ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓟꓲ-ꓚꓲ-ꓠ ꓔꓲꓺ ꓒ ꓓꓽ ꓢ-ꓢꓲ-ꓠ꓾ ꓔꓲꓺ ꓒ ꓓꓽ ꓙꓳꓧꓠ ꓟꓴꓠꓖ ꓠꓖꓮꓪꓠ ꓡꓮ ꓢꓮꓟ ꓠꓬ 6 ꓦ ꓟ 8 ꓠꓬꓲ 2025 ꓘꓳꓼ꓾ ꓢꓲ-ꓫꓬ-ꓟ-ꓦ ꓪꓴ-ꓢ ꓬꓯꓼ ꓡ ꓟ ꓑꓮꓲ ꓦꓬꓼ ꓠꓬꓲ ꓕꓯ ꓔꓮꓠꓖꓧꓑꓣꓰ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓚꓳ ꓙꓰ ꓢꓲ꓾ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓬꓰ ꓖꓶ ꓗꓷ ꓟ ꓥꓳ=
ꓔꓮꓠꓖꓧꓑꓣꓰ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓟ ꓚꓳ ꓙꓰ ꓡ ꓟ ꓔꓲꓺ ꓒ ꓓꓽ ꓔꓯ ꓔꓲꓺ ꓒ ꓡꓴꓚꓮꓢ ꓡꓮꓬꓰꓠ ꓓꓮꓴ ꓧꓗꓮꓪꓠꓖ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓥ ꓟꓲ ꓡꓲꓽ ꓒꓰꓼ ꓟꓶ ꓢꓯꓼ ꓟꓶ ꓫꓵ ꓐꓰ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓗꓷ ꓟ ꓥꓳ=
ꓔꓲꓺ ꓒ ꓓꓽ ꓡꓰ ꓬꓲ ꓔꓯ “ꓠꓲꓹ ꓡꓱ ꓗꓹ ꓛꓲ ꓛꓲ ꓐꓰ ꓘꓳꓹ ꓣꓴ_ ꓟ꓾ ꓡꓲꓽ ꓒꓰꓼ ꓐꓰ ꓘꓳꓹ ꓣꓴ ꓡ ꓟ ꓑꓶ ꓓꓴ ꓫ ꓟꓳ ꓐꓰ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓬꓲ ꓔꓯ ꓘꓳꓹ ꓣꓴ ꓟ ꓑꓶ ꓓꓴ ꓪꓴ-ꓢ ꓣꓱ ꓛꓰ ꓠꓬ ꓠꓴ ꓪ ꓠꓯꓼ ꓗꓪ ꓟꓶ ꓡꓰ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ ꓟ ꓥ ꓡꓳ꓾ ꓔꓮꓠꓖꓧꓑꓣꓰ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓐꓰ ꓘꓴ ꓜꓲꓼ ꓞꓳ ꓐꓴ ꓢꓯꓼ ꓪ ꓗꓪ ꓐꓰ ꓔꓹ ꓡ ꓟ ꓑꓶ ꓓꓴ ꓮ ꓘꓶꓸ ꓐꓯ ꓖꓴ ꓟꓽ ꓓ ꓠ ꓗꓪ ꓛꓲ ꓫ ꓟꓳ꓾ ꓕꓱ ꓟ ꓡꓰ ꓐꓰ ꓫꓸ ꓔꓬ ꓟ ꓙꓵꓹ ꓗꓪ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓡꓱ ꓢꓲ ꓠꓬꓲ ꓟꓬ ꓠꓬꓲ ꓪꓽ ꓘꓴ ꓢꓲ꓾ ꓟꓬ ꓠꓬꓲ ꓢꓯꓼ ꓕꓵꓼ ꓠꓬ ꓣꓳ ꓫꓸ ꓓꓴ ꓕꓱ ꓟ ꓠꓬ ꓪꓴ-ꓢ ꓣꓱ ꓛꓰ ꓗꓷ ꓡ ꓟ ꓥꓳ=
ꓠꓬꓲꓸ ꓠꓬꓲ ꓥꓪ ꓔꓯ ꓘꓳꓹ ꓣꓴ ꓡ ꓟ ꓡꓰ ꓐꓰ ꓠꓴ ꓪ ꓓꓵꓽ ꓙ ꓟ꓾ ꓬꓰ ꓔꓬ ꓟ ꓮ ꓙꓵ ꓧꓪꓸ ꓡꓰ ꓡ ꓟ ꓥꓳ꓾ ꓪꓴ-ꓢ ꓠꓬ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓥ ꓡꓳ= ꓮ ꓘꓶꓸ ꓫꓸ ꓟ ꓙꓵꓹ ꓕꓯ ꓣꓳ ꓟꓬ ꓠꓬꓲ ꓣꓱ ꓬꓯꓼ ꓟ ꓔꓯ ꓶꓼ ꓓꓰ ꓓꓴ ꓬꓰ ꓡꓯ꓾ ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪ ꓔꓬ ꓡꓳ꓾ ꓠꓲꓹ ꓟ ꓕꓽ ꓐꓬ ꓡꓰ꓾” ꓐꓰ ꓢꓯꓼ ꓖꓶ ꓔ ꓟ ꓥꓳ=
ꓔꓮꓠꓖꓧꓑꓣꓰ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓠꓬ 2024 ꓘꓳꓼ ꓕꓯ ꓵ ꓔ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓢꓲ ꓤ (469) ꓣꓳ ꓐꓰ ꓟꓸ ꓒꓽ ꓙꓵꓽ ꓔꓶꓸ (15) ꓔꓶꓸ ꓛꓲ ꓔꓬ ꓡꓳ ꓐꓰ ꓔꓲꓺ ꓒ ꓡꓰ ꓐꓯ ꓔ ꓟ ꓗꓪ ꓐꓰ ꓢꓷꓸ ꓪ ꓡꓳ=
