ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓟꓲ‐ꓚꓲ‐ꓠ ꓢ‐ꓢꓲ‐ꓠ꓾ ꓡ‐ꓫꓲꓳ ꓢ‐ꓢꓲ‐ꓠ꓾ ꓐꓰ ꓐ‐ꓟꓳ ꓢ‐ꓢꓲ‐ꓠ ꓗꓪ ꓐꓰ ꓔꓲꓺ ꓒ ꓓꓽ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓯꓼ ꓖꓶ ꓪꓽ ꓖꓶ ꓘꓶꓽ ꓫ ꓕꓱ ꓗꓷ ꓟ꓾
7 ꓦ ꓟ 8. ꓠꓬꓲ 2025 ꓘꓳꓼ ꓕꓯ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓟꓲ‐ꓚꓲ‐ꓠ ꓢ‐ꓢꓲ‐ꓠ꓾ ꓡ‐ꓫꓲꓳ ꓢ‐ꓢꓲ‐ꓠ꓾ ꓐꓰ ꓐ‐ꓟꓳ ꓢ‐ꓢꓲ‐ꓠ ꓗꓪ ꓐꓰ ꓔꓲꓺ ꓒ ꓓꓽ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓯꓼ ꓖꓶ ꓪꓽ ꓖꓶ ꓘꓶꓽ ꓖꓶ ꓗꓷꓳ ꓐꓰ ꓢꓷ. ꓪ ꓡꓳ꓿ ꓔꓲꓺ ꓒ ꓓꓽ ꓐꓴ ꓡꓰ ꓠꓲ, ꓠꓵ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓢꓲ ꓡꓲ, ꓟ ꓠꓴ ꓪ ꓮ ꓙꓵꓽ ꓢꓴ ꓘꓳ, ꓣꓴ ꓪ ꓝꓲ ꓐꓰ ꓒꓵꓽ ꓗ, ꓫ. ꓕꓱ ꓗꓷ ꓟ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓟꓵꓽ ꓗꓳ ꓓꓵ ꓓꓵ ꓗꓪ ꓟꓵꓽ ꓘꓳꓼ ꓒꓳ, ꓟ ꓑꓶ. ꓓꓴ ꓑ ꓫꓬ ꓐꓴ ꓮ ꓟꓬ, ꓫ. ꓙꓵ ꓟꓷꓼ ꓙꓵ ꓓꓴ ꓔꓳ, ꓜꓳ ꓔꓬ ꓟ ꓐꓰ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓪꓴ. ꓠꓬꓲ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓫ. ꓓꓴ ꓟꓷꓼ ꓓꓴ ꓐꓰ ꓠꓻ ꓫꓵꓽ ꓠ ꓙꓰ ꓮ ꓟꓬ, ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓖꓳ ꓟ ꓡꓰ ꓐꓰ ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓥ ꓟꓲ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓬꓲ ꓙꓵ, ꓟꓶ ꓫꓵˍ ꓡꓰ ꓟ ꓟꓲ ꓥ ꓡꓳ꓿ ꓗꓳ. ꓗꓷ ꓟ ꓡꓲ ꓘꓳꓼ ꓘꓴꓽ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓪꓴ. ꓠꓬꓲ ꓑ ꓫꓬ ꓐꓴ ꓝꓴꓲ ꓟꓽ ꓙꓳ ꓢꓴ ꓮ ꓟꓬ, ꓫꓵꓻ ꓡꓰ ꓟ ꓐꓰ ꓑ ꓫꓬ ꓐꓴ ꓔꓬ ꓦꓲꓻ ꓙꓱꓽ ꓤ ꓐꓴ ꓝꓮꓲ ꓟꓵꓽ ꓮ ꓟꓬ, ꓥ ꓟꓲ ꓐꓬ ꓡꓰ ꓟ ꓟꓶ ꓡꓰ ꓟ ꓔꓯ ꓔꓳ, ꓜꓳ ꓡꓰ ꓟ ꓥ ꓡꓳ꓿
ꓗꓴꓷꓼ ꓘꓴꓽ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓑ ꓫꓬ ꓐꓴ ꓮ ꓟꓬ, ꓠꓬ ꓟꓯꓼ ꓘꓰ, ꓔꓶ. ꓗꓪ ꓔꓬ ꓠ ꓗꓷ ꓡꓰ ꓟ ꓥ ꓡꓳ꓿ ꓑ ꓫꓬ ꓕꓲ ꓐꓱ ꓠꓬ ꓚꓲ. ꓛꓬ ꓢꓯꓼ ꓟꓬ ꓐꓱ ꓶ ꓓꓵ ꓙ ꓫ. ꓟ ꓐꓰ ꓤ ꓠꓱ ꓤ ꓐꓴ ꓐꓱ ꓶ ꓟꓲ ꓠꓯ ꓢꓷ. ꓠꓲ, ꓢꓳꓻ ꓠ, ꓟ ꓫ. ꓓꓴ ꓮ ꓟꓬ, ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓑ ꓫꓬ ꓐꓴ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓙꓵ, ꓗꓪ ꓗꓳ. ꓗꓷ ꓟ 3 ꓦ ꓟ (28) ꓠꓬꓲ 2025 ꓘꓳꓼ ꓕꓯ ꓬꓲ ꓢꓯꓼ ꓮ ꓟꓬ, ꓙꓳˍ ꓟ ꓟꓵꓽ ꓙꓴꓽ ꓚꓵ, ꓗꓷ ꓟ ꓪꓴ. ꓠꓬꓲ ꓑ ꓫꓬ ꓐꓴ ꓮ ꓟꓬ, ꓫꓵꓻ ꓡꓰ ꓟ ꓐꓰ ꓠꓻ ꓓꓴ ꓡꓰ ꓢꓴ ꓑ ꓫꓬ ꓐꓴ ꓮ ꓟꓬ, ꓔꓬ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓟꓵꓽ ꓙꓴꓽ ꓚꓵ, ꓗꓷ ꓟ ꓑꓶ. ꓓꓴ ꓑ ꓫꓬ ꓔꓬ ꓦꓲꓻ ꓢꓳꓻ ꓦꓲꓻ ꓮ ꓟꓬ, ꓠꓬ ꓐꓬ ꓡꓰ ꓓꓴ ꓔꓳ, ꓜꓳ ꓡꓰ ꓟ ꓥ ꓡꓳ꓿
ꓕꓱ ꓡꓱ ꓫꓵꓽ ꓒꓬꓱꓼ ꓡ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓠꓲ, ꓟ ꓫ. ꓓꓴ ꓙꓳ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓟꓲ ꓠꓯ ꓗꓪ ꓫ. ꓓꓴ ꓟꓷ ꓓꓴ ꓙꓳ ꓡ ꓕꓯ ꓬꓲ ꓔꓯ ꓙꓵꓻ ꓠ, ꓟ ꓐꓰ ꓬꓲ ꓠꓯꓼ ꓗꓪ ꓡ ꓠ, ꓟ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿
ꓬꓳ‐ꓦ 14ꓽ1) ꓝꓲ. ꓗꓪ ꓠꓴ ꓪ ꓠꓲ, ꓟ ꓕꓽ ꓫ꓿ ꓪꓴ‐ꓢ ꓔꓯ ꓙꓵꓻ꓾ ꓥꓪ ꓔꓯˍ ꓟꓲ ꓙꓵꓻ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓝꓮꓲ (ꓟ‐ꓕꓲ 16ꓽ24 ) ꓝꓲ. ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓮꓽ ꓟ ꓥꓪ ꓔꓯ ꓛꓳ ꓠꓲ, ꓫꓵˍ ꓠꓬꓲ ꓚꓲ. ꓛꓬ ꓙꓲ ꓖꓴ ꓡꓳ ꓗꓷ ꓢꓲ꓾ ꓬꓲ ꓡꓯꓼ ꓐꓳ ꓔꓶ. ꓓꓴ ꓑꓱ. ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓡ ꓠꓯ, ꓡꓳ ꓐꓰ ꓐꓯ ꓔ ꓡꓳ꓿
ꓮ ꓘꓶ. ꓛꓲ ꓠꓲ, ꓟ ꓫ. ꓓꓴ ꓐꓰ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓥ ꓟꓲ ꓪꓴ‐ꓢ ꓔꓯ ꓪꓽ ꓘꓴ ꓢꓲ ꓠꓬꓲ ꓣꓳ ꓢꓯ. ꓔꓬ ꓠꓬ ꓠꓲ, ꓫ. ꓟꓬ ꓫ. ꓓꓴ ꓔꓯ ꓔꓳ, ꓧꓪ. ꓡꓰ ꓠ, ꓟ ꓢꓯꓼ ꓪ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓡ ꓓꓴ ꓥꓳ꓿ ꓣꓳ ꓬꓰ ꓠ, ꓟ ꓟꓬꓱꓽ ꓔꓯ ꓠꓲ, ꓟ ꓟꓽ ꓐꓬ ꓡꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
(2 ꓘꓳ‐ꓡꓱ‐ꓕꓴ 4ꓽ8‐9) ꓝꓲ. ꓗꓪ ꓥꓪ ꓠꓴꓽ ꓠꓬ ꓮ ꓟꓬ, ꓒꓳ, ꓗꓪ ꓫ. ꓙꓵˍ ꓟ ꓔꓳ, ꓜꓳꓽ ꓥ ꓟꓲ꓾ ꓠꓲ, ꓗꓷ, ꓟꓬ ꓗꓷ, ꓠꓬꓲ ꓟꓽ ꓗꓷ ꓡꓰ꓿ ꓓꓵ ꓙ ꓪꓴꓽ ꓧꓶꓻ ꓟꓲ ꓥꓳ ꓡꓳ. ꓓꓴ ꓒꓲꓼ ꓬꓰ ꓠ ꓛꓲ ꓟꓽ ꓗꓷ ꓡꓰ꓿ ꓗ. ꓧꓪ ꓟꓶˍ ꓟꓲ ꓒꓰ ꓗꓷ ꓟꓶˍ ꓟ ꓟꓽ ꓥ꓿ ꓓꓶꓽ ꓓꓳꓽ ꓡꓰ ꓟꓲ ꓟꓽ ꓐꓬ ꓡꓰ ꓐꓰ ꓐꓳ ꓔ ꓟ ꓔꓯ ꓢꓯꓼ ꓪ ꓣꓴ ꓠ, ꓟ ꓢꓯꓼ ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓲ, ꓠꓵ ꓟ ꓙꓲ‐ꓢꓴ ꓢꓲꓺ ꓤ ꓐꓴꓳ꓾ ꓠꓲ, ꓟ ꓐꓬ ꓡꓰ ꓓꓴ ꓟꓽ ꓙꓳ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓐꓯ ꓔ ꓟ ꓕꓲ ꓞꓲꓼ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓙ ꓢꓲ ꓠꓬꓲ ꓣꓳ ꓬꓰ ꓐ ꓡ ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓢꓲ ꓠꓬꓲ ꓬꓰ ꓠ, ꓟ ꓔꓲꓺ ꓒ ꓓꓽ ꓐꓴ ꓡꓰ ꓢꓯꓼ ꓖꓶ ꓔ ꓟ ꓥ ꓡꓳ꓿
ꓕꓱ ꓕꓲ ꓘꓳꓼ ꓠꓬ꓾ ꓥꓳ ꓡꓳ. ꓓꓴ ꓙꓴ‐ꓐꓲ‐ꓡꓲ ꓑꓮꓲꓽ ꓘꓳꓼ ꓥ ꓟ ꓪꓴ. ꓠꓬꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓐꓱ ꓶ ꓪꓽ ꓘꓴ ꓙ ꓢꓲ ꓠꓬꓲ ꓬꓰ ꓙ ꓔꓳ, ꓙ ꓡꓯꓽ ꓘꓳ ꓓꓴ ꓬꓰ ꓡꓯ꓿ ꓪꓴ‐ꓢ ꓟꓬꓱꓽ ꓟꓯ ꓢꓴ ꓔꓲꓺ ꓒ꓾ ꓔꓲꓺ ꓟ ꓐꓴ꓾ ꓐꓣꓳꓔꓧꓰꓣ ꓐꓴ ꓟ. ꓒꓽ ꓟ. ꓟ ꓐꓴ ꓮ ꓙꓵꓽ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓙ ꓠ, ꓟ ꓐꓱ ꓶ ꓐꓯ ꓔ ꓡꓳ ꓐꓰ ꓟꓲ‐ꓚꓲ‐ꓠ ꓢ‐ꓢꓲ‐ꓠ꓾ ꓡ‐ꓫꓲꓳ ꓢ‐ꓢꓲ‐ꓠ꓾ ꓐꓰ ꓐ‐ꓟꓳ ꓢ‐ꓢꓲ‐ꓠ ꓗꓪ ꓐꓰ ꓔꓲꓺ ꓒ ꓓꓽ ꓐꓴ ꓐꓯ ꓔ ꓡꓳ ꓐꓰ ꓢꓷ. ꓪ ꓡꓳ꓿
