“ꓥꓳ ꓡꓳꓸ ꓓꓴ ꓐꓰ ꓙꓻ ꓫꓱꓽ ꓔꓬ ꓢꓴ” ꓬꓲ ꓕꓲ ꓟꓴ ꓗꓪ ꓐꓰ 2025 ꓘꓳꓼ 6 ꓦ ꓟ 22 ꓠꓬꓲ ꓕꓯ ꓬꓮꓠꓖꓳꓠ ꓡꓳ ꓒꓱ ꓢꓔꓸ ꓟꓮꓣꓬ ꓪꓽ ꓘꓴ ꓦꓲꓻ ꓓꓽ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓑꓮꓲ ꓐꓰ ꓙꓴꓐꓲꓡꓰꓰ ꓑꓮꓲ ꓔꓯ ꓬꓰ ꓓꓳ ꓡꓰ ꓟ ꓥꓳ=
ꓟꓬ-ꓟ ꓗ-ꓕꓳ-ꓡꓲꓗ ꓔꓲꓺ ꓒ ꓓꓽ ꓜꓴ (ꓚꓐꓚꓟ) ꓗꓪ ꓐꓰ ꓢꓽ ꓡ ꓙꓵ ꓥ ꓟ ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ ꓑꓮꓲ ꓔꓯ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓔꓲꓺ ꓒ ꓓꓽ ꓙꓵꓽ ꓔꓶꓸ 17 ꓟ ꓔꓯ ꓟꓳꓸ ꓢꓲ ꓠꓬꓲ ꓔꓲꓺ ꓒ ꓓꓽ 22 ꓣꓳ ꓾ ꓔꓲꓺ ꓒ ꓓꓽ ꓐꓴ ꓔꓲꓺ ꓒ ꓐꓴ ꓐꓰ Msgr. Andrea Ferrante ꓐꓴ ꓙꓴꓐꓲꓡꓰꓰ ꓗꓸ ꓘꓶꓽ ꓠꓯꓼ ꓗꓪ ꓓꓵꓽ ꓡꓰ ꓟ ꓥꓳ= ꓝꓮꓲ ꓕꓱ ꓟꓲ-ꓢ ꓪꓽ ꓘꓴ ꓙꓵꓹ ꓑꓮꓲ ꓗꓪ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓥ ꓟꓲ ꓮ ꓟꓬꓹ ꓜꓲꓼ ꓡ ꓟ ꓥꓳ=
ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ ꓚꓧꓮꓣꓡꓰ ꓐꓳ ꓡꓰ ꓓꓽ ꓪꓴꓸ ꓘꓶꓽ ꓒꓴ_ ꓟ ꓗꓪ “ꓮ ꓟꓬꓹ ꓟꓽ ꓐ ꓡ ꓘꓴ ꓥ ꓟꓲ ꓔꓲꓺ ꓒ ꓓꓽ ꓙꓵꓽ ꓔꓶꓸ 17 ꓟ ꓔꓯ ꓟꓳꓸ ꓢꓲ ꓔꓲꓺ ꓒ ꓓꓽ 22 ꓣꓳ ꓔꓹ ꓐ ꓡ ꓟ ꓥꓳ= ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓑꓮꓲ ꓥ ꓡꓳ= ꓟꓬ-ꓟ ꓗꓴꓷꓼ ꓠꓬ ꓫ ꓙꓵ ꓓꓴ ꓬꓲ ꓘꓶꓽ ꓗꓪ ꓔꓳꓹ ꓜꓳ ꓔꓬ ꓟ ꓥꓳ= ꓟꓬ-ꓟ ꓗꓴꓷꓼ ꓐꓰ ꓟꓲ ꓠꓯ ꓢꓲ ꓡꓲꓹ ꓠꓹ ꓟ ꓐꓱ ꓶ ꓥ ꓟꓲ ꓪꓽ ꓘꓴ ꓓꓴ ꓬꓰ ꓡꓯ꓾” ꓐꓰ ꓐꓯ ꓔ ꓡꓳ=
Msgr. Andrea Ferrante ꓶꓼ ꓓꓳ ꓫꓱꓹ ꓓꓳ ꓚꓺ ꓟ ꓗꓪ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ 2024 ꓘꓳꓼ ꓘ-ꓣꓲ-ꓢ-ꓟꓯ ꓢꓲ ꓫꓬ ꓟ ꓗꓸ ꓘꓶꓽ ꓒꓴ_ ꓟ ꓙꓵꓹ ꓕꓯ ꓬꓲ ꓐꓯ ꓘꓶꓽ ꓗꓪ ꓐꓰ “ ꓥꓳ ꓡꓳꓸ ꓓꓴ ꓠꓬ ꓠꓲꓹ ꓟ ꓐꓬ ꓡꓰ ꓓꓴ ꓟꓽ ꓙꓳ” ꓐꓰ ꓙꓴꓐꓲꓡꓰꓰ ꓑꓮꓲ ꓔꓯ ꓒꓴ ꓖꓶ ꓗꓷ ꓟ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓔꓯ ꓥꓪ ꓠꓴ ꓓꓵꓽ ꓙ ꓔꓬ ꓡꓳ= ꓕꓱ ꓥꓳ ꓡꓳꓸ ꓓꓴ ꓙꓵꓹ ꓗꓪ ꓠꓬ ꓪꓴ-ꓢ ꓐꓰ ꓙꓻ ꓡꓯ ꓘꓳ ꓜꓲ ꓡꓯ ꓘꓳ ꓟ ꓗꓪ ꓐꓰ ꓗꓹ ꓛꓲ ꓓꓴ ꓔꓯ ꓧꓪ ꓠꓹ ꓟ ꓐꓰ ꓣꓳ ꓔꓯ ꓘꓴ ꓢꓲ ꓠꓬꓲ ꓦ ꓢꓯꓼ ꓕꓲ ꓒꓳꓹ ꓗꓪ ꓝꓮꓲ ꓦ ꓢꓯꓼ ꓣꓴ ꓠꓹ ꓟ ꓐꓰ ꓣꓳ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓟꓲ ꓘꓴ ꓔ ꓟ ꓥ ꓡꓳ= ꓙꓴꓐꓲꓡꓰꓰ ꓑꓮꓲ ꓕꓱ ꓟ ꓔꓯ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓣꓱ ꓛꓰ ꓗꓪ ꓐꓰ ꓟꓶ ꓟ ꓥꓳ= “ ꓣꓳ ꓠꓯꓼ ꓗꓪ ꓔꓳꓹ ꓜꓳ ꓡ ꓟ꓾ ꓓꓵꓽ ꓙ ꓫꓸ ꓓꓴ ꓔꓯ ꓠꓲꓹ ꓟ ꓘꓴꓽ ꓗꓪ ꓐꓰ ꓣꓳ ꓕꓲ ꓠꓲꓹ ꓕꓲ ꓪ ꓢꓯꓼ ꓕꓵꓼ ꓢꓲ ꓠꓬꓲ ꓣꓳ ꓔꓯ ꓚꓬꓴ ꓙ ꓢꓲ ꓥꓳ ꓡꓳꓸ ꓓꓴ ꓖꓶ ꓡ ꓟ ꓪꓴ-ꓢ ꓔꓯ ꓫ ꓟꓳ ꓓꓴ ꓬꓰ ꓡꓯ= ꓖꓳ ꓟ ꓡꓰ ꓐꓰ ꓢꓲ ꓡꓲꓹ ꓗꓹ ꓛꓲ_ ꓟ ꓤꓶꓻ ꓐꓱ ꓶ ꓶ ꓓꓰ ꓓꓴ ꓬꓰ ꓡꓯ꓾” ꓐꓰ ꓢꓯꓼ ꓖꓶ ꓔ ꓟ ꓥꓳ=
ꓟꓬ-ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓟꓵꓽ ꓙꓴ ꓚꓵꓹ ꓟ꓾ꓬꓲꓻ ꓙꓬ ꓙꓵ_ ꓟ ꓡꓰ ꓐꓰ ꓗꓴꓷꓼ ꓢꓰꓼ ꓡꓯꓽ ꓘꓳ ꓓꓴ ꓗꓴꓷꓼ ꓫꓵ ꓪꓴ ꓐꓰ ꓫꓸ ꓔꓬ ꓢꓴ ꓧꓪ ꓖꓳ ꓓꓱ ꓕꓲ ꓒꓳꓹ ꓠꓻ ꓔꓬ ꓢꓴ ꓦ ꓕꓲ ꓒꓳꓹ ꓢꓯꓼ ꓐ ꓢꓴ Radio Veritas Asia Myanmar Services ꓐꓰ ꓚꓐꓚꓟ ꓗꓪ ꓐꓰ ꓕꓲ ꓝꓸ ꓦ ꓕꓲ ꓒꓳꓹ ꓗꓪ ꓪꓽ ꓘꓴ ꓔꓹ ꓡ ꓢꓴ ꓮ ꓙꓵ ꓢꓴ ꓔꓯ ꓥ ꓟꓲ ꓕꓱ ꓟ ꓔꓯ ꓬꓲ ꓚꓰ ꓣꓴ ꓢꓲ ꓐꓯ ꓖꓶ ꓗꓷ ꓟ ꓥꓳ=
Msgr. Andrea Ferrante ꓬꓲ ꓶꓼ ꓓꓳ ꓫꓱꓹ ꓓꓳ ꓗꓪ ꓢꓲ ꓫꓬ ꓖꓳ ꓓꓱ ꓑ ꓑ ꓠꓬ ꓮ ꓘꓶꓸ ꓛꓲ ꓬꓲ ꓠꓯꓹ ꓟ ꓣꓳꓸ ꓚꓵ_ ꓟ ꓔꓯ ꓐꓯ ꓖꓶ ꓔ ꓡꓳ= “ꓮ ꓙꓵ ꓢꓴ ꓠꓯꓼ ꓗꓪ ꓬꓲ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓔꓯ ꓟꓸ ꓖꓶ ꓗꓷ ꓟ ꓥꓳ꓾” “ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓠꓬꓲꓸ ꓠꓸ ꓓꓴ ꓬꓰ ꓡꓯ꓾” ꓠꓵꓻ ꓠꓲꓹ ꓔꓬ ꓟ ꓑꓶ ꓓꓴ ꓮ ꓙꓵ ꓠꓬ ꓟꓬ ꓠꓬꓲ ꓙꓲ_ ꓟ ꓔꓯ ꓒꓳꓹ ꓐ ꓡ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓣꓳ ꓥꓳ ꓡꓳꓸ ꓓꓴ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ= ꓢꓲ ꓫꓬ ꓑ ꓑ ꓠꓬ ꓙꓲ ꓢꓴ ꓢꓲ ꓤ ꓐꓴ ꓮ ꓙꓵ ꓔꓯ ꓕꓲ ꓠꓲꓹ ꓕꓲ ꓪ ꓐꓰ ꓪꓴ-ꓢ ꓢꓲ ꓫꓬꓹ ꓟ ꓡ ꓞꓳ ꓒꓬꓱꓼ ꓡ ꓝꓲ ꓟ ꓥꓳ= ꓕꓱ ꓢꓲ ꓫꓬ ꓖꓳ ꓓꓱ ꓑ ꓑ ꓠꓯꓼ ꓗꓪ ꓚꓵ ꓚꓵ ꓪꓴ-ꓢ ꓔꓬ ꓟ ꓔꓯ ꓙꓵꓻ ꓡꓳ ꓐꓰ ꓐꓯ ꓔ ꓡꓳ=
ꓟꓬ ꓔꓶ ꓐ-ꓕꓲ-ꓟꓲ-ꓪꓴ (ꓟ-ꓘꓳ 10ꓽ46-52) ꓢꓲ ꓫꓬ ꓕꓳ ꓶ ꓔꓯ ꓓꓵ ꓙ ꓔꓱꓹ ꓕ ꓢꓲ ꓠꓬꓲ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓬꓲ ꓐꓯ ꓘꓶꓽ ꓗꓪ ꓐꓰ “ꓪꓴ-ꓢ ꓟꓽ ꓐꓯ ꓙ ꓟ ꓶꓼ ꓓꓰ ꓘꓶꓽ ꓠꓬ ꓟꓽ ꓙꓳ꓾” ꓐꓯ_ ꓟ ꓬꓲ ꓕꓲ ꓟꓴ ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ= ꓢꓲ ꓒ ꓬꓰ-ꓢꓴ ꓡꓰ ꓟꓬ ꓔꓶ ꓐ-ꓕꓲ-ꓟꓲ-ꓪꓴ ꓔꓯ ꓠ ꓠꓬꓲ ꓘꓶꓽ “ꓥꓪ ꓔꓯ ꓠꓴ ꓐꓱ ꓶ ꓮ ꓫꓵ ꓬꓰ ꓖꓶ ꓠꓲꓹ ꓫꓵ_ ꓡ?ꓐꓰ ꓠ ꓠꓬꓲ ꓡꓳ꓾ ꓠꓬꓲꓸ ꓠꓬꓲ ꓣꓳ ꓙꓲ ꓢꓴ ꓢꓲ ꓤ ꓐꓴ ꓮ ꓙꓵ ꓔꓯ ꓥ ꓟꓲ ꓕꓱ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓢꓲ ꓫꓬ ꓖꓳ ꓓꓱ ꓑ ꓑ ꓗꓪ ꓔꓬ ꓢꓲ ꓠꓬꓲ ꓠ ꓠꓬꓲ ꓔ ꓟ ꓥꓳ=
ꓚꓬꓴ ꓙ ꓟꓶ ꓟ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓡ ꓟ ꓥ ꓡꓳ꓾ ꓢꓲ ꓫꓬ ꓢꓴ ꓒꓲ-ꓕꓱ ꓡꓰ “ꓢꓲ ꓒꓽꓳ꓾ ꓥꓪ ꓠꓴ ꓠꓬ ꓮꓽ ꓟ ꓔꓯ ꓙꓰ ꓢꓰꓽ= ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓐꓯ ꓘꓶ ꓠꓬ ꓠꓴ ꓔꓯ_ ꓡꓰ ꓙꓳ_ ꓡꓳ= ꓠꓴ ꓠꓬ ꓪꓴ-ꓢ ꓬꓲ ꓢꓲ ꓫꓬ ꓢꓴ ꓕꓲ ꓣꓳ ꓥ ꓟ ꓥꓪ ꓠꓴꓽ ꓙꓵꓻ_ ꓟꓲ ꓙꓵꓻ ꓗꓷꓳ꓾ ꓢꓷꓸ_ ꓟꓲ ꓢꓷꓸ ꓡꓰꓳ꓾ (ꓬꓳ-ꓦ 6ꓽ68-69) ꓗꓪ ꓙꓵꓻ ꓠꓲꓹ ꓚꓱꓹ ꓡꓳꓸ ꓟꓳ ꓪ ꓡꓳ=
ꓣꓳ ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓵꓻ ꓠꓲꓹ ꓐꓰ ꓠꓵꓻ ꓠꓲꓹ ꓒꓳꓹ ꓖꓶ ꓢꓲ ꓠꓬꓲ ꓗꓴꓷꓼ ꓢꓰꓼ ꓡꓯ ꓘꓳ ꓓꓴ ꓛꓴꓽ ꓙꓳ ꓡꓯ ꓘꓳ ꓓꓴ ꓙꓵꓻ ꓠꓲꓹ ꓢꓯꓼ ꓐ ꓔꓬ ꓢꓴ ꓠꓻ ꓓꓴ ꓡꓰ ꓢꓴ ꓐꓴ ꓔꓯ ꓥꓳ ꓡꓳꓸ ꓓꓴ ꓠꓬꓲ ꓟꓳ ꓓꓴ ꓔꓯ ꓖꓶ ꓐ ꓡ ꓟ ꓥꓳ= ꓕꓱ ꓡꓱ ꓫꓸ ꓔ ꓟ ꓗꓪ ꓡꓳꓹ ꓬꓰ ꓟ ꓙꓵꓹ ꓗꓪ ꓐꓰ ꓮ ꓟꓶ ꓗꓪ ꓛꓲ ꓟꓬ-ꓟ ꓗꓪ ꓢ-ꓢꓲ-ꓠ ꓟꓬꓱꓽ ꓔꓯ ꓢꓯꓼ ꓕꓵꓼ ꓢꓲ ꓘꓴ ꓜꓲꓼ ꓞꓳ ꓟꓬꓱꓽ꓾ ꓢꓷꓸ ꓠꓲꓹ ꓕꓲ ꓒꓳꓹ ꓮ ꓙꓵ꓾ “ꓙꓲ_ ꓟ ꓢꓲꓹ ꓜꓲ ꓢꓲꓹ ꓪꓰ” ꓔꓯ ꓓꓱꓼ ꓡ ꓟ ꓔꓯ ꓥ ꓟꓲ ꓐꓯ ꓖꓶ ꓔ ꓡꓳ= ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓪꓽ ꓘꓴ ꓟ ꓗꓪ ꓐꓰ ꓪ ꓟꓶ_ ꓟ ꓢꓯꓼ ꓪ ꓔꓯ ꓙꓲ ꓢꓴ ꓢꓲ ꓤ ꓐꓴ ꓔꓯ ꓐꓯ ꓖꓶ ꓔ ꓡꓳ= “ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓦꓬꓼ ꓠꓬꓲ ꓠꓯꓼ ꓗꓪ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓙꓰ ꓓꓴ ꓬꓰ ꓡꓯ= ꓬꓲ ꓠꓬ ꓣꓳ ꓔꓯ ꓠꓲꓹ ꓟ ꓗꓳꓸ ꓖꓶ ꓢꓲ ꓙꓲ_ ꓟ ꓔꓯ ꓖꓶ ꓠꓹ ꓟ ꓮ ꓕꓯ ꓟꓲ ꓡꓳꓸ ꓔꓬ ꓡꓳ꓾” ꓐꓰ ꓢꓯꓼ ꓖꓶ ꓔ ꓟ ꓥꓳ=
ꓘꓴ ꓜꓲꓼ ꓞꓳ ꓟꓬꓱꓽ ꓠꓬ ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓢꓳ ꓣꓴ ꓢꓲ ꓠꓬꓲ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓠꓹ ꓟ ꓐꓰ ꓚꓲ ꓛꓬ ꓠꓬ ꓠꓵꓻ ꓠꓲꓹ ꓔꓯ ꓖꓶ ꓠꓹ ꓟ ꓟꓸ ꓖꓶ ꓠꓹ ꓟ ꓥ ꓡꓳ꓾ ꓙꓳꓺ ꓠꓯꓹ ꓟ꓾ ꓣꓳ ꓫꓷꓹ꓾ ꓚꓲ ꓛꓬ ꓕꓲ ꓣꓳ ꓡꓰ ꓓꓵ ꓙ ꓟ ꓗꓪ ꓐꓰ ꓚꓲ ꓛꓬ ꓔꓯ ꓞꓳꓸ ꓡꓰ ꓝꓲ_ ꓟ꓾ ꓡꓲꓹ ꓙꓰ ꓟꓽ ꓐ ꓡ ꓫꓵ ꓕꓽ ꓗꓷ ꓡꓰ ꓝꓲ꓾ ꓚꓲ ꓛꓬ ꓟꓬꓱꓽ ꓙꓵꓽ ꓪ ꓐꓱ ꓶ ꓫ ꓟꓳ ꓢꓲ ꓫꓱꓸ ꓖꓶ ꓓꓴ ꓬꓰ ꓡꓯ=
Msgr. Ferrante ꓡꓰ ꓶꓼ ꓓꓳ ꓫꓱꓹ ꓓꓳ ꓬꓲ ꓟꓶꓽ ꓗꓪ ꓪꓴ- ꓢ ꓐꓰ ꓣꓳ ꓠꓶ ꓛꓳ ꓕꓲ ꓛꓳ ꓐꓴ ꓔꓯ ꓝꓴꓲ ꓖꓽ ꓖꓶ ꓢꓲ ꓠꓬꓲ ꓠꓲꓹ ꓠꓵ ꓡꓯ ꓘꓳ ꓠꓹ ꓟ ꓐꓱ ꓶ ꓢꓯꓼ ꓖꓶ ꓗꓷ ꓢꓲ ꓠꓬꓲ ꓢꓲ-ꓫꓬ-ꓟ-ꓦ ꓗꓪ ꓐꓰ ꓙ ꓖꓴ ꓧꓳꓽ ꓟꓳꓸ ꓖꓶ ꓢꓲ ꓠꓬꓲ ꓢꓲ ꓫꓬ ꓖꓳ ꓓꓱ ꓑ ꓑ ꓗꓪ ꓔꓬ ꓟ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓐ ꓡ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓡꓰ ꓬꓰ ꓙ ꓖꓶ ꓠꓹ ꓟ ꓶꓼ ꓓꓰ ꓖꓶ ꓗꓷ ꓟ ꓥꓳ=
ꓙꓴꓐꓲꓡꓰꓰ ꓑꓮꓲ ꓟꓲ-ꓢ ꓪꓽ ꓘꓴ ꓙꓵꓹ ꓓꓳ ꓡꓰ ꓗꓸ ꓠꓯꓸ ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ Msgr. Ferrante ꓬꓲ ꓐꓯ ꓘꓶꓽ “ꓣꓳ ꓠꓬ ꓢ-ꓗ-ꓣ-ꓟꓯ ꓶꓼ ꓤ ꓫꓱꓸ ꓤ ꓔꓯ ꓟꓶ ꓟ ꓡꓰ ꓐꓰ ꓣꓳ ꓠꓬ ꓪꓴ-ꓢ ꓠꓯꓼ ꓗꓪ ꓕꓲ ꓠꓲꓹ ꓕꓲ ꓪ ꓙꓻ ꓫꓱ ꓠꓹ ꓟ꓾” ꓔꓯ ꓫ ꓟꓳ ꓐꓰ ꓐꓯ ꓖꓶ ꓗꓷ ꓟ ꓥꓳ=
ꓔꓲꓺ ꓒ ꓓꓽ ꓝꓣꓮꓠꓚꓲꓢ ꓔꓧꓮꓠ ꓔꓴꓠ ꓐꓰ ꓙꓴꓐꓲꓡꓰꓰ ꓑꓮꓲ ꓪꓴꓸ ꓓꓵ ꓣꓱ ꓢꓴ ꓐꓴ ꓟꓬ-ꓟ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓔꓲꓺ ꓒ ꓐꓴ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓬꓲꓸ ꓒꓳꓹ ꓒꓳꓹ ꓗꓪ ꓐꓰ ꓬꓰ ꓙ ꓔꓳꓹ ꓙ ꓡ ꓢꓴ ꓮ ꓙꓵ ꓔꓯ ꓫ ꓟꓳ ꓐꓰ ꓐꓯ ꓔ ꓡꓳ=
ꓟꓬ-ꓟ ꓕꓲ ꓗꓴꓷꓼ ꓡꓱꓼ ꓗꓪ ꓔꓬ ꓟ ꓔꓲꓺ ꓒ ꓓꓽ ꓙꓵꓽ ꓔꓶꓸ ꓐꓰ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓐꓰ ꓙꓴꓐꓲꓡꓰꓰ ꓬꓰ_ ꓟ ꓬꓲꓸ ꓙꓱꓽ ꓐꓴ ꓔꓯ ꓢꓔꓸ ꓟꓮꓣꓬ ꓪꓽ ꓘꓴ ꓦꓲꓻ ꓔꓲꓺ ꓒ ꓐꓴ ꓜꓲꓼ ꓓꓴ ꓐꓳꓹ ꓗꓪ ꓟꓸ ꓖꓶ ꓔ ꓟ ꓥ ꓡꓳ=
