ꓤ ꓠꓱ ꓤ ꓐꓴ ꓔꓯ ꓟꓽ ꓠꓵ, ꓢꓴ ꓮ ꓐꓽ ꓮ ꓟ ꓠꓬ ꓟꓽ ꓔꓬ ꓐꓰ ꓐꓯ ꓔꓬ ꓥˍꓟꓲ ꓤ ꓠꓱ ꓤ ꓐꓴ ꓔꓯ ꓟꓽ ꓠꓵ ꓢꓴ ꓮ ꓐꓽ ꓮ ꓟ ꓟꓲ ꓔꓬ ꓡꓳ꓾ ꓐ ꓐꓽ ꓟ ꓟ ꓣꓱꓽ ꓢꓴ ꓐꓴ ꓮ ꓙꓵꓽ ꓢꓴ ꓔꓯ ꓐꓯ ꓔꓬ ꓟ ꓠꓬ ꓟꓽ ꓥ꓾ ꓮ ꓟꓶ ꓟ ꓣꓳ ꓤꓶ., ꓗꓪ ꓟꓬ ꓠꓬꓲ ꓟꓬ ꓡ ꓔꓬ ꓡꓳ꓿ꓣꓳ ꓤ ꓠꓱ ꓐꓴ ꓫꓵ., ꓠ ꓛꓲ ꓠ., ꓔꓬ ꓥˍꓟꓲ ꓬꓲ ꓪ ꓠꓲ, ꓟ ꓗꓪ ꓮ ꓡꓲˍꓟꓲ ꓟꓽ ꓗ,꓿ꓚꓬ,_ ꓟꓲ ꓟꓽ ꓚꓬ, ꓬꓲ ꓪ ꓐꓱ ꓶ ꓠꓲ, ꓟ ꓫ. ꓓꓴˍꓟꓲ ꓟꓽ ꓒꓬꓱꓼ ꓡ꓾ꓬꓲ ꓟꓶꓽ ꓗꓪ ꓠꓬ ꓤ ꓠꓱ ꓤ ꓐꓴ ꓔꓯ ꓡꓳ ꓩꓴ ꓗꓷ ꓠ ꓛꓲ ꓟꓽ ꓠꓵ, ꓟ ꓐ ꓐꓽ ꓟ ꓟ ꓣꓱꓽ ꓢꓴ ꓐꓴ ꓟꓲ ꓔꓬ ꓡꓳ꓿
ꓤ ꓠꓱ ꓤ ꓐꓴ ꓐꓰ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓙ ꓡꓯ ꓘꓳꓼ ꓟ ꓬꓲ ꓚꓱ, ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓽ ꓜꓲ ꓫ. ꓡ ꓟ ꓔꓯ ꓡꓳ ꓟꓳ ꓡꓳ꓿ ꓕꓲ ꓐꓱ ꓞꓳ ꓡꓱ ꓐꓴ ꓠꓬ ꓞꓳ ꓟꓳ ꓟ. ꓖꓶ ꓔꓯ ꓥˍꓟꓲ ꓟꓽ ꓠꓵ ꓬꓲ ꓬꓰ ꓠꓲ, ꓫꓵꓼˍ ꓟ ꓡꓰ ꓬꓰ ꓔꓬ ꓟ ꓑꓶ. ꓓꓴ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓬ ꓠꓲ, ꓟ ꓜꓲꓼ ꓟꓽ ꓘꓴ ꓟ ꓑꓶ. ꓓꓴ ꓡꓳ ꓩꓵ ꓗꓷ ꓟ ꓥ ꓡꓳ꓿ꓖꓳ ꓟ ꓑꓶ. ꓓꓴ ꓮ ꓟꓵꓽ ꓗꓪ ꓐꓯ ꓟ. ꓖꓶ ꓗꓷ ꓟ ꓡꓰ ꓐꓰ ꓟꓽ ꓗꓷ ꓡ ꓠ, ꓟ ꓐꓱ ꓶ ꓣꓳ ꓮ ꓡꓰ ꓐꓰ ꓬꓰ ꓠ ꓗ, ꓥ ꓢꓷ ꓟꓽ ꓞꓲ ꓤ ꓠꓱ ꓤ ꓐꓴ ꓠꓬ ꓮ ꓐꓽ ꓮ ꓟ ꓐꓴ ꓠꓯꓼ ꓗꓪ ꓐꓰ ꓮ ꓡꓰ ꓫꓵꓽ ꓔꓯ ꓥꓳꓽ ꓡꓳ ꓔꓬ ꓟ ꓚꓱ, ꓔꓯ ꓢꓷ. ꓙ ꓟꓵ ꓙ ꓩꓴ ꓡ ꓥꓳ꓿
ꓓ ꓪꓴ ꓠꓬ ꓦ ꓡꓱ ꓐꓳ ꓐꓳ ꓙ ꓡꓯ ꓘꓳꓼ ꓟ꓾ ꓠꓲ, ꓙꓽ ꓟꓬ ꓗꓳˍꓟ꓾ ꓢꓯꓼ ꓖꓶˍꓟ꓾ ꓬꓰ ꓙ ꓟ꓾ ꓦꓵ., ꓖꓶˍꓟ꓾ ꓬꓲ ꓪ ꓔꓯ ꓥꓪ ꓤ ꓠꓱ ꓚꓵ.. ꓚꓵ. ꓥ ꓡꓳ ꓐꓰ ꓐꓯ ꓖꓶ ꓢꓲ꓾ ꓮ ꓕꓯ ꓥˍ ꓟꓲ ꓠꓲ., ꓠꓵ ꓡꓳ ꓐꓰ ꓐꓯ ꓟ ꓔꓯ ꓪ ꓠꓲ, ꓫꓵꓽ ꓟ ꓥ ꓡꓳ꓿ ꓕꓱ ꓟ ꓠꓯꓼ ꓘꓴ ꓗꓪ ꓕꓲ ꓚꓱ, ꓟꓽ ꓑꓲ ꓝꓲ ꓠꓬ ꓜ ꓜꓼ ꓕꓯ ꓪꓳ ꓐꓬ ꓕꓲ ꓟꓽ ꓐꓲ ꓝꓲ ꓟ ꓡꓰ ꓐꓰ ꓗ, ꓡꓳ꓿ ꓚꓵ.. ꓚꓵ.. ꓐꓯ ꓠꓬ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓤ ꓠꓱ ꓤ ꓕꓲ ꓣꓳ ꓢꓳ ꓪꓴ ꓡ ꓠ, ꓟ ꓠꓬ ꓟꓽ ꓢ꓾ ꓒꓴꓽ ꓫꓵꓽ ꓙꓳ ꓓꓰ ꓗ ꓡꓰ ꓟꓽ ꓐꓲ ꓝꓲ꓿ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓲ, ꓟ ꓐꓬ ꓡꓰ ꓟ ꓠꓬ ꓤ ꓠꓱ ꓤ ꓐꓴ ꓡꓰ ꓬꓰ ꓡ ꓟ ꓟꓬꓱꓼ ꓐꓰ ꓮ ꓐꓽ ꓮ ꓟ ꓠꓵ ꓠꓲ, ꓔꓯ ꓟꓽ ꓢꓷ ꓕꓽ ꓟ ꓪꓴ. ꓠꓬꓲ ꓥ ꓡꓳ꓿ ꓤ ꓠꓱ ꓤ ꓐꓴ ꓠꓬ ꓬꓲ ꓪ ꓔꓯ ꓮ ꓐꓽ ꓮ ꓟ ꓡꓰ ꓬꓰ ꓖꓶ ꓠ ꓗ, ꓟ ꓔꓯ ꓡꓰ ꓡꓳ. ꓟꓳ ꓡꓳ꓾ ꓤ ꓠꓱ ꓤ ꓐꓴ ꓡꓰ ꓐꓽ ꓐ ꓟ ꓟ ꓔꓯ ꓬꓰ ꓙ ꓠ, ꓟ ꓠꓬ ꓟꓲ ꓡꓰ ꓔꓬ ꓡꓳ꓿ ꓖꓳ ꓟ ꓑꓶ. ꓓꓴ ꓤ ꓠꓱ ꓤ ꓐꓴ ꓮ ꓐꓽ ꓮ ꓟ ꓡꓰ ꓣꓳ ꓔꓯ ꓮ ꓟꓬ ꓫ. ꓢꓲ꓾ ꓢꓳ ꓪꓴ ꓡ ꓟ ꓔꓯ ꓓꓵ ꓙ ꓢꓲ꓾ ꓐꓽ ꓐ ꓟ ꓟ ꓠꓲ, ꓢ ꓡꓰ ꓠ, ꓢꓯꓼ ꓕꓵꓼ ꓡꓯ꓿ ꓣꓳ ꓑꓶ. ꓓꓴ ꓞꓳ ꓟꓳ ꓗ, ꓛꓲ ꓡꓰ ꓝꓲ꓾ ꓞꓳ ꓟꓳ ꓕꓲ ꓣꓳ ꓤ ꓠꓱ ꓤ ꓔꓯ ꓡꓳ ꓩꓴ ꓗꓷ ꓟ ꓠꓬ ꓟꓽ ꓠꓵ ꓠꓬꓲ ꓡꓳ ꓩꓴ ꓗꓷ ꓟ ꓟꓽ ꓥˍ ꓣꓳ ꓡꓰ ꓬꓰ ꓗꓷˍꓟ ꓚꓱ, ꓮ ꓟꓬ, ꓠꓬ ꓙꓲˍ ꓖꓴ ꓙꓳ ꓟ ꓚꓱ, ꓟꓽ ꓥˍ ꓟ ꓑꓶ. ꓓꓴ ꓟꓽ ꓞꓲ ꓞꓳ ꓟꓳ ꓟ. ꓖꓶ ꓟꓽ ꓠꓵ ꓟ ꓑꓶ. ꓓꓴ ꓬꓲ ꓟꓶ ꓗꓪ ꓠꓬ ꓬꓲ ꓪ ꓠꓲ, ꓟ ꓫ. ꓠꓲ, ꓟ ꓠ ꓠꓲ, ꓟ ꓜꓲꓼ ꓟꓽ ꓘꓴ ꓟ ꓑꓶ. ꓓꓴ ꓡꓳ ꓩꓴ ꓡ ꓟ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓟꓽ ꓞꓲ ꓤ ꓠꓱ ꓤ ꓐꓴ ꓕꓲ ꓣꓳ ꓗ, ꓛꓲ ꓛꓲ ꓪꓴ ꓡ ꓠ, ꓟ ꓐꓱ ꓶ ꓮ ꓐꓽ ꓮ ꓟ ꓣꓱꓽ ꓢꓴ ꓥˍꓟꓲ ꓫꓬ, ꓦꓵ., ꓗꓴ ꓠ ꓗ, ꓟ ꓥ ꓡꓳ꓿ ꓤ ꓠꓱ ꓤ ꓐꓴ ꓔꓯ ꓫꓬ, ꓦꓵ., ꓫꓬ , ꓐꓱ ꓖꓶ ꓠ, ꓟ ꓟꓽ ꓢꓷ. ꓕꓽ ꓐꓭ ꓠꓬ ꓣꓳ ꓢꓳ ꓣꓴ ꓢꓲ꓾ ꓫꓬ, ꓐꓱ ꓖꓶ ꓠ, ꓟ ꓣꓳ.. ꓚꓵ ꓡꓳ꓿ ꓖꓳ ꓟ ꓑꓶ. ꓓꓴ ꓞꓳ ꓡꓱ ꓐꓰ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓬꓲ ꓖꓳꓽ ꓙ ꓗꓪ ꓗ, ꓛꓲ ꓛꓲ ꓔꓬ ꓠ, ꓟ ꓠꓬ ꓮ ꓘꓶꓼ ꓣꓳ ꓚꓵ.. ꓓꓰ ꓡꓰ ꓟ ꓥ ꓡꓳ꓿
