ꓡꓲ ꓒꓲꓼ ꓐꓰ ꓫꓸ ꓕꓱ_ ꓟ
ꓬꓲ ꓤ ꓠꓬꓲꓽ ꓤ ꓐꓴꓳ꓾ ꓡꓲ ꓒꓱꓼ ꓐꓰ ꓫꓸ ꓪꓽ ꓕꓱˍꓟ ꓗꓪ ꓠꓬ ꓡꓲ ꓒꓲꓼ ꓘꓴꓽ ꓠꓯꓹ ꓗꓪ ꓙꓵꓸꓹ ꓠꓲꓹ ꓔꓯ ꓟꓳꓸ ꓖꓶ ꓡꓯ ꓐꓯˍꓟ ꓚꓱꓹ ꓔꓯ ꓠꓽ ꓠ ꓓꓴ ꓬꓰ ꓡꓯ= ꓬꓲ ꓤ ꓠꓬꓲꓽ ꓤ ꓐꓴꓳ꓾ ꓣꓳ ꓘꓴꓽ ꓣꓴ ꓟꓶˍꓟ ꓙꓵꓸꓹ ꓠꓲꓹ ꓔꓯ ꓣꓳ ꓡꓲ ꓒꓲꓼ ꓘꓴꓽ ꓠꓯꓹ ꓗꓪ ꓐꓰ ꓟꓳꓸ ꓖꓶ ꓠꓸ ꓡꓳ= ꓮ ꓫꓵꓽ ꓑꓶ ꓓꓴ ꓥ ꓡ ꓐꓰ ꓐꓯ ꓠꓬ ꓪꓴ-ꓢ ꓠꓬ ꓟꓽ ꓪ ꓟ ꓞꓳ ꓫꓵꓽ ꓞꓳ ꓙꓰ ꓮ ꓟꓬꓹ ꓔꓯ ꓚꓰ ꓔ ꓡꓳ= ꓖꓳ ꓡꓰ ꓠꓬꓲꓽ ꓡꓲ ꓒꓲꓼ ꓖꓳ ꓟ ꓘꓴꓽ ꓠꓯꓹ ꓗꓪ ꓬꓲ ꓒꓴ ꓶꓸꓹ ꓙꓳ ꓡꓳ= ꓙꓲˍꓟ ꓘꓴꓽ ꓠꓯꓹ ꓗꓪ ꓐꓰ ꓙꓵꓸꓹ ꓠꓲꓹ ꓕꓱ ꓟ ꓔꓯ ꓟꓳꓸ ꓖꓶ ꓠ ꓟ ꓣꓳ ꓬꓰ ꓒ ꓡ ꓡꓳ= ꓮ ꓡꓰ ꓥ ꓡ? ꓐꓯ ꓠꓬ ꓣꓳ ꓡꓲ ꓒꓲꓼ ꓘꓴꓽ ꓠꓯꓹ ꓗꓪ ꓡꓲ ꓒꓲꓼ ꓙꓵꓹ ꓟ ꓕꓱ ꓡꓱ ꓫꓵꓽ ꓙꓳ ꓡꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓖꓳ ꓟꓳꓸ ꓖꓶˍꓟ ꓙꓵꓸꓹ ꓧꓳ ꓢꓲ꓾ ꓣꓳ ꓙꓵꓸꓹ ꓠꓲꓹꓪ ꓐꓰ ꓪꓴ-ꓢ ꓔꓯ ꓫꓱꓹ ꓖꓶ ꓐ ꓡ ꓡꓳ= ꓪꓴ-ꓢ ꓔꓯ ꓓꓳ ꓟꓳ ꓐ ꓡ ꓡꓳ= ꓚꓲ ꓛꓬ ꓟꓳ ꓖꓪ ꓗꓪ ꓐꓰ ꓡꓲ ꓟꓽ ꓥ ꓣꓳ ꓶ ꓖꓪ ꓗꓪ ꓐꓰ ꓪꓴ-ꓢ ꓔꓯ ꓫꓱꓹ ꓖꓶ ꓙꓲˍ ꓡꓳ=
ꓝꓮꓲ ꓕꓲ ꓫꓵꓽ ꓟ ꓠꓬ ꓖꓳ ꓡꓰ ꓐꓰ ꓣꓳ ꓡꓲ ꓒꓲꓼ ꓘꓴꓽ ꓠꓯꓹ ꓗꓪ ꓟꓽ ꓙꓵꓹ ꓟ ꓠꓲꓽ ꓐꓰ ꓖꓳ ꓙꓰ ꓙꓳ ꓟ ꓪꓴ-ꓢ ꓟꓽ ꓥ ꓥ ꓐꓰ ꓦ ꓕꓲ ꓒꓳꓹ ꓔꓯ ꓠ ꓡꓰ ꓝꓲˍꓟ ꓡꓲ ꓒꓲꓼ ꓔꓯ ꓠꓬ ꓣꓳ ꓠꓬ ꓙꓲ ꓫꓬ ꓟ ꓙꓵꓸꓹ ꓠꓲꓹ ꓔꓯ ꓗꓷ ꓢꓲ꓾ ꓠꓬꓲꓽ ꓣꓱꓽ ꓙꓵꓽ ꓡꓳ ꓐꓰ ꓢꓷꓸꓠꓽ ꓗ ꓡꓳ= ꓕꓯ ꓥꓳ ꓐꓯˍ ꓠꓬ ꓣꓳ ꓡꓲ-ꓢꓴ ꓖꓪ ꓛꓰꓹ ꓛꓰꓹꓐꓯˍꓟ ꓠꓬ ꓙꓵꓹ ꓟ ꓕꓲ ꓫꓵꓽ ꓥ ꓡꓳ= ꓧꓪ ꓡꓰ ꓟ ꓖꓪ ꓛꓰꓹꓕꓲ ꓚꓱꓹ ꓐꓯ ꓠꓬ ꓪꓴ-ꓢ ꓔꓯ ꓫꓱꓹ ꓖꓶ ꓟ ꓖꓪ ꓛꓰꓹ ꓡꓲ ꓒꓲꓼ ꓕꓱ ꓟ ꓔꓯ ꓪꓴ-ꓢ ꓚꓰꓹ ꓔ ꓖꓶ ꓟ ꓑꓶ ꓓꓴ ꓪꓴ-ꓢ ꓔꓯ ꓫꓱꓹ ꓖꓶ ꓟ ꓬꓲ ꓔꓯ ꓫꓹ ꓟꓳ ꓟ ꓕꓱ ꓡꓱ ꓫꓵꓽ ꓗꓪ ꓐꓰ ꓣꓳ ꓬꓰ ꓙꓲ ꓡꓳ= ꓢꓲꓽ ꓒ ꓬꓰ-ꓢꓴ ꓔꓯ ꓘꓴ ꓣꓴ ꓟꓶ ꓡꓰ ꓟ ꓑꓶꓸ ꓓꓴ ꓡꓲ ꓒꓲꓼ ꓮ ꓙꓵꓽ ꓔꓯ ꓡꓳꓸ ꓗꓷ ꓠ ꓗ ꓡꓳ ꓐꓰ ꓐꓯ ꓟ ꓠꓬ ꓟꓽ ꓥ꓾ ꓡꓲ-ꓢꓴ ꓡꓲ ꓒꓲꓼ ꓠꓯꓹ ꓘꓴꓽ ꓗꓪ ꓐꓰ ꓪꓴ-ꓢ ꓔꓯ ꓫꓱꓹ ꓖꓶ ꓟ ꓡꓲ-ꓢꓴ ꓶꓸꓹ ꓖꓪ ꓗꓪ ꓐꓰ ꓪꓴ-ꓢ ꓔꓯ ꓫꓱꓹ ꓖꓶ ꓠꓹ ꓟ ꓥ ꓡꓳ꓾ ꓮ ꓙꓵꓽ ꓢꓴ ꓔꓯ ꓫꓸ ꓟꓳ=
