ꓪꓴ-ꓢ ꓟꓽ ꓑꓺ ꓙ ꓟ ꓶꓼ ꓓꓰ ꓢꓯꓼ ꓘꓶꓽ ꓠꓬ ꓟꓽ ꓙꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓟ꓾
ꓕꓲ ꓫꓵ ꓠꓽ ꓡꓲ ꓕꓲ ꓫꓵꓽ ꓠ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯꓽ ꓘꓳ_ ꓟ ꓐꓰ ꓙꓵꓻ ꓠꓲꓹ ꓚꓱꓹ ꓟꓸ ꓖꓶ_ ꓟ ꓙꓵꓹ ꓗꓪ ꓠꓬ ꓢꓲ ꓒꓽ ꓬꓰ-ꓢꓴ ꓬꓲ ꓤꓶꓻ ꓗꓪ ꓐꓰ ꓮ ꓘꓶꓸ ꓣꓳꓸ ꓚꓵ_ ꓟ ꓕꓲ ꓟ ꓥ ꓟ ꓠꓻ ꓫꓬꓹ ꓖꓶ_ ꓟ ꓚꓱꓹ ꓔꓯ ꓔꓱꓹ ꓕ ꓖꓶ ꓗꓷ ꓡꓳꓹ ꓬꓰ ꓟ ꓥꓳ=
ꓕꓱ ꓡꓱ ꓠꓻ ꓫꓬꓹ ꓖꓶ_ ꓟ ꓚꓱꓹ ꓔꓯ ꓟꓳꓸ ꓔꓲꓺ ꓒ ꓪ ꓔꓲ ꓡꓰ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓢꓲ ꓒ ꓬꓰ-ꓢꓴ ꓙꓻ ꓫꓱ ꓕꓯ ꓐ-ꓕꓲ-ꓟꓲ-ꓪꓴ ꓟꓬ ꓔꓶ ꓕꓲ ꓣꓳ ꓔꓯ ꓫꓬꓹ ꓖꓶ ꓠꓹ ꓟ ꓘꓴ ꓢꓲ ꓶꓼ ꓓꓰ ꓟ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓔꓱꓹ ꓕ ꓢꓯꓼ ꓖꓶ ꓗꓷ ꓟ ꓥꓳ=
ꓢꓲ ꓒ ꓬꓰ-ꓢꓴ ꓠꓬ ꓕꓱ ꓡꓱ ꓣꓳ ꓓꓰ ꓡꓰ ꓢꓴ ꓐꓴ ꓠꓯꓼ ꓗꓪ ꓬꓯꓼ ꓡ ꓢꓲ ꓠꓬꓲ ꓬꓲ ꓪ ꓤꓶꓻ ꓟꓴ ꓡ ꓠꓹ ꓟ꓾ ꓮ-ꓓꓯ ꓝꓴꓲ ꓑꓶ ꓓꓴ ꓝꓴꓲ ꓓꓰ ꓡꓰ ꓢꓴ ꓐꓴ ꓔꓯ ꓚꓬꓴ ꓙ ꓠꓹ ꓟ ꓔꓯ ꓟꓳꓸ ꓖꓶ_ ꓟ ꓐꓰ ꓖꓳ ꓟ ꓡꓰ ꓐꓰ ꓔꓲꓺ ꓒ ꓪ ꓔꓲ ꓡꓰ ꓟꓬ ꓔꓶ ꓥ ꓟ ꓐ-ꓕꓲ-ꓟꓲ-ꓪꓴ ꓐꓯ_ ꓟ ꓬꓲ ꓟꓬꓱꓺ ꓚꓱꓹ ꓔꓯ ꓝꓮꓲ ꓐꓯ ꓟꓸ ꓖꓶ_ ꓡꓳ= ꓐ-ꓕꓲ-ꓟꓲ-ꓪꓴ ꓐꓯ_ ꓟ ꓠꓬ ꓟꓬꓱꓺ ꓓꓳ ꓙꓳ_ ꓟ ꓤ ꓐꓰ ꓥ ꓡꓳ= ꓕꓱ ꓟꓬ ꓔꓶ ꓠꓬ ꓮ ꓡꓰ ꓶ ꓓꓰꓽ ꓠꓹ ꓟ ꓬꓲ ꓢꓷꓸ ꓔ ꓡꓳ=
ꓞꓳ ꓜꓴ ꓞꓳ ꓟꓯꓼ ꓬꓲ ꓔꓬ ꓗꓪ ꓛꓲ ꓡ ꓕꓯ ꓢꓲ ꓒ ꓬꓰ-ꓢꓴ ꓐ ꓡ ꓟ ꓥꓳ꓾ꓖꓳ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓮꓽ ꓟ ꓥ ꓟ ꓔꓯ ꓬꓲ ꓢꓷꓸ ꓔ ꓟ ꓑꓶ ꓓꓴ ꓶ ꓓꓰ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓘꓴ_ ꓟ ꓶ ꓓꓰꓽ ꓘꓶꓽ ꓔꓯ ꓑ ꓙ ꓢꓲ ꓐꓯ ꓖꓶ_ ꓡꓳ= ꓕꓱ ꓟ ꓠꓬ ꓠꓬꓲꓸ ꓠꓬꓲ ꓣꓳ ꓔꓯ ꓓꓵꓽ ꓙ ꓢꓷꓸ ꓡꓰ ꓠꓹ ꓟ ꓠꓬ ꓚꓲ ꓛꓬ ꓟꓽ ꓢꓷꓸ ꓔ ꓟ ꓙꓵꓹ ꓗꓪ ꓪꓴ-ꓢ ꓔꓯ ꓶ ꓓꓰ ꓪꓽ ꓘꓴ ꓡꓳ= ꓣꓳ ꓢꓷꓸ ꓠꓹ ꓟ ꓠꓬ “ꓪꓴ-ꓢ ꓟꓽ ꓑ ꓙ_ ꓟ ꓶꓽ ꓓꓰ ꓘꓶꓽ ꓠꓬ ꓟꓽ ꓙꓳ” ꓐꓯ_ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓟꓬ ꓔꓶ ꓐ-ꓕꓲ-ꓟꓲ-ꓪꓴ ꓠꓯꓼ ꓗꓪ ꓟꓽ ꓙꓰ ꓙꓰ ꓬꓲ ꓠꓯꓼ ꓗꓪ ꓡꓰ ꓡ ꓝꓲ_ ꓟ ꓥꓳ= ꓟꓲ ꓠꓯ ꓗꓪ ꓠꓲꓹ ꓡꓱ_ ꓟ꓾ ꓙꓵꓻ ꓟ ꓔꓯ ꓒꓰꓹ ꓗꓷ ꓢꓲ ꓠꓬꓲ ꓠꓻ ꓫꓬꓹ ꓟꓶ ꓠꓹ ꓟ ꓬꓲ ꓠꓯꓼ ꓗꓪ ꓙꓵꓻ ꓠꓲꓹ ꓐꓰ ꓡꓯ ꓐꓰ ꓐꓯ_ ꓟ ꓬꓲ ꓢꓷꓸ ꓡꓰ ꓓꓴ ꓥ ꓡꓳ=
ꓕꓱ ꓟꓬ ꓔꓶ ꓡꓰ ꓐꓰ ꓥ ꓡꓳ꓾ ꓣꓳ ꓤꓶꓻ ꓗꓪ ꓥ ꓟꓲ ꓣꓳ ꓤꓶꓻ ꓔꓯ ꓗꓽ ꓕ ꓖꓶ_ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓜꓲ ꓠꓹ ꓟ ꓙꓰ ꓠꓹ ꓟ ꓐꓱ ꓶ ꓟꓲ ꓕꓯ ꓗꓪ ꓐꓰ ꓗꓽ ꓕ ꓔꓬ ꓟ ꓥ ꓡꓳ= ꓣꓳ ꓬꓰ ꓠ ꓔ ꓟ ꓠꓬ ꓕꓱ ꓟꓬ ꓔꓶ ꓡꓰ ꓐꓰ ꓣꓳ ꓠꓯꓼ ꓗꓪ ꓢꓯꓼ ꓐ_ ꓟ ꓮ ꓙꓵ ꓔꓯ ꓢꓲ ꓒ ꓬꓰ-ꓢꓴ ꓟꓲ ꓕꓯ ꓗꓪ ꓣꓳ ꓒꓴ ꓖꓶ ꓢꓲ ꓐꓯ ꓟꓸ ꓖꓶ ꓠ ꓔ ꓡꓳ= ꓕꓱ ꓟ ꓠꓬ ꓫꓬꓹ ꓖꓶ ꓟꓶ ꓠꓹ ꓟ ꓐꓱ ꓶ ꓮ ꓘꓶꓸ ꓣꓳꓸ ꓚꓵ_ ꓟ ꓬꓲꓸ ꓪꓴꓸ ꓕꓲ ꓔꓳꓹ ꓥ ꓡꓳ=
ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓢꓲ ꓒ ꓬꓰ-ꓢꓴ ꓡꓰ ꓟꓬ ꓔꓶ ꓔꓯ ꓠ ꓠꓬꓲ_ ꓟ “ꓥꓪ ꓔꓯ ꓠꓴ ꓐꓱ ꓶ ꓮ ꓫꓵꓽ ꓬꓰ ꓖꓶ ꓠꓲꓹ ꓫꓵ_ ꓡ? ꓐꓰ ꓠ ꓠꓬꓲ_ ꓕꓯ ꓟꓬ ꓔꓶ ꓡꓰ ꓥꓪ ꓠꓬꓲ ꓟꓳ ꓡ ꓠꓲꓹ ꓫꓵ_ ꓡꓳ꓾ ꓐꓰ ꓥ ꓡꓳ= ꓟꓬ ꓔꓶ ꓬꓲ ꓶ ꓓꓰ_ ꓟ ꓗꓪ ꓠꓬ ꓬꓲ ꓟꓬ ꓢꓶ ꓠꓬꓲ ꓟꓳ ꓠꓲꓹ ꓫꓵ_ ꓟ ꓡꓰ ꓟꓽ ꓞꓲ ꓬꓲ ꓟꓬꓱꓺ ꓓꓳ ꓔꓯ ꓥ ꓟꓲ ꓝꓮꓲ ꓪ ꓠꓹ ꓟ ꓶ ꓓꓰ_ ꓟ ꓥ ꓡꓳ=
ꓣꓳ ꓟꓲ ꓠꓯ ꓡ ꓞꓳ ꓥ ꓟꓲ ꓠꓬꓲꓸ ꓞ_ ꓟ ꓤꓶꓻ ꓗꓪ ꓐꓰ ꓣꓳ ꓤꓶꓻ ꓬꓲ ꓒꓵ ꓟꓬꓱꓺ ꓓꓳꓽ ꓔꓯ ꓝꓮꓲ ꓧꓪ ꓢꓴ ꓡꓰ ꓥ ꓡꓳ= ꓟꓬ ꓔꓶ ꓐ-ꓕꓲ-ꓟꓲ-ꓪꓴ ꓡꓰ ꓐꓰ ꓙꓵꓻ ꓠꓲꓹ ꓗꓪ ꓐꓰ ꓣꓳ ꓠꓬ ꓚꓬꓴ ꓙ ꓟꓶ_ ꓡꓳ꓾ ꓢꓲ ꓒ ꓬꓰ-ꓢꓴ ꓬꓲ ꓠꓻ ꓫꓬꓹ ꓖꓶ_ ꓟ ꓡꓰ ꓣꓳ ꓔꓯ ꓡꓲꓹ ꓙꓰ ꓝꓲ_ ꓡꓳ= ꓟꓬ ꓔꓶ ꓔꓯ ꓢꓲ ꓒ ꓬꓰ-ꓢꓴ ꓠꓻ ꓫꓬꓹ ꓖꓶ ꓖꓶ_ ꓥ ꓟꓲ ꓬꓲ ꓠꓯꓼ ꓗꓪ ꓛꓳ ꓠꓹ ꓟ ꓟꓽ ꓘꓴ꓾ ꓬꓰ-ꓢꓴ ꓠꓬ ꓣꓳ ꓔꓯ ꓢꓲ ꓠꓹ ꓟ ꓬꓲ ꓚꓱꓹ ꓮ ꓟꓬꓹ ꓖꓶ ꓔ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓟꓬ ꓔꓶ ꓖꓳ ꓕꓲ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓛꓳ ꓙꓰ_ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓠꓻ ꓫꓵ ꓠꓻ ꓔꓬ ꓢꓴ ꓫꓸ ꓙꓵ ꓢꓲ ꓬꓲ ꓚꓱꓹ ꓟꓶ ꓡꓰ ꓔꓬ ꓟ ꓕꓲ ꓦꓲꓻ ꓢꓴ ꓐꓴ ꓢꓲ ꓒ ꓬꓰ-ꓢꓴ ꓔꓯ ꓧꓪ ꓟꓳ ꓢꓲ ꓠꓻ ꓫꓬꓹ ꓟꓶ ꓠꓹ ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ ꓘꓴ ꓢꓲ ꓠꓬꓲ ꓕꓲ ꓫꓵ ꓠ ꓡꓲ ꓕꓲ ꓫꓵ ꓠꓽ ꓠ ꓢꓽ ꓠꓬꓲ ꓘꓴ ꓜꓲꓼ ꓞꓳ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓐꓰ ꓙꓵꓻ ꓠꓲꓹ ꓚꓱꓹ ꓟꓸ ꓖꓶ_ ꓟ ꓔꓯ ꓬꓲ ꓟꓶꓽ ꓢꓰꓼ ꓗꓷ ꓟ ꓥꓳ=
