ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗꓷ ꓗ ꓠꓯ. 40 ꓦꓬꓼ 40 ꓠꓬꓲ ꓬꓲ ꓝꓲ ꓓꓴ ꓐꓴ ꓐꓰ ꓕꓲꓽ ꓡꓰ, ꓔꓬ ꓡꓳ꓿ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓠꓲ, ꓠꓵ ꓢꓴ ꓔꓯ ꓬꓲ ꓡꓰ ꓟꓳ. ꓖꓶˍ ꓡꓳ꓿ ꓬꓲ ꓪ ꓐꓰ ꓜꓻ ꓜꓽˍ ꓡꓳ꓿ 40 ꓦꓬꓼ 40 ꓠꓬꓲ ꓖꓴ ꓡꓰ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓴꓽ ꓗꓪ ꓗꓪ ꓓꓯꓻ ꓙꓰˍ ꓟ ꓑꓮꓲꓽ ꓔꓯ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓡꓰ ꓬꓰ ꓔꓬ ꓡꓳ꓿ ꓣꓳ ꓑ ꓙꓽ ꓠ ꓔ ꓟ ꓶꓼ ꓓꓳꓽ ꓫꓱ, ꓓꓳꓽ ꓕꓳꓽ ꓶ ꓠꓬ ꓡꓴ‐ꓘ 24ꓽ46‐52 ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰ ꓦ. ꓕꓯ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓡ‐ꓞꓳ‐ꓮ‐ꓐꓲ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰˍ ꓥꓳ꓿ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ ꓡ‐ꓞꓳ‐ꓮ‐ꓐꓲ ꓔꓯ ꓙꓵꓻ ꓢꓴ ꓠꓬ ꓖꓽ ꓖꓶˍ ꓟ ꓟꓶˍ ꓥꓳ꓾ ꓐꓯ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓡꓳ꓿ ꓕꓱ ꓡꓱ ꓐꓯ ꓖꓶ ꓗꓷ ꓗ ꓠꓯ. ꓬꓲ ꓠꓬ ꓬꓲ ꓪ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰꓳ꓾ ꓐꓯ ꓢꓲ ꓠꓬꓲ ꓣꓳꓽ ꓑ ꓙꓽˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰˍ ꓟ ꓑꓶ. ꓓꓴ ꓟꓲ ꓠꓯ ꓕꓱ ꓟ ꓔꓯ ꓡꓳ ꓒꓰ, ꓔꓲ.ˍ ꓟ ꓟꓽ ꓥ꓿ ꓟꓲ ꓠꓯ ꓕꓱ ꓟ ꓔꓯ ꓡꓳ ꓔꓲ. ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰ ꓟ ꓟꓽ ꓥ꓿ ꓢꓲ ꓒ ꓬꓰ‐ꓢꓴ ꓠꓬ Time and Space ꓐꓰ ꓐꓯˍ ꓟ ꓬꓲ ꓔꓶ. ꓐꓰ ꓬꓲ ꓙꓵ, ꓕꓱ ꓠꓬꓲꓽ ꓫꓵꓽ ꓟ ꓠꓬ ꓬꓲ ꓔꓯ ꓗꓽ ꓕ. ꓟꓽ ꓐ ꓡꓺꓳ꓿ ꓕꓱ ꓟ ꓕꓯꓽ ꓢꓲ ꓗꓪ ꓬꓲ ꓓꓯꓻ ꓙꓰ ꓟ ꓥꓳ꓿
ꓣꓳ ꓟꓲ ꓠꓯ ꓞꓳ ꓤ ꓠꓬ ꓬꓲ ꓔꓶ. ꓐꓰ ꓬꓲ ꓙꓵ, ꓠꓬꓲꓽ ꓗꓴ. ꓚꓸꓼ ꓗꓪ ꓔꓬ ꓡꓳ꓿ ꓔꓯꓺ ꓥꓳꓽ ꓐꓯˍ ꓠꓬ ꓠꓴ ꓕꓱ ꓕꓲꓽ ꓙꓵ, ꓗꓪ ꓕꓱ ꓗꓪ ꓔꓬ ꓠꓬ ꓝꓮꓲ ꓕꓲꓽ ꓘꓴ ꓗꓪ ꓔꓬ ꓟꓽ ꓠ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓠꓴ ꓠꓬ ꓬꓲ ꓔꓶ. ꓐꓰ ꓬꓲ ꓙꓵ, ꓠꓬꓲꓽ ꓗꓴ. ꓚꓸꓼ ꓗꓪ ꓔꓬ ꓟ ꓑꓶ. ꓓꓴ ꓥ ꓡꓳ꓿ ꓕꓱ ꓕꓲꓽ ꓙꓵ, ꓗꓪ ꓕꓱ ꓗꓪ ꓔꓬ ꓥꓳ ꓐꓯˍ ꓠꓬ꓾ ꓕꓱ ꓕꓲꓽ ꓙꓵ, ꓗꓪ ꓖꓳ ꓗꓪ ꓔꓬ, ꓟꓽ ꓠ꓿ ꓢꓲ ꓒ ꓬꓰ‐ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰ ꓗ ꓠꓯ. ꓖꓳ ꓡꓱ ꓟꓽ ꓥꓺꓳ꓿ ꓟꓲꓽ ꓦꓲˍ ꓡꓰ ꓐꓰ ꓮ ꓡꓲ ꓗꓪˍ ꓟꓲ ꓬꓲ ꓔꓬ ꓡꓳ꓿ ꓕꓱ ꓟ ꓠꓬ ꓣꓳ ꓐꓱ ꓶ ꓗ, ꓛꓲꓽ ꓓꓴ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰ ꓟ ꓑꓶ. ꓓꓴ ꓣꓳ ꓠꓲ, ꓟ ꓫ. ꓓꓴ ꓟꓽ ꓙꓳ꓿ ꓙꓽ ꓫ. ꓓꓴ ꓟꓽ ꓙꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓣꓳ ꓐꓰ ꓧꓶ. ꓕꓯ ꓟ ꓢꓶ. ꓟꓽ ꓞꓲꓺ ꓠꓶꓽ ꓙꓰꓳ꓿
ꓔꓯꓺ ꓥꓳꓽ ꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓯꓻ ꓙꓰ ꓥꓳ ꓐꓯˍ ꓠꓬ ꓬꓲ ꓖꓳ ꓓꓱꓽ ꓠꓬ ꓬꓲ‐ꓢꓷ‐ꓡꓰ ꓗꓴꓷꓼ ꓗꓪ ꓡꓰꓽ ꓔꓬ ꓢꓰꓽ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟꓴ ꓗꓪ ꓗꓪ ꓓꓯꓻ ꓙꓰ ꓟ ꓑꓶ. ꓓꓴ ꓬꓲ ꓙꓵ, ꓐꓰ ꓬꓲ ꓔꓶ. ꓠꓬ ꓬꓲ ꓔꓯ ꓟꓽ ꓞꓳ, ꓓꓻꓳ꓿ ꓣꓳꓽ ꓮ ꓙꓵꓽ ꓐꓰ ꓕꓲꓽ ꓡꓰ, ꓔꓬ ꓡꓳ꓿ ꓖꓳ ꓡꓱ ꓣꓳꓽ ꓐꓱ ꓶ ꓢꓯꓼ ꓪ ꓟꓶ ꓓꓴ ꓥ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓢꓲ ꓒ ꓬꓰ‐ꓢꓴ ꓠꓬ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ ꓖꓽ ꓖꓶ ꓟꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳꓽ ꓔꓯ ꓬꓲꓼ ꓠꓬꓲ. ꓖꓶ ꓔꓬ ꓡꓳ꓿
ꓝꓴꓲ. ꓗꓪ ꓐꓰ ꓖꓽ ꓖꓶ ꓟꓶ ꓠ, ꓟ ꓐꓱ ꓶ ꓓꓵꓽ ꓙꓽ ꓒꓳ, ꓬꓲꓼ ꓡ ꓠ ꓔ ꓡꓳ꓿ ꓖꓽ ꓖꓶ ꓟꓽ ꓟꓶ ꓢꓰꓽ ꓕꓯ ꓧꓶ. ꓕꓯ ꓓꓵꓽ ꓙꓽ ꓒꓳ, ꓬꓲꓼ ꓡ ꓠ ꓔ ꓡꓳ꓿ ꓣꓳ ꓝꓴꓲ. ꓐꓯ ꓟ ꓠꓬ ꓣꓱꓽ ꓛꓰꓽ ꓙꓽ ꓖꓴ ꓗꓪ ꓐꓰ ꓧꓶ. ꓧꓶ. ꓫꓵ ꓙꓰ ꓗꓷ ꓟ ꓥ ꓡꓳ꓿ ꓪꓴ‐ꓢ ꓠꓲ, ꓡꓶꓽ ꓗꓪ ꓐꓰ ꓧꓶ. ꓧꓶ. ꓫꓵ ꓙ ꓖꓴ ꓥꓳꓽ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓖꓽ ꓖꓶ ꓟꓶ ꓠ, ꓟ ꓠꓬ ꓣꓳ ꓥꓳꓽ ꓡꓰ ꓟ ꓔꓯ ꓣꓳ ꓛꓳ. ꓡꓰ ꓟ ꓔꓯ ꓫꓬ, ꓔꓱ, ꓗꓷ ꓠ, ꓟ ꓧꓶ. ꓕꓯ ꓓꓵꓽ ꓙꓽ ꓒꓳ, ꓬꓲꓼ ꓡ ꓠ ꓔ ꓡꓳ꓿ ꓖꓳ ꓡꓱ ꓢꓲ ꓡꓰꓽ ꓪꓴ‐ꓢ ꓖꓽ ꓖꓶˍ ꓟ ꓟꓶˍ ꓡꓳ꓿
ꓪꓴ‐ꓢ ꓖꓽ ꓖꓶˍ ꓟ ꓟꓶ ꓠ, ꓟ꓾ ꓪꓴ‐ꓢ ꓫꓱ. ꓤˍ ꓟ ꓟꓶ ꓠ, ꓟ ꓔꓯ ꓠꓬ ꓮꓽ ꓔꓳ ꓔꓳ ꓟꓶ ꓟꓽ ꓓꓻ꓿ ꓚꓲ. ꓛꓬ ꓠꓬ ꓔꓶꓼ ꓐꓰ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ ꓪꓴ‐ꓢ ꓚꓱ, ꓗꓪ ꓝꓮꓲ. ꓕꓲꓽ ꓧꓪ, ꓫꓱꓽˍ ꓕꓯ ꓡꓰꓽ ꓣꓳꓽ ꓠꓬ ꓖꓽ ꓖꓶˍ ꓟ ꓟꓶˍ ꓡꓳ꓿ ꓔꓯ ꓥꓳꓽ ꓐꓯˍ ꓠꓬ ꓣꓳꓽ ꓕꓲꓽ ꓘ, ꓘ, ꓗꓪ ꓙꓰ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓙꓻ ꓖꓴ ꓥꓳꓽ ꓡꓰ ꓕꓯ ꓣꓳ ꓠꓬ ꓚꓱ, ꓬꓲꓼ ꓡ ꓠ ꓔ ꓡꓳ꓿ ꓙꓻ ꓖꓴ ꓥꓳꓽ ꓡꓰ ꓥ ꓟꓲ ꓖꓳ ꓡꓱ ꓙꓰ ꓔꓬ ꓠꓬ ꓣꓳ ꓙꓰ ꓠꓲ, ꓫꓵˍ ꓟ ꓗꓪ ꓛꓲ ꓬꓰ ꓟꓽ ꓐ ꓡ꓿ ꓖꓳ ꓡꓱ ꓠꓬꓲ ꓚꓱ, ꓬꓲꓼ ꓡˍ ꓟ ꓠꓬ ꓓꓵꓽ ꓙꓽ ꓒꓳ, ꓬꓲꓼ ꓡˍ ꓟ ꓥ ꓡꓳ꓿ ꓣꓳꓽ ꓮ ꓙꓵꓽ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓓꓯꓻ ꓢꓴ ꓥ ꓡꓳ꓿ ꓝꓴꓲ. ꓐꓯˍ ꓟ ꓠꓬ ꓙꓻ ꓖꓴ ꓧꓶ. ꓡꓰ ꓝꓲˍ ꓟ ꓥ ꓡꓳ꓿ ꓓꓵꓽ ꓙꓽ ꓒꓳ, ꓬꓲꓼ ꓡˍ ꓐꓯˍ ꓟ ꓠꓬ ꓣꓳ ꓬꓰ ꓔꓬ ꓟ ꓝꓴꓲ. ꓗꓪ ꓐꓰ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ ꓔꓱ, ꓚꓵˍ ꓟ ꓢꓲ ꓒ ꓙꓻ ꓖꓴ ꓠꓯꓸꓼ ꓗꓪ ꓫꓱꓽˍ ꓟ ꓥ ꓡꓳ꓿ ꓖꓳ ꓡꓱ ꓠꓬ ꓣꓳꓽ ꓠꓬ ꓖꓽ ꓖꓶˍ ꓟ ꓟꓶˍ ꓥꓳ꓿ ꓖꓳ ꓡꓱ ꓠꓬ ꓣꓳꓽ ꓠꓬ ꓗ, ꓛꓲˍ ꓟ ꓟꓶˍ ꓥꓳ꓿
ꓣꓳꓽ ꓠꓲ, ꓟꓽ ꓗ, ꓛꓲꓽ ꓠꓲ, ꓟ ꓪꓴꓽ ꓧꓶˍ ꓟ ꓠꓬ ꓝꓴꓲ. ꓡꓰ ꓠꓬꓲ. ꓞ, ꓟ ꓑꓶ. ꓓꓴ ꓥ ꓡꓳ꓿ ꓝꓴꓲ. ꓡꓰ ꓠꓬꓲ. ꓞ, ꓕꓯ ꓣꓳ ꓠꓬ ꓮ ꓡꓲ ꓥˍ ꓟꓲ ꓗ, ꓛꓲꓽ ꓟꓽ ꓐ ꓡ꓿ ꓠꓲ, ꓟ ꓠꓬ ꓮ ꓕꓯ ꓥ ꓟꓲ ꓡꓲꓽ ꓡꓲꓽ ꓡꓰꓽ ꓓ, ꓡꓳ꓿ ꓠꓲ, ꓟ ꓡꓳꓻ ꓡꓰ ꓠ, ꓟ ꓐꓱ ꓶ ꓝꓴꓲ. ꓮ ꓙꓵꓽ ꓖꓽ ꓖꓶ ꓟꓶ ꓠ, ꓟ ꓬꓳ. ꓚꓰꓽˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓠꓴ ꓐꓰ ꓥꓪ ꓔꓯ ꓘꓴ ꓔꓬ ꓡꓳ꓿ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓯꓻ ꓙꓰ ꓢꓰꓽ ꓕꓯ ꓬꓲ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓔꓲ. ꓟ ꓡꓰ ꓐꓰ꓾ ꓠꓴ ꓐꓰ ꓥꓪ ꓔꓯ ꓐꓯ ꓔꓬ ꓡꓳ꓿ ꓓꓵꓽ ꓙꓽ ꓒꓳ, ꓬꓲꓼ ꓡ꓾ ꓐꓯ ꓔꓬ ꓡꓳ꓿
ꓝꓮꓲ ꓢꓲ ꓒ ꓬꓰ‐ꓢꓴ ꓠꓬ ꓝꓮꓲ ꓕꓲꓽ ꓫꓵꓽ ꓪꓵꓼ ꓘꓶ ꓖꓶ ꓔꓬ ꓢꓰꓽ ꓡꓳ꓿ ꓕꓱ ꓟ ꓠꓬ ꓢꓲꓽ‐ꓫꓬ‐ꓟ‐ꓦ ꓔꓯ ꓝꓲ ꓩꓴ ꓡˍ ꓥꓳ ꓐꓰ ꓐꓯ ꓖꓶˍ ꓡꓳ꓿ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓡꓰ ꓐꓯ ꓟ. ꓖꓶ ꓔ ꓟ ꓐꓯ ꓧꓪ. ꓘꓶꓽ ꓚꓲ. ꓟꓶ ꓠ, ꓟ ꓐꓰ꓾ ꓢꓲ ꓒ ꓬꓰ‐ꓢꓴ ꓫꓱ. ꓫꓱ. ꓡꓰꓽ ꓮ ꓟꓬ, ꓙꓳ ꓡ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓲ, ꓡꓶꓽ ꓙꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓕꓯ ꓬꓲ ꓟ. ꓘꓶ ꓑꓱ ꓘꓶ꓾ ꓬꓲ ꓬꓰ ꓘꓶꓽ꓾ ꓠꓲꓽ ꓢ‐ꓓꓯ ꓔꓯ ꓖꓼ ꓓꓳ ꓖꓶˍ ꓟ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬ, ꓖꓶˍ ꓟ꓾ ꓓꓵꓽ ꓙ ꓟꓶ ꓓꓴ ꓬꓰ ꓖꓶˍ ꓟ꓾ ꓕꓱ ꓟ ꓮ ꓙꓵꓽ ꓠꓬ ꓢꓲꓽ‐ꓫꓬ‐ꓟ‐ꓦ ꓡꓯꓽ ꓠꓬꓲ ꓗꓪ ꓐꓰ ꓬꓰˍ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓬꓲ ꓬꓰˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓕꓲꓽ ꓑ, ꓟꓽ ꓦꓽ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓥ ꓡꓳ ꓐꓯ ꓢꓲ ꓠꓬꓲ ꓣꓳ ꓔꓯ ꓢꓯꓼ ꓖꓶ ꓡˍ ꓡꓳ꓿
ꓢꓲ ꓒ ꓬꓰ‐ꓢꓴ ꓐꓰ ꓕꓲꓽ ꓡꓰ, ꓔꓬ ꓟ ꓦꓻ ꓖꓳ ꓟ ꓠꓬ ꓠꓬꓲ. ꓠꓬꓲ ꓬꓲ ꓣꓳꓽ ꓔꓯ ꓖꓶ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓦ ꓔꓯ ꓘꓳ ꓣꓴ ꓐꓰ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳꓽ ꓞꓳ ꓤ ꓮ ꓙꓵꓽ ꓟ ꓬꓲ ꓪꓴ. ꓕꓲꓽ ꓣꓳ ꓟ ꓤꓽ ꓪꓴꓽ ꓥ ꓡꓳ꓿ ꓣꓳꓽ ꓮ ꓙꓵꓽ ꓠꓬ ꓬꓰ‐ꓢꓴ ꓠꓯꓸꓼ ꓗꓪ ꓪꓴ‐ꓢ ꓤ ꓠꓱ ꓒꓬꓱꓼ ꓡꓺꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵꓽ ꓥ ꓟꓲ ꓢꓲ ꓒ ꓬꓰ‐ꓢꓴˍ ꓡꓰ ꓐꓰ ꓢꓲꓽ‐ꓫꓬ‐ꓟ‐ꓦ ꓔꓯ ꓘꓳ ꓣꓴ ꓟꓶ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓤ ꓤ ꓮ ꓟꓬ, ꓒꓬꓱꓼ ꓡꓺꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓫꓱ.ˍ ꓟ ꓠꓱ. ꓐꓯ ꓢꓲ ꓒ ꓬꓰ‐ꓢꓴ ꓤ ꓤ ꓒꓬꓱꓼ ꓡꓺꓳ꓿ ꓪꓴ‐ꓢ ꓣꓳꓽ ꓔꓯ ꓢꓲ ꓒ ꓬꓰ‐ꓢꓴ ꓔꓯ ꓝꓲ ꓩꓴ ꓖꓶˍ ꓟ ꓬꓲ ꓔꓶ ꓙꓱꓼ ꓠꓬ ꓕꓱ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓔꓯ ꓢꓳ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓮ ꓟꓬ, ꓒꓬꓱꓼ ꓡ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓫꓱ. ꓫꓱ. ꓫꓵꓽ ꓮ ꓟꓬ, ꓒꓬꓱꓼ ꓡ ꓠ, ꓟ ꓬꓲ ꓡꓰ ꓣꓳꓽ ꓔꓯ ꓠꓲ, ꓡꓶꓽ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓠꓬ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓡꓰꓽ ꓣꓳ ꓐ ꓡˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓮ ꓫꓵꓽ ꓥ ꓟꓲ ꓬꓰ ꓗꓳ. ꓙꓰˍ ꓟ ꓡꓰ ꓐꓰ ꓣꓳ ꓥ ꓟꓲ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓮ ꓫꓵꓽ ꓥˍ ꓟꓲ ꓬꓰ ꓐ ꓡˍ ꓡꓳ꓿ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓤ ꓤ ꓒꓬꓱꓼ ꓡˍ ꓡꓳ꓿ ꓣꓳ ꓠꓬ ꓪꓴ‐ꓢ ꓟꓬꓱ ꓓꓳꓽ ꓔꓯ ꓛꓵ ꓔꓴ ꓢꓴ ꓒꓬꓱꓼ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ‐ꓫꓬ‐ꓟ‐ꓦ ꓔꓯ ꓣꓳ ꓘꓳ ꓣꓴ ꓡꓯ꓿ ꓝꓴꓲ. ꓗꓪ ꓐꓰ ꓓꓵꓽ ꓙ ꓒꓳ, ꓬꓲꓼ ꓡ ꓢꓲ ꓠꓬꓲ ꓢꓲ ꓡꓲ, ꓟ ꓣꓱꓽ ꓛꓰꓽ ꓣꓳ ꓠꓯꓸꓼ ꓗꓪ ꓞꓳ ꓙꓳ ꓢꓲ ꓠꓲ, ꓟ ꓠꓯꓸꓼ ꓗꓪ ꓢꓻ ꓢꓻ ꓡꓰꓽ ꓡꓳꓻ ꓡꓳꓻ ꓡꓰꓽ ꓞꓳ ꓙꓳ ꓙꓰ ꓡꓯ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓡꓰꓽ ꓟꓽ ꓥ꓿ ꓟꓲ ꓠꓯ ꓕꓱ ꓟ ꓗꓪ ꓟꓲꓽ ꓦꓲˍ ꓡꓰ ꓐꓰ ꓬꓲ ꓠꓬ ꓮ ꓡꓲ ꓗꓪˍ ꓟꓲ ꓔꓬ ꓡꓳ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ꓾ ꓣꓳꓽ ꓔꓳ, ꓜꓳꓽ ꓔꓬ ꓟ ꓠꓲ, ꓫ. ꓟꓬ ꓫ. ꓓꓴ ꓘꓶꓻ ꓡꓶꓽ ꓓꓴ ꓔꓯ ꓧꓪ. ꓡꓰ ꓠ, ꓟ ꓐꓱ ꓶ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
