ꓔꓲ ꓒ ꓪ ꓔꓲ. ꓡꓰꓳ (14) ꓠꓬ ꓮ ꓟꓰ (ꓠꓽ ꓢꓽ ꓠꓬꓲ) ꓠꓯꓼ ꓙꓵ, ꓕꓯ ꓲ‐ꓔ‐ꓡꓲ ꓟꓵꓽ ꓙꓵꓽ ꓢꓲꓽ ꓒꓽ Giorgia Maloni ꓔꓯ ꓔꓲꓺ ꓒ ꓪ ꓔꓲ. ꓬꓳ, ꓗꓪ ꓘꓳ ꓣꓴ ꓢꓲ ꓜꓲ ꓡꓯ ꓘꓳ ꓗꓷꓳ꓿ ꓟꓵꓽ ꓙꓵꓽ ꓢꓲꓽ ꓒ ꓠꓬ 6 ꓦ 24 ꓠꓬꓲ ꓗꓪ ꓐꓰ 25 ꓠꓬꓲ ꓗꓪ ꓛꓲ The Hague ꓡꓳ ꓒꓱ ꓗꓪ ꓬꓰˍ ꓟ ꓠꓮꓔꓳ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓬꓲꓼ ꓡ ꓗꓷ ꓟ ꓥ ꓡꓳ꓿ ꓖꓪ ꓙꓱ ꓜꓲꓼ ꓓꓴ ꓖꓳ ꓟ ꓗꓪ ꓟꓯꓼ ꓢꓰꓼ ꓡꓯ ꓘꓳˍ ꓟ ꓗꓪ ꓣꓱꓽˍ ꓟ ꓒꓴ ꓐꓰ ꓗꓴ. ꓙꓲꓽ ꓙꓳ ꓢꓲ ꓖꓪ ꓙꓱ ꓡꓯ ꓘꓳ ꓗꓷ ꓟ ꓥ ꓡꓳ꓿

ꓠꓽ ꓢꓽ ꓠꓬꓲ ꓗꓪˍ ꓟꓲ ꓔꓲ ꓒ ꓪ ꓔꓲ. ꓐꓱ ꓶ ꓮ ꓘꓶ. ꓟꓬꓱꓽ ꓟꓬꓽˍ ꓟ ꓠꓬꓲ ꓕꓲ ꓠꓬꓲ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓔꓲꓺ ꓒ ꓪ ꓔꓲ. ꓠꓬ ꓠꓽ ꓢꓽ ꓠꓬꓲ ꓛꓲ ꓡˍ ꓕ ꓑꓳꓸꓼ ꓦꓮꓔꓲꓚꓮꓠ ꓗꓪ ꓡˍ ꓟ ꓪꓰ ꓤ ꓐꓴ ꓐꓰ ꓙꓲꓻ ꓫꓬ ꓢꓴ ꓒꓲ‐ꓕꓱ ꓑ, (St. Peter Square) ꓗꓪ ꓜꓲ ꓡꓯ ꓘꓳ ꓢꓲ ꓪꓽ ꓘꓴ꓾ ꓶꓼ ꓓꓳ ꓫꓱ, ꓓꓳꓽ ꓚ ꓖꓶ ꓔꓬ ꓟ ꓥ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓔꓲꓺ ꓒ ꓪ ꓔꓲ. ꓠꓬ ꓚꓮꓣꓓꓲꓠꓮꓡ ꓐꓴ ꓐꓱ ꓶ ꓟꓬꓱꓽ ꓬꓰ ꓪˍ ꓟ ꓗꓳ‐ꓟ‐ꓫꓲ ꓗꓪ ꓧꓳꓽ ꓣꓱꓽ ꓢꓴ ꓚꓮꓣꓓꓲꓠꓮꓡ Luis Antonio Tagle꓾ ꓬꓴ‐ꓗ‐ꓣꓲꓠ ꓖ‐ꓣꓰꓰꓗ ꓗ‐ꓔꓳ‐ꓡꓲꓗ ꓢꓽ‐ꓢꓶ‐ꓠ ꓢꓲ‐ꓠꓳ (ꓢꓬꓠꓳꓓ) ꓚꓱ, ꓔꓯ ꓟꓳ. ꓔꓲꓺ ꓒ ꓓꓽ ꓐꓴ ꓜꓴ ꓗꓪ ꓙꓵꓽ ꓪ ꓙꓳ ꓢꓴ Paul Emil Tscherrig꓾ ꓔꓴ‐ꓣ‐ꓗꓲ ꓗꓴꓷꓼ ꓙꓵꓽ ꓢꓲꓽ ꓒ ꓬꓲ ꓦꓲꓻ ꓢꓲ ꓟ Emine Erdogan ꓐꓴ ꓐꓰˍ ꓟꓲ ꓜꓲ ꓡꓯ ꓘꓳ ꓗꓷꓳ꓿

ꓦꓮꓔꓲꓚꓮꓠ ꓓꓳꓽ ꓐꓯ ꓒꓬꓱ ꓔꓶ. ꓗꓪ ꓐꓰ ꓐꓯ ꓑꓶ ꓔ ꓟ ꓗꓪ ꓠꓬ ꓲ‐ꓔ‐ꓡꓲ ꓟꓵꓽ ꓙꓵꓽ ꓢꓲꓽ ꓒ ꓠꓬ ꓔꓲꓺ ꓒ ꓪ ꓔꓲ. ꓐꓰ ꓜꓲ ꓡꓯ ꓘꓳ ꓗꓷ ꓗ ꓠꓯ. ꓦꓮꓔꓲꓚꓮꓠ ꓣꓱꓽ ꓙ ꓟꓬꓱꓽ ꓢꓲꓽ ꓒ ꓥ ꓟ ꓚꓮꓣꓓꓲꓠꓮꓡ Piero Parolin꓾ ꓟꓵꓽ ꓗꓳ, ꓓꓵ ꓓꓵ ꓙ ꓡꓯ ꓘꓳˍ ꓟ ꓐꓰ ꓟꓵꓽ ꓗꓳ, ꓓꓵ ꓓꓵ ꓜꓴꓻ ꓐꓴ ꓬꓳ, ꓗꓪ ꓧꓳꓽ ꓣꓱꓽ ꓢꓴ ꓥ ꓟ ꓔꓲꓺ ꓒ ꓓꓽ ꓟ Paul Richard Gallagher ꓐꓴ ꓐꓰ ꓜꓲ ꓡꓯ ꓘꓳ ꓗꓷꓳ꓾ ꓐꓰ ꓐꓯ ꓔ ꓡꓳ꓿

ꓖꓳ ꓡꓱ ꓜꓲ ꓡꓯ ꓘꓳ ꓔꓬ ꓕꓯ ꓦꓮꓔꓲꓚꓮꓠ ꓐꓰ ꓲ‐ꓔ‐ꓡꓲ ꓗꓴꓷꓼ ꓠꓬꓲꓽ ꓗꓴ. ꓚꓸꓼ ꓗꓪ ꓙꓳˍ ꓟ ꓙꓲꓻˍ ꓟ ꓙꓻ ꓡꓯ ꓘꓳ ꓚꓱ,꓾ ꓬꓴ‐ꓗ‐ꓣꓲꓠ ꓐꓰ ꓐꓶ ꓓꓳ ꓔꓱ, ꓫꓵ ꓗꓴꓷꓼ ꓐꓴ ꓗꓪ ꓢꓲ ꓡꓲ ꓟ ꓙꓳ ꓡ ꓠ ꓬꓰˍ ꓟ ꓟꓬꓱꓽ ꓐꓴ ꓗꓪ ꓕꓲ ꓪꓺꓽ ꓬꓰ ꓐ ꓡˍ ꓟ ꓚꓱ,꓾ ꓖ‐ꓜ ꓗꓪ ꓫꓱ. ꓤ ꓠꓲ, ꓔꓯ ꓟꓳ. ꓖꓶˍ ꓟ ꓬꓰ ꓙ ꓔꓳ, ꓙ ꓓꓴ ꓖꓶ ꓐ ꓡˍ ꓟ ꓚꓱ, ꓐꓴ ꓔꓯ ꓖꓪ ꓙꓱ ꓡꓯ ꓘꓳ ꓗꓷ ꓢꓲ꓾ ꓠꓬꓲꓽ ꓗꓴꓷꓼ ꓡꓱꓸꓼ ꓕꓲ ꓪꓺꓽ ꓟꓬꓱꓽ ꓬꓰ ꓐ ꓡˍ ꓟ ꓚꓱ,꓾ ꓙꓵꓻ ꓠꓲ, ꓚꓱ, ꓐꓰ ꓲ‐ꓔ‐ꓡꓲ ꓞꓳ ꓡꓲꓽ ꓪ ꓚꓱ, ꓐꓴ ꓔꓯ ꓖꓪ ꓙꓱ ꓡꓯ ꓘꓳ ꓗꓷꓳ꓾ ꓐꓰ ꓢꓷ. ꓪ ꓡꓳ꓿

News – Vatican News