ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓢꓲ ꓫꓬ ꓢꓴ ꓒꓲ-ꓕꓱ ꓬꓲ ꓡꓱꓼ ꓜꓴ ꓗꓪ ꓟꓲ-ꓢ ꓪꓽ ꓘꓴ ꓢꓲ ꓠꓬꓲ ꓠꓲꓚꓧꓰ ꓳꓝ ꓔꓧꓰ ꓑꓮꓡꓡꓲꓮ ꓗꓪ ꓪꓽ ꓘꓴ ꓡꓳꓹ ꓬꓰ ꓟ ꓔꓯ ꓢꓷꓸ ꓪ ꓡꓳ=
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ꓾ ꓠꓽ ꓫꓵ ꓠꓬꓲ ꓠꓯꓼ ꓙꓵꓹ ꓕꓯ ꓦꓮꓔꓲꓚꓮꓠ ꓖꓣꓳꓔꓔꓳꓰꓢ ꓗꓪ ꓚꓳ ꓙꓰ ꓢꓲ ꓢꓲ ꓫꓬ ꓢꓴ ꓒꓲ-ꓕꓱ ꓡꓱꓼ ꓜꓴ ꓑ ꓕꓲ ꓗꓪ ꓢꓲ ꓫꓬ ꓟ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓬꓰ ꓓꓳ ꓡꓰ ꓟ ꓥꓳ= ꓧꓳꓡꓬ ꓢꓰꓰ ꓑꓣꓰꓢꓢ ꓳꓝꓝꓲꓚꓰ ꓗꓪ ꓐꓰ ꓐꓯ ꓑꓶ ꓔ ꓟ ꓡꓰ ꓐꓰ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓢꓲ ꓫꓬ ꓟ ꓮꓴꓖꓴꓢꓔꓲꓠ ꓜꓴ ꓗꓪ ꓐꓰ ꓑꓣꓲꓳꓣ ꓖꓰꓠꓰꓣꓮꓡ ꓥ ꓟ ꓝꓣꓸ ꓮꓡꓰꓙꓮꓠꓓꓣꓳ ꓟꓳꓣꓮꓡ ꓮꓠꓔꓳꓠ ꓐꓰ ꓕꓲ ꓪ ꓬꓰ ꓓꓳ ꓡꓰ ꓟ ꓥꓳ=
ꓟꓲ-ꓢ ꓪꓽ ꓘꓴ ꓓꓳ ꓡꓰ ꓗ ꓠꓯꓸ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ꓾ ꓬꓲ ꓟꓲ ꓕꓯ ꓗꓪ ꓔꓬ ꓟ ꓔꓲꓺ ꓒ ꓪ ꓔꓲ ꓡꓱꓼ ꓜꓴ ꓗꓪ ꓢꓲ ꓡꓲꓹ ꓡꓲꓹ ꓐꓰ ꓪꓽ ꓘꓴ ꓡꓳꓹ ꓬꓰ ꓟ ꓥꓳ= ꓟꓵꓽ ꓗꓳꓸ ꓓꓵ ꓓꓵ ꓗꓪ ꓐꓰ ꓔꓲꓺ ꓒ ꓓꓽ ꓐꓰ ꓕꓲ ꓖ ꓡꓲ ꓕꓲ ꓖ ꓗꓪ ꓐꓰ ꓔꓲꓺ ꓒ ꓐꓴ ꓗꓳꓸ ꓡꓳ ꓗꓪ ꓕꓲ ꓠꓲꓹ ꓕꓲ ꓪ ꓥ ꓟ ꓬꓲ ꓙꓱꓼ ꓬꓰ ꓖꓶ_ ꓟ ꓠꓲꓚꓧꓰ ꓳꓝ ꓑꓮꓡꓡꓲꓮ ꓗꓪ ꓕꓲ ꓑꓹ ꓞ ꓦ ꓢꓲ ꓠꓬꓲ ꓬꓲ ꓙꓵꓹ ꓖꓶ ꓡꓳꓹ ꓬꓰ ꓟ ꓔꓯ ꓢꓷꓸ ꓪ ꓡꓳ= ꓣꓳ ꓤꓶꓻ ꓔꓯ ꓢꓲꓺ ꓒ ꓠꓯꓼ ꓗꓪ ꓡꓯꓼ ꓙꓱ ꓓꓴ ꓬꓰ ꓡꓯ꓾ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓕꓱ “ꓮ ꓘꓶꓸ ꓣꓳ ꓚꓵ_ ꓟ” ꓠꓽ ꓦꓬꓼ ꓠꓬꓲ ꓐꓱ ꓶ ꓶꓼ ꓓꓳ ꓫꓱꓸ ꓓꓳ ꓗꓪ “ꓙꓲ_ ꓟ ꓮ ꓣꓳ ꓡꓳꓸ ꓒꓽ” ꓶꓼ ꓓꓳ ꓫꓱꓸ ꓓꓳ ꓔꓯ ꓰꓠꓖꓡꓲꓢꓧ ꓥꓳꓽ ꓗꓪ ꓐꓰ ꓓꓽ ꓪꓴꓸ ꓚꓺ ꓢꓲ꓾ ꓗꓸ ꓠꓯꓸ ꓲꓔꓮꓡꓲꓮꓠ ꓥꓳꓽ ꓗꓪ ꓐꓰ ꓚꓺ ꓡꓳꓹ ꓬꓰ ꓟ ꓥꓳ=
ꓬꓲ ꓑꓰꓔꓣꓲꓠꓰ ꓢ-ꓢꓲ-ꓠ ꓟꓬꓱꓽ ꓫꓵꓼ ꓔꓯ ꓪꓴꓸ ꓔꓴ ꓕꓯ ꓔꓲꓺ ꓒ ꓪ ꓔꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓔꓯ ꓥꓳ ꓗꓪ ꓐꓰ “ꓣꓳ ꓙꓵꓻ ꓟ ꓢꓲ ꓒ” ꓐꓰ ꓐꓯ ꓗꓷ ꓟ ꓥꓳ= ꓟꓹ ꓟ ꓑꓮꓲ ꓦꓬꓼ ꓠꓬꓲ ꓗꓪ ꓬꓲꓸ ꓫꓳ ꓫꓳ ꓫꓱꓸ ꓖꓶ ꓘꓶꓽ ꓐꓯ_ ꓟ ꓗꓪ “ꓪꓴ-ꓢ ꓠꓵꓻ ꓠꓲꓹ ꓔꓯ ꓓꓵꓽ ꓙ ꓟꓶ ꓓꓴ ꓟꓸ ꓖꓶ_ ꓟ ꓗꓪ ꓐꓰ ꓕꓲ ꓟ ꓠꓬ ꓮ ꓟ ꓐꓴ ꓟꓬ ꓠꓬꓲ ꓬꓲ ꓪ ꓤ ꓠꓱ ꓤ ꓐꓴ꓾ ꓡꓲꓸ ꓑꓸ ꓡꓲꓸ ꓟ ꓐꓴ ꓔꓯ ꓖꓶ_ ꓟ ꓠꓵꓻ ꓠꓲꓹ ꓥ ꓡꓳ꓾ ꓐꓰ ꓐꓯ ꓡꓳꓹ ꓬꓰ ꓟ ꓥꓳ= “ꓣꓳ ꓔꓬ ꓢ ꓠꓹ ꓟ ꓐꓱ ꓶ ꓧꓪ ꓜ ꓧꓪ ꓓꓳ ꓟ ꓟꓬꓱꓽ ꓐꓱ ꓶ ꓪꓽ ꓘꓴ ꓖꓶ_ ꓟ ꓦꓬꓼ ꓠꓬꓲ” ꓐꓯ_ ꓟ ꓚꓱꓹ ꓔꓯ ꓟꓳꓸ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓐꓯ ꓖꓶ ꓗꓷ ꓟ ꓚꓱꓹ ꓔꓯ ꓐꓯ ꓢꓲ꓾ ꓔꓲꓺ ꓒ ꓪ ꓔꓲ ꓡꓰꓳ ꓠꓬ ꓬꓲ ꓔꓯ ꓢꓲ ꓚꓰꓸ_ ꓟ ꓑꓮꓲ ꓐꓰ ꓟꓽ ꓢꓲ ꓚꓰꓸ ꓟ ꓟꓲ ꓕꓯ ꓗꓪ ꓚꓮꓣꓓꓲꓠꓮꓡ ꓐꓴ ꓐꓰ ꓖꓪ ꓙꓱ ꓜꓲꓼ ꓓꓴ ꓬꓰ_ ꓟ ꓙꓵꓹ ꓗꓪ ꓕꓱ ꓬꓲ ꓕꓲ ꓟꓴ ꓔꓯ ꓟꓽ ꓓ ꓐꓯ ꓡꓳꓹ ꓬꓰ ꓟ ꓥꓳ=
“ꓣꓳ ꓮ ꓙꓵ ꓠꓬ ꓟꓬꓱꓽ ꓔꓯ ꓕꓲ ꓪ ꓢꓯꓼ ꓕꓵꓼ ꓧꓪ ꓠ ꓔ ꓡꓳ= ꓓ ꓪꓴꓸ ꓣꓳ ꓤꓶꓻ ꓗꓪ ꓠꓱꓸ ꓐꓯꓼ ꓢꓴ ꓠꓯꓼ ꓗꓪ ꓠꓬꓲ ꓟꓽ ꓟꓴ ꓟ ꓟꓽ ꓙꓳ ꓙꓳ꓾ ꓙꓲ_ ꓟ ꓬꓲ ꓔꓯ ꓥꓳꓽ ꓟꓸ ꓖꓶ ꓢꓲ ꓠꓬꓲ ꓗꓹ ꓛꓲ ꓛꓲ ꓐꓰ ꓗꓹ ꓛꓲ_ ꓟ ꓶꓼ ꓓꓳꓽ ꓫꓱꓸ ꓓꓳ ꓐꓰ ꓢꓯꓸ ꓔꓬ ꓙꓻ ꓫꓱꓽ ꓟ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓠꓲꓹ ꓟ ꓐꓬꓽ ꓡꓰ ꓓꓴ ꓟꓽ ꓗꓷ ꓡꓰ ꓠꓹ ꓟ꓾ ꓞꓳ ꓡꓱ ꓤ ꓐꓴ ꓔꓯ ꓢꓲ ꓒꓽ ꓢꓯꓼ ꓔꓯ ꓠ ꓠꓹ ꓪ ꓡꓰ ꓠꓹ ꓟ ꓐꓱ ꓶ ꓐꓰ ꓖꓳ ꓟ ꓢꓯꓼ ꓔꓯ ꓠꓹ ꓠ ꓢꓲ ꓛꓳ ꓫꓱꓽ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓟꓬꓱꓽ ꓬꓰ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓬꓲ ꓚꓱꓹ ꓔꓯ ꓧꓪ ꓠꓹ ꓟ ꓢꓯꓼ ꓖꓶ ꓡꓳꓹ ꓬꓰ ꓟ ꓥꓳ=
ꓠ ꓠꓹ ꓟ ꓢꓯꓼ ꓪ ( the power of listening) ꓔꓲꓺ ꓒ ꓪ ꓔꓲ ꓡꓰꓳ ꓗꓪ ꓐꓰ ꓗꓹ ꓛꓲ ꓟ ꓶꓼ ꓓꓳ ꓫꓱꓸ ꓓꓳ ꓔꓯ ꓟꓵꓽ ꓗꓳꓸ ꓓꓵ ꓓꓵ ꓛꓱꓻ ꓓꓳ ꓡꓰ ꓠꓹ ꓟ ꓐꓱ ꓶ ꓐꓯ ꓢꓲ ꓠꓬꓲ꓾ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ “ꓠꓲꓹ ꓟ ꓓꓵꓽ ꓙ ꓔ꓾ ꓠꓲꓹ ꓟ ꓕꓽ ꓙꓳ꓾” ꓐꓰ ꓢꓯꓼ ꓖꓶ ꓡꓳꓹ ꓬꓰ ꓟ ꓥꓳ= ꓮ ꓟꓶ ꓡꓰ ꓐꓰ ꓢ-ꓢꓲ-ꓠ (ꓟꓲꓢꓢꓲꓳꓠ) ꓬꓰ_ ꓟ ꓗꓪ ꓕꓲ ꓧꓪꓹ ꓧꓪꓹ ꓣꓳ ꓤꓶꓻ ꓔꓯ ꓢꓯꓼ ꓟꓬ ꓖꓶ ꓗꓷ ꓗꓪ ꓛꓲ ꓙꓳ_ ꓟ ꓔꓯ ꓢꓷꓸ ꓠ ꓔ ꓡꓳ꓾ ꓣꓳ ꓠꓬ ꓪꓴ-ꓢ ꓐꓯ ꓘꓶꓽ ꓶꓼ ꓓꓳ ꓫꓱꓸ ꓓꓳ ꓔꓯ ꓠ ꓠꓹ ꓠ ꓔ ꓟ ꓐꓰ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓥ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠ ꓠꓹ ꓠ ꓔ ꓟ ꓔꓯ ꓐꓯ ꓡꓳꓹ ꓢꓯꓼ ꓖꓶ ꓗꓷ ꓟ ꓥꓳ=
ꓠ ꓠꓹ ꓠꓹ ꓟ ꓠꓬ ꓚꓵ ꓚꓵ ꓣꓳ ꓔꓯ ꓜꓲ ꓡꓯꓼ ꓘꓳ ꓠꓹ ꓟ ꓗꓸ ꓘꓶꓽ ꓔꓯ ꓒꓴ ꓖꓶ_ ꓟ ꓥꓳ꓾ ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓙꓻ ꓡꓯ ꓘꓳ ꓠꓹ ꓟ ꓓꓽ ꓖꓴ ꓔꓯ ꓫꓬꓹ ꓖꓶ ꓐ ꓡ ꓠꓹ ꓟ ꓐꓱ ꓶ ꓣꓳꓸ ꓚꓵ_ ꓟ ꓥ ꓡꓳ= ꓔꓲꓺ ꓒ ꓪ ꓔꓲ ꓙꓵꓽ ꓪ ꓔꓯ ꓘꓳꓹ ꓣꓴ ꓟꓶ ꓟ ꓦꓬꓼ ꓠꓬꓲ ꓗꓪ ꓐꓰ ꓮ ꓘꓶꓸ ꓓꓵꓽ ꓙ ꓢꓲ ꓐꓯ ꓡꓳꓹ ꓬꓰ ꓟ ꓕꓲ ꓟ ꓟꓲ ꓥ ꓡꓳ=
ꓣꓳ ꓠꓬ ꓠ ꓠꓹ ꓗꓴꓸ ꓠꓹ ꓟ ꓐꓱ ꓶ ꓙꓻ ꓜꓲꓼ ꓠ ꓔ ꓡꓳ꓾ ꓝꓴꓲ ꓟꓽ ꓐꓯ ꓐꓯ꓾ ꓣꓳ ꓠꓯꓼ ꓗꓪ ꓔꓱꓹ ꓟ ꓚꓱꓹ ꓙꓳ_ ꓡꓳ꓾ ꓠꓱꓸ ꓐꓯꓼ ꓢꓴ ꓐꓰ ꓮ ꓫꓵ ꓥ ꓟꓲ ꓙꓻ ꓡꓯꓼ ꓘꓳ ꓓꓴ ꓟꓽ ꓙꓳ ꓓꓵꓽ ꓙ ꓢꓲ ꓠꓬꓲ ꓗꓸ ꓘꓶꓽ ꓐꓲꓸ ꓢꓲ ꓔꓬ ꓟ ꓬꓰ ꓟꓽ ꓓ꓾ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓙ ꓣꓳ_ ꓟ ꓠꓲꓹ ꓟ ꓗꓪ ꓐꓰ ꓡꓰ ꓢꓲ ꓒꓽ ꓡꓰ ꓣꓳ ꓔꓯ ꓮ ꓡꓰ ꓕꓲ ꓖ ꓗꓪ ꓝꓲ ꓩꓴ ꓖꓶ ꓡ ꓟ ꓔꓯ ꓟꓬ ꓠꓬꓲ ꓢꓷꓸ ꓡ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓟ ꓥꓳ=
