ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓟꓵꓽ ꓛꓵꓽ ꓟꓽ ꓙꓲ ꓗꓷ ꓡꓰ ꓟ ꓚꓱ, (Soil pollution)
ꓠꓬꓲ. ꓠꓬꓲ ꓠꓬ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓟꓵꓽ ꓛꓵꓽ ꓟꓽ ꓙꓲ ꓗꓷ ꓡꓰ ꓟ ꓚꓱ, ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿ ꓗꓳ. ꓗꓷ ꓟ ꓙꓵ, ꓕꓯ ꓣꓳ ꓦꓲꓻ ꓗꓪ ꓔꓶ. ꓔ ꓟ ꓟꓵꓽ ꓗꓪ ꓢꓲ ꓪꓰ ꓡꓳ ꓪꓰ ꓐꓰ ꓢꓶ, ꓢꓶꓽ ꓠꓬ ꓮ ꓘꓶ. ꓛꓲ ꓙꓲ ꓢꓲ ꓠꓬꓲ ꓮ ꓟꓬꓽ ꓓꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓮ ꓡꓰ ꓗꓷ ꓡꓰ ꓢꓲ ꓠꓬꓲ ꓟꓽ ꓙꓲ ꓟꓽ ꓓꓱ ꓗꓷ ꓡꓰ ꓡ ꓐꓰ ꓣꓳ ꓠ ꓠꓬꓲˍ ꓢꓴ ꓐꓴ ꓙꓳ ꓟ ꓥ ꓡꓳ꓿
ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓟꓲ ꓠꓯ ꓠꓬ ꓬꓲ ꓚꓱ, (3) ꓫꓵꓽ ꓗꓪ ꓐꓰ ꓐꓬ ꓡꓰ ꓡꓳ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓬꓲ ꓪꓴ. ꓕꓲ ꓫꓵꓽ ꓠꓬ ꓟꓲ ꓠꓯ ꓘꓴꓽ ꓠꓯ, ꓗꓪ ꓟꓲ ꓠꓯ ꓬꓲ ꓞꓶ ꓠꓬ ꓖꓴ ꓡꓰ ꓟ ꓥ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓔꓯ ꓐꓯ ꓡ ꓐꓰ ꓐꓯ ꓠꓬ ꓟꓶ ꓦ ꓦ ꓙꓵ, ꓗꓪ ꓣꓳ ꓦꓲꓻ ꓗꓪ ꓝꓮꓲ ꓣꓳ ꓦ ꓟꓲ ꓗꓪ ꓟꓶ ꓦ ꓬꓲꓻ ꓑꓶ. ꓓꓴ ꓣꓳ ꓟꓲ ꓠꓯ ꓐꓬ ꓡꓰ ꓓꓴ ꓙꓳ ꓟ ꓥ ꓡꓳ꓿ ꓟꓶ ꓦ ꓬꓲꓻ ꓡꓰ ꓟꓵꓽ ꓛꓵꓽ ꓙꓲ ꓟ ꓔꓯ ꓐꓵ ꓔꓯꓺ ꓙꓰ ꓟ ꓥ ꓡꓳ꓿ ꓝꓮꓲ ꓬꓲꓻ ꓙꓬ ꓙꓵꓽ ꓟ ꓑꓶ. ꓓꓴ ꓣꓳ ꓔꓶ ꓜꓽ ꓔꓶ ꓓꓳ ꓟ ꓟꓲ ꓠꓯ ꓔꓯ ꓬꓲ ꓞꓶꓻ ꓖꓴ ꓡꓰ ꓝꓲ ꓟ ꓥ ꓡꓳ꓿
ꓝꓮꓲ ꓣꓳ ꓫꓵꓺ ꓚꓴˍ ꓟ ꓟꓲ ꓠꓯ ꓘꓴꓽ ꓗꓪ ꓒꓴ ꓫꓵꓺ ꓧꓪ, ꓟ ꓑꓶ. ꓓꓴ ꓟꓲ ꓠꓯ ꓘꓴꓽ ꓒꓽ ꓓꓽ ꓚꓴˍ ꓟ ꓮ ꓙꓵꓽ ꓠꓬ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓓꓴ ꓒꓬꓱꓼ ꓡꓰ ꓝꓲ ꓡꓳ ꓐꓰ ꓟꓵꓽ ꓘꓳꓼ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓠꓯꓻ ꓞꓲꓼ ꓣꓱ ꓢꓲ ꓠꓬꓲ ꓣꓳ ꓔꓶ ꓜꓽ ꓔꓶ ꓓꓳ ꓟ ꓔꓶ. ꓗꓪ ꓣꓱ ꓟ ꓪꓴ. ꓠꓬꓲ ꓟꓵꓽ ꓛꓵꓽ ꓟꓽ ꓙꓲ ꓡꓰ ꓟ ꓔꓯ ꓒꓬꓱꓼ ꓡꓰ ꓝꓲ ꓟ ꓥ ꓡꓳ꓿ ꓣꓳ ꓠꓯ ꓟꓵꓽ ꓛꓵꓽ ꓔꓯ ꓮ ꓟꓬ, ꓟꓽ ꓣꓱ ꓠꓯꓻ ꓞꓲꓼ ꓔꓯ ꓡꓰ ꓣꓱ ꓢꓲ ꓠꓬꓲ ꓔꓶ. ꓟ ꓪꓴ. ꓠꓬꓲ ꓟꓵꓽ ꓛꓵꓽ ꓠꓬ ꓐꓬ ꓡꓰ ꓢꓲ ꓠꓬꓲ ꓟꓽ ꓙꓲ ꓗꓷ ꓡꓰ ꓓꓴ ꓙꓳ ꓟ ꓥ ꓡꓳ꓿
ꓣꓳ ꓠꓬ ꓡ ꓞꓳ ꓡꓯꓽ ꓒꓯ, ꓡꓰ ꓫꓬ, ꓔ ꓟ ꓑꓶ ꓓꓲ ꓠꓯꓻ ꓞꓲꓼ ꓝꓮꓲ ꓟꓳꓼ ꓫꓵꓻ ꓠꓯꓻ ꓞꓲꓼ ꓐꓴ ꓮ ꓟꓬ, ꓔꓯ ꓣꓱ ꓟ ꓪꓴ. ꓠꓬꓲ ꓗꓳ. ꓗꓷ ꓟ ꓙꓵ, ꓕꓯ ꓮ ꓟꓬ, ꓙꓲ ꓟ ꓟꓵꓽ ꓛꓵꓽ ꓔꓯ ꓟꓶ ꓡꓰ ꓐꓬ ꓡꓰ ꓝꓲ ꓟ ꓒꓬꓱꓼ ꓡꓰ ꓓꓴ ꓙꓳ ꓡꓳ ꓐꓰ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ꓿ ꓮ ꓘꓶ. ꓛꓲ ꓤ ꓟꓳ ꓢꓲ ꓠꓬꓲ ꓮ ꓠꓱ ꓣꓳ ꓮ ꓡꓰ ꓔꓶ ꓜꓽ ꓔꓶ ꓓꓳ ꓟ ꓚꓱ, ꓔꓯ ꓣꓱ ꓢꓲ ꓟꓬꓱꓽ ꓬꓰ ꓠ, ꓟ ꓙꓳ ꓟ ꓥ ꓡꓳ꓿
ꓝꓮꓲ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓝꓲ ꓟ ꓕꓲ ꓫꓵꓽ ꓠꓬ ꓬꓲ ꓝꓲ ꓟꓽ ꓥ ꓟꓶ ꓞ ꓮ ꓟꓬ, ꓞ ꓟ ꓪꓴ. ꓠꓬꓲ ꓟꓵꓽ ꓘꓴꓽ ꓗꓪ ꓔꓬ ꓟ ꓟꓬ ꓢꓶ ꓗꓪ ꓐꓰ ꓟꓳ ꓪ ꓟꓽ ꓓ ꓟ ꓑꓶ ꓓꓲ ꓡꓯ ꓓꓲ ꓮ ꓟꓬ, ꓠꓬ ꓫꓵꓻ ꓡꓰ ꓟ ꓥ ꓡꓳ꓿ ꓕꓱ ꓑꓶ ꓓꓲ ꓡꓯꓻ ꓓꓲ ꓠꓬ ꓟꓵꓽ ꓛꓵꓽ ꓙꓲ ꓡꓰ ꓝꓲ ꓓꓴ ꓒꓬꓱꓼ ꓢꓴ ꓐꓴ ꓥ ꓡꓳ꓿ ꓟꓲ ꓠꓯ ꓠꓬ ꓕꓲ ꓠꓬꓲꓽ ꓡꓰ ꓕꓲ ꓠꓬꓲ ꓒꓳ, ꓔꓬ ꓑ ꓔꓬ ꓟ ꓪꓴ. ꓠꓬꓲ ꓟꓲ ꓠꓯ ꓘꓴꓽ ꓗꓪ ꓬꓲ ꓓꓳꓼ ꓒꓬꓱꓼ ꓡ ꓢꓲ ꓠꓬꓲ ꓟꓵꓽ ꓛꓵꓽ ꓟꓽ ꓙꓲ ꓟ ꓒꓬꓱꓼ ꓡꓰ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓔꓶ ꓜꓽ ꓔꓶ ꓓꓳ ꓟ ꓙꓵ, ꓕꓯ ꓣꓱ ꓟ ꓙꓵ, ꓕꓯ ꓢꓷ. ꓠꓲ, ꓙꓳ ꓙꓳ ꓡꓰ ꓔꓶ ꓢꓲ ꓠꓬꓲ ꓣꓳ ꓖꓳ ꓓꓱꓽ ꓐꓱ ꓶ ꓙꓲ ꓖꓴ ꓙꓳ ꓟ ꓔꓯ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
