ꓘꓴ ꓜꓲꓼ ꓞꓳ ꓢ-ꓢꓲ-ꓠ ꓟꓬꓱꓽ ꓬꓰ ꓔꓶꓸ ꓗꓪ ꓟꓬꓱꓽ ꓬꓰ ꓢꓯꓼ ꓕꓵꓼ ꓢꓴ ꓒꓬꓱꓼ ꓡꓰ ꓝꓲ꓾
ꓔꓲꓺ ꓒ ꓪ ꓔꓲ ꓡꓰ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓔꓯ ꓣꓳ ꓮ ꓙꓵ ꓠꓬ ꓢ-ꓢꓲ-ꓠ ꓬꓰ_ ꓟ ꓟꓬꓱꓽ ꓗꓪ ꓘꓴ ꓟꓶ ꓢꓴ ꓐꓴ ꓥ ꓡꓳ꓾ ꓐꓯ_ ꓟ ꓔꓯ ꓟꓳꓸ ꓙꓵꓻ ꓠꓲꓹ ꓚꓱꓹ ꓗꓪ ꓐꓰ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓤꓶꓻ ꓗꓪ ꓢꓷꓸ ꓙ ꓟꓳ ꓙ ꓢꓴ ꓒꓬꓱꓼ ꓡꓰ ꓢꓴ ꓗꓷ ꓡꓰ ꓠꓹ ꓟ ꓢꓯꓼ ꓖꓶ ꓔ ꓡꓳ=
7 ꓦ ꓟ 6 ꓠꓬꓲ ꓠꓽ ꓦꓬꓼ ꓠꓬꓲ ꓕꓯ ꓢꓲ ꓫꓬ ꓕꓳ ꓶ ꓡꓴ-ꓘ ꓕꓳ ꓶ ꓗꓪ ꓐꓰ ꓘꓴ ꓜꓲꓼ ꓞꓳ ꓠꓬ ꓢ-ꓢꓲ-ꓠ ꓬꓰ ꓠꓹ ꓟ ꓬꓲ ꓚꓱꓹ ꓥ ꓟ ꓔꓯ ꓔꓱꓹ ꓕ ꓖꓶ_ ꓡꓳ=
ꓝꓲ ꓓꓴ ꓕꓳ ꓶ ꓗꓪ ꓝꓲ ꓓꓴ ꓐꓴ 72 ꓣꓳ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓝꓲ ꓩꓴ ꓗꓷ ꓟ ꓚꓱꓹ ꓔꓯ ꓟꓳꓸ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓥꓳ ꓡꓳꓸ ꓓꓴ ꓠꓬ ꓞꓳ ꓫꓵ ꓮ ꓙꓵ ꓐꓱ ꓶ ꓥ ꓡꓳ ꓐꓰ ꓬꓲ ꓔꓶꓻ ꓙꓱꓼ ꓥ ꓟ꓾ ꓫ ꓠꓹ ꓟ ꓜ ꓪꓳꓽ ꓡꓳ ꓪꓳꓽ ꓮ ꓟꓬꓹ ꓙꓳ_ ꓡꓳ= ꓟꓬꓱꓽ ꓬꓰ ꓢꓴ ꓠꓬ ꓮ ꓘꓶꓸ ꓟꓽ ꓔꓬ꓾ ꓕꓱ ꓟꓲ ꓠꓯ ꓠꓬ ꓐꓬ ꓡꓰ ꓟ꓾ ꓫꓸ ꓓꓴ ꓟꓷꓼ ꓓꓴ ꓐꓰ ꓐꓲ ꓞꓹ ꓔꓬ ꓥ ꓟꓲ ꓟꓲ ꓠꓯ ꓡ ꓞꓳ ꓐꓴ ꓠꓬ ꓔꓱꓹ ꓟ ꓔꓯ ꓠꓲꓹ ꓫꓵ_ ꓟ꓾ ꓢꓲ ꓡꓲꓹ ꓟ ꓔꓯ ꓡꓰ ꓧꓪ ꓔꓬ ꓟ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓔꓯ ꓠꓲꓹ ꓫꓵ_ ꓡꓳ ꓐꓯ_ ꓟ ꓬꓲ ꓚꓱꓹ ꓥ ꓡꓳ=
ꓪꓴ-ꓢ ꓠꓬ ꓠꓲꓹ ꓡꓱ ꓢꓴ ꓜ ꓫꓵꓸ ꓫꓵꓸ ꓢꓴ ꓥ ꓡꓳ= ꓕꓲ ꓞꓲꓼ ꓕꓲ ꓑ ꓚꓬꓴ ꓙ ꓟ꓾ ꓐꓲ ꓞꓲꓼ ꓟ ꓤꓶꓻ꓾ ꓕꓲ ꓞꓲꓼ ꓕꓲ ꓑ ꓕꓷ ꓞꓹ ꓟ ꓔꓯ ꓥꓳ ꓡꓳꓸ ꓟ ꓠꓲꓹ ꓟ ꓔꓯ ꓟꓲ ꓠꓯ ꓡ ꓞꓳ ꓐꓴ ꓠꓲꓹ ꓟ ꓘꓴꓽ ꓗꓪ ꓬꓲꓸ ꓒꓵꓽ ꓟꓽ ꓣꓴ ꓫꓵꓸ ꓖꓶ ꓔ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓲ ꓟꓬ ꓢꓶꓽ ꓗꓪ ꓐꓰ ꓓꓵꓽ ꓙ ꓢꓪꓼ ꓗꓴꓸ_ ꓟ ꓡ ꓞꓳ ꓕꓲ ꓐꓱ ꓡꓰ ꓕꓱ ꓫ ꓠꓹ ꓟ ꓐꓱ ꓶ ꓙꓲ_ ꓟ ꓬꓲ ꓫꓵꓸ ꓔꓯ ꓫꓵꓸ ꓐ ꓡ ꓡꓳ=
ꓠꓴ ꓪ ꓙꓵꓻ ꓠꓲꓹ ꓠꓬ ꓬꓲꓸ ꓐ ꓗꓪ ꓕꓳꓹ ꓠꓷꓼ ꓔ ꓟ ꓢꓷꓸ ꓡꓰ ꓓꓴ ꓕꓲ ꓟ ꓡꓰ ꓗꓷ ꓡꓰ ꓟꓽ ꓓ꓾ ꓟꓲ ꓠꓯ ꓐꓰ ꓘꓴ ꓜꓲꓼ ꓞꓳ ꓢ-ꓢꓲ-ꓠ ꓠꓬ ꓣꓳ ꓔꓬ ꓢ ꓕꓯ ꓢꓲ꓾ ꓬꓲ ꓙꓵꓹ ꓙꓳ ꓕꓯ ꓢꓲ ꓣꓳ ꓢꓯꓼ ꓕꓵꓼ ꓐ ꓠꓹ ꓟ ꓙꓵꓻ ꓠꓲꓹ ꓔꓯ ꓟꓽ ꓣꓱ ꓬꓯꓼ ꓟ ꓥꓳ= ꓕꓲ ꓖ ꓡꓲ ꓕꓲ ꓖ ꓗꓪ ꓪꓴ-ꓢ ꓟꓴ ꓗꓪ ꓗꓴꓷꓼ ꓔꓯ ꓢꓷꓸ ꓙ ꓳ ꓙ ꓢꓲ ꓠꓲꓹ ꓠꓵꓻ ꓟ ꓠꓲꓹ ꓟ ꓐꓰ ꓛꓳ ꓫꓱꓽ ꓡ ꓢꓴ ꓐꓴ ꓢ-ꓢꓲ-ꓠ ꓟꓬꓱꓽ ꓗꓪ ꓠꓲꓹ ꓡꓱ ꓢꓯꓼ ꓕꓵꓼ ꓢꓴ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓡꓰ ꓣꓱ ꓬꓯꓼ ꓟ ꓥꓳ=
ꓘꓴ ꓜꓲꓼ ꓞꓳ ꓕꓲ ꓒꓳꓹ ꓗꓪ ꓣꓳ ꓓꓵꓽ ꓙ ꓠꓲꓹ ꓑꓶ ꓓꓴ ꓐ ꓡ ꓢꓴ꓾ ꓘꓴ ꓜꓲꓼ ꓞꓳ ꓑꓮꓲ ꓗꓪ ꓡꓰ ꓐ ꓡ ꓢꓴ ꓟꓬ ꓡ ꓢꓲ ꓠꓬꓲ ꓪꓴ-ꓢ ꓢ-ꓢꓲ-ꓠ ꓦ ꓟꓲ ꓗꓪ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓫ ꓠꓹ ꓟ ꓟꓬꓱꓽ ꓬꓰ ꓢꓴ ꓮ ꓘꓶꓸ ꓟꓽ ꓔꓬ ꓟ ꓔꓯ ꓐꓯ ꓔ ꓡꓳ=
ꓢ-ꓢꓲ-ꓠ ꓔꓯ ꓮ ꓡꓰ ꓐꓰ ꓠꓬꓲꓸ ꓠꓸ ꓠꓹ ꓟ꓾ ꓮ ꓡꓰ ꓐꓰ ꓣꓱ ꓠꓹ ꓟ ꓐꓯ ꓟ theory ꓣꓳ ꓓꓵꓽ ꓙ ꓚꓱꓹ ꓮ ꓘꓶꓸ ꓟꓽ ꓣꓱ ꓬꓯꓼ꓾ ꓚꓵ ꓚꓵ ꓣꓱ ꓬꓯꓼ ꓟ ꓠꓬ ꓪꓴ-ꓢ ꓐꓰ ꓠꓶꓽ ꓞꓹ ꓢꓴ꓾ ꓪꓽ ꓘꓴ ꓟ ꓗꓪ ꓪꓴ-ꓢ ꓣꓱ ꓛꓰ ꓔꓯ ꓧꓪ ꓢꓴ ꓐꓴ ꓟꓬ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓠꓹ ꓟ ꓣꓱ ꓬꓯꓼ ꓟ ꓥꓳ=
ꓘꓴ ꓜꓲꓼ ꓞꓳ ꓢ-ꓢꓲ-ꓠ ꓟꓬꓱꓽ ꓗꓪ ꓟꓴ ꓗꓪ ꓗꓴꓷꓼ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶ ꓝꓲ ꓩꓴ ꓠꓹ ꓟ ꓗꓼ ꓗꓷ ꓡꓰ ꓢꓴ ꓔꓱꓹ ꓔꓱ ꓐꓰ ꓟꓬꓱꓽ ꓬꓰ ꓢꓴ ꓒꓬꓱꓼ ꓡ ꓢꓴ ꓐꓴ ꓔꓯ ꓕꓵꓼ ꓪ ꓖꓶ ꓠꓹ ꓟ ꓡꓰ ꓣꓱ ꓬꓯꓼ ꓡꓳ=
ꓟꓹ ꓟ ꓟ-ꓡꓲ ꓠꓬ ꓣꓳ ꓮ ꓙꓵ ꓐꓱ ꓶ ꓚꓬꓴ ꓙ ꓟ ꓟꓬꓱꓽ ꓗꓪ ꓐ ꓠꓹ ꓟ ꓬꓲ ꓡꓰ ꓬꓰꓢ ꓐꓰ ꓐꓯ ꓔ ꓟ ꓡꓰ ꓐꓰ ꓬꓲ ꓡꓰ ꓠꓬꓲꓽ ꓗꓳꓸ ꓚꓸ ꓗꓪ ꓪꓽ ꓘꓴ ꓶꓽ ꓓꓰꓽ ꓖꓶ ꓢꓲ ꓠꓬꓲ ꓣꓳ ꓮ ꓙꓵ ꓥ ꓟꓲ ꓪꓴ-ꓢ ꓟꓴ ꓗꓪ ꓗꓴꓷꓼ ꓐꓱ ꓶ ꓗꓹ ꓛꓲ_ ꓟ ꓟꓬꓱꓽ ꓬꓰ ꓢꓴ ꓒꓬꓱꓼ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓡꓰ ꓐꓰ ꓢꓯꓼ ꓖꓶ ꓔ ꓡꓳ=
