ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓻ ꓠꓲ, ꓠꓬ ꓡꓲꓽ ꓒꓰꓼ ꓘꓴꓽ ꓠꓯꓸꓼ ꓗꓪ ꓓꓵꓽ ꓡ ꓠ, ꓟ꓾ ꓔ, ꓑꓯꓼ ꓡ ꓠ, ꓟ꓾ ꓔ, ꓐ ꓡ ꓠ, ꓟ ꓐꓱ ꓶ꓾ ꓕꓱ ꓡꓱ ꓫꓵꓽ (3) ꓫꓵꓽ ꓔꓯ ꓢꓷ. ꓠ ꓗ, ꓡꓳ꓾ ꓐꓰ ꓕꓱ ꓕꓲꓽ ꓠꓽ ꓡꓲꓽ ꓒꓰꓼ ꓐꓰ ꓫ. ꓕꓱˍ ꓟ ꓗꓪ ꓐꓯ ꓟꓳ. ꓖꓶ ꓠꓲ, ꓫꓵˍ ꓡꓳ꓿

ꓬꓲ ꓪꓴ. ꓕꓲꓽ ꓟ ꓠꓬ Sacramental Principle ꓐꓰ ꓐꓯˍ ꓟ ꓘꓳ‐ꓡꓳ‐ꓫꓲ 1ꓽ15 ꓗꓪ꓾ ꓟꓳꓻ ꓟꓽ ꓓꓻ ꓟ ꓪꓴ‐ꓢ  ꓠꓬ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓞꓳ ꓤ ꓒꓬꓱꓼ ꓡꓺꓳ꓿ ꓮ ꓠꓱ ꓕꓲꓽ ꓞꓲꓼ ꓪꓴ‐ꓢ ꓔꓯ ꓮꓽ ꓟˍ ꓟꓲ ꓟꓽ ꓟꓳꓻ ꓠꓬꓲ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓳꓻ ꓡˍ ꓕꓯ ꓞꓳ ꓤ ꓮ ꓙꓵꓽ ꓠꓬ ꓪꓴ‐ꓢ ꓮ ꓡꓲ ꓥ ꓟ ꓣꓳ ꓢꓷ. ꓡꓰꓳ꓿

ꓞꓳ ꓤ ꓠꓬ ꓟꓬ ꓢꓶꓽ ꓡꓰ ꓐ, ꓐ ꓪꓴ‐ꓢ ꓔꓯ ꓟꓳꓻ ꓠꓬꓲ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓟꓵꓽ ꓚꓰꓼ ꓟꓲ ꓚꓰꓼ ꓢꓴ꓾ ꓟꓳꓻ ꓓ, ꓟ ꓐꓰ ꓟꓳꓻ ꓟꓽ ꓓꓻ ꓟ ꓔꓯ ꓚꓰꓼ ꓢꓴ ꓪꓴ‐ꓢ ꓠꓬ ꓢꓲ ꓒ ꓬꓰ‐ꓢꓴ ꓒꓬꓱꓼ ꓡꓺꓳ꓾ ꓞꓳ ꓤ ꓒꓬꓱꓼ ꓡꓺꓳ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓡꓳ꓿

ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓥ ꓟꓲ ꓶꓼ ꓓꓳꓽ ꓫꓱ, ꓓꓳꓽ ꓕꓱ ꓟ ꓚꓲ. ꓛꓬ ꓡꓲꓽ ꓒꓰꓼ ꓠꓯꓸꓼ ꓘꓴꓽ ꓗꓪ꓾ ꓚꓲ. ꓛꓬ ꓥꓳꓽ ꓫꓵꓽ ꓠꓯꓸꓼ ꓘꓴꓽ ꓗꓪ ꓟꓳꓻ ꓓˍ ꓗꓪ ꓛꓲ ꓓꓳ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ ꓗ, ꓡꓳ꓾ ꓐꓰ ꓣꓳ ꓢꓷ. ꓠ ꓗ, ꓡꓳ꓿ ꓕꓱ ꓟ ꓔꓯ ꓠꓬ Sacramental Principle ꓐꓰ ꓐꓯˍ ꓡꓳ꓿ ꓟꓳꓻ ꓟꓽ ꓓꓻ ꓟ ꓔꓯ ꓟꓳꓻ ꓓꓻ ꓠ ꓛꓲ ꓬꓰˍ ꓟ꓾ ꓟꓬ ꓢꓶꓽ ꓗꓪ ꓐꓰ ꓡꓳ. ꓟꓳꓻ ꓟꓽ ꓓꓻ ꓟ ꓔꓯ ꓟꓳꓻ ꓓˍ ꓗꓪ ꓛꓲ ꓢꓯꓼ ꓕꓵꓼˍ ꓟ꓾ ꓟꓳꓻ ꓟꓽ ꓓꓻ ꓟ ꓪꓴ‐ꓢ ꓠꓬ ꓞꓳ ꓤ ꓒꓬꓱꓼ ꓡˍ ꓟ ꓡꓰ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓕꓱ ꓟ ꓥˍ ꓟꓲ ꓞꓳ ꓤ꓾ ꓞꓳ ꓫꓵꓽ ꓞꓳ ꓙꓰꓽ ꓟꓳꓻ ꓓ, ꓗꓪ ꓛꓲ ꓚꓲ. ꓛꓬ ꓡꓲꓽ ꓒꓰꓼ ꓠꓯꓸꓼ ꓘꓴꓽ ꓗꓪ ꓐꓰꓼ ꓡˍ ꓟ꓾ ꓦꓵꓻ ꓡ ꓟ꓾ ꓟꓬꓽ ꓡˍ ꓟ ꓕꓱ ꓡꓱ ꓫꓵꓽ ꓬꓰ ꓠ ꓔ ꓡꓳ꓾ ꓐꓰ ꓣꓳ ꓔꓯ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓡˍ ꓡꓳ꓿

ꓖꓳ ꓡꓱ ꓠꓬꓲ ꓚꓲ. ꓛꓬ ꓡꓲꓽ ꓒꓰꓼ ꓠꓯꓸꓼ ꓘꓴꓽ ꓗꓪ꓾ ꓚꓲ. ꓛꓬ ꓥꓳꓽ ꓫꓵꓽ ꓠꓯꓸꓼ ꓘꓴꓽ ꓗꓪ꓾ ꓗꓺ ꓫꓵꓽ ꓠꓯꓸꓼ ꓘꓴꓽ ꓗꓪ ꓶꓼ ꓓꓳꓽ ꓫꓱ, ꓓꓳꓽ ꓕꓱ ꓟ ꓔꓯ ꓠꓬ ꓢꓯ. ꓓ, ꓝꓲ ꓠ, ꓟ ꓣꓳ ꓢꓯꓼ ꓕꓵꓼ ꓠ ꓗ, ꓡꓳ꓿

ꓝꓮꓲ ꓕꓲꓽ ꓫꓵꓽ ꓟ ꓠꓬ Unity in Diversity ꓐꓰ ꓐꓯˍ ꓟ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓴ‐ꓔ ꓡ ꓞꓳ ꓕꓲ ꓣꓳˍ ꓡꓰ ꓐꓰ ꓒꓬꓱꓽ ꓟꓳꓻ ꓡˍ ꓟ ꓗꓪ ꓐꓰ ꓠꓱ. ꓐꓯ ꓐꓶꓽ ꓞꓳ ꓔꓯ ꓟꓽ ꓒꓳ, ꓔꓳ,꓿ ꓬꓲ ꓠꓬ ꓬꓴ‐ꓔ ꓡꓽ ꓞꓳ ꓕꓲ ꓣꓳˍ ꓡꓰ ꓐꓰ ꓒꓬꓱꓽ ꓟꓳꓻ ꓡˍ ꓟ ꓑꓶ. ꓓꓴ ꓠꓱ. ꓐꓯ ꓗꓪ ꓟ ꓞꓳ ꓫꓵꓽ ꓒꓬꓱꓼ ꓔꓬ ꓟ ꓞꓳ ꓙꓰꓽ ꓒꓬꓱꓼ ꓔꓬ ꓟ ꓞꓳ ꓤ ꓐꓴ ꓐꓰ ꓟꓽ ꓒꓳ, ꓔꓳ,꓿ ꓪꓴ. ꓔꓲ. ꓪꓴ. ꓑ ꓟꓽ ꓗꓷ ꓡꓰ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓬꓴ‐ꓔ ꓡ ꓞꓳ ꓕꓲꓽ ꓣꓳˍ ꓡꓰ ꓐꓰ ꓒꓬꓱꓽ ꓟꓳꓻ ꓡ ꓥ ꓟꓲ ꓬꓲ ꓠꓬ ꓞꓳ ꓤ ꓕꓲꓽ ꓣꓳˍ ꓡꓰꓽ ꓥꓳ꓿

ꓖꓳ ꓡꓱ ꓠꓬꓲ ꓪꓴ‐ꓢ ꓬꓲ. ꓶꓼ ꓓꓳꓽ ꓫꓱ, ꓓꓳꓽ ꓥˍ ꓟꓲ ꓞꓳ ꓫꓵꓽ ꓕꓲꓽ ꓫꓵꓽ꓾ ꓡꓲꓽ ꓒꓰꓼ ꓕꓲꓽ ꓟ ꓠꓯꓸꓼ ꓘꓴꓽ ꓗꓪ ꓡꓰꓽ ꓗꓷ ꓟꓽ ꓓꓻ꓾ ꓗꓷ ꓟꓽ ꓚꓰꓼ꓿ ꓖꓳ ꓟ ꓘꓴꓽ ꓠꓯꓸꓼ ꓗꓪ ꓡꓰꓽ ꓗꓷ ꓔ ꓢꓲ ꓠꓬꓲ ꓞꓳ ꓫꓱꓽ ꓟꓽ ꓚꓰꓼ ꓐꓯˍ ꓟ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓡꓲꓽ ꓒꓰꓼ ꓡꓲꓽ ꓫꓵꓽ ꓮ ꓙꓵꓽ ꓠꓯꓸꓼ ꓘꓴꓽ ꓗꓪ ꓔ, ꓐ ꓡˍ ꓟ ꓠꓬ ꓶꓼ ꓓꓳꓽ ꓫꓱ, ꓓꓳꓽ ꓕꓱ ꓟ ꓥ ꓡꓳ꓿ ꓕꓲꓽ ꓟ ꓐꓰ ꓕꓲꓽ ꓟ ꓗꓴ. ꓙꓲꓽ ꓟꓽ ꓙꓳ ꓥ ꓟꓲ꓾ ꓗꓴ. ꓙꓲꓽ ꓙꓳˍ ꓟ ꓠꓬ ꓡꓲꓽ ꓒꓰꓼ ꓐꓯˍ ꓟ ꓕꓱ ꓟ ꓠꓬ꓾ ꓬꓲ ꓧꓪꓺ ꓬꓲ ꓚꓱ, ꓕꓱ ꓟ ꓠꓬ ꓣꓳ ꓮ ꓙꓵꓽ ꓢꓴ ꓐꓱ ꓶ ꓫꓱ. ꓡꓱ ꓘꓳˍ ꓟ ꓥ ꓡꓳ꓿

ꓝꓮꓲ ꓕꓲꓽ ꓟ ꓟ ꓠꓬ Critical Transformation ꓐꓰ ꓐꓯˍ ꓟ꓾ ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓤ ꓒꓬꓱꓼ ꓡˍ ꓕꓯ ꓬꓴ‐ꓔ ꓡ ꓞꓳ ꓕꓲꓽ ꓣꓳ ꓒꓬꓱꓼ ꓡˍ ꓕꓯ꓾ ꓬꓴ‐ꓔ ꓡꓲꓽ ꓬꓴ‐ꓔ ꓥꓳꓽ ꓫꓵꓽ ꓔꓯ ꓟꓽ ꓔꓱ, ꓟ ꓟꓽ ꓜꓳꓽ ꓟ ꓔꓯ ꓠꓬ ꓬꓲ ꓟ. ꓖꓶ ꓑꓱ ꓖꓶˍ ꓡꓳ꓾ ꓫꓬ, ꓔꓱ,ˍ ꓡꓳ꓿ ꓕꓱ ꓟ ꓔꓯ ꓠꓬ Critical Transformation ꓐꓰ ꓐꓯˍ ꓡꓳ꓿ ꓟ‐ꓕꓲ 23ꓽ ꓗꓪ ꓣꓳ ꓟꓳꓻˍ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓬꓲ ꓪ ꓡꓲꓽ ꓒꓰꓼ ꓕꓲ ꓐꓱ ꓟ ꓔꓯ ꓟꓽ ꓫꓬ ꓟ꓾ ꓟꓽ ꓔꓱ, ꓟ꓾ ꓖꓳꓼ ꓓ, ꓟ꓾ ꓧ. ꓧ. ꓫꓵ ꓓ,ˍ ꓟ ꓔꓯ ꓬꓲ ꓡꓰ ꓫꓬ, ꓔꓱ, ꓖꓶˍ ꓟ ꓥ ꓡꓳ꓿

ꓣꓳ ꓡꓲꓽ ꓒꓰꓼ ꓠꓯꓸꓼ ꓘꓴꓽ ꓗꓪ ꓥˍ ꓟꓲ ꓶꓼ ꓓꓳꓽ ꓫꓱ, ꓓꓳꓽ ꓐꓰ ꓟꓽ ꓪꓽ ꓟ꓾ ꓠꓲꓽ ꓬꓲ ꓐꓵꓽ ꓓ, ꓟ꓾ ꓡꓲꓽ ꓒꓰꓼ ꓠꓯꓸꓼ ꓘꓴꓽ ꓗꓪ ꓐꓰ ꓠꓲꓽ ꓔꓯ ꓪꓴ. ꓓꓵ ꓕꓱꓼˍ ꓟ꓾ ꓝꓮꓲ ꓠꓲꓽ ꓖꓴˍ ꓟ ꓕꓱ ꓟ ꓔꓯ ꓣꓳ ꓠꓬ ꓫꓬ, ꓔꓱ, ꓠ ꓗ, ꓡꓳ꓿ ꓕꓱ ꓡꓱ ꓫꓵꓽ ꓔꓯ ꓠꓬ ꓪꓴ‐ꓢ ꓐꓱ ꓘꓶꓽ ꓗꓪ ꓐꓰ ꓞꓲꓽ ꓫꓬ ꓡꓰ ꓝꓲ ꓢꓲ ꓠꓬꓲ ꓕꓱ ꓡꓱ ꓐꓰ ꓔꓱ, ꓜꓳꓽˍ ꓟ ꓬꓰˍ ꓥꓳ ꓐꓯ ꓠꓬ ꓚꓲ. ꓛꓬ ꓡꓲꓽ ꓒꓰꓼ ꓕꓱ ꓟ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓒꓵꓽˍ ꓟ꓾ ꓬꓲ ꓐꓵꓽ ꓫꓬ.ˍ ꓟ ꓡꓲꓽ ꓒꓰꓼ ꓕꓲꓽ ꓟ ꓒꓬꓱꓼ ꓙꓰˍ ꓥꓳ꓾ ꓐꓰ ꓮ ꓙꓵꓽ ꓢꓴ ꓔꓯ ꓢꓷ. ꓖꓶ ꓠꓲ, ꓫꓵˍ ꓡꓳ꓿