ꓮꓓ (390) ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓗꓽ ꓕꓽ ꓖꓶ ꓢꓴ ꓙꓲꓻ ꓫꓬ ꓢꓴ John Chrysostom ꓚꓱ, (St. John Chrysostom)
ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓠꓬ ꓮꓓ (390) ꓘꓳꓼ ꓕꓯ ꓙꓵꓻ ꓠꓲ, ꓗꓽ ꓕꓽ ꓖꓶ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓙꓵꓻ ꓟ Arenim ꓜꓴꓻ ꓮ ꓟꓬ, ꓟꓽ ꓔꓬ ꓗꓷ ꓡꓰ ꓟ ꓙꓵ, ꓟꓲ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓙꓵꓻ ꓔꓬ ꓟ ꓡ ꓞꓳ ꓮ ꓟꓬ, ꓔꓯ ꓥ ꓟꓲ ꓡꓳ. ꓟꓳ ꓪ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓑꓶ ꓓꓳ ꓕꓲ ꓒꓳ, ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓠꓬ (40) ꓘꓳꓼ ꓢꓲ ꓡꓲ ꓐꓰ ꓔꓬ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓮ ꓟꓬ, ꓛꓲ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓦꓻ ꓢꓯꓼ ꓪ ꓮ ꓟꓬ, ꓪ ꓡꓰ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓠꓬ ꓟ. ꓟꓲ ꓚꓺ ꓟ ꓗꓪ ꓮ ꓟꓬ, ꓓ ꓢꓴ ꓕꓲ ꓣꓳ ꓥ ꓟ ꓪꓴ. ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓱꓺ ꓓꓳꓽ ꓮ ꓟꓬ, ꓛꓲ ꓙꓳ ꓡ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓐ, ꓐ ꓢꓲ ꓟ, ꓟ ꓠꓬ ꓮꓓ (344) ꓘꓳꓼ ꓕꓯ ꓮ‐ꓕꓲ‐ꓬ ꓡꓳ ꓒꓱ ꓗꓪ ꓮ ꓟꓬ, ꓛꓲ ꓒꓴ ꓫꓵ ꓙꓳˍ ꓟ ꓐꓰ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓥ ꓡꓳ꓿
ꓬꓲ ꓪꓴꓽ ꓡ ꓟ ꓙꓵ, ꓕꓯ ꓟꓽ ꓦꓻ ꓡꓱ ꓢꓴ ꓟ. ꓒꓽ ꓢꓴ ꓠꓯ, ꓗꓪ ꓐꓰ ꓟꓲ ꓠꓯ ꓢꓷ. ꓠꓲ, ꓕꓯ ꓢꓳꓻ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓟ, ꓟ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓮ‐ꓐꓲ ꓤ ꓕꓲ ꓣꓳ ꓥ ꓡꓳ꓿ ꓬꓲ ꓟ, ꓟ ꓡꓰ ꓬꓲ ꓔꓯ ꓦꓻ ꓕꓲ ꓒꓳ, ꓗꓪ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓔꓯ ꓮ ꓘꓶ. ꓛꓲ ꓟ. ꓖꓶ ꓗꓷꓳ꓿
ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟꓶ ꓡꓰ ꓗ. ꓠꓯ ꓮ‐ꓕꓲ‐ꓬ ꓡꓳ ꓒꓱ ꓗꓪ ꓙꓰ ꓢꓲ ꓠꓬꓲ ꓔꓲꓺ ꓒ ꓓꓽ ꓠꓯ, ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳꓻ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓔꓲꓺ ꓒ ꓓꓽ ꓡꓯꓽ ꓒꓯ, ꓗꓪ ꓖꓳꓽ ꓓꓱ ꓔꓲ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓟ, ꓟ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓡꓳˍ ꓬꓰ ꓗ. ꓠꓯ ꓬꓲ ꓠꓬ ꓟꓵꓽ ꓗꓪ ꓔꓬ ꓗꓷ ꓢꓲ ꓠꓬꓲ ꓦꓻ ꓕꓲ ꓒꓳ, ꓗꓪ ꓮ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ ꓔꓲꓺ ꓒ ꓐꓴ ꓐꓰ ꓕꓲ ꓧꓪ ꓢꓯꓼ ꓕꓵꓽ ꓗꓷꓳ꓿
ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓠꓬ ꓕꓲ ꓣꓳ ꓔꓵꓼ (2) ꓘꓳꓼ ꓢꓯ. ꓔꓬ ꓗꓷ ꓢꓲ ꓠꓬꓲ ꓚꓲ. ꓛꓬ ꓦꓻ ꓕꓲ ꓒꓳ, ꓗꓪ ꓪꓴꓽ ꓟꓴ ꓡ ꓠ, ꓟ ꓪꓴ‐ꓢ ꓡꓰ ꓬꓲ ꓮ ꓡꓰ ꓐꓰ ꓙ ꓡꓯꓽ ꓘꓳ, ꓠ, ꓟ ꓔꓯ ꓢꓳꓻ ꓣꓴ ꓗꓷꓳ꓿ ꓖꓳ ꓗ. ꓠꓯ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓓꓴ ꓙ ꓗꓷꓳ꓿
ꓮꓓ (384) ꓘꓳꓼ ꓕꓯ ꓮ‐ꓕꓲ‐ꓬ ꓡꓳ ꓒꓱ ꓗꓪ ꓬꓯꓼ ꓡ ꓢꓲ ꓠꓬꓲ ꓔꓲꓺ ꓒ ꓙꓵꓽ ꓪ ꓘꓳ, ꓣꓴ ꓟꓶ ꓡꓰꓳ꓿ ꓬꓲ ꓠꓬ ꓪꓴ‐ꓢ ꓠꓵꓻ ꓠꓲ, ꓐꓰ ꓙ ꓣꓳ ꓟꓲ ꓠꓲ, ꓟ ꓙꓳ ꓢꓴ ꓔꓲꓺ ꓒ ꓕꓲ ꓣꓳ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓔ ꓙ ꓖꓶ ꓗꓷꓳ꓿ ꓬꓲ ꓠꓬ ꓔꓲꓺ ꓒ ꓒꓬꓱꓼ ꓡ ꓗ. ꓠꓯ ꓪꓴ‐ꓢ ꓟꓬꓱꓽ ꓗꓪ ꓮ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ ꓐꓱ ꓶ On The Priesthood ꓕꓳ ꓶ ꓔꓯ ꓐꓳ ꓖꓶ ꓗꓷ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓠꓬ ꓟ. ꓟꓲꓽ ꓚꓺ ꓟ ꓗꓪ ꓮ ꓘꓶ. ꓓ ꓢꓴ ꓕꓲ ꓣꓳ ꓥ ꓟ ꓪꓴ. ꓠꓬꓲ ꓫꓵꓺ ꓟꓷ ꓠꓶ ꓐꓰ ꓘꓴ ꓟ ꓥ ꓡꓳ꓿(397) ꓘꓳꓼ ꓕꓯ ꓚꓳꓠꓢꓔꓮꓠꓔꓲꓠꓰꓠꓳꓑꓡꓰ ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓕꓲ ꓪ ꓒꓬꓱꓼ ꓡ ꓗꓷꓳ꓿
ꓙꓲꓻ ꓫꓬ ꓢꓴ ꓙꓳꓧꓠ ꓚꓧꓣꓬꓢꓳꓢꓔꓳꓟ ꓔꓲꓺ ꓒ ꓓꓽ ꓒꓬꓱꓼ ꓡ ꓗꓷ ꓗ. ꓠꓯ ꓥ ꓟꓲ ꓪꓴ‐ꓢ ꓐꓯꓽ ꓘꓶ ꓮ ꓟꓬ, ꓚꓺ ꓟ. ꓖꓶ ꓟ ꓪꓴ. ꓠꓬꓲ ꓡ ꓞꓳ ꓮ ꓟꓬ, ꓬꓲ ꓔꓬ ꓟ ꓔꓶ. ꓗꓪ ꓡ ꓢꓲ ꓠꓬꓲ ꓟ. ꓟꓲ ꓠ ꓠ, ꓡ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓴ ꓔꓬ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯꓽ ꓘꓶꓽ ꓔꓯ ꓮ ꓟꓬ, ꓛꓲ ꓚꓺ ꓟ. ꓖꓶ ꓗꓷꓳ꓿
ꓔꓲꓺ ꓒ ꓓꓽ ꓡꓰ ꓟ. ꓟꓲꓽ ꓮ ꓟꓬ, ꓚꓺ ꓟ. ꓖꓶ ꓗꓷ ꓟ ꓪꓴ. ꓠꓬꓲ ꓝꓴꓲ ꓙꓳ ꓢꓴ ꓮ ꓟꓬ, ꓥ ꓟꓲ ꓓꓴ ꓙ ꓒꓳ ꓡꓲ ꓡ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓔꓯ ꓟꓽ ꓠꓴ ꓢꓴ ꓐꓴ ꓠꓬ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓥ ꓡꓳ꓿ ꓬꓲ ꓔꓯ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓫꓵꓽ ꓪꓴ ꓮ ꓟꓬ, ꓖꓶ ꓟ ꓥ ꓡꓳ꓿ ꓫ. ꓟꓳ ꓪ꓿ ꓝ. ꓢꓲ ꓠꓬꓲ ꓠꓬꓲꓽ ꓕꓱ ꓔꓯ ꓛꓲ ꓡ ꓕꓲ ꓫꓵꓽ ꓗꓪ ꓝꓮꓲ ꓚꓺ ꓟ. ꓖꓶ ꓓꓴ ꓥꓳ꓿ ꓫ. ꓟꓳ ꓪ꓿
