ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓦꓮꓔꓲꓚꓮꓠ ꓣꓮꓓꓲꓳ ꓓꓳꓽ ꓫꓵ: ꓢꓯꓼ ꓐꓯ ꓒꓬꓱꓻ ꓔꓶꓸ ꓗꓪ ꓚꓳ ꓙꓰ_ ꓟ꓾
ꓕꓱ ꓕꓲ ꓘꓳꓼ 6 ꓦ ꓟ 19 ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓬꓲ ꓔꓲꓺ ꓒ ꓙꓵꓽ ꓪ ꓘꓳꓹ ꓣꓳ ꓟꓶ_ ꓟ 43 ꓘꓳꓼ ꓐꓲ ꓡꓰ ꓟ ꓟꓲ ꓥ ꓡꓳ= ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓔꓲꓺ ꓒ ꓪ ꓔꓲ ꓣꓳꓸ ꓬꓲꓸ ꓚꓰ ꓡ ꓞꓳ ꓐꓴ ꓐꓰ ꓙꓻ ꓡꓯ ꓘꓳ ꓖꓶ_ ꓟ ꓬꓲ ꓔꓶꓸ ꓔꓬ ꓟ Santa Maria di Galeria ꓣꓮꓓꓲꓳ ꓬꓓꓳꓽ ꓫꓵ ꓢꓯꓼ ꓐꓯ ꓒꓬꓱ ꓔꓶꓸ ꓗꓪ ꓚꓳ ꓙꓰ ꓡꓰ ꓟ ꓥꓳ=
ꓕꓱ ꓓꓳꓽ ꓫꓵ ꓢꓯꓼ ꓐꓯ ꓒꓬꓱ ꓔꓶꓸ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓰ ꓜꓲ ꓡꓯ ꓘꓳ ꓗꓷ ꓢꓲ꓾ꓬꓲ ꓢꓯꓼ ꓐꓯ ꓒꓬꓱ ꓔꓶꓸ ꓗꓪ ꓚꓳ ꓙꓰ ꓗꓷ ꓟ ꓥꓳ= ꓕꓱ ꓬꓲ ꓢꓯꓼ ꓐꓯ ꓒꓬꓱ ꓔꓶꓸ ꓔꓯ ꓔꓲꓺ ꓒ ꓪ ꓔꓲ ꓞꓲ ꓠꓬꓲꓽ ꓣꓳ ꓕꓲ ꓣꓳ ꓥ ꓟ ꓑꓲꓴꓢ ꓡꓰ 1957 ꓘꓳꓼ ꓕꓯ ꓫꓬꓹ ꓪꓴꓸ ꓔꓴ ꓗꓷ ꓟ ꓥ ꓢꓲ ꓠꓬꓲ 1991 ꓘꓳꓼ ꓕꓯ ꓥ ꓟꓲ ꓔꓲꓺ ꓒ ꓪ ꓔꓲ ꓙꓳꓧꓠ ꓑꓮꓴꓡ ꓲꓲ ꓡꓰ ꓚꓳ ꓙꓰ ꓗꓷ ꓟ ꓥꓳ=
ꓝꓮꓲ ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓡꓮꓔꓲꓠ ꓮꓟꓰꓣꓲꓚꓮ ꓐꓰ ꓮꓝꓣꓲꓚꓮ ꓗꓪ ꓶꓼ ꓓꓳ ꓫꓱꓸ ꓓꓳ ꓟꓬꓱꓽ ꓟꓯ ꓔꓬ ꓟ ꓙꓵꓹ ꓗꓪ ꓥ ꓟꓲ ꓬꓲ ꓓꓳꓽ ꓮ ꓘꓶꓸ ꓟꓽ ꓛꓲ ꓡ ꓟ ꓗꓪ ꓐꓰ ꓦꓮꓔꓲꓚꓮꓠ ꓗꓪ ꓐꓰ ꓐꓯ ꓒꓬꓱꓽ ꓡ ꓟ ꓓꓳꓽ ꓫꓵ ꓐꓴ ꓔꓯ ꓘꓳꓹ ꓣꓴ ꓟꓶ ꓟ ꓠꓯꓼ ꓗꓪ ꓮ ꓘꓶꓸ ꓛꓲ ꓐꓯ ꓖꓴ ꓟꓽ ꓓ ꓠ ꓗꓪ ꓛꓲ ꓙꓲ ꓖꓴ ꓙꓳ ꓡꓰ ꓟ ꓔꓯ ꓕꓱ ꓟ ꓠꓬ ꓢ-ꓢꓲ-ꓠ ꓟꓬꓱꓽ ꓟꓯ ꓟ ꓗꓪ ꓙꓻ ꓡꓯ ꓘꓳ ꓟ ꓒꓵꓽ ꓓꓰ ꓡꓰ ꓟ ꓥ ꓡꓳ ꓐꓰ ꓢꓯꓼ ꓖꓶ ꓗꓷ ꓟ ꓥꓳ=
ꓕꓱ ꓡꓱ ꓮ ꓕꓯ ꓟꓲ ꓓꓳꓽ ꓫꓵ ꓢꓯꓼ ꓐꓯ ꓒꓬꓱ ꓔꓬ ꓟ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓮ ꓙꓵ ꓔꓯ ꓥ ꓟꓲ ꓮ ꓘꓶꓸ ꓫ ꓟꓳ ꓐꓰ ꓐꓯ ꓢꓲ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓶ ꓥꓳꓽ ꓙꓱ ꓖꓶ ꓗꓷ ꓟ ꓥꓳ=
