ꓮ. ꓡꓴꓽ ꓫꓬ, ꓛꓵꓽ ꓔꓯ ꓠꓬ ꓮꓢꓲꓮ ꓗꓴꓷꓼ ꓐꓴ ꓗꓪ ꓔꓶ ꓢꓲ ꓜꓽ ꓔꓬ ꓟ ꓢꓲ, ꓢꓶꓽ ꓕꓲ ꓙꓰꓽ ꓥꓳ꓿ ꓟꓬ‐ꓟ ꓗꓴꓷꓼ ꓗꓪ ꓠꓬ ꓮ. ꓡꓴꓽ ꓫꓬ, ꓛꓵꓽ ꓔꓯ. ꓡꓯ ꓓ, ꓕꓯ ꓚꓬ. ꓜꓽ꓾ ꓞꓴꓻ ꓜꓽ꓾ ꓡꓱ ꓜꓽ ꓢꓲ ꓠꓬꓲ꓾ ꓬꓲ ꓢꓶꓽ ꓟꓳꓽ ꓡˍ ꓠꓬ ꓮ. ꓡꓴꓽ ꓛ, ꓞꓲꓽ꓾ ꓖꓳ ꓓꓱꓽ ꓞꓲꓽ ꓓꓴ ꓬꓰˍ ꓟ ꓥ ꓡꓳ꓿
ꓬꓲ ꓢꓶꓽ ꓕꓱ ꓟ ꓗꓪ ꓚꓮꓣꓐꓳꓧꓔꓓꓣꓮꓔꓰ ꓐꓰ ꓦꓲꓔꓮꓟꓲꓠ (ꓮ) ꓡꓰꓽ ꓟꓽ ꓞꓲ ꓑꓳꓔꓮꓢꓢꓲꓴꓟ꓾ ꓟꓮꓠꓖꓮꓠꓰꓢꓰ꓾ ꓚꓳꓑꓑꓰꓣ꓾ ꓦꓲꓔꓮꓟꓲꓠ ꓐ6꓾ ꓦꓲꓔꓮꓟꓲꓠ ꓚ ꓐꓴ ꓥˍ ꓟꓲ ꓓꓯ,ˍ ꓟ ꓥ ꓡꓳ꓿ ꓮꓠꓔꓲꓳꓫꓲꓓꓮꓠꓔ ꓐꓴ꓾ ꓦꓲꓔꓮꓟꓲꓠ ꓢꓯꓼ꓾ ꓪꓳꓽ ꓒꓬꓽ ꓢꓯꓼ ꓐꓰ ꓬꓲ ꓞꓶꓻ ꓢꓯꓼ꓾ ꓟꓲꓠꓰꓣꓮꓡ ꓢꓯꓼ ꓐꓴ ꓓꓯ,ˍ ꓟ ꓮ. ꓡꓴꓽ ꓫꓬ, ꓛꓵꓽ ꓠꓬ ꓮ ꓟꓬ, ꓚꓱ, ꓗꓪ ꓣꓱꓽ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓧꓪꓽ ꓗꓴ, ꓙꓲꓻ ꓗꓪ ꓳʼˍ ꓟ ꓔꓯ ꓓꓻ ꓡꓰ ꓝꓲ ꓠ, ꓟ ꓐꓱ ꓧꓪꓽ ꓗꓴ, ꓙꓲ ꓗꓪ ꓙꓳˍ ꓟ ꓬꓲ ꓓꓳꓼ ꓣꓴ ꓓꓳ ꓠ, ꓟ ꓐꓱ ꓶ ꓮ. ꓡꓴꓽ ꓫꓬ, ꓛꓵꓽ ꓬꓲ ꓧꓶꓽ ꓔꓯ ꓒꓬꓱꓽ ꓟꓬ ꓟꓲ ꓓꓴ ꓐꓴ ꓗꓪ ꓣꓱꓽˍ ꓡꓳ꓾ ꓐꓰˍ ꓟꓲ ꓢꓷ. ꓪ ꓡꓳ꓿ ꓤ ꓟꓶ ꓤ ꓐꓴ ꓐꓱ ꓶ ꓫꓵꓽ ꓬꓲꓻ ꓚꓳˍ ꓟ ꓗꓪˍ ꓟꓲ ꓬꓰ ꓙ ꓔꓳ, ꓙ ꓖꓶˍ ꓡꓳ꓿ ꓤ ꓠꓱ ꓤ ꓙꓳˍ ꓟ ꓟ, ꓟ ꓐꓴ ꓥ ꓟꓲ ꓮ ꓚꓵ, ꓬꓲꓻ ꓮ ꓟꓬ, ꓓꓳꓻ ꓡ ꓠ ꓬꓰ ꓙ ꓖꓶˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓮ. ꓡꓴꓽ ꓫꓬ, ꓛꓵꓽ ꓬꓲ ꓙꓲꓻ ꓖꓴ ꓐꓴ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓞꓰꓻ ꓡꓰ ꓬꓯꓼ ꓡꓰ ꓝꓲ ꓢꓲ ꓠꓬꓲ ꓓꓯꓸꓼ‐ꓚꓧꓳˍ ꓟ ꓔꓯ ꓗꓽ ꓙ ꓖꓶˍ ꓟ ꓡꓰꓽ ꓟꓽ ꓞꓲ꓾ ꓖꓳ ꓓꓱꓽ ꓗꓪ ꓟ ꓬꓲ ꓞꓶꓻ ꓔꓯ ꓙꓲꓺ ꓡꓰ ꓝꓲ ꓢꓲ ꓖꓳ ꓓꓱꓽ ꓘꓴꓽ ꓗꓪ ꓙꓳˍ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓮ. ꓡꓴꓽ ꓫꓬ, ꓛꓵꓽ ꓠꓬ ꓟꓬ ꓢꓶꓽ ꓐꓱ ꓶ ꓙꓲˍ ꓡꓳ꓿
ꓮ. ꓡꓴꓽ ꓫꓬ, ꓛꓵꓽ ꓗꓪ ꓓꓵˍ ꓟ ꓦꓲꓔꓮꓟꓲꓠ(ꓮ) ꓪꓴ. ꓠꓬꓲ ꓟꓬ ꓢꓶꓽ ꓐꓰ ꓗꓴ. ꓙꓲꓽ ꓙꓳˍ ꓟ ꓫꓵꓽ ꓪꓴ ꓐꓴ ꓔꓯ ꓠꓲ. ꓡꓰ ꓝꓲ꓾ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓠꓲ, ꓟ ꓐꓱ ꓶ ꓥˍ ꓟꓲ ꓙꓲˍ ꓟ ꓥ ꓡꓳ꓿ ꓦꓲꓔꓮꓟꓲꓠ (ꓮ) ꓪꓴ. ꓠꓬꓲ ꓟꓽ ꓙꓲꓻ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓐꓰ ꓔꓣꓲꓖꓡꓬꓚꓰꓣꓲꓓꓰꓢ ꓔꓯ ꓠꓲ. ꓡꓰ ꓝꓲˍ ꓟ ꓑꓶ. ꓓꓴ ꓠꓲ, ꓟ ꓠꓻ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓢꓰ,‐ꓛꓬꓳ ꓠꓻ ꓔꓯ ꓗꓽ ꓙ ꓖꓶˍ ꓡꓳ꓿ ꓟꓮꓠꓖꓠꓰꓢꓰ ꓠꓬ ꓜꓽ ꓓꓴ ꓙꓲꓺ ꓖꓶˍ ꓟ ꓰꓠꓜꓬꓟꓰ ꓐꓴ ꓔꓯ ꓣꓴ ꓓꓳ ꓖꓶˍ ꓟ ꓗꓪ ꓣꓱꓽ ꓬꓯꓼˍ ꓟ ꓖꓡꓴꓚꓳꓠꓰꓳꓖꓰꓠꓰꓢꓲꓢ ꓰꓠꓜꓬꓟꓰ ꓟꓬꓱꓽ ꓬꓰ ꓚꓱ, ꓐꓱ ꓶ ꓣꓱꓽ ꓬꓯꓼˍ ꓡꓳ꓿ ꓟꓮꓖꓠꓰꓢꓰ ꓠꓬ ꓲꓠ‐ꓢꓴ‐ꓡꓲ ꓣꓴ ꓦˍ ꓟ ꓗꓪ ꓬꓰ ꓙ ꓖꓶ ꓢꓲ ꓟꓲꓔꓳꓚꓧꓧꓳꓠꓓꓣꓲꓮꓡ ꓟꓬꓱꓽ ꓬꓰ ꓚꓱ, ꓔꓯ ꓢꓯꓼ ꓡꓴꓽ ꓖꓶ ꓐ ꓡˍ ꓡꓳ ꓐꓰ ꓠꓯꓻ ꓞꓲꓼ ꓔꓯ ꓟꓳ. ꓟꓰ, ꓠꓬꓲ ꓧꓪ ꓠꓬꓲ ꓓꓴ ꓐꓴ ꓡꓰ ꓖꓴ ꓟꓳ. ꓖꓶ ꓔ ꓡꓳ꓿
ꓬꓲ. ꓝꓲ. ꓬꓲ ꓟꓲ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿ ꓮ. ꓡꓴꓽ ꓫꓬ, ꓛꓵꓽ ꓗꓪ ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓬꓲ ꓢꓯꓼ ꓙꓳˍ ꓟ ꓚꓳꓑꓑꓰꓣ ꓢꓯꓼ ꓪꓴ. ꓠꓬꓲ ꓬꓲ ꓝꓲ. ꓳʼ ꓠꓻˍ ꓐꓰ ꓗꓴ. ꓙꓲꓽ ꓙꓳˍ ꓟ ꓗꓳ,ˍ ꓟ꓾ ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿
ꓫꓵꓽ ꓢꓯꓼ ꓔꓯ ꓥ ꓟꓲ ꓡꓴꓽ ꓖꓶˍ ꓡꓳ꓿ ꓮ. ꓡꓴꓽ ꓫꓬ, ꓛꓵꓼ ꓗꓪ ꓓꓯ,ˍ ꓟ ꓦꓲꓔꓮꓟꓲꓠ ꓐ6 ꓠꓬ ꓫꓵꓽ ꓘꓴꓽ ꓗꓪ ꓟ ꓧꓰꓟꓳꓖꓡꓳꓐꓲꓠ ꓔꓯ ꓮ ꓟꓬ, ꓓꓳ ꓡ ꓝꓲ ꓢꓲ ꓫꓵꓽ ꓢꓯꓼ ꓙꓳ ꓡ ꓝꓲˍ ꓟ ꓥ ꓡꓳ꓿
ꓧꓪꓽ ꓗꓴ, ꓙꓲ ꓐꓱ ꓶ ꓥˍ ꓟꓲ ꓙꓲꓻˍ ꓡꓳ ꓐꓰ ꓢꓷ. ꓪˍ ꓡꓳ꓿ ꓦꓲꓔꓮꓟꓲꓠ ꓚ ꓠꓬ ꓧꓪꓽ ꓗꓴ, ꓙꓲ ꓐꓱ ꓶ ꓙꓲꓻˍ ꓟ ꓥ ꓢꓲ ꓧꓪꓽ ꓗꓴ, ꓙꓲ ꓙꓴ ꓡꓰˍ ꓟ꓾ ꓬꓲ ꓚꓱ, ꓓꓳ ꓡˍ ꓟ꓾ ꓬꓲ ꓞꓲꓼ ꓟꓽ ꓙꓳ ꓡ ꓕꓯ ꓡꓰꓽ ꓟꓳꓽ ꓡꓰ ꓟ ꓔꓯ ꓗꓽ ꓙ ꓖꓶˍ ꓡꓳ꓿ ꓦꓲꓔꓮꓟꓲꓠ ꓚ ꓠꓬ ꓧꓪꓽ ꓘꓴ.꓾ ꓧꓪꓽ ꓗꓴ, ꓙꓲ꓾ ꓫꓵꓽ ꓙꓴꓽ ꓐꓰ ꓬꓲ ꓙꓴꓽ ꓐꓱ ꓶ ꓣꓱꓽ ꓬꓯꓼˍ ꓟ ꓑꓣꓳꓔꓰꓲꓠ ꓢꓯꓼ ꓓꓳ ꓡ ꓠ ꓬꓰˍ ꓟ ꓣꓱꓽ ꓞ, ꓟ ꓥ ꓡꓳ꓿ ꓝꓮꓲ ꓕꓲ ꓚꓱ, ꓠꓬ ꓬꓲ ꓑꓺ ꓟꓲ ꓡꓰ ꓢꓻˍ ꓟ ꓥ ꓡꓳ꓿
ꓪꓴ. ꓓꓵ ꓕꓲꓽ ꓐꓶ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿ ꓮ. ꓡꓴꓽ ꓫꓬ, ꓛꓵꓽ ꓗꓪ ꓙꓳˍ ꓟ ꓟꓮꓖꓠꓰꓢꓲꓴꓟ ꓠꓬ ꓪꓴ. ꓓꓵ ꓕꓲꓽ ꓐꓶ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿ ꓟꓮꓖꓠꓰꓢꓲꓴꓟ ꓠꓬ ꓖꓳ ꓓꓱꓽ ꓘꓴꓽ ꓗꓪ ꓟ ꓠꓰꓴꓣꓳꓔꓣꓮꓠꓢꓟꓲꓔꓔꓰꓣꓢ ꓐꓴ ꓔꓯ ꓔꓲꓺ ꓟꓴ. ꓗꓷ ꓡꓰ ꓠ ꓬꓰˍ ꓟ ꓗꓪ ꓬꓰ ꓙ ꓖꓶˍ ꓟ ꓑꓶ. ꓓꓴ ꓮ ꓟꓶ ꓟ ꓡꓰ ꓬꓲ ꓢꓯꓼ ꓙꓳˍ ꓟ ꓥ ꓡꓳ꓿
ꓪꓴ. ꓠꓶ. ꓐꓱ ꓶ ꓥˍ ꓟꓲ ꓟꓬꓽ ꓠꓬꓲ ꓬꓰ ꓙ ꓔꓳ, ꓙ ꓖꓶ ꓐ ꓡˍ ꓡꓳ꓿ ꓪꓴ. ꓠꓶ. ꓟꓬꓱꓽ ꓬꓰ ꓚꓱ, ꓪ ꓜꓲ ꓙꓲꓻ ꓡ ꓠ, ꓟ ꓐꓰ ꓶ ꓳꓫꓬꓖꓰꓠ ꓣꓱꓽ ꓞ,ˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓜꓲꓠꓚ ꓢꓯꓼ ꓡꓳꓼ ꓠ ꓛꓲ ꓟꓽ ꓙꓳ ꓕꓯ ꓠꓽ ꓪꓴ. ꓠꓶ. ꓗꓪ ꓳꓫꓬꓖꓰꓠ ꓛꓲ ꓬꓰ ꓟꓽ ꓐ ꓡ꓿ ꓖꓳ ꓟ ꓑꓶ. ꓓꓴ ꓜꓲꓠꓚ ꓢꓯꓼ ꓠꓲ.ˍ ꓟ ꓠꓬ ꓫꓵꓽ ꓢꓯꓼ ꓠꓲ. ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ ꓠꓲ, ꓟ ꓢꓴꓼ ꓢꓼˍ ꓟ꓾ ꓠꓲ, ꓟ ꓦꓶ ꓡꓰ ꓢꓻˍ ꓟ꓾ ꓮ ꓫꓵꓽ ꓔꓯ ꓥ ꓟꓲ ꓢꓳ ꓣꓴ ꓟꓽ ꓐ ꓡ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓝꓲ ꓗꓴ.ˍ ꓡꓳ꓿ ꓮ ꓡꓴꓽ ꓫꓬ, ꓛꓵꓽ ꓗꓪ ꓠꓬ ꓜꓲꓠꓚ ꓢꓯꓼ ꓮ ꓟꓬ, ꓙꓳˍ ꓟ ꓪꓴ. ꓠꓬꓲ ꓜꓽ ꓖꓶ ꓠ ꓔ ꓟ ꓥ ꓡꓳ꓿
ꓟꓬ‐ꓟ ꓠꓯꓻ ꓞꓲꓼ ꓕꓳꓽ ꓶ ꓗꓪ ꓮ. ꓡꓴꓽ ꓫꓬ, ꓛꓵꓽ ꓠꓬ ꓛꓵˍ ꓡꓳ꓾ ꓡꓬˍ ꓡꓳ꓾ ꓬꓲ ꓝꓲ ꓔꓯ ꓧꓪ. ꓡꓰˍ ꓡꓳ꓿ ꓛꓶꓽ ꓚꓵ.ˍ ꓟ ꓐꓰ ꓢꓯꓼ ꓦ ꓚ ꓐꓰ ꓗꓴ. ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓮ. ꓡꓴꓽ ꓫꓬ, ꓛꓵꓽ ꓗꓪ ꓬꓲ ꓛꓵ ꓢꓶꓽ ꓐꓰ ꓬꓲ ꓘꓪꓽ ꓢꓶ ꓐꓯ ꓢꓲ ꓙꓳˍ ꓟ ꓥ ꓡꓳ꓿
