ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓤꓶꓻ ꓐꓱ ꓶ ꓑꓮꓲꓽ ꓦꓬꓼ ꓠꓬꓲ ꓗꓪ ꓡ ꓞꓳ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓡꓯ ꓫꓴꓻ ꓔꓯ ꓒꓵꓽ ꓠ, ꓟ ꓐꓯ ꓔ ꓟ ꓓꓳꓽ
6 ꓦ ꓟ 16 ꓠꓬꓲ 2025 ꓘꓳꓼ ꓔꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓤꓶꓻ ꓐꓱ ꓶ ꓑꓮꓲꓽ ꓦꓬꓼ ꓠꓬꓲ ꓗꓪ ꓪꓴ‐ꓢ ꓡꓰ ꓟꓲ ꓠꓯ ꓡ ꓞꓳ ꓔꓯ ꓖꓶ ꓔ ꓟ ꓡꓯ ꓫꓴꓻ ꓔꓯ ꓒꓵꓽ ꓠ, ꓟ ꓫ. ꓕꓱ ꓔ ꓟ ꓥ ꓡꓳ꓿ ꓰꓠꓖꓡꓮꓠꓓ꓾ ꓪ‐ꓡ꓾ ꓢꓚꓳꓔꓡꓮꓠꓓ꓾ ꓲꓢꓡꓮꓠꓓ꓾ ꓗꓴꓷꓼ ꓗꓪ ꓙꓳ ꓟ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ ꓗꓪ ꓬꓰ ꓟ ꓑꓮꓲꓽ ꓥ ꓟ ꓤꓶꓻ ꓑꓮꓲꓽ ꓦꓬꓼ ꓠꓬꓲ ꓗꓪ ꓠꓲ, ꓫ. ꓟꓬ ꓫ. ꓓꓴ꓾ ꓐꓰ ꓠꓲ, ꓟ ꓫ. ꓓꓴ ꓗꓪ ꓐꓰ ꓥꓳ ꓡꓳ. ꓓꓴ ꓔꓯ ꓧꓪ ꓠ, ꓟ ꓔꓲꓺꓒ ꓪ ꓔꓲ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓯꓼ ꓖꓶ ꓗꓷ ꓟ ꓥ ꓡꓳ꓿
ꓑꓮꓲꓽ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓣꓳ‐ꓟ ꓕꓳ ꓶ (5ꓽ5‐6) ꓗꓪ ꓥꓳ ꓡꓳ. ꓓꓴ ꓡꓰ ꓣꓳ ꓔꓯ ꓟꓽ ꓫ. ꓔꓳ ꓡꓰ ꓝꓲ ꓐꓰ ꓢꓯꓼ ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓡ ꓞꓳ ꓐꓴ ꓔꓳ, ꓜꓳ ꓔꓬ ꓟ ꓠꓲ, ꓫ ꓟꓬ, ꓫ ꓓꓴ ꓮ ꓙꓵꓽ ꓔꓯ ꓪꓴ‐ꓢ ꓠꓵꓻ ꓠꓲ, ꓡꓰ ꓥꓳ ꓡꓳ. ꓓꓴ ꓙꓳ ꓡꓰ ꓝꓲ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥꓳ ꓡꓳ. ꓓꓴ ꓠꓬ ꓮ ꓘꓶ. ꓛꓲ ꓣꓳ ꓚꓵ. ꓟ ꓐꓰ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓙꓵꓻ ꓠꓲ, ꓡꓰ ꓮ ꓕꓯ ꓥ ꓟꓲ ꓟꓽ ꓐꓬ ꓡꓰ ꓝꓲ ꓠ, ꓟ ꓙꓵꓻ ꓠꓲ, ꓙꓳˍ ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓠꓬ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓮ ꓟꓬ, ꓛꓲ ꓪꓴꓽ ꓟ ꓟꓬꓱꓽ ꓔꓯ ꓬꓰ ꓐ ꓡ ꓠ, ꓟ ꓚꓱ, ꓐꓰ ꓡ ꓞꓳ ꓐꓴ ꓠꓯ, ꓗꓪ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓡꓯ ꓫꓴ ꓔꓯ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓢꓯꓼ ꓖꓶ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓞꓳ ꓡꓯ. ꓐꓴ ꓔꓯ ꓟ, ꓟ ꓟ. ꓡꓰ ꓔꓯ ꓔꓯ ꓢꓳꓻ ꓠ, ꓟ ꓐꓰ ꓣꓳ ꓐꓱ ꓶ ꓮ ꓕꓯ ꓟꓲ ꓪꓽ ꓘꓴ ꓙ ꓟ ꓔꓯ ꓙꓵꓻ ꓠ, ꓟ ꓐꓯ ꓔ ꓡꓳ꓿
ꓝꓮꓲ ꓢꓯꓼ ꓬꓼ ꓡ ꓟ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓦꓻ ꓢꓯꓼ ꓪ ꓣꓴ ꓠ, ꓟ ꓐꓰ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓠ, ꓟ ꓞꓳ ꓡꓯ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓗꓷꓳ ꓐꓰ (Vatican ) News ꓗꓪ ꓐꓰ ꓢꓷ. ꓪ ꓡꓳ꓿
