ꓫꓸ ꓟꓵ ꓫ ꓙꓵ ꓢꓴ ꓟꓽ ꓔꓱꓹ ꓢꓴ ꓐꓴ ꓐꓰ ꓐꓲ ꓞꓹ ꓔꓬ ꓟ ꓟꓲ ꓠꓯ ꓐꓱ ꓶ ꓢꓲ ꓡꓲꓹ ꓡꓲꓹ ꓐꓰ ꓪꓽ ꓘꓴ ꓙ ꓔꓬ ꓟ꓾
ꓟꓲ ꓠꓯ ꓗꓪ ꓟꓽ ꓔꓱꓹ ꓟ꓾ ꓫ ꓟꓵ ꓫ ꓙꓵ ꓟ ꓐꓰ ꓥꓴꓻ ꓔꓬ ꓢꓴ ꓮ ꓟꓬꓹ ꓔꓬ ꓟ ꓥꓳ= ꓕꓱ ꓡꓱ ꓫ ꓙꓵ ꓔꓬ ꓟ ꓟꓲ ꓠꓯ ꓐꓱ ꓶ Zimbabwe ꓗꓴꓷꓼ ꓗꓪ ꓔꓬ ꓟ Poor Clare Sisters ꓔꓲꓺ ꓟ ꓜꓴ ꓐꓴ ꓢꓲ ꓡꓲꓹ ꓡꓲꓹ ꓐꓰ ꓪꓴ-ꓢ ꓐꓰ ꓕꓲ ꓪ ꓪꓽ ꓘꓴ ꓙ ꓟ ꓠꓬ ꓡ ꓞꓳ ꓮ ꓟꓬꓹ ꓤꓶꓻ ꓗꓪ ꓘꓳꓹ ꓣꓴ ꓟꓶ_ ꓟ ꓔꓯ ꓟꓸ ꓖꓶ_ ꓡꓳ=
ꓕꓱ ꓜꓴ ꓗꓪ ꓐꓰ ꓔꓲꓺ ꓟ ꓐꓴ ꓠꓬ ꓚꓲ ꓛꓬ ꓤꓶꓻ ꓔꓯ ꓪꓽ ꓘꓴ_ ꓟ ꓗꓪ ꓐꓰ ꓡꓰ ꓡꓯꓼ ꓙꓱ ꓖꓶ ꓢꓴ ꓡꓰ ꓥ ꓡꓳ= ꓬꓲ ꓪ ꓗꓪ ꓐꓰ ꓪꓽ ꓘꓴ ꓶ ꓓꓰꓽ ꓡ ꓢꓴ ꓐꓴ ꓐꓱ ꓶ ꓠꓲꓹ ꓗꓳ ꓟꓬ ꓗꓳ ꓟ꓾ꓬꓲ ꓚꓱꓹ ꓟꓳꓸ ꓖꓶ_ ꓟ꓾ ꓠꓲꓹ ꓟ ꓐꓬ ꓡꓰ ꓢꓴ ꓐꓴ ꓫꓬꓹ ꓖꓶ ꓓꓴ ꓪ ꓟꓶ ꓠꓹ ꓟ ꓬꓲ ꓪ ꓠꓬ ꓡ ꓞꓳ ꓟꓽ ꓟꓳ_ ꓟ ꓗꓪ ꓐꓰ ꓬꓲꓸ ꓙꓵꓹ ꓮ ꓟꓬꓹ ꓟꓶ ꓫꓵ ꓠ ꓫꓸ ꓢꓴ ꓐꓴ ꓐꓱ ꓶ ꓘꓶꓽ ꓠ ꓝꓲꓸ ꓖꓶ ꓢꓲ ꓪꓽ ꓘꓴ ꓖꓶ ꓔꓬ ꓟ ꓥꓳ=
ꓬꓲ ꓪ ꓪꓽ ꓘꓴ ꓟ ꓗꓪ ꓐꓰ ꓪꓽ ꓘꓴ ꓟ ꓤꓶꓻ ꓠꓬ ꓫ ꓙꓵ ꓟꓷꓼ ꓙꓵ ꓢꓴ ꓠꓲꓹ ꓟ ꓐꓬ ꓡꓰ ꓢꓴ ꓐꓴ ꓐꓱ ꓶ ꓥꓳ ꓡꓳꓸ ꓓꓴ ꓐꓰ ꓠꓲꓹ ꓟ ꓗꓳꓸ ꓖꓶ ꓓꓴ ꓪ ꓟꓶ ꓠꓹ ꓟ ꓬꓲ ꓚꓱꓹ ꓗꓷ ꓡ ꓟ ꓥꓳ= ꓟꓽ ꓙꓲ_ ꓟ ꓜ ꓫꓵ ꓓꓳ ꓫꓵ ꓣꓱ ꓢꓴ꓾ ꓢꓴ ꓡꓰ ꓪꓴ ꓜ ꓟ ꓗꓪ ꓐ ꓡꓰ ꓢꓴ꓾ ꓟꓬꓱꓽ ꓟꓽ ꓙꓳ ꓫꓸ ꓔꓬ ꓢꓴ ꓐꓴ ꓠꓬ ꓕꓱ ꓔꓲꓺ ꓟ ꓜꓴ ꓐꓴ ꓪꓽ ꓘꓴ ꓙ ꓟ ꓑꓶ ꓓꓴ ꓬꓲ ꓪ ꓤꓶꓻ ꓗꓪ ꓥꓳ ꓡꓳꓸ ꓓꓴ꓾ ꓠꓲꓹ ꓟ ꓗꓳ ꓖꓶ ꓓꓴ ꓐꓰ ꓪꓴ-ꓢ ꓔꓯ ꓝꓮꓲ ꓘꓳꓹ ꓣꓴ ꓢꓲ ꓙꓵꓻ ꓡ ꓢꓴ ꓟꓬ ꓡ ꓟ ꓥ ꓡꓳ=
ꓥꓳ ꓡꓳꓸ ꓓꓴ ꓟꓶꓽ ꓡꓰ ꓢꓴ ꓡ ꓠꓹ ꓟ ꓤꓶꓻ ꓗꓪ ꓬꓲ ꓚꓱꓹ ꓟꓽ ꓟꓳ ꓡꓰ ꓢꓴ ꓐꓴ ꓐꓱ ꓶ ꓔꓲꓹ ꓫꓵ ꓗꓪ ꓐꓰ ꓪꓽ ꓘꓴ ꓖꓶ ꓔꓬ ꓢꓴ ꓥ ꓡꓳ= Poor Clare Sisters ꓔꓲꓺ ꓟ ꓜꓴ ꓔꓯ ꓠꓬ 1212 ꓘꓳꓼ ꓕꓯ ꓬꓲꓸ ꓔꓴ ꓗꓷ ꓟ ꓥꓳ= ꓢꓑꓮꓲꓠ ꓗꓴꓷꓼ ꓗꓪ ꓐꓰ ꓕꓱ ꓜꓴ ꓗꓪ ꓢ-ꓢꓲ-ꓠ ꓬꓰ ꓔꓬ ꓟ ꓔꓲꓺ ꓟ ꓐꓴ 1985 ꓘꓳꓼ ꓕꓯ ꓜꓲꓟꓐꓮꓐꓪꓰ ꓗꓴꓷꓼ ꓗꓪ ꓔꓲꓺ ꓟ ꓙꓳ ꓕꓲ ꓟ ꓔꓯ ꓫꓬꓹ ꓔꓷ ꓗꓷ ꓢꓲ ꓠꓬꓲ ꓢ-ꓢꓲ-ꓠ ꓟꓬꓱꓽ ꓔꓯ ꓬꓰ ꓖꓶ ꓔꓬ ꓟ ꓥꓳ=
ꓕꓱ ꓔꓲꓺ ꓟ ꓜꓴ ꓠꓬ ꓞꓳ ꓤ ꓟꓽ ꓟꓳ_ ꓟ ꓗꓪ ꓐꓰ ꓪꓽ ꓘꓴ ꓖꓶ ꓔꓬ ꓟ ꓔꓲꓺ ꓟ ꓜꓴ ꓥ ꓟ ꓑꓶ ꓓꓴ ꓞꓳ ꓤ ꓮ ꓟꓬꓹ ꓟꓽ ꓢꓷꓸ ꓥ ꓟꓲ ꓬꓲ ꓪ ꓢ-ꓢꓲ-ꓠ ꓟꓬꓱꓽ ꓠꓬ ꓞꓳ ꓤ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ_ ꓟ ꓥ ꓡꓳ=
ꓟꓲ ꓠꓯ ꓒꓴ ꓫꓵꓺ ꓟꓽ ꓙꓳ ꓥ ꓟꓲ ꓪꓽ ꓘꓴ ꓢꓯꓼ ꓪ ꓐꓰ ꓦ ꓕꓲ ꓒꓳꓹ ꓗꓪ ꓐꓳ ꓞꓹ ꓔꓬ ꓢꓴ ꓥ ꓡꓳ= ꓚꓲ ꓛꓬ ꓙꓽ ꓣꓳ ꓢꓲ ꓠꓬꓲ ꓠꓱꓸ ꓐꓯꓼ ꓢꓴ ꓐꓱ ꓶ ꓪꓽ ꓘꓴ ꓖꓶ_ ꓟ ꓬꓲ ꓪ ꓬꓰ ꓔꓬ ꓟ ꓠꓬ ꓟꓲ ꓠꓯ ꓡ ꓞꓳ ꓐꓱ ꓶ ꓬꓲ ꓪ ꓜꓴ ꓐꓱ ꓶ ꓙꓵꓻ ꓠꓲꓹ ꓐꓱ ꓶ ꓪꓴꓽ ꓓꓰ ꓡꓰ_ ꓟ ꓢꓷꓸ ꓙ ꓟꓳ ꓙ ꓓꓴ ꓕꓲ ꓟ ꓥ ꓡꓳ=
ꓢꓲ ꓫꓬ ꓢꓴ ꓚꓡꓮꓣꓰ ꓬꓲ ꓪꓽ ꓘꓴ ꓢꓯꓼ ꓪ ꓗꓪ ꓐꓰ ꓠꓻ ꓫꓬꓹ ꓓ ꓡꓰ ꓢꓴ ꓠꓻ ꓫꓬ ꓔꓬ ꓢꓴ ꓐꓴ ꓕꓱ ꓢꓯꓼ ꓪ ꓔꓯ ꓢꓳ ꓢꓲ ꓠꓬꓲ ꓢꓲ ꓫꓬ ꓢꓴ ꓚꓡꓮꓣꓰ ꓔꓯ ꓛꓳ ꓢꓲ ꓥꓪ ꓠꓴ ꓔꓲꓺ ꓟ ꓐꓴ ꓥ ꓟꓲ ꓝꓮꓲ ꓪꓽ ꓘꓴ ꓙ ꓖꓶ ꓔꓬ ꓟ ꓥ ꓡꓳ ꓐꓰ ꓔꓲꓺ ꓟ Agnes Mupunga ꓡꓰ ꓐꓯ ꓔ ꓡꓳ= ꓝꓮꓲ ꓬꓲ ꓡꓰ ꓥꓪ ꓠꓴ ꓗꓪ ꓐꓰ ꓪꓽ ꓘꓴ ꓖꓶ_ ꓟ꓾ ꓬꓲ ꓚꓱꓹ ꓟꓳꓸ ꓖꓶ_ ꓟ ꓶ ꓓꓰ ꓢꓴ ꓟꓬ ꓡ ꓔꓬ ꓡꓳ ꓐꓰ ꓐꓯ ꓔ ꓡꓳ= ꓕꓲ ꓫꓵ ꓠ ꓡꓲ ꓕꓲ ꓫꓵ ꓠ ꓟꓽ ꓐ ꓡ ꓟ ꓴꓢ ꓓꓳꓡꓡꓮ 700 ꓛꓲ ꓣꓱ ꓢꓲ ꓠꓬꓲ Cancer ꓠꓻ ꓫꓵ ꓠꓯꓺ ꓞꓲꓼ ꓫꓬꓹ ꓔꓬ ꓢꓴ ꓤ ꓟꓶ ꓤ ꓐꓱ ꓶ ꓬꓲ ꓦꓲꓻ ꓢꓲ ꓒꓽ ꓡꓰ ꓕꓱ ꓔꓲꓺ ꓟ ꓐꓴ ꓠꓯꓼ ꓗꓪ ꓪꓽ ꓘꓴ ꓶ ꓓꓰ ꓟ ꓐꓰ ꓬꓲ ꓚꓱꓹ ꓟꓳꓸ ꓖꓶ ꓠꓹ ꓟ ꓶ ꓓꓰ ꓡ ꓟ ꓑꓶ ꓓꓴ ꓪꓴ-ꓢ ꓣꓱ ꓛꓰ ꓗꓪ ꓐꓰ ꓕꓲ ꓫꓵ ꓠ ꓡꓲ ꓕꓲ ꓫꓵ ꓠ ꓕꓱ ꓒꓴ ꓔꓯ ꓙꓬ ꓫꓸ ꓟꓽ ꓛꓲ ꓠꓯꓺ ꓞꓲꓼ ꓔꓯ ꓫꓬꓹ ꓐ ꓡꓰ ꓟ ꓑꓶ ꓓꓴ ꓫ ꓟꓳ ꓐꓰ ꓢꓷꓸ ꓙ ꓟꓳ ꓙ ꓔ ꓟ ꓥꓳ=
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓥ ꓟꓲ ꓗꓴꓷꓼ ꓫꓵ ꓪꓴ꓾ ꓫꓸ ꓟꓵ ꓫ ꓙꓵ ꓬꓰ ꓢꓴ꓾ ꓟꓽ ꓔꓱꓹ ꓜꓳ ꓢꓴ ꓐꓴ ꓑꓶ ꓓꓴ ꓠꓻ ꓓꓴ ꓡꓰ ꓟ ꓣꓳ ꓟꓲ ꓠꓯ ꓠꓬ ꓪꓴ-ꓢ ꓠꓵꓻ ꓠꓲꓹ ꓐꓰ ꓢꓲ ꓡꓲꓹ ꓟ ꓗꓹ ꓛꓲ_ ꓟ ꓬꓲ ꓓꓳꓽ ꓔꓯ ꓐ ꓙ ꓠꓹ ꓟ ꓣꓱ ꓬꓯꓼ_ ꓡꓳ= ꓕꓱ ꓡꓱ ꓬꓲ ꓓꓳꓽ ꓔꓯ ꓑ ꓙ ꓟꓶ ꓠꓹ ꓟ ꓢꓲ ꓡꓲꓹ ꓡꓲꓹ ꓐꓰ ꓪꓽ ꓘꓴ ꓙ ꓔꓬ ꓟ ꓜꓲꓟꓐꓮꓐꓪꓰ ꓗꓴꓷꓼ Waterfalls ꓗꓪ ꓔꓬ ꓟ The Poor Clare Sisters ꓔꓲꓺ ꓟ ꓜꓴ ꓐꓴ ꓚꓱꓹ ꓔꓯ ꓐꓯ ꓖꓶ ꓔ ꓟ ꓥꓳ=
