10 ꓘꓳꓼ ꓛꓲ ꓡꓳˍꓟ ꓤ ꓠꓱ ꓤ ꓐꓴ ꓔꓯ ꓟ. ꓖꓶ ꓐꓶ ꓖꓶˍꓟ ꓗꓪ ꓕꓲ ꓡꓱ ꓫꓵꓽ ꓚꓱ, ꓔꓯ ꓮ ꓘꓶꓽ ꓤ ꓟꓳ ꓠꓽ ꓗ. ꓡꓳ꓿ ꓤ ꓠꓱ ꓤ ꓐꓴ ꓬꓲ ꓪꓽ ꓓꓵ ꓙ ꓟ꓾ ꓪꓴ ꓡ ꓟ ꓗꓪ ꓐꓰ ꓣꓳ ꓠꓯ, ꓗꓪ ꓦ ꓡꓱ ꓓꓴ ꓚꓱ, ꓔꓯ ꓟꓽ ꓠ., ꓓꓴ ꓡꓰ ꓠ, ꓟ ꓐꓱ ꓶ ꓬꓲ ꓚꓱ, ꓜꓳꓽ ꓜꓳ ꓟ. ꓖꓶ ꓪ ꓡꓰ ꓠ, ꓟ ꓣꓳ.. ꓚꓵ ꓡꓳ꓿
- ꓠꓵ, ꓠꓲ., ꓐꓰ ꓢꓷ. ꓗꓴ. ꓠꓯ, ꓟ꓾ ꓝꓴꓲ.ꓟꓽ ꓓꓰ ꓓꓰ ꓟ. ꓖꓶ ꓪ ꓡꓰ ꓝꓲ꓾ ꓤ ꓠꓱ ꓤ ꓐꓴ ꓕꓲ ꓫꓵꓽ ꓫꓵ ꓗꓪ ꓬꓰ ꓥꓳꓽ ꓡꓰ ꓕꓯ ꓮ ꓫꓵꓽ ꓑꓶ. ꓓꓴ ꓕꓱ ꓡꓱ ꓬꓰ ꓡ? ꓐꓰ ꓠꓽ ꓠꓬꓲ ꓢꓲ꓾ ꓬꓲ ꓪ ꓡꓰ ꓒꓳ, ꓖꓶ ꓡ ꓟ ꓫ. ꓪ ꓔꓯ ꓠꓽ ꓡꓳ ꓖꓶ ꓢꓲ꓾ ꓬꓲ ꓟꓶ ꓗꓪ ꓮ ꓡꓰ ꓫꓵꓽ ꓗꓪ ꓥꓳꓽ ꓡꓰ ꓟ ꓔꓯ ꓟ. ꓖꓶ ꓪ ꓡꓰ ꓝꓲ꓿ ꓟꓽ ꓞꓲ ꓬꓲ ꓪ ꓔꓯ ꓮ ꓕꓯ ꓥˍꓟꓲ ꓠꓲ., ꓠꓵ, ꓡꓳ ꓐꓰ ꓐꓯ ꓖꓶ꓾ ꓮ ꓡꓰ ꓗ. ꓠꓬꓲꓽ ꓥ꓾ ꓐꓯ ꓠꓬ ꓬꓲ ꓪ ꓬꓰ ꓥꓳꓽ ꓡꓰ ꓥˍꓟꓲ ꓥꓪ ꓔꓯ ꓮꓽ ꓐ ꓮ ꓟ ꓠꓬ ꓠꓲ., ꓠꓵ, ꓐꓭ ꓐꓰ ꓓꓵ ꓙ ꓪ ꓡꓰ ꓠ, ꓟ ꓥ ꓡꓳ꓿
- ꓗ., ꓫꓵ., ꓐꓰ ꓠꓲ., ꓙ ꓟꓬ ꓗꓳˍꓟ꓾ ꓤ ꓠꓱ ꓤ ꓐꓴꓳ ꓬꓲ ꓪ ꓬꓰ ꓐ ꓡ ꓟ ꓗ., ꓫꓵ., ꓔꓯ ꓡꓰ ꓬꓰ ꓝꓲ ꓠꓯ, ꓔꓯ ꓥꓳꓽ ꓐꓯ ꓠꓬ ꓟ ꓟꓶꓼ ꓘꓶꓼ 8 ꓙꓵꓽ ꓙ ꓡꓰ ꓕꓯ ꓑꓧꓳꓠꓰ ꓛꓳ ꓟꓽ ꓔ꓾ꓬꓲ ꓪ ꓔꓯ ꓝꓴꓲ. ꓖꓶˍꓕꓯ ꓠꓲ., ꓙ ꓟꓬ ꓗꓳˍꓟ ꓗꓪ ꓐꓰ ꓬꓲ ꓪ ꓬꓰ ꓥꓳꓽ ꓡꓰ ꓕꓯ ꓕꓲ ꓑ ꓠꓽ ꓝꓲˍꓟ ꓟꓽ ꓥˍꓠꓬ ꓡꓳ ꓖꓪ ꓓꓴ ꓔꓯ ꓠꓽ ꓡꓲ ꓕꓲ ꓙꓵꓽ ꓛꓲ ꓦ ꓝꓲˍꓟ꓾ ꓕꓱ ꓡꓱ ꓬꓰ ꓖꓶ ꓠ, ꓗ. ꓟ ꓥ ꓡꓳ ꓠꓲ., ꓠꓵ ꓟ ꓬꓲ ꓤ ꓠꓬꓲꓽ ꓤ ꓐꓴꓳ꓿
- ꓤ ꓠꓱ ꓤ ꓐꓴꓳ ꓡꓰ ꓙꓵꓽ ꓟ ꓬꓰ ꓓꓳ ꓡ ꓕꓯ ꓥꓪ ꓤ ꓥꓪ ꓤ ꓟꓶ ꓠꓬ ꓮ ꓘꓶꓽ ꓓ ꓐꓭ ꓥˍꓐꓰ ꓐꓯ ꓖꓶ ꓪ ꓡꓰ ꓝꓲ꓿ ꓕꓱ ꓡꓱ ꓐꓯ ꓖꓶ. ꓟ ꓗꓪ ꓐꓰ ꓤ ꓠꓱ ꓤ ꓐꓴ ꓬꓲ ꓪ ꓠꓲ., ꓟ ꓠꓯꓼ ꓗꓪ ꓢꓯꓼ ꓕꓵꓽ ꓠꓲ, ꓙꓳ ꓡ ꓥꓳ꓾ ꓙꓲˍꓟ ꓚꓱ, ꓗꓪ ꓛꓳ ꓫꓱ, ꓡ ꓥꓳ꓿ ꓤ ꓠꓱ ꓤ ꓐꓴ ꓠꓬ ꓣꓳ ꓮꓽ ꓐ ꓮ ꓟ ꓫꓱ, ꓔꓯ ꓛꓳꓽ ꓢꓲ꓾ ꓜꓳꓽ ꓫꓱ, ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓣꓳ ꓤ ꓠꓱ ꓤ ꓐꓴ ꓟꓲ ꓛꓬ ꓗꓪ ꓫ. ꓪ ꓔꓯ ꓤ ꓟꓳ ꓢꓲ꓾ ꓕꓱ ꓠ, ꓟ ꓬꓰ ꓠ, ꓟ ꓮ ꓓꓰ ꓣꓳ.. ꓚꓵ ꓟ ꓥ ꓡꓳ꓿
ꓤ ꓠꓱ ꓤ ꓐꓴꓳ꓾ ꓬꓲ ꓪ ꓠꓲ., ꓟ ꓔꓯ ꓠꓽ ꓡꓳ. ꓖꓶ꓾ ꓬꓲ ꓪ ꓥꓳꓽ ꓕꓯ ꓮ ꓫꓵꓽ ꓪꓴ ꓠꓬꓲꓽ ꓥꓳꓽ ꓡ ꓠꓲ., ꓟ ꓫꓵ., ꓢꓲ꓾ꓠꓽ ꓠꓬꓲ ꓪꓽ ꓡꓰ ꓝꓲ꓿
ꓣꓳ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴꓳ ꓤ ꓟꓳ ꓠꓽ ꓗ. ꓟ ꓠꓬ ꓮ ꓘꓶꓽ ꓠ., ꓡꓰ ꓠꓽ ꓓꓰ ꓟ ꓙꓱꓽ ꓟ ꓑꓲ.,ˍꓟ ꓟꓽ ꓠꓽ ꓠ. ꓟꓽ ꓢ ꓟ ꓫ. ꓪ ꓗꓪ ꓐꓰ ꓑꓲ.,ˍꓟ ꓕꓱ ꓡꓱ ꓫꓵꓽ ꓠꓬ ꓤ ꓠꓱ ꓤ ꓐꓴꓳ ꓬꓲ ꓪ ꓠꓲ., ꓟ ꓔꓯ ꓮ ꓘꓶꓽ ꓠ., ꓡꓰ ꓝꓲˍꓟ ꓥˍꓡꓳ꓿
