ꓬꓲꓼ ꓔ ꓬꓲꓼ ꓟꓶ ꓙꓵ, ꓟꓽ ꓡꓳꓼ ꓕꓯ ꓣꓳ ꓖꓳ ꓓꓱꓽ ꓗꓪ ꓮ ꓡꓲ ꓗꓷ ꓡˍ ꓡ?
ꓣꓳ ꓕꓲꓽ ꓦꓬꓼ ꓤ ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓗꓷ ꓡꓰ ꓠꓬ ꓝꓮꓲ ꓕꓲ ꓠꓬꓲ ꓗꓪ ꓧꓶ. ꓕꓯ ꓬꓲꓼ ꓟꓶ ꓐꓳ ꓔ ꓟ ꓡꓰ ꓟꓽ ꓫꓱ.ꓳ꓿ ꓠꓲ, ꓟ ꓥ ꓟꓲ ꓔꓬ ꓘꓶꓻ ꓡꓶ ꓡ꓾ ꓖꓳ ꓓꓱꓽ ꓗꓪ ꓟꓲ ꓢꓯꓼ ꓟꓽ ꓙꓳ ꓟ ꓡꓰ ꓗ, ꓡꓳ꓿
ꓕꓱ ꓟ ꓠꓬ ꓕꓲꓽ ꓦꓬꓽ ꓤ ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓗꓷ ꓡꓰˍ ꓕꓯ ꓒꓬꓱꓼ ꓡˍ ꓟ ꓚꓱ, ꓥ ꓕꓯ ꓠꓽ꓾ ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓟ ꓬꓲꓼ ꓦꓬꓼ ꓠꓬꓲ ꓟꓶ ꓤ ꓗꓷ ꓡˍ ꓕꓯ ꓮ ꓡꓲ ꓫꓵꓽ ꓒꓬꓱꓼ ꓡ ꓓ, ꓡ ꓐꓯ ꓟ ꓔꓯ ꓝ. ꓢꓲ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓬꓲꓼ ꓔ ꓟ ꓬꓲꓼ ꓟꓶˍ ꓟ ꓠꓬ ꓣꓳ ꓖꓳ ꓓꓱꓽ ꓢꓯꓼ꓾ ꓪꓴ. ꓠꓶ. ꓐꓰ ꓠꓲ, ꓟ ꓢꓯꓼ ꓚꓱ, ꓐꓱ ꓶ ꓮ ꓘꓶ. ꓬꓳ. ꓚꓰꓽˍ ꓟ ꓡꓰ ꓐꓰ ꓖꓳ ꓓꓱꓽ ꓗꓪ ꓫꓵꓽ ꓢꓯꓼ ꓔꓲ ꓟꓴ. ꓗꓷ ꓡꓰ ꓠ ꓬꓰ ꓖꓶˍ ꓟ꓾ ꓧꓳꓣꓟꓳꓠꓰꓢ ꓐꓴ ꓔꓯ ꓔꓲ ꓟꓴ ꓗꓷ ꓡꓰ ꓝꓲˍ ꓟ ꓐꓰ ꓖꓳ ꓓꓱꓽ ꓠꓯꓸꓼ ꓗꓪ ꓟꓬꓱꓽ ꓬꓰ ꓚꓱ, ꓐꓴ ꓗꓪ ꓬꓰ ꓙ ꓖꓶ ꓔꓬ ꓟ ꓥ ꓡꓳ꓿
ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓟ ꓟꓬꓽ ꓡꓰˍ ꓕꓯ ꓣꓳ ꓖꓳ ꓓꓱꓽ ꓗꓪ ꓕꓱ ꓡꓱ ꓫꓵꓽ ꓟꓽ ꓙꓲꓻ ꓟ ꓒꓬꓱꓼ ꓡ ꓝꓲ ꓗꓴ.ˍ ꓡꓳ꓿
ꓪꓴ. ꓠꓶ. ꓔꓯ ꓐꓬ ꓡꓰ ꓝꓲˍ ꓟ
ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓟ ꓬꓲꓼ ꓦꓬꓼ ꓠꓬꓲ ꓟꓬꓽ ꓡˍ ꓕꓯ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶꓻˍ ꓟ ꓐꓰ ꓠꓲ, ꓟ ꓙꓬˍ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓟ ꓡꓰꓽ ꓟꓽ ꓞꓲ꓾ ꓚꓲ. ꓟꓶ ꓫ.ˍ ꓟ ꓟꓲ ꓡꓰ, ꓢꓻˍ ꓟ꓾ ꓕꓲ ꓫꓵꓽ ꓫꓵꓽ ꓔꓯ ꓢꓳ ꓣꓴ ꓫ.ˍ ꓟ꓾ ꓫꓵꓽ ꓪꓴꓽ ꓒꓬꓱꓼ ꓡˍ ꓕꓯ ꓥ ꓟꓲ ꓫꓬ, ꓔꓱ, ꓟꓽ ꓐ ꓡ ꓟ꓾ ꓕꓱ ꓡꓱ ꓫꓵꓽ ꓪꓴ. ꓠꓶ. ꓟꓬꓱꓽ ꓬꓰ ꓚꓱ, ꓐꓴ ꓔꓯ ꓥ ꓟꓲ ꓐꓬ ꓡꓰ ꓝꓲˍ ꓟ ꓥ ꓡꓳ꓿
ꓟꓳꓼ ꓡꓳ ꓙꓵ, ꓕꓯ ꓪꓴ. ꓠꓶ. ꓗꓪ ꓡꓳꓽ ꓡˍ ꓟ ꓬꓲ ꓓꓳꓼ ꓐꓴ ꓐꓴ ꓔꓯ ꓟꓶꓽ ꓘꓶ ꓬꓲꓼ ꓔ ꓕꓯ ꓪꓴ. ꓠꓶ. ꓠꓬ ꓣꓴ ꓦ ꓖꓶˍ ꓟ ꓥ ꓡꓳ꓿ ꓬꓲ ꓓꓳꓼ ꓑꓣꓳꓔꓰꓲꓠ ꓐꓴ ꓪꓴ. ꓠꓶ. ꓗꓪ ꓮ ꓘꓶ. ꓟꓬꓽ ꓡˍ ꓠꓬ ꓢ. ꓖꓶ ꓗꓪ ꓬꓲ ꓞꓲꓼ ꓙꓳ ꓢꓴ ꓗꓪ ꓒꓬꓱꓼ ꓡ ꓗꓴ.ˍ ꓟ ꓮꓡꓢꓧꓰꓲꓟꓰꓣ ꓠꓻ ꓒꓬꓱꓼ ꓡ ꓚꓱ, ꓔꓯ ꓟꓴ ꓓꓯꓻ ꓡ ꓝꓲˍ ꓡꓳ꓿
ꓫꓵꓽ ꓓꓯꓻ ꓠꓻ ꓒꓬꓱꓼ ꓡ ꓚꓱ, ꓟꓬꓽˍ ꓟ
ꓬꓲꓼ ꓔ ꓬꓲꓼ ꓟꓶˍ ꓟ ꓠꓬ ꓫꓵꓽ ꓢꓯꓼ꓾ ꓫꓵꓽ ꓘꓴꓽ ꓗꓪ ꓟ ꓬꓲ ꓞꓶꓻ ꓢꓯꓼ ꓐꓰ ꓞꓼ ꓐꓳ ꓐꓬꓽ ꓢꓯꓼ ꓐꓴ ꓔꓯ ꓔꓲꓺ ꓟꓴ. ꓗꓷ ꓡꓰ ꓠ ꓬꓰˍ ꓟ ꓗꓪ ꓬꓳ. ꓚꓰꓽˍ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲꓼ ꓔ ꓬꓲꓼ ꓟꓶ ꓙꓵ, ꓟꓽ ꓡꓳꓼ ꓟ ꓠꓬ ꓟꓶ ꓫꓵ ꓡˍ ꓕꓯ ꓫꓵꓽ ꓓꓯꓻ ꓠꓻ꓾ ꓢꓰ,‐ꓛꓬꓳ ꓠꓻ꓾ ꓫꓵꓽ ꓘꓴꓽ ꓗꓪ ꓬꓲ ꓞꓶꓻ ꓢꓯꓼ ꓟꓬꓽ ꓡˍ ꓟ꓾ ꓒ. ꓢ ꓡꓰ (ꓘꓪꓽ ꓟꓬꓽ ꓙꓲ ꓡꓰ ꓟ) ꓟ ꓔꓯ ꓒꓬꓱꓼ ꓡ ꓝꓲ ꓗꓴ.ˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓬꓲꓼ ꓔ ꓬꓲꓼ ꓟꓶ ꓙꓵ, ꓟꓽ ꓡꓳꓼ ꓗꓷ ꓡꓰˍ ꓕꓯ ꓖꓳ ꓓꓱꓽ ꓠꓬ ꓣꓳ ꓖꓳ ꓓꓱꓽ ꓐꓱ ꓶ ꓙꓲˍ ꓟ ꓜꓽ ꓓꓴ ꓢꓶ. ꓟꓽ ꓞꓲ ꓟꓽ ꓙꓲꓻ ꓟ ꓜꓽ ꓓꓴ ꓐꓴ ꓔꓯ ꓡꓰꓽ ꓪ ꓜꓲ ꓜꓽ ꓠꓲ, ꓫꓵ ꓡ ꓝꓲˍ ꓡꓳ꓿
ꓖꓳ ꓓꓱꓽ ꓢꓯꓼ ꓔꓯ ꓐꓽ ꓡꓰ ꓝꓲˍ ꓟ
ꓬꓲꓼ ꓔ ꓬꓲꓼ ꓟꓶˍ ꓟ ꓐꓰ ꓣꓳ ꓖꓳ ꓓꓱꓽ ꓢꓯꓼ ꓠꓬ ꓝ. ꓡꓯ ꓘꓳ ꓓ, ꓡꓳ꓿ ꓬꓲꓼ ꓟꓶ ꓔꓬ ꓕꓯ ꓖꓳ ꓓꓱꓽ ꓠꓬ ꓖꓳ ꓓꓱꓽ ꓠꓯꓸꓼ ꓗꓪ ꓟ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓠ ꓬꓰ ꓝꓲˍ ꓟ ꓡꓰꓽ ꓟꓽ ꓞꓲꓺ꓾ ꓖꓳ ꓓꓱꓽ ꓗꓪ ꓙꓳˍ ꓟ ꓢꓯꓼ ꓔꓯ ꓥˍ ꓟꓲ ꓪ ꓜꓲ ꓪꓽ ꓠꓬꓲ ꓡ ꓝꓲˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓟ ꓢꓯꓼ ꓠꓬ ꓬꓲ ꓑ ꓟꓲ ꓡꓰ ꓢꓻˍ ꓟ꓾ ꓖꓳ ꓓꓱꓽ ꓗꓪ ꓟ ꓚꓰꓡꓡꓢ ꓐꓰ ꓧꓪꓽ ꓘꓴ. ꓐꓴ ꓔꓯ ꓫꓬ, ꓔꓱ, ꓖꓶˍ ꓟ꓾ ꓠꓱ. ꓫꓳ. ꓟ. ꓗꓪ ꓐꓰ ꓓꓵꓽ ꓡˍ ꓟ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶˍ ꓟ꓾ ꓕꓱ ꓡꓱ ꓫꓵꓽ ꓟꓬꓱꓽ ꓬꓰ ꓖꓶˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓬꓲꓼ ꓔ ꓬꓲꓼ ꓟꓶ ꓙꓵ, ꓟꓽ ꓡꓳꓼ ꓟ ꓟꓬꓽ ꓡˍ ꓕꓯ ꓖꓳ ꓓꓱꓽ ꓗꓪ ꓢꓯꓼ ꓟꓽ ꓙꓳ ꓗꓷ ꓡꓰ ꓢꓲ ꓠꓬꓲ ꓠꓻ ꓒꓬꓽ ꓓꓵꓽ ꓡꓰ ꓢꓻˍ ꓟ ꓔꓯ ꓒꓬꓱꓼ ꓡꓰ ꓝꓲ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲ ꓠ, ꓟ ꓐꓱ ꓶ
‐ ꓬꓲꓼ ꓔ ꓙꓵ, ꓔꓯ ꓠꓱ. ꓐꓱ ꓬꓳ. ꓚꓰꓽˍ ꓟ ꓬꓲ ꓙꓵ, ꓡꓰ ꓐꓰ ꓒꓵꓽ ꓠꓯ,ˍ ꓟ ꓥ ꓡꓳ꓿
‐ ꓬꓲꓼ ꓔ ꓙꓵ, ꓕꓲ ꓙꓵ, ꓔꓯ ꓚꓲ. ꓔ ꓢꓲ ꓠꓬꓲ ꓬꓲꓼ ꓔ ꓬꓲꓼ ꓟꓶˍ ꓟ ꓬꓰ꓿ ꓟꓶ ꓘꓶ 10 ꓙꓵ, ꓗꓪ ꓬꓲꓼ ꓔ ꓢꓲ ꓠꓯꓼ ꓠꓯꓼ 6ꓽ00 ꓙꓵ, ꓗꓪ ꓔꓴ꓿ ꓕꓲꓽ ꓦꓬꓼˍ ꓡꓰ ꓖꓳ ꓡꓱ ꓬꓰ꓿
ꓟꓬꓱꓽ ꓠꓽ ꓠꓬꓲ꓾ ꓙꓳꓽ ꓦꓲꓻ ꓚꓵ.ˍ ꓟ ꓠꓬꓲ ꓗꓪ ꓥˍ ꓟꓲ ꓖꓳ ꓟ ꓡꓰ ꓐꓰ ꓬꓲꓼ ꓔ ꓠꓯ,ˍ ꓟ ꓥ ꓡꓳ꓿ ꓠꓬꓲ. ꓟꓰ ꓠꓽ ꓕꓲꓽ ꓠꓬꓲ ꓡꓱꓸꓼ ꓮ ꓫꓵꓽˍ ꓟꓲ ꓬꓰ ꓟꓽ ꓛꓵ ꓟ ꓑꓶ. ꓓꓴ ꓟꓶ ꓤ ꓬꓲꓼ ꓔ ꓥꓳ꓾ ꓐꓯ ꓢꓲ ꓕꓲꓽ ꓟꓳ ꓡꓳ ꓕꓯ ꓔꓴˍ ꓟ ꓔꓯ ꓥ ꓟꓲ ꓕꓽ ꓬꓰ꓿ ꓮ ꓕꓯ ꓟꓲ ꓬꓲꓼ ꓔ ꓙꓵ, ꓔꓯ ꓬꓲ ꓙꓵ, ꓙꓳ ꓙꓳ ꓡꓰꓽ ꓬꓰ ꓠꓯ,ˍ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓪꓴ. ꓠꓶ. ꓔꓯ ꓣꓱꓽ ꓬꓰ ꓚꓱ, ꓛꓳꓻ ꓫꓱꓽ ꓚꓱ, ꓕꓲꓽ ꓟ ꓖꓶˍ ꓟ ꓥ ꓢꓲ ꓠꓬꓲ꓾ ꓕꓲ ꓠꓬꓲˍ ꓡꓰ ꓬꓰ ꓙꓰˍ ꓥꓳ ꓐꓯ ꓠꓬ ꓣꓳ ꓖꓳ ꓓꓱꓽ ꓠꓬ ꓔꓴ ꓝꓲ. ꓛꓲ ꓡˍ ꓕꓯ ꓬꓲ ꓓꓻ ꓬꓲ ꓬꓲ ꓔꓱ, ꓬꓲ ꓧꓪ. ꓛꓲꓽ ꓗꓴ. ꓡ ꓢꓲ ꓠꓬꓲ꓾ ꓬꓲꓼ ꓔ ꓬꓲꓼ ꓟꓶ ꓙꓵ, ꓛꓲ ꓡˍ ꓕꓯ ꓟꓲ ꓬꓲ ꓔꓱ, ꓬꓲ ꓬꓲ ꓓꓻ ꓬꓲ ꓬꓲꓼ ꓟꓶ ꓕꓳ, ꓡˍ ꓗꓴ.ˍ ꓟ ꓥ ꓡꓳ꓿
ꓮ ꓠꓱ ꓫꓵꓽ ꓫꓵ ꓟꓽ ꓣꓱꓽ꓾ ꓑꓧꓳꓠꓰ ꓟꓽ ꓙꓳ ꓟ ꓦꓬꓼ ꓠꓬꓲ ꓕꓯ ꓣꓳꓽ ꓮꓽ ꓑ ꓮ ꓤ ꓐꓴ ꓮꓽ ꓐ ꓮ ꓟ ꓐꓴ ꓖꓳ ꓡꓱ ꓬꓰ ꓗꓳ. ꓡˍ ꓟ ꓥ ꓡꓳ꓿
‐ꓕꓲꓽ ꓦꓬꓼ ꓬꓲꓼ ꓔ ꓙꓵ, ꓔꓯ ꓡꓳꓼ ꓠ ꓛꓲ ꓖꓶ꓿
‐ ꓬꓲꓼ ꓔ ꓦ. ꓕꓯ ꓔꓦ꓾ ꓑꓧꓳꓠꓰ꓾ ꓚꓳꓟꓑꓴꓔꓰꓣ ꓕꓱ ꓡꓱ ꓫꓵꓽ ꓣꓱꓽˍ ꓟ ꓔꓯ ꓤ ꓟꓳ꓿
ꓟꓶ ꓘꓶ ꓬꓲꓼ ꓔ ꓙꓵ, ꓗꓪ ꓖꓳ ꓓꓱꓽ ꓠꓬ ꓟꓰꓡꓮꓔꓳꓠꓲꓠ ꓐꓰ ꓘꓴˍ ꓟ ꓧꓳꓣꓟꓳꓠꓰ ꓔꓯ ꓓꓳ ꓡ ꓝꓲˍ ꓡꓳ꓿
ꓧꓳꓣꓟꓳꓠꓰ ꓕꓱ ꓟ ꓠꓬ ꓟꓶ ꓘꓶ ꓠꓬꓲ ꓟꓳꓻ ꓓꓴ ꓟꓽ ꓙꓳ ꓗꓷ ꓡꓰˍ ꓕꓯ ꓓꓳ ꓡˍ ꓟ ꓥ ꓢꓲ ꓠꓬꓲ꓾ ꓬꓲꓼ ꓟꓶ ꓡꓰ ꓝꓲˍ ꓟ ꓧꓳꓣꓟꓳꓠꓰ ꓕꓲꓽ ꓟ ꓥ ꓡꓳ꓿
ꓔꓦ꓾ ꓑꓧꓳꓠꓰ꓾ ꓚꓳꓟꓑꓴꓔꓰꓣ ꓐꓴ ꓗꓪ ꓐꓰ ꓓꓳ ꓡˍ ꓟ ꓐꓡꓴꓰ ꓣꓮꓬꓢ ꓮ‐ꓑꓬ‐ꓬꓮꓴ ꓮ ꓡꓲ, ꓔꓯ. ꓠꓬ ꓟꓰꓡꓮꓔꓳꓠꓲꓠ ꓧꓳꓣꓟꓳꓠꓰ ꓓꓳ ꓡˍ ꓟ ꓔꓯ ꓠꓲ. ꓡꓰ ꓝꓲˍ ꓟ ꓑꓶ. ꓓꓴ ꓬꓲꓼ ꓔ ꓬꓲꓼ ꓟꓶˍ ꓕꓯ ꓬꓲꓼ ꓟꓶ ꓫ. ꓡꓰ ꓝꓲˍ ꓡꓳ꓿
‐ ꓚꓳꓝꓝꓰ ꓡꓰ ꓐꓰ ꓚꓮꓝꓰ ꓢꓯꓼ ꓓꓯ,ˍ ꓟ ꓓꓳꓻ ꓓꓴ꓾ ꓬꓲ ꓛꓵꓻ ꓢꓯꓼ ꓮ ꓘꓶ. ꓟꓬꓽˍ ꓟ ꓓꓳꓻ ꓓꓴ ꓕꓱ ꓡꓱ ꓫꓵꓽ ꓐꓴ ꓔꓯ ꓥ ꓟꓲ ꓟꓶ ꓘꓶ ꓙꓵ, ꓗꓪ ꓓꓳꓻˍ ꓟ ꓔꓯ ꓤ ꓟꓳ ꓠ ꓔ ꓡꓳ꓿
ꓬꓲꓼ ꓔ ꓬꓲꓼ ꓟꓶˍ ꓟ ꓠꓬ ꓣꓳ ꓞꓳ ꓙꓳ ꓢꓯ. ꓔꓬ ꓚꓱ, ꓐꓱ ꓶ ꓣꓱꓽ ꓞ,ˍ ꓟ ꓟꓬꓱꓽ ꓕꓲꓽ ꓟ ꓥ ꓡꓳ꓿
ꓣꓳ ꓣꓱꓽ ꓔꓬ ꓟ ꓑꓧꓳꓠꓰ ꓔꓯ ꓬꓲ ꓢꓯꓼ ꓧꓳꓽ ꓖꓶ ꓠ ꓗ, ꓟ ꓡꓰ ꓐꓰ꓾ ꓕꓲ ꓠꓬꓲ ꓡꓱꓸꓼ ꓙꓰ ꓙꓰ ꓡ ꓡ ꓬꓰˍ ꓟ꓾ ꓟꓬꓱꓽ ꓬꓰ ꓔꓬ ꓪˍ ꓟ ꓣꓳꓽ ꓖꓳ ꓓꓱꓽ ꓐꓰ ꓠꓲ, ꓟ ꓠꓬꓲꓽ ꓟ ꓡꓱꓸꓼ ꓔꓯ ꓟꓶꓽ ꓘꓶ ꓬꓲꓼ ꓔ ꓟ ꓗꓪ ꓐꓰ ꓬꓲ ꓢꓯꓼ ꓐꓲ ꓡꓰ ꓠ ꓧꓳꓽ ꓖꓶ ꓠ ꓔ ꓟ ꓥ ꓡꓳ꓿
ꓬꓲꓼ ꓟꓶ ꓔꓬ ꓕꓯ ꓣꓳ ꓠꓬ ꓬꓲꓼ ꓟꓶ ꓔꓬ ꓐꓯ ꓥ ꓟꓲ꓾ ꓖꓳ ꓓꓱꓽ ꓕꓲ ꓟ ꓡꓱꓸꓼ ꓠꓬ ꓬꓲ ꓟꓬꓱꓽ ꓬꓲ ꓬꓰ ꓔꓬ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓚꓲ. ꓛꓬ ꓬꓲꓼ ꓔ ꓬꓲꓼ ꓟꓶ ꓙꓵ, ꓔꓯ ꓮꓽ ꓔꓳ ꓔꓳ ꓒꓬ, ꓗꓷ ꓢꓲ ꓠꓬꓲ꓾ ꓬꓲꓼ ꓔ ꓬꓲꓼ ꓟꓶ ꓙꓵ, ꓟꓽ ꓡꓳꓼ ꓟ꓾ ꓕꓲ ꓢ ꓘꓪ ꓗꓪ ꓡꓰꓽ ꓬꓲꓼ ꓔ ꓟ꓾ ꓕꓱ ꓡꓱ ꓫꓵꓽ ꓬꓲ ꓫꓱ, ꓙꓳˍ ꓠꓬ꓾ ꓟꓶ ꓫꓵ ꓡˍ ꓕꓯ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓟꓽ ꓙꓲꓻ ꓟ ꓚꓱ, ꓒꓬꓱꓼ ꓡ ꓗꓴ.ˍ ꓡꓳ꓾ ꓐꓯ ꓟ ꓔꓯ ꓚꓬ, ꓪ ꓝꓲ ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓠꓬꓲ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓠ ꓣꓱꓽ ꓬꓰ ꓚꓱ, ꓗꓪ ꓮ ꓘꓶ. ꓬꓳ. ꓚꓰꓽˍ ꓟ ꓚꓱ, ꓕꓲꓽ ꓟ ꓥ ꓟ ꓬꓲ ꓙꓵ, ꓙꓳ ꓙꓳ ꓡꓰꓽ ꓬꓲꓼ ꓔ ꓟ꓾ ꓔꓴˍ ꓟ ꓬꓲ ꓫꓱ,꓾ ꓛꓳ ꓫꓱꓽ ꓚꓱ, ꓔꓯ ꓫꓬ, ꓦꓵꓻ ꓙꓰ ꓡꓯ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
