ꓕꓲ ꓦꓲ., ꓡ ꓞꓳ ꓗ, ꓛꓲ ꓠ, ꓟ ꓐꓱ ꓶ ꓠꓬ ꓠꓵ, ꓠꓲ.,꓾ ꓕꓲ ꓣꓳ ꓛꓳ ꓕꓲ ꓣꓳ ꓬꓰ ꓙ ꓡꓯꓼ ꓘꓳˍꓟ꓾ ꓜꓲꓼ ꓘꓴ ꓠꓲ.,꓾ ꓫꓱ, ꓤ ꓟ꓾ ꓕꓱ ꓡꓱ ꓮ ꓟꓬ, ꓫꓵꓽ ꓣꓱꓽ ꓯꓬꓼ ꓡꓳ꓿

ꓕꓲ ꓣꓳ ꓣꓱꓽ ꓯꓬꓼ ꓟ ꓔꓯ ꓕꓲ ꓣꓳ ꓢꓷ. ꓠꓯꓼ ꓟ꓾ ꓒꓴ ꓗ. ꓬꓰˍꓟ꓾ ꓕꓲ ꓣꓳ ꓐꓯ ꓠꓲ., ꓫꓵꓽ ꓟ ꓐꓯ ꓖꓶ ꓔꓯ ꓠꓽ ꓠ, ꓘꓴ ꓣꓴ ꓟ꓾ ꓣꓳ ꓛꓲ ꓚꓬ ꓐꓱ ꓶ ꓡꓰ ꓟꓽ ꓓꓵ ꓙ ꓬꓲ ꓐꓱ ꓶ ꓔꓯ ꓥˍꓟꓲ ꓙ ꓟꓶ ꓖꓶ ꓟ꓾ ꓟꓽ ꓞꓲ ꓫ. ꓪ ꓕꓱ ꓔꓯ ꓥˍꓟꓲ ꓠꓲ., ꓟ ꓢ ꓡꓰ ꓠꓽ ꓕꓱ ꓟ꓾ ꓕꓱ ꓡꓱ ꓫꓵꓽ ꓮ ꓟꓬ, ꓠꓬ ꓕꓲ ꓦꓲ., ꓡ ꓞꓳ ꓠꓬꓲꓽ ꓖꓳ ꓚ ꓗꓪ ꓮ ꓘꓶꓽ ꓣꓱꓼ ꓯꓬꓼ ꓡꓳ꓿

ꓕꓲ ꓦꓲ., ꓡ ꓞꓳ ꓘꓴꓽ ꓠꓯ, ꓗꓪ ꓒꓬꓱꓽ ꓠꓲ., ꓫꓵꓽ ꓟ ꓐꓰ ꓐꓯ ꓠꓲ., ꓫꓵꓽ ꓟ ꓬꓰ ꓠꓲ., ꓟ ꓮ ꓙꓵꓽ ꓔꓯ ꓒꓴ ꓒꓴ ꓡꓯ ꓡꓯ ꓙ ꓡꓯ ꓘꓳ, ꓠꓽ ꓗ, ꓡꓳ꓿ ꓦꓲ., ꓢꓲ ꓒ ꓥˍꓟꓲ ꓦꓲ., ꓢꓲ ꓟ ꓥˍꓟꓲ ꓦꓲ., ꓘꓴ ꓡ ꓞꓳ ꓔꓯ ꓮ ꓕꓯ ꓥˍꓟꓲ ꓬꓲ ꓙꓵꓽ ꓖꓶ ꓪ ꓡꓰ ꓝꓲ꓿ꓤ ꓠꓱ ꓤ ꓐꓴ ꓐꓰ ꓕꓲ ꓠꓲ, ꓕꓲ ꓪ ꓜꓽ ꓜ ꓪ ꓡꓰ ꓝꓲ꓿ ꓤ ꓠꓱ ꓤ ꓐꓴ ꓟꓽ ꓙꓵꓽ ꓟ ꓜꓳ ꓟ ꓬꓰ ꓔꓬ ꓐꓭ ꓠꓬ ꓙꓲˍꓟ ꓚꓱ, ꓗꓪ ꓙ ꓫꓱ, ꓡ ꓠ, ꓟ ꓟ. ꓖꓶ ꓓꓴ ꓬꓰ꓿ ꓕꓲ ꓦꓲ., ꓘꓴ ꓠꓯ, ꓗꓪ ꓥꓳꓽ ꓡꓰ ꓟ ꓙꓳ ꓡ ꓐꓭ ꓠꓬ ꓖ ꓖꓶ ꓠꓲ, ꓙꓳ ꓠꓽ ꓗ, ꓟ ꓔꓯ ꓟ. ꓖꓶ ꓪ ꓡꓰ ꓝꓲ꓿ ꓡꓳ, ꓬꓰ ꓟ ꓕꓲ ꓙꓵꓽ ꓔꓯ ꓥꓳꓽ ꓡꓰ ꓟ ꓚꓱ, ꓔꓯ ꓮ ꓟꓶ ꓕꓲ ꓕꓲ ꓙꓵꓽ ꓗꓪ ꓕ ꓐꓯ ꓪ ꓡꓰ ꓝꓲ꓾ ꓡ ꓠ, ꓟ ꓗꓪ ꓕꓱ ꓡꓱ ꓟꓽ ꓗꓷ ꓡ ꓠ, ꓟ ꓐꓱ ꓶ ꓙ ꓟꓳ ꓙꓰ ꓙꓳˍꓟ ꓗꓪ ꓙ ꓟꓳ ꓑ ꓡ ꓠ, ꓟ ꓟ. ꓖꓶ ꓐꓱ ꓖꓶ ꓡꓯ ꓘꓳ, ꓓꓴ ꓬꓰ ꓠꓽ ꓗ, ꓡꓳ꓿

ꓦꓲ., ꓘꓴ ꓕꓲ ꓟ ꓒꓬꓱꓽ ꓡꓲꓳ ꓐꓯ ꓠꓬ ꓤ ꓫꓱ ꓤ ꓠꓱ ꓔꓬ ꓡ ꓥꓳ꓾  ꓕꓱ ꓡꓱ ꓣꓳ ꓤ ꓠꓱ ꓐꓴ ꓪꓴ ꓡ ꓕꓯ ꓬꓲ ꓪ ꓐꓱ ꓶ ꓙꓲ ꓖꓴ ꓙꓳˍꓟ ꓕꓶ. ꓙꓰꓼ ꓗꓪ ꓛꓲ ꓠ, ꓟ ꓐꓱ ꓶ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓢꓯꓽ ꓕꓵꓼ ꓖꓶ ꓠꓽ ꓗ, ꓟ ꓥ ꓡꓳ꓿ ꓕꓱ ꓡꓱ ꓢꓯꓽ ꓕꓵꓼ ꓟ ꓗꓪ ꓠꓵ, ꓠꓲ., ꓬꓰ ꓙ ꓡꓯ ꓘꓳ, ꓟ ꓠꓬ ꓮ ꓓꓰ ꓣꓳ.. ꓚꓵ ꓡꓳ꓿ ꓮ ꓕꓯ ꓥˍꓟꓲ ꓣꓳ ꓕꓲ ꓦꓲ., ꓢꓴ ꓔꓯ ꓠꓲ., ꓠꓵ ꓡꓳ ꓐꓰ ꓐꓯ ꓪ ꓡꓰ ꓝꓲ ꓡꓯ꓿ ꓝꓮꓲ ꓕꓲ ꓫꓵꓽ ꓟ ꓠꓬ ꓣꓳ ꓛꓲ ꓛꓬ ꓥˍꓟꓲ ꓧꓪ ꓖꓳ ꓓꓱ ꓔꓬ ꓢ ꓠ, ꓟ ꓮ ꓘꓶꓽ ꓣꓳ.. ꓚꓵ ꓡꓳ꓿ ꓣꓳ ꓧꓪ ꓖꓳ ꓓꓱ ꓔꓬ ꓢ ꓗ, ꓛꓲ ꓕꓯ ꓢꓲ꓾ ꓦꓲ., ꓘꓴꓽ ꓡ ꓞꓳ ꓔꓯ ꓥˍꓟꓲ ꓗ, ꓛꓲ ꓟ ꓬꓰ ꓖꓶ ꓐ ꓡ ꓥꓳ꓿ ꓖꓳ ꓟ ꓡꓰ ꓐꓰ ꓟꓽ ꓞꓲ ꓫ. ꓓꓴ ꓙꓳ ꓡ ꓕꓯ ꓥˍꓟꓲ ꓕꓲ ꓠꓲ, ꓕꓲ ꓪ ꓫ. ꓓꓴ ꓕꓱ ꓟ ꓔꓯ ꓧꓪ ꓡꓰ ꓠ, ꓢꓯꓼ ꓕꓵꓼ ꓠꓽ ꓗ, ꓡꓳ꓿ ꓕꓱ ꓟ ꓡꓰ ꓐꓰ ꓗ, ꓛꓲ ꓓꓴ ꓙꓳ ꓡ ꓕꓯ ꓥˍꓟꓲ ꓕꓲ ꓠꓲ, ꓕꓲ ꓪ ꓗ, ꓛꓲ ꓪ ꓡꓰ ꓝꓲ꓿ꓕꓱ ꓡꓱ ꓬꓰ ꓔꓬ ꓐꓭ ꓠꓬ ꓕꓲ ꓦꓲ., ꓡ ꓞꓳ ꓘꓴ ꓠꓯ, ꓗꓪ ꓢꓲ ꓡꓲꓽ ꓗ, ꓟ ꓔꓯ ꓣꓴ ꓣꓴ ꓟꓶ ꓡ ꓥꓳ꓿ ꓦꓲ., ꓘꓴ ꓕꓲ ꓟ ꓠꓬ ꓢꓲ ꓜꓲꓼ ꓕꓲ ꓜꓲꓼ ꓔꓶ. ꓟ ꓡꓰ ꓐꓰ ꓥ ꓡꓳ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲ ꓜꓲꓼ ꓪꓴ ꓡ ꓠ, ꓟ ꓐꓱ ꓶ ꓬꓲ., ꓙꓬ ꓕꓲ ꓖꓶ ꓟ ꓡꓰ ꓐꓰ ꓦꓲ., ꓕꓲ ꓟ ꓔꓬ ꓢ ꓗ, ꓛꓲ ꓠ, ꓟ ꓐꓱ ꓶ ꓠꓵ, ꓠꓲ., ꓬꓰ  ꓙ ꓡꓯ ꓘꓳ, ꓟ  ꓖ ꓖꓶ ꓡꓯ ꓘꓳ, ꓟ ꓕꓱ ꓡꓱ ꓫꓵꓽ ꓗꓪ ꓐꓰ ꓡꓰ ꓢꓯꓼ ꓔꓬ ꓝꓲ ꓐ ꓡ ꓢꓲ꓾ ꓗ, ꓛꓲ ꓟ ꓦꓲ., ꓘꓴ ꓒꓬꓱꓽ ꓡ ꓝꓲ ꓐ ꓡ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ ꓪ꓿