ꓟꓲ ꓛꓬ ꓐꓰ ꓟꓲꓽ ꓦꓲ ꓠꓬ ꓮ ꓕꓯ ꓟꓲ ꓒꓼ ꓡꓼ ꓡꓼ ꓗ, ꓟ ꓟꓶꓽ ꓦ ꓦ ꓝꓲ. (ꓬꓰ‐ꓢꓴꓲꓽ) ꓦꓬꓼ ꓠꓬꓲ ꓟꓵꓽ ꓠꓶ ꓦꓬꓼ ꓠꓬꓲ ꓗꓪ ꓬꓲꓻ ꓙꓬ ꓐꓰ ꓜꓽ ꓓꓴ ꓗꓪ ꓐꓰ ꓕꓲꓽ ꓝ. ꓚꓲ. ꓠꓷꓼˍ ꓟ ꓠꓻ ꓒꓬꓱꓼ ꓡˍ ꓟ ꓙꓳˍ ꓡꓳ꓿ ꓦꓲꓣꓴꓢ꓾ ꓐꓰ ꓐꓰꓚꓔꓰꓣꓲꓮ ꓑꓶ. ꓓꓴ ꓧꓪꓽ ꓗꓴ, ꓙꓲ꓾ ꓢꓯꓼ ꓦ ꓚꓱ, ꓐꓰ ꓦꓰꓼ ꓟ ꓙꓲ ꓚꓱ, ꓐꓴ ꓗꓪ ꓠꓻ ꓓꓵꓽ ꓡ ꓗꓴ.ˍ ꓟ ꓥ ꓡꓳ꓿ ꓖꓳ ꓓꓱꓽ ꓠꓯꓸꓼ ꓗꓪ ꓟ ꓢꓯꓼ ꓟꓬꓱꓽ ꓬꓰ ꓚꓱ, ꓐꓰ ꓜꓽ ꓓꓴ ꓙꓲˍ ꓟ ꓚꓱ, ꓐꓴ ꓠꓬ ꓮ ꓟꓶ ꓟ ꓡꓰ ꓟꓶꓽ ꓦ ꓦ ꓝꓲ. ꓗꓪ ꓟꓬꓽ ꓠꓬꓲ ꓔꓬ, ꓟꓽ ꓢꓻ ꓗꓷ ꓡꓰˍ ꓟ ꓑꓶ. ꓓꓴ ꓙꓬ ꓓꓵꓽ ꓡꓰˍ ꓟ꓾ ꓠꓻ ꓒꓬꓽ ꓡˍ ꓟ꓾ ꓦꓰꓽ ꓛꓲꓽ ꓧꓳ,ˍ ꓟ꓾ ꓦꓰꓼ ꓟ ꓙꓲ ꓟꓽ ꓘꓴ ꓟ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓗꓴ.ˍ ꓟ ꓥ ꓡꓳ꓿
ꓟꓬꓽ ꓠꓬꓲ ꓠꓬ ꓦꓰꓽ ꓛꓲꓽ ꓧꓳ, ꓢꓻˍ ꓟ ꓑꓶ. ꓓꓴ ꓜꓽ ꓓꓴ ꓫꓬꓻ ꓠ ꓔ ꓟ ꓥ ꓢꓲ꓾ ꓬꓲꓻ ꓙꓬ ꓥˍ ꓟꓲ ꓫꓬꓻ ꓠ, ꓟ꓾ ꓡꓯꓽ ꓒꓯ, ꓥ ꓟꓲ ꓢꓲꓽ ꓫꓬꓻ ꓠ, ꓟ ꓬꓳ. ꓚꓰꓽˍ ꓡꓳ꓿ ꓪꓳꓽ ꓒꓬꓽ ꓠꓲ, ꓛꓵꓼ ꓐꓴ ꓔꓯ ꓬꓲ ꓜꓲꓽ ꓜꓽˍ ꓟ ꓢꓶ. ꓟꓽ ꓞꓲꓺ ꓐꓶꓽ ꓓꓲꓻ ꓫꓵꓻ ꓡꓰ ꓠ ꓚꓬ. ꓗꓷ ꓢꓲ ꓞꓻ ꓞꓻ ꓡꓰꓽ ꓜꓽ ꓠ ꓔ ꓡꓳ꓿
ꓖꓳ ꓡꓱ ꓠꓬꓲ ꓟꓶꓽ ꓦ ꓦ ꓝꓲ. ꓕꓯ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓮ ꓡꓲ ꓫꓵꓽ ꓜꓽ ꓠ ꓔ ꓡ ꓐꓯ ꓟ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓮ ꓟꓶ ꓐꓯ ꓟꓳ. ꓖꓶ ꓠ, ꓟ ꓚꓱ, ꓔꓯ ꓠꓬ ꓧꓰꓡꓡꓳ ꓢ‐ꓬ‐ꓪꓴꓠ ꓪꓰꓐꓢꓲꓔꓰ ꓗꓪ ꓐꓯ ꓔ ꓟ ꓔꓯ ꓕꓲꓽ ꓝ. ꓡꓲ‐ꓢꓴ ꓢꓯꓼ ꓠ ꓠ, ꓢꓴ ꓐꓴ ꓐꓱ ꓶ ꓙꓲꓻ ꓖꓴ ꓙꓳˍ ꓥꓳ ꓓꓵꓽ ꓙꓽ ꓢꓲ ꓠꓬꓲ ꓐꓯ ꓟ. ꓖꓶ ꓩꓴ ꓡˍ ꓟ ꓥ ꓡꓳ꓿
ꓟꓵꓽ ꓠꓶꓽ ꓦꓬꓼ ꓠꓬꓲ ꓬꓰ‐ꓢꓴꓲꓽ ꓦꓬꓼ ꓠꓬꓲ ꓗꓪ ꓣꓳꓽ ꓜꓽ ꓠ ꓔ ꓟ ꓠꓬ
ꓪꓳꓽ ꓒꓬꓽ ꓠꓲ, ꓛꓵꓼ ꓐꓰ ꓢꓲ, ꓢꓶꓽ ꓡꓳ ꓢꓶꓽ꓾
ꓟꓶꓽ ꓦ ꓦ ꓝꓲ. ꓕꓯ ꓜꓽ ꓪꓳꓽ ꓡꓳ ꓪꓳꓽ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓣꓳ ꓠꓲ, ꓫꓵˍ ꓟ ꓔꓯ ꓜꓽ ꓐ ꓡˍ ꓟ ꓥ ꓡꓳ꓿ ꓜꓻ ꓜꓽˍ ꓕꓯ ꓪꓳꓽ ꓒꓬꓽ ꓠꓲ, ꓛꓵꓼ 1 ꓙꓰꓽ 2 ꓙꓰꓽ ꓛꓲ ꓚꓬꓼ ꓠ ꓜꓽ ꓠ ꓔ ꓥ꓿
ꓢꓲ, ꓢꓶꓽ ꓡꓳ ꓢꓶꓽ ꓐꓰ ꓪꓳꓽ ꓒꓬꓽ ꓠꓲ, ꓛꓵꓼ ꓐꓴ ꓗꓪ ꓦꓲꓔꓮꓟꓲꓠ ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓖꓳ ꓓꓱꓽ ꓢꓯꓼ ꓙꓳ ꓡ ꓝꓲˍ ꓡꓳ꓿
ꓬꓲ ꓪꓳꓽ ꓬꓲꓻ ꓮ ꓟꓬ, ꓓꓳꓻ ꓖꓶ
ꓟꓶꓽ ꓦ ꓦ ꓝꓲ. ꓕꓯ ꓙꓬˍ ꓟ ꓑꓶ. ꓓꓴ꓾ ꓝꓮꓲ ꓕꓲ ꓝ. ꓝ. ꓬꓲ ꓐꓽ ꓗꓪ ꓙꓰ ꓠꓲ, ꓟꓽ ꓫꓵ꓾ ꓠꓱ ꓫꓳ. ꓟ. ꓗꓪ ꓓꓳ ꓙꓰ ꓠꓲ, ꓟꓽ ꓫꓵ ꓟ ꓑꓶ. ꓓꓴ ꓬꓲꓻ ꓙꓬ ꓔꓯ ꓮ ꓟꓬ, ꓟꓽ ꓓꓳꓻ ꓓꓳꓻ ꓔꓬ ꓗꓴ.ˍ ꓡꓳ꓿ ꓚꓵ ꓚꓵ ꓐꓯˍ ꓠꓽ ꓬꓲꓻ ꓙꓬ ꓔꓯ ꓣꓳ ꓖꓳ ꓓꓱꓽ ꓣꓱꓽ ꓞ, ꓟ ꓡꓰ ꓓꓳꓻ ꓠ ꓔ ꓟ ꓥ ꓡꓳ꓿
ꓓꓳꓻˍ ꓕꓯ ꓬꓲꓻ ꓙꓬ ꓡꓰꓽ ꓟꓽ ꓞꓲ ꓪꓳꓽ ꓒꓬꓽ ꓧꓪꓽ ꓕꓲ ꓙꓰꓽ ꓙꓰꓽ ꓔꓯ ꓚꓬ. ꓔ ꓟ ꓪꓳꓽ ꓬꓲꓻ꓾ ꓜꓳꓽ ꓜꓳꓽ ꓚ ꓔ ꓟ ꓮ. ꓠꓬꓲꓽ ꓮ ꓚꓵ,꓾ ꓬꓲꓻ ꓛꓻ ꓕꓱ ꓡꓱ ꓣꓳꓽ ꓖꓳ ꓓꓱꓽ ꓐꓱ ꓶ ꓙꓲˍ ꓟ ꓔꓯ ꓓꓳꓻ ꓖꓶ ꓐ ꓡˍ ꓡꓳ꓿
ꓖꓳ ꓟ ꓡꓰ ꓟꓽ ꓞꓲꓺ ꓟꓵꓽ ꓘꓳꓼ ꓙꓬˍ ꓕꓯ ꓚꓬ (ꓛꓳꓽ ꓒꓲ) ꓚꓬ. ꓪꓳꓽ ꓬꓲꓻ꓾ ꓐꓬꓽ ꓔꓯ‐ꓑ‐ꓬ ꓬꓲꓻ ꓕꓱ ꓡꓱ ꓫꓵꓽ ꓔꓯ ꓞꓻ ꓞꓻ ꓡꓰꓽ ꓓꓳꓻ ꓖꓶˍ ꓟ ꓠꓬ ꓟꓷꓽ ꓠꓷ, ꓔꓯ ꓫꓬꓻ ꓡꓰ ꓝꓲ ꓢꓲ ꓖꓳ ꓓꓱꓽ ꓢꓯꓼ ꓙꓳ ꓡ ꓝꓲˍ ꓡꓳ꓿
Probiotic ꓮ ꓟꓬ, ꓙꓳˍ ꓟ ꓜꓽ ꓓꓴ ꓔꓯ ꓜꓽ
ꓟꓶꓽ ꓦ ꓦ ꓝꓲ. ꓗꓪ ꓣꓳ ꓚꓳ ꓡꓳ ꓗꓪ ꓟꓽ ꓢꓲꓽ ꓫꓬ ꓕꓯ ꓠꓽ ꓜꓽ ꓓꓴ ꓘꓴꓽ ꓠꓯꓸꓼ ꓗꓪ ꓐꓶꓽ ꓓꓲꓻ ꓠꓬ ꓮ ꓟꓬ, ꓟꓽ ꓥ ꓡꓲ. ꓮ ꓔꓲ. ꓠꓽ ꓙꓳˍ ꓟ ꓥ ꓡꓳ꓿ ꓐꓶꓽ ꓓꓲꓻ ꓕꓱ ꓟ ꓑꓶ. ꓓꓴ ꓦꓰꓽ ꓛꓲꓽ ꓐꓬ ꓦꓰꓽ ꓛꓲꓽ ꓧꓳ, ꓟꓽ ꓗꓷ ꓡꓰ ꓠ, ꓟ ꓐꓱ ꓶ ꓠꓬ ꓬꓲ ꓪꓴꓻ ꓚꓱ, ꓗꓪ ꓙꓲˍ ꓟ ꓐꓮꓚꓔꓰꓣꓲꓮ ꓐꓶꓽ ꓓꓲꓻ Probiotic ꓮ ꓟꓬ, ꓙꓳ ꓠ ꓔ ꓟ ꓥ ꓡꓳ꓿
ꓕꓱ ꓟ ꓐꓱ ꓶ ꓓꓰꓲꓠ‐ꓛꓬꓲ꓾ ꓪꓳꓽ ꓚꓱ꓾ ꓡꓽ‐ꓫꓪ.꓾ ꓥ‐ꓟ‐ꓢꓶꓽ ꓕꓱ ꓡꓱ ꓫꓵꓽ Probiotic ꓮ ꓟꓬ, ꓙꓳˍ ꓟ ꓔꓯ ꓜꓽ ꓠ ꓔ ꓟ ꓥ ꓡꓳ꓿
ꓮ ꓡꓲ ꓫꓵꓽ ꓔꓯ ꓤ ꓟꓳ ꓠ ꓔ ꓡ
ꓟꓬꓽ ꓠꓬꓲ ꓠꓬ ꓣꓳ ꓖꓳ ꓓꓱꓽ ꓔꓯ ꓙꓲꓻ ꓖꓴ ꓖꓶˍ ꓟ ꓬꓲ ꓢꓯꓼ ꓠꓲ. ꓢꓲ ꓠꓬꓲ ꓠꓻ ꓐꓶꓽ ꓓꓲꓻ ꓓꓯ, ꓗꓴ.ˍ ꓟ ꓜꓽ ꓓꓴ ꓐꓴ ꓔꓯ ꓤ ꓟꓳ ꓠ ꓔ ꓟ ꓥ ꓡꓳ꓿
ꓙꓻ ꓖꓴ ꓘꓶꓽ ꓗꓪ ꓪꓴꓽ ꓔꓬ ꓟ ꓜꓽ ꓓꓴ
ꓙꓻ ꓖꓴ ꓘꓶꓽ ꓗꓪ ꓪꓴꓽ ꓔꓬ ꓟ ꓜꓽ ꓓꓴ ꓥ ꓕ ꓑꓳꓸꓼ ꓠꓬ ꓟꓽ ꓫꓬꓻ ꓫꓵꓽ ꓠꓽ ꓟꓽ ꓥ ꓐꓯ ꓥ ꓟꓲ ꓟꓬꓽ ꓠꓬꓲ ꓠꓬ ꓟꓽ ꓢꓲꓽ ꓫꓬ ꓟ ꓑꓶ. ꓓꓴ꓾ ꓜꓽ ꓟꓽ ꓜꓳꓽ ꓗꓷ ꓡꓰ ꓕꓯ ꓜꓽ ꓓꓴ ꓓꓳꓼ ꓖꓳˍ ꓟ꓾ ꓦꓰꓽ ꓛꓲꓽ ꓧꓳ,ˍ ꓟ ꓕꓱ ꓡꓱ ꓒꓬꓱꓼ ꓡ ꓗꓴ.ˍ ꓡꓳ꓿
ꓡ. ꓝꓲꓼ ꓐꓬˍ ꓟ ꓜꓽ ꓓꓴ
ꓟꓵꓽ ꓠꓶ ꓦꓬꓼ ꓠꓬꓲ ꓗꓪ ꓙꓬꓻˍ ꓟ ꓐꓰ ꓡ, ꓝꓲꓼ ꓐꓬˍ ꓟ ꓠꓬ ꓮ ꓘꓶ. ꓒꓰ.ˍ ꓟ꓾ ꓮ ꓘꓶ. ꓪꓽˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓜꓽ ꓗꓷ ꓕꓯ ꓠꓬ ꓦꓰꓼ ꓟ ꓞꓴꓻ ꓞˍ ꓟ꓾ ꓦꓰꓼ ꓟ ꓙꓲ ꓟꓽ ꓘꓴ ꓟ ꓒꓬꓱꓼ ꓡ ꓗꓴ.ˍ ꓡꓳ꓿ ꓖꓳ ꓡꓱ ꓠꓬꓲ ꓟꓵꓽ ꓠꓶ ꓦꓬꓼ ꓠꓬꓲ ꓬꓰ‐ꓫꓴꓲꓽ ꓦꓬꓼ ꓠꓬꓲ ꓗꓪ ꓙꓲ ꓢꓻˍ ꓟ ꓜꓽ ꓓꓴ ꓔꓯ ꓟꓬꓽ ꓠꓬꓲ ꓜꓽ ꓠ ꓔ ꓡꓳ꓿
ꓧꓪꓽ ꓞꓶꓻ ꓐꓰ ꓡꓱ ꓔ ꓟ ꓜꓽ ꓓꓴ
ꓧꓪꓽ ꓞꓶꓻ ꓐꓰ ꓡꓱ ꓔ ꓟ ꓜꓽ ꓓꓴ ꓥˍ ꓟꓲ ꓬꓲ ꓕꓲꓽ ꓡꓰ, ꓥꓳ꓿ ꓦꓰꓼ ꓟ ꓙꓲ ꓫ. ꓟ ꓑꓶ. ꓓꓴ ꓮ ꓟꓬ, ꓜꓽˍ ꓟ ꓗꓪ ꓐꓰ ꓤ ꓟꓳ ꓠ ꓔ ꓡꓳ꓿ ꓖꓳ ꓓꓱꓽ ꓔꓬ, ꓟꓽ ꓢꓻ ꓢꓲ ꓞꓶꓽ ꓚꓵ. ꓔꓬ ꓕꓯ ꓟꓽ ꓫꓬꓻ ꓟ ꓧꓪꓽ ꓞꓶꓻ ꓠꓬ ꓡꓰ ꓐꓰ ꓔꓯ ꓠꓬꓲ, ꓟꓵ ꓡꓰ ꓝꓲ꓾ ꓞꓰ, ꓡ ꓝꓲˍ ꓟ ꓑꓶ. ꓓꓴ ꓪ ꓜꓲ ꓔꓬ, ꓟꓽ ꓢꓻ ꓗꓷ ꓡꓰ ꓝꓲ ꓗꓴ.ˍ ꓡꓳ꓿
ꓟꓽ ꓟꓲ ꓟ ꓜꓽ ꓓꓴ ꓔꓯ ꓤ ꓟꓳ
ꓬꓲ ꓜꓲꓽ ꓑꓯ. ꓔ ꓟ ꓜꓽ ꓓꓴ꓾ ꓟꓽ ꓟꓲ ꓟꓲ ꓚꓬ. ꓔ ꓟ ꓜꓽ ꓓꓴ ꓐꓴ ꓔꓯ ꓤ ꓟꓳ ꓠ ꓔ ꓡꓳ꓿ ꓟꓽ ꓟꓲ ꓕꓲꓽ ꓟꓲ ꓚꓬ. ꓔ ꓟ ꓜꓽ ꓓꓴ ꓐꓴ ꓗꓪ ꓠꓻ ꓐꓶꓽ ꓓꓲꓻ ꓓꓯ,ˍ ꓗꓴ.ˍ ꓟ ꓑꓶ. ꓓꓴ ꓦꓰꓽ ꓛꓲꓽ ꓐꓬ ꓦꓰꓽ ꓛꓲꓽ ꓧꓳ, ꓡ ꓗꓴ.ˍ ꓟ ꓑꓶ. ꓓꓴ ꓥ ꓡꓳ꓿
ꓪꓳꓽ ꓒꓬꓽ ꓠꓲ, ꓛꓵꓼ ꓐꓴ ꓔꓯ ꓬꓲ ꓜꓲꓽ ꓕꓽ ꓜꓽ
ꓪꓳꓽ ꓒꓬꓽ ꓠꓲ, ꓛꓵꓼ ꓔꓯ ꓔꓳ, ꓜꓽ ꓓꓴ ꓬꓰˍ ꓕꓯ ꓠꓽ ꓬꓲꓻ ꓙꓬ ꓐꓰ ꓫꓬꓻ ꓡꓰ ꓠ ꓞꓲꓽ ꓠ ꓔ ꓡꓳ꓿ ꓚꓬ. ꓢꓲ ꓜꓽˍ ꓕꓯ ꓠꓽ ꓪ ꓜꓲ ꓙꓲˍ ꓟ ꓥ ꓡꓳ꓿ ꓬꓲ ꓒꓬꓽ ꓐꓴ ꓗꓪ ꓐꓶꓽ ꓓꓲꓻ ꓓꓯ,ˍ ꓗꓴ.ˍ ꓟ ꓑꓶ. ꓓꓴ ꓜꓽ ꓪ ꓡꓰˍ ꓠꓬ ꓦꓰꓽ ꓛꓲꓽ ꓧꓳ, ꓡ ꓗꓴ.ˍ ꓟ ꓑꓶ. ꓓꓴ ꓥ ꓡꓳ꓿
ꓮ ꓟꓶ ꓕꓯ ꓠꓬ ꓟꓵꓽ ꓠꓶ ꓦꓬꓼ ꓠꓬꓲ ꓬꓰꓽ‐ꓢꓴꓲꓽ ꓦꓬꓼ ꓠꓬꓲ ꓗꓪ ꓧꓪꓽ ꓖꓳ ꓓꓱꓽ ꓔꓬ ꓢꓻ ꓠ, ꓟ ꓐꓱ ꓶ ꓮ ꓡꓲ ꓫꓵꓽ ꓜꓽ ꓠ ꓔ ꓟ ꓔꓯ ꓢꓷ. ꓡꓰꓳ꓿ ꓜꓽ ꓓꓴ ꓡꓰꓽ ꓟꓽ ꓞꓲ ꓠꓱ. ꓐꓯ ꓤ ꓟꓳ ꓠ ꓔ ꓟ ꓚꓱ, ꓐꓴ ꓠꓬ
ꓜꓽ ꓓꓴ ꓔꓯ ꓢꓲꓽ ꓫꓬ ꓡꓰ ꓝꓲ꓾
ꓬꓲꓻ ꓙꓬ ꓔꓯ ꓫꓬ ꓡꓰ ꓝꓲ꓾
ꓟꓽ ꓠꓽ ꓠꓽ ꓡꓯꓽ ꓒꓯ, ꓞꓲꓽ꓾ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ꓾
ꓠꓱ. ꓫꓳ. ꓟ. ꓗꓪ ꓜꓽ ꓓꓴ ꓪꓴꓻ ꓜꓽˍ ꓟ ꓔꓯ ꓤ ꓟꓳ꓾ ꓜꓽ ꓠꓲ, ꓫꓵ ꓡˍ ꓕꓯˍ ꓟꓲ ꓢꓲꓽ ꓫꓬˍ ꓟ ꓗꓪ ꓡꓰꓽ ꓪꓴ ꓜꓽ
ꓜꓽ ꓓꓴ ꓐꓴ ꓔꓯ ꓞꓻ ꓞꓻ ꓡꓰꓽ ꓜꓽ꓾
ꓮ ꓙꓵꓽ ꓢꓴ ꓗ, ꓛꓲꓽ ꓔꓬ, ꓢꓻ ꓟ ꓤꓶꓻ ꓔꓯ ꓘꓳ ꓣꓴ ꓟꓶ ꓡꓰ ꓝꓲ꓿
ꓮ ꓙꓵꓽ ꓢꓴ ꓧꓪ. ꓧꓪ. ꓔꓬ꓿
