ꓕꓯꓲ꓾ ꓗꓴꓷꓼ ꓗ‐ꓔꓳ‐ꓡꓲꓗ ꓔꓲꓺ ꓟ ꓕꓲ ꓣꓳ ꓡ ꓞꓳ ꓪꓴꓽ ꓜ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓬꓰ ꓟ ꓑꓶ. ꓓꓴ ꓡꓯꓽ ꓫꓴꓻ ꓪ ꓟ ꓓꓳꓽ

6 ꓦ ꓟ 5 ꓠꓬꓲ 2025 ꓘꓳꓼ ꓕꓯ ꓕꓯꓲ.꓾ ꓗꓴꓷꓼ ꓗꓪ ꓐꓰ ꓗ‐ꓔꓳ‐ꓡꓲꓗ ꓔꓲꓺ ꓟ ꓕꓲ ꓣꓳ ꓥ ꓟꓲ Sr. Marie-Agnes Suwanna Buasap ꓠꓬ ꓟꓲ ꓠꓯ ꓗꓪ ꓡ ꓞꓳ ꓪꓴꓽ ꓜ ꓟ ꓟꓬꓱꓽ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓪꓴ. ꓠꓬꓲ ꓕꓯꓲ. ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓡꓯ ꓫꓴꓻ ꓓꓽ ꓔꓯ ꓖꓶ ꓗꓷ ꓟ ꓥ ꓡꓳ꓿

ꓔꓲꓺ ꓟ ꓠꓬ ꓢꓲꓽ ꓫꓬ ꓢꓴ ꓑꓮꓴꓡ ꓓꓰ ꓚꓧꓮꓣꓔꓣꓰꓢ ꓔꓲꓺ ꓟ ꓜꓴꓻ ꓗꓪ ꓐꓰ ꓔꓲꓺ ꓟ ꓕꓲ ꓣꓳ ꓥ ꓡꓳ꓿ ꓔꓲꓺ ꓟ ꓠꓬ ꓡ ꓞꓳ ꓪꓴꓽ ꓜꓽ ꓟ ꓟꓬꓱꓽ ꓔꓯ ꓗꓽ ꓕꓽ ꓟ ꓗꓪ ꓐꓰ ꓡꓯ ꓫꓴꓻ ꓪ ꓟ ꓠꓬ ꓞꓲꓼ ꓣꓳ ꓟ ꓤ ꓟꓶ ꓤ ꓐꓴ ꓐꓰ ꓤ ꓠꓱ ꓤ ꓮ ꓟꓬ, ꓔꓯ ꓮ ꓟꓶ ꓟ ꓙꓵ, ꓗꓪ ꓟꓽ ꓙꓲ ꓢꓴ ꓐꓴ ꓡꓰ ꓪꓴꓽ ꓜꓽ ꓟ ꓬꓲ ꓙꓵ, ꓕꓯ ꓬꓲ ꓠꓬ ꓟꓽ ꓙꓲ ꓢꓴ ꓐꓴ ꓔꓯ ꓟꓽ ꓙꓳꓺ ꓙꓳꓺ ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓐꓰ ꓤ ꓟꓶ ꓤ ꓐꓴ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓗꓷ ꓢꓴ ꓥ ꓟ ꓪꓴ. ꓠꓬꓲ ꓡꓯ ꓫꓴꓻ ꓪ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓕꓱ ꓡꓯ ꓫꓴꓻ ꓖꓶ ꓟ ꓙꓵ, ꓕꓯ ꓕꓯꓲ꓾ ꓕꓲ ꓗꓴꓷꓼ ꓡꓱꓼ ꓗꓪ ꓐꓰ ꓡ ꓞꓳ ꓪꓴꓽ ꓜꓽ ꓟ꓾ ꓟꓽ ꓙꓲ ꓟ ꓟꓬꓱꓽ ꓬꓰ ꓝꓲ ꓟ ꓞꓲꓼ ꓣꓳ ꓟ ꓤ ꓟꓶ ꓤ ꓐꓴ ꓐꓰ ꓤ ꓠꓱ ꓤ ꓐꓴ ꓔꓯ ꓗꓽ ꓕꓽ ꓢꓴ ꓜꓴꓻ (ꓙꓵꓻ ꓠꓲ, ꓟꓽ ꓪ ꓥ ꓟꓲ) ꓕꓱ ꓟꓬꓱꓽ ꓔꓯ ꓬꓰ ꓢꓴ ꓐꓴ ꓜꓴꓻ ꓮ ꓟꓬ, ꓥ ꓟꓲ ꓔ ꓗꓷ ꓟ ꓥ ꓡꓳ꓿

ꓡꓯ ꓫꓴꓻ ꓪ ꓟ ꓔꓲꓺ ꓟ ꓡꓰ ꓞꓲ ꓠꓲ, ꓠꓬ ꓙꓴ‐ꓐꓲ‐ꓡꓰ ꓘꓳꓼ ꓣꓱ ꓛꓰ ꓪ ꓟ ꓘꓳꓼ ꓥ ꓟ ꓪꓴ. ꓠꓬꓲ ꓕꓱ ꓡꓱ ꓫꓵꓽ ꓟꓬꓱ ꓔꓯ ꓟꓽ ꓙꓳꓺ ꓙꓳꓺ ꓑꓶ. ꓑꓶ. ꓬꓰ ꓠ, ꓟ ꓮ ꓟꓬ, ꓛꓲ ꓣꓱ ꓬꓯꓼ ꓡꓳ ꓐꓰ ꓐꓯ ꓔ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓞꓲꓼ ꓣꓳ ꓟ ꓤ ꓟꓶ ꓤ ꓐꓴ ꓐꓰ ꓤ ꓠꓱ ꓤ ꓐꓴ ꓮ ꓟꓬ, ꓠꓬ ꓟꓽ ꓙꓲ ꓢꓴ ꓐꓴ ꓡꓯꓽ ꓒꓯ ꓗꓪ ꓛꓲ ꓬꓰ ꓢꓲ ꓠꓬꓲ ꓮ ꓘꓶ. ꓛꓲ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓥ ꓡꓳ ꓕꓱ ꓡꓱ ꓫꓵꓽ ꓤ ꓠꓱ ꓐꓴ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓗꓪ ꓡ ꓞꓳ ꓮ ꓟꓬ, ꓥ ꓟꓲ ꓬꓰ ꓙ ꓢꓲ ꓠꓬꓲ ꓪꓴꓽ ꓜꓽ ꓗꓷ ꓢꓴ ꓐꓴ ꓔꓯ ꓝꓮꓲ ꓥꓳ. ꓡꓳ ꓓꓴ ꓖꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳ ꓚꓵ_ ꓡꓳ ꓐꓰ ꓔꓲꓺ ꓟ ꓡꓰ ꓫ. ꓕꓱ ꓗꓷꓳ꓿

ꓔꓲꓺ ꓟ ꓠꓬ ꓕꓯꓲ. ꓗꓴꓷꓼ ꓗꓪ ꓐꓰ ꓶꓻ ꓤ ꓟ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓡ ꓞꓳ ꓪꓴꓽ ꓜꓽ ꓟ ꓗꓽ ꓕꓽ ꓓꓴ ꓢꓷ. ꓠꓲ, ꓚꓳ ꓬꓲꓻ ꓖꓶ ꓟ ꓟꓬꓱꓽ ꓬꓰ ꓗꓷ ꓟ ꓠꓬ ꓢꓳꓻ ꓦꓲꓻ (35) ꓦꓲꓻ ꓗꓪ ꓟ. ꓖꓶ ꓗꓷ ꓢꓲ ꓠꓬꓲ ꓟ. ꓒ ꓟ. ꓟ (3182) ꓣꓳ ꓐꓰ ꓢꓳꓻ ꓒ ꓢꓳꓻ ꓟ (60000) ꓣꓳ ꓔꓯ ꓟ. ꓖꓶ ꓗꓷꓳ꓿

ꓕꓯꓲ꓾ ꓗꓴꓷꓼ ꓐꓰ ꓟꓬ‐ꓟ ꓗꓴꓷꓼ ꓫ. ꓗ ꓗꓪ ꓔꓬ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓟꓬꓱꓽ ꓮ ꓟꓬ, ꓔꓯ ꓬꓰ ꓗꓷ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓕꓯꓲ. ꓗꓴꓷꓼ ꓐꓰ ꓟꓬ‐ꓟ ꓗꓴꓷꓼ ꓫ. ꓗ ꓗꓪ ꓔꓬ ꓟ ꓞꓳ ꓘ, ꓢꓽ ꓘ, ꓗꓪ ꓐꓰ ꓔꓬ ꓟ ꓑ ꓫꓬ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓒꓴ ꓓꓵ ꓠ, ꓟ ꓐꓱ ꓶ ꓟꓬꓱꓽ ꓔꓯ ꓥ ꓟꓲ ꓬꓰ ꓖꓶ ꓗꓷ ꓢꓴ ꓥ ꓡꓳ꓿

ꓝꓮꓲ ꓔꓲꓺ ꓟ ꓠꓬ ꓔꓮꓡꓲꓔꓧꓮ ꓗꓴꓟ ꓜꓴꓻ ꓡꓰ ꓢꓳꓻ ꓜꓲꓼ ꓓꓴ ꓒꓴ ꓖꓶ ꓗꓷ ꓢꓲ ꓠꓬꓲ ꓬꓲ ꓒꓵꓽ ꓟꓽ ꓣꓴ ꓟ. ꓒ ꓟ. ꓟ (40) ꓣꓳ ꓐꓰ ꓝꓲ ꓩꓴ ꓢꓲ ꓠꓬꓲ ꓤ ꓟꓶ ꓤ (800) ꓣꓳ ꓔꓯ ꓞꓳ ꓙꓳ ꓚꓱ, ꓗꓪ ꓮ ꓡꓰ ꓪꓴꓽ ꓟꓴ ꓡ ꓟ ꓟꓬꓱꓽ ꓔꓯ ꓮ ꓡꓰ ꓬꓰ ꓠ, ꓟ ꓔꓯ ꓟ. ꓖꓶ ꓗꓷꓳ꓿ ꓕꓱ ꓜꓴꓻ ꓔꓯ ꓠꓬ (2009) ꓘꓳꓼ ꓕꓯ ꓒꓴ ꓗꓷ ꓢꓲ ꓠꓬꓲ ꓮ ꓟꓶ ꓟ ꓙꓵ, ꓗꓪ (90) ꓗꓴꓷꓼ ꓗꓪ ꓟꓬꓱꓽ ꓔꓯ ꓬꓰ ꓔꓬ ꓟ ꓥ ꓡꓳ ꓐꓰ (Vatican) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿