ꓦꓮꓔꓲꓚꓮꓠ ꓡꓳ ꓒꓱ ꓗꓪ 7 ꓦ ꓟ (28‐29) ꓠꓬꓲ 2025 ꓘꓳꓼ ꓕꓯ ꓗ‐ꓔꓳ‐ꓡꓲꓗ ꓓꓳꓽ ꓫꓵꓽ ꓗꓪ ꓟꓬꓱ: ꓬꓰ ꓢꓴ ꓐꓴ ꓐꓱ ꓶ ꓙꓴ‐ꓐꓲ‐ꓡꓲ ꓑꓮꓲꓽ ꓬꓰ ꓠ, ꓟ꓾

7 ꓦ ꓟ 28‐29 ꓠꓬꓲ 2025 ꓘꓳꓼ ꓕꓯ ꓦꓮꓔꓲꓚꓮꓠ ꓡꓳ ꓒꓱ ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓟꓲ ꓦꓲꓻ ꓢꓯꓼ ꓓꓳꓽ ꓫꓵꓽ ꓐꓯ ꓑꓶ ꓔꓶ. ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓱ ꓶ ꓫꓵꓺ ꓙꓴ‐ꓐꓲ‐ꓡꓲ ꓑꓮꓲꓽ ꓔꓯ ꓬꓰ ꓖꓶ ꓓꓴ ꓥꓳ ꓐꓰ Synod ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓐꓯ ꓑꓶ ꓗꓷꓳ ꓐꓰ ꓐꓯ ꓔ ꓡꓳ꓿

ꓙꓴ‐ꓐꓲ‐ꓡꓲ ꓑꓮꓲꓽ ꓬꓲ ꓔꓶꓻ ꓙꓱꓼ ꓠꓬ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓟꓲ ꓦꓲꓻ ꓢꓯꓼ ꓗꓪ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓠ, ꓟ ꓠꓬ ꓮ ꓘꓶ. ꓛꓲ ꓣꓱ ꓬꓯꓼ ꓔꓬ ꓟ ꓪꓴ. ꓠꓬꓲ ꓥ ꓡꓳ꓿ ꓘꓴ ꓜꓲꓼ ꓞꓳ ꓥ ꓟꓲ ꓟꓲ ꓦꓲꓻ ꓢꓯꓼ ꓗꓪ ꓐꓰ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓔꓶ. ꓗꓪ ꓟꓬꓱꓽ ꓬꓰ ꓠꓲ, ꓫꓵ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓶꓻ ꓙꓳ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓔꓶ. ꓗꓪ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ_ ꓟ ꓙꓵꓻ ꓠꓲ, ꓔꓯ ꓚꓺ ꓟ. ꓖꓶ ꓠ, ꓟ ꓥ ꓡꓳ꓿ ꓙꓴ‐ꓐꓲ‐ꓡꓲ ꓑꓮꓲꓽ ꓗꓪ ꓢꓷ. ꓠꓲ, ꓚꓴꓽ ꓬꓲ, ꓖꓶ ꓟ꓾ ꓪꓽ ꓘꓴ ꓙꓵ,꓾ ꓢꓲ ꓡꓲ, ꓐꓰ ꓔꓬ ꓢꓲ ꓠꓬꓲ ꓕꓲ ꓣꓳ ꓐꓰ ꓕꓲ ꓣꓳ ꓫ. ꓕꓱ ꓡꓯꓽ ꓘꓳ, ꓟ ꓚꓱ, ꓮ ꓟꓬ, ꓫꓵꓽ ꓔꓯ ꓬꓰ ꓓꓴ ꓙꓳ ꓡꓳ ꓐꓰ ꓐꓯ ꓔ ꓡꓳ꓿

ꓓꓽ ꓪꓴ. ꓕꓲ ꓠꓬꓲ ꓗꓪ ꓢꓷ. ꓠꓲ, ꓖꓶ ꓟ ꓚꓱ, ꓐꓰ ꓦꓻ ꓢꓯꓼ ꓪ ꓙ ꓖꓶ ꓓꓴ ꓔꓯ ꓬꓰ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓠꓬꓲꓽ ꓠꓬꓲ ꓗꓪ ꓠꓬ ꓙꓴ‐ꓐꓲ‐ꓡꓲ ꓑꓮꓲꓽ ꓗꓪ ꓡ ꓢꓴ ꓐꓴ ꓮ ꓡꓰ ꓐꓰ ꓓꓵꓽ ꓙ ꓚꓱ, ꓐꓰ ꓢꓷ. ꓠꓲ, ꓚꓴꓽ ꓬꓲꓻ ꓖꓶ ꓠ, ꓟ ꓢꓯꓼ ꓖꓶ ꓓꓴ ꓙꓵ, ꓟꓲ ꓬꓰ ꓓꓴ ꓐꓰ ꓮ ꓡꓰ ꓐꓰ ꓟꓲ ꓕꓯ ꓢꓲ ꓗꓪ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓺ ꓠ, ꓟ ꓙ ꓖꓶ ꓠ, ꓟ ꓐꓱ ꓶ ꓬꓰ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓙꓴ‐ꓡꓲ‐ꓑꓮꓲ ꓗꓪ ꓡ ꓠꓲ, ꓫꓵ ꓢꓴ ꓐꓴ ꓔꓯ ꓟꓬꓱꓺ ꓖꓶ ꓠ, ꓟ https://www.digitalismissio.org/  ꓖꓶ ꓔ ꓡꓳ꓿ ꓝꓮꓲ ꓙꓴ‐ꓐꓲ‐ꓡꓲ ꓑꓮꓲꓽ ꓗꓪ ꓡ ꓢꓴ ꓐꓴ ꓠꓬ ꓐꓬꓱ ꓦꓲꓻ ꓤꓶ ꓒꓵꓽ ꓮ ꓙꓵꓽ ꓠꓬ ꓚꓲ. ꓛꓬ ꓒꓴ ꓗꓪ ꓐꓰ ꓣꓱ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓮ ꓟꓶ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓠ, ꓟ ꓬꓰ ꓟ ꓙꓵ, ꓕꓯ ꓟꓲ ꓦꓲꓻ ꓢꓯꓼ ꓗꓪ ꓐꓰ ꓟꓬꓱꓽ ꓬꓰ ꓟ ꓔꓯ ꓮ ꓘꓶ. ꓛꓲ ꓢꓯꓼ ꓖꓶ ꓠ, ꓟ ꓥꓳꓻ ꓡꓳꓻ ꓓꓴ ꓙꓳ ꓡꓳ꓿

ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓝꓮꓲ ꓐ, ꓐ ꓪꓴ‐ꓢ ꓠꓵꓻ ꓠꓲ, ꓡꓰ ꓪꓽ ꓡꓯꓽ ꓘꓳ, ꓟ ꓫꓱ, ꓡꓯꓽ ꓘꓳ, ꓓꓴ ꓥ ꓔꓯ ꓢꓷ. ꓡꓰ ꓓꓴ ꓪꓴ‐ꓢ ꓐꓯ ꓘꓶꓽ ꓔꓯ ꓟꓴ ꓗꓳ ꓓꓵ ꓓꓵ ꓗꓪ ꓚꓺ ꓟ. ꓖꓶ ꓐ ꓡ ꓢꓴ ꓘꓴ ꓜꓲꓼ ꓞꓳ ꓔꓯ ꓢꓯꓼ ꓖꓶ ꓢꓲ ꓠꓬꓲ ꓫꓬ, ꓔꓷ ꓡꓯ ꓐꓰ ꓐꓯ ꓔ ꓡꓳ꓿

ꓝꓮꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ Digital ꓦꓬꓼ ꓠꓬꓲ ꓗꓪ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓔꓳ, ꓜꓳ ꓡ ꓟ ꓫꓵꓽ ꓪꓴꓽ ꓔꓯ ꓮ ꓡꓰ ꓐꓰ ꓗꓳ. ꓙꓰ ꓧꓪ. ꓡꓰ ꓓ ꓠ, ꓟ ꓪꓴ‐ꓢ ꓔꓯ ꓢꓯꓼ ꓪ ꓣꓴ ꓠ, ꓟ ꓢꓯꓼ ꓖꓶ ꓔ ꓡꓳ꓿ ꓝꓮꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓮ‐ꓣꓳ ꓡꓳ. ꓒꓽ ꓐꓴ ꓔꓯ ꓥ ꓟꓲ ꓮ ꓘꓶ. ꓛꓲ ꓫ. ꓟꓳ ꓟ ꓚꓱ, ꓔꓯ ꓕꓳ ꓶ ꓗꓪ ꓐꓳ ꓔ ꓡꓳ ꓐꓰ ꓢꓷ. ꓪ ꓡꓳ꓿