ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓑꓮꓲ ꓠꓽ ꓦꓬꓼ ꓠꓬꓲ ꓕꓯ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓗꓪ ꓐꓰ ꓟꓸ ꓠꓲꓽ ꓚꓺ ꓖꓶ ꓔ ꓡꓳ= ꓠꓬꓲꓸ ꓠꓬꓲ ꓵ ꓠꓹ ꓟ ꓪꓴ-ꓢ ꓶ ꓓꓳ ꓫꓱꓹ ꓓꓳ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓠꓹ ꓟ ꓡ ꓞꓳ ꓮ ꓟꓬꓹ ꓠꓬ ꓜꓲꓼ ꓡ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓡꓰ ꓚꓺ ꓟ ꓟꓽ ꓥ꓾ ꓡ ꓞꓳ ꓮ ꓟꓬꓹ ꓗꓪ ꓐꓰ ꓠꓻ ꓫꓵ ꓠꓻ ꓢꓴ ꓮ ꓟꓬꓹ ꓔꓯ ꓥ ꓟꓲ ꓠꓻ ꓫꓬꓹ ꓖꓶ ꓟ ꓥꓳ= ꓟꓸ ꓟꓲꓽ ꓚ ꓟ ꓡꓰ ꓟꓽ ꓥ꓾ ꓕꓱ ꓟ ꓔꓯ ꓚꓵ ꓚꓵ ꓬꓰ ꓢꓴ ꓥ ꓡꓳ꓾ ꓚꓬꓴ ꓙ ꓢꓴ ꓐꓯ ꓟ ꓡꓰ ꓐꓰ ꓞꓳ ꓤ ꓐꓴ ꓔꓯ ꓠꓻ ꓫꓬꓹ ꓖꓶ ꓔ ꓟ ꓥ ꓡꓳ=
ꓖꓳ ꓟ ꓑꓶ ꓓꓴ ꓪꓴ-ꓢ ꓬꓲ ꓠꓵꓻ ꓠꓲꓹ ꓔꓯ ꓡ ꓞꓳ ꓐꓴ ꓚꓵ ꓚꓵ ꓘꓳꓹ ꓣꓴ ꓟꓶ ꓡꓳ= ꓪꓴ-ꓢ ꓡꓰ ꓙꓵ_ ꓟ ꓔꓶꓸ ꓗꓪ ꓣꓳ ꓠꓬ ꓟꓽ ꓙꓲ_ ꓟ ꓗꓪ ꓐꓰ ꓶꓻ ꓡꓰ ꓟ ꓥꓳ= ꓣꓳ ꓦꓬꓼ ꓟꓷꓼ_ ꓟ ꓙꓵꓹ꓾ ꓔꓬ ꓟꓽ ꓢ ꓟ ꓙꓵꓹ꓾ ꓣꓳ ꓬꓲ ꓟꓶ ꓕꓲ ꓠꓬꓲ ꓗꓪ ꓣꓳ ꓣꓱ ꓬꓯꓼ ꓔꓬ ꓟ ꓙꓵꓹ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓯꓼ ꓗꓪ ꓔꓬ ꓟ ꓥꓳ= ꓣꓱ ꓬꓯꓼ ꓟ ꓙꓵꓹ ꓘꓴ ꓗꓪ ꓪꓴ-ꓢ ꓔꓬ ꓠꓬꓲ ꓣꓳ ꓤꓶꓻ ꓔꓯ ꓟꓬ ꓠꓬꓲ ꓐꓲ ꓞꓲꓼ ꓡꓰ ꓝꓲ_ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓥꓪꓸ ꓐꓰ ꓑ ꓑ ꓔꓯ ꓶ ꓥꓳ ꓙꓱ_ ꓟ ꓗꓪ ꓐꓰ ꓖꓶ ꓜ_ ꓟ ꓗꓪ ꓐꓰ ꓟꓬ ꓡ ꓝꓲ_ ꓡꓳ= ꓡ ꓞꓳ ꓮ ꓟꓬꓹ ꓐꓳ ꓡꓰ ꓗꓪ ꓛꓲ ꓖꓶ ꓜ ꓓꓳ ꓗ ꓠꓯꓸ ꓬꓲ ꓦꓶ ꓬꓲ ꓒꓯ 12 ꓠꓳꓸ ꓘꓴꓽ ꓗꓪ ꓛꓲ ꓖꓳ ꓫ ꓟꓶ_ ꓟ ꓥꓳ= ꓢꓲ ꓒ ꓬꓰ-ꓢꓴ ꓠꓬ ꓕꓱ ꓡꓱ ꓡ ꓞꓳ ꓮ ꓟꓬ ꓔꓯ ꓕꓱ ꓡꓱ ꓖꓶ ꓜ ꓐ ꓡ ꓟ ꓥꓳ= ꓪꓴ-ꓢ ꓡꓰ ꓬꓰ_ ꓟ ꓟꓬꓱꓽ ꓔꓯ ꓬꓲ ꓬꓰ ꓗꓷ ꓟ ꓥꓳ꓾ ꓣꓳ ꓔꓯ ꓥ ꓟꓲ ꓬꓲ ꓡꓰ ꓐꓰ ꓬꓰ ꓠꓹ ꓟ ꓟꓸ ꓖꓶ ꓗꓷ ꓟ ꓥꓳ=
ꓮ ꓟꓶ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓠꓲꓹ ꓦꓬꓹ ꓟ ꓑꓶ ꓓꓴ ꓫꓸ ꓢꓴ ꓟꓷꓼ ꓢꓴ ꓔꓳꓹ ꓜꓳ ꓔꓬ ꓢꓴ ꓐꓴ ꓔꓯ ꓓꓵꓽ ꓙ ꓠꓹ ꓟ ꓮ ꓘꓶꓸ ꓣꓳ ꓚꓵ_ ꓡꓳ= ꓚꓲ ꓛꓬ ꓠꓯꓼ ꓗꓪ ꓠꓱꓸ ꓐꓯꓼ ꓢꓴ ꓔꓯ ꓬꓰ ꓙ ꓖꓶ ꓙ ꓠꓹ ꓟ ꓟꓽ ꓙꓳ꓾ ꓕꓲ ꓐꓱ ꓠꓬ ꓣꓱꓽ ꓖꓴ ꓟꓽ ꓓ ꓠꓽ ꓗꓪ ꓛꓲ ꓙꓳ ꓢ ꓔꓬ ꓢ ꓢꓲ ꓠꓬꓲ ꓟꓬ ꓠꓬꓲ ꓠꓬ ꓫꓸ ꓔꓬ ꓟ ꓥꓳ= ꓠꓱꓸ ꓐꓯꓼ ꓢꓴ ꓫꓸ ꓔꓬ ꓟ ꓔꓯ ꓣꓳ ꓟꓽ ꓓꓵ ꓙ ꓟ ꓑꓶ ꓓꓴ ꓫ ꓙꓵ ꓟꓷꓼ ꓙꓵ ꓟ꓾ ꓟꓽ ꓔꓱꓹ ꓟ ꓕꓱ ꓡꓱ ꓟꓬ ꓡ ꓔꓬ ꓡꓳ= ꓖꓳ ꓟ ꓡꓰ ꓐꓰ ꓮ ꓟꓶ ꓕꓱ ꓕꓲ ꓘꓳꓼ ꓢꓲ ꓫꓬ ꓟ ꓙꓴꓐꓲꓡꓰꓰ ꓘꓳꓼ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓬꓰ ꓔꓬ ꓟ ꓟꓬꓱꓽ꓾ ꓣꓳ ꓬꓰ ꓙ ꓔꓳꓹ ꓙ ꓟ ꓟꓬꓱꓽ ꓕꓱ ꓟ ꓔꓯ ꓟꓳꓸ ꓖꓶ ꓔ ꓡꓳ= ꓣꓳ ꓠꓬ ꓣꓳ ꓠꓯꓼ ꓗꓪ ꓙꓳ_ ꓟ ꓑ ꓑ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓖꓶ ꓜ ꓠꓹ ꓟ ꓟꓬ ꓠꓬꓲ ꓐꓷ ꓠꓬꓲ ꓟꓬ ꓡ ꓠꓹ ꓟ ꓐꓱ ꓶ ꓘꓴ ꓔ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓪꓴ-ꓢ ꓗꓴꓷꓼ ꓠꓶꓽ ꓡ ꓠꓹ ꓟ ꓚꓱꓹ ꓔꓯ ꓣꓳ ꓐꓯ ꓒꓬꓱ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓢꓯꓼ ꓟꓬ ꓑ ꓑ ꓥ ꓟ꓾ ꓕꓱ ꓟ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵ ꓔꓯ ꓫꓵꓻ ꓟ ꓗꓪ ꓐꓰ ꓚꓬꓴ ꓙ ꓖꓶ ꓡ ꓟ ꓥꓳ=
ꓕꓱ ꓬꓲ ꓠꓯꓹ ꓟ ꓚꓵ ꓘꓶꓽ ꓓꓽ ꓟ ꓠꓬ ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓶ ꓥꓳꓽ ꓙꓱ_ ꓟ ꓟꓲ-ꓢ ꓪꓽ ꓘꓴ ꓙꓵꓹ ꓘꓴꓽ ꓗꓪ ꓬꓰ ꓟ ꓥꓳ= ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓘꓰꓸ ꓟ ꓠꓬ ꓪꓴ-ꓢ ꓚꓬꓴ ꓙ_ ꓟ ꓡꓯꓼ ꓫꓴ ꓔꓯ ꓟꓸ ꓖꓶ_ ꓟ ꓥꓳ= ꓠꓲꓹ ꓠꓵ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓦꓬꓼ ꓟꓷꓼ ꓔꓬ ꓟ ꓔꓯ ꓐꓳ ꓡꓰ ꓝꓲ_ ꓟ ꓪꓴ-ꓢ ꓡꓰ ꓖꓶ ꓜ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓑ ꓑ ꓥ ꓡꓳ= ꓘꓳꓹ ꓣꓴ ꓓꓴ ꓬꓰ ꓡꓯ= ꓠꓴ ꓪ ꓮ ꓙꓵ ꓐꓱ ꓶ ꓥ ꓡꓳ= ꓢꓯꓼ ꓟꓬ ꓑ ꓑ ꓥ ꓟ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓣꓳ ꓠꓬ ꓬꓲ ꓐꓱ ꓶ ꓢꓯꓸ ꓔꓬ ꓠ ꓔ ꓡꓳ= ꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓻ ꓙ ꓗꓷ ꓗꓸ ꓠꓯꓸ ꓝꓮꓲ ꓢꓯꓸ ꓬꓲꓼ ꓡ ꓟ ꓠꓬ ꓬꓲ ꓚꓲ ꓛꓬ ꓣꓳ ꓠꓯꓼ ꓗꓪ ꓡꓯꓼ ꓙꓱ ꓗꓷ ꓟ ꓥꓳ=
ꓣꓳ ꓥ ꓟꓲ ꓪꓴ-ꓢ ꓔꓯ ꓘꓳꓹ ꓣꓴ ꓠꓹ ꓟ ꓚꓰꓼ ꓟꓶ ꓡꓰ ꓢꓴ ꓥ ꓟ ꓔꓯ ꓓꓵꓼ ꓙ ꓓꓴ ꓬꓰ ꓡꓯ= ꓙꓲ-ꓢꓴ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓢꓲ꓾ ꓪꓴ-ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓑ ꓑ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ_ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓣꓳ ꓮ ꓙꓵ ꓠꓲꓹ ꓟ ꓘꓴꓽ ꓠꓯꓼ ꓗꓪ ꓔꓬ ꓝꓲ ꓓꓴ ꓬꓰ ꓡꓯ= ꓟꓲ ꓠꓯ ꓡ ꓞꓳ ꓮ ꓙꓵ ꓬꓲ ꓚꓬꓴ ꓙ ꓟ ꓟꓬꓱꓽ ꓗꓪ ꓐ ꓐ ꓡ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓡꓰ ꓖꓶ ꓜ_ ꓟ ꓗꓪ ꓣꓳ ꓘꓳꓹ ꓣꓴ ꓐ ꓡ ꓠꓹ ꓟ ꓘꓴ ꓔ ꓟ ꓥꓳ= ꓑꓮꓲ ꓠꓯꓼ ꓗꓪ ꓘꓴ ꓟꓶ ꓡꓰ ꓢꓴ ꓠꓬ ꓶ ꓛꓳ ꓫꓱꓸ ꓙꓳ_ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓗꓪ ꓐꓰ ꓪꓴ-ꓢ ꓡꓰ ꓟꓸ ꓖꓶ ꓡ ꓟ ꓠꓵꓻ ꓠꓲꓹ ꓬꓲ ꓢꓷꓸ ꓡꓰ ꓓꓴ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ=
