ꓮ ꓟꓶ ꓟ ꓤꓶ., ꓗꓪ ꓞꓳ ꓡꓱ ꓐꓴ ꓠꓯ., ꓗꓪ ꓕꓳꓽ ꓜꓳꓽ ꓔꓬ ꓟ ꓦ ꓡꓱ ꓚꓱ, ꓙꓵ., ꓠꓲ, ꓗꓪ ꓮ ꓘꓶꓽ ꓢꓯꓼ ꓒ ꓔꓬ ꓟ ꓔꓯ ꓡꓳ. ꓟꓳ ꓡꓳ꓿ ꓪꓴ‐ꓢ ꓔꓯ ꓦ ꓡꓱ ꓟ ꓗꓪ ꓢꓯ., ꓒ ꓔꓬ ꓟ ꓙꓵ., ꓠꓲ, ꓟ ꓙꓳˍꓟ ꓕꓱ ꓡꓱ ꓫꓵꓽ ꓕꓳꓽ ꓜꓳꓽ ꓔꓬ ꓡꓳ꓿ ꓣꓳ ꓓꓵ ꓙ ꓠꓬꓲ ꓕꓯ ꓚꓵ.. ꓚꓵ.. ꓙꓵ., ꓠꓲ, ꓟ ꓞꓳ ꓫꓵꓽ ꓥˍꓢꓷ. ꓟꓽ ꓥˍꓠꓬ ꓪꓴ‐ꓢ ꓔꓯ ꓦ ꓡꓱ ꓠ, ꓟ ꓟꓽ ꓢꓷ. ꓕꓽ ꓫꓵꓽ ꓥ ꓢꓷ. ꓣꓳ ꓙ ꓟꓶ ꓓꓴ ꓙꓳˍ ꓡꓳ꓿
ꓖꓳ ꓡꓱ ꓐꓯˍꓟꓲ ꓧꓪꓽ ꓠꓲ, ꓫꓵꓽ ꓟ ꓠꓲ, ꓟ ꓙꓳˍꓢꓴ ꓕꓲ ꓣꓳ ꓥꓳꓽ ꓐꓯ ꓠꓬꓲ ꓙꓵ., ꓠꓲ, ꓟꓽ ꓞꓳ ꓟꓽ ꓓˍꓟ ꓥ ꓡꓳ꓿ ꓦ ꓡꓱ ꓠ, ꓗ ꓡꓳ꓿ ꓙꓵ., ꓠꓲ, ꓐꓯˍꓟ ꓮ ꓫꓵꓽ ꓔꓯ ꓐꓯ ꓡ? ꓐꓰ ꓠ, ꓠꓬꓲ ꓕꓯ ꓥꓪ ꓠꓬ ꓪꓴ‐ꓢ ꓔꓯ ꓶꓼ ꓓꓰ ꓪꓽ ꓘꓴ ꓢꓲ꓾ ꓟꓬꓱꓼ ꓕꓱ ꓔꓯ ꓬꓰˍꓠꓬ ꓧꓪꓽ ꓡꓰ ꓡ ꓥꓳ ꓐꓰ ꓙ ꓟꓶ ꓟ ꓔꓯ ꓐꓯˍꓟ ꓥˍꓡꓳ꓿ ꓣꓳ ꓛꓲ ꓚꓬ ꓢꓯꓼ ꓪ ꓗꓪ ꓐꓰ ꓬꓰ ꓟ ꓑ ꓡ ꓟ ꓑꓶ. ꓓꓴ ꓪꓴ‐ꓢ ꓔꓯ ꓙꓵꓽ ꓢꓲ꓾ ꓦ ꓡꓱ ꓢꓲ꓾ ꓙꓵ., ꓠꓲ, ꓣꓱꓽ ꓢꓲ꓾ ꓪꓴ‐ꓢ ꓔꓯ ꓶꓼ ꓓꓰ ꓠꓽ ꓗ, ꓟ ꓥ ꓡꓳ꓿
ꓕꓯ ꓥꓳ ꓕꓲ ꓟ ꓐꓯˍꓠꓬ ꓣꓳ ꓛꓳꓽ ꓒꓯ, ꓕꓱ ꓕꓲ ꓣꓳ ꓟ ꓠꓬ ꓦ ꓡꓱ ꓷˍꓡꓳ ꓮ ꓡꓰꓳ ꓫꓵꓽ ꓟꓬꓱꓼ ꓬꓰ ꓥˍꓟꓲ ꓬꓲ ꓠꓬꓲ ꓕꓱ ꓕꓱ ꓬꓰ ꓔꓬ ꓟ ꓐꓭ ꓓꓴ ꓬꓲ ꓔꓯ ꓥꓪ ꓙꓵ., ꓡꓳ꓾꓿ ꓬꓲ ꓠꓬ ꓦ ꓡꓱ ꓓˍꓟ ꓑꓶ. ꓓꓴ ꓬꓲ ꓔꓯ ꓠꓬ ꓒꓴ ꓚꓲ ꓖꓶ ꓷˍ ꓡꓳ꓿ ꓖꓳ ꓟ ꓡꓰ ꓐꓰ ꓪꓴ‐ꓢ ꓔꓯ ꓙꓵ., ꓟ ꓦ ꓡꓱ ꓟ ꓟꓲ ꓣꓳ ꓠꓲ, ꓟ ꓗꓪ ꓐꓰ ꓡ ꓟ ꓥ ꓡꓳ꓿ ꓙꓵ., ꓠꓲ, ꓐꓯˍꓟ ꓠꓬ ꓪꓴ‐ꓢ ꓡꓰ ꓖꓶ ꓡ ꓟ ꓡꓯꓼ ꓫꓴ ꓕꓱ ꓟ ꓥ ꓡꓳ꓿ꓖꓳ ꓟ ꓑꓶ. ꓓꓴ ꓣꓳ ꓞꓳ ꓡꓱ ꓐꓴ ꓮ ꓫꓵꓽ ꓬꓰ ꓥˍꓟꓲ ꓪꓴ‐ꓢ ꓔꓯ ꓪꓽ ꓪꓴ ꓘꓳ ꓢꓲ꓾ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓟꓽ ꓞꓲ ꓣꓳ ꓞꓳ ꓡꓱ ꓐꓴ ꓠꓬ ꓦꓲ., ꓔꓴꓽ ꓘꓪ ꓔꓴ ꓠ ꓗ, ꓟ ꓑꓶ. ꓓꓴ ꓙꓵ., ꓟ ꓦꓲ., ꓢꓲ ꓒ ꓙꓵ., ꓟ ꓦꓲ., ꓟ ꓪ ꓠ, ꓟ ꓐꓱ ꓶ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓽ ꓘꓴ ꓠ ꓗ, ꓟ ꓥ ꓡꓳ꓿ ꓣꓳ ꓦ ꓡꓱ ꓟ ꓪꓴ‐ꓢ ꓠꓬ ꓮ ꓡꓰ ꓫꓵꓽ ꓗꓪ ꓥˍꓟꓲ ꓑ ꓡ ꓟ ꓪꓴ‐ꓢ ꓥ ꓡꓳ꓿ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓐꓯ ꓖꓶ ꓠ ꓡꓳ. ꓡꓯ꓿ ꓢꓲ ꓫꓬ ꓕꓳꓽ ꓶ ꓢꓲ꓾ ꓵ ꓢꓲ꓾ ꓦ ꓢꓯꓼ ꓪ ꓣꓴ ꓙꓰ ꓥꓳ ꓐꓯ ꓠꓬ ꓮ ꓡꓰ ꓫꓵꓽ ꓟꓬꓱꓽ ꓬꓰ ꓥˍꓟꓲ ꓗ, ꓛꓲ ꓛꓲ ꓡꓰ ꓟꓬꓱꓽ ꓬꓰ ꓑ ꓡ ꓥꓳ ꓿
