5 ꓦ ꓟ 25 ꓠꓬꓲ 2025 ꓘꓳꓼ ꓕꓯ ꓟꓬ‐ꓟ ꓗꓴꓷꓼ ꓗꓪ ꓐꓰ ꓚꓮꓣꓓꓲꓠꓮꓡ ꓚꓧꓮꓡꓰꓢ ꓐꓳ ꓠꓬ ꓕꓲ ꓟꓲ ꓠꓯ ꓡꓱ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓫꓵꓼ ꓡꓰꓳ (14) ꓔꓯ ꓟꓲ ꓠꓯ ꓢꓲ ꓡꓲ ꓟꓶ ꓠ,ꓟ ꓟꓬꓱꓽ ꓬꓰ ꓢꓴ ꓒꓬꓱꓼ ꓠ, ꓟ ꓶ ꓓꓰꓽ ꓪꓽ ꓘꓴ ꓙ ꓖꓶ ꓗꓷ ꓟ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓟꓵ ꓗꓳ ꓓꓵ ꓓꓵ ꓗꓪ ꓫꓵꓽ ꓪꓴꓽ ꓒꓬꓱꓼ ꓔꓬ ꓟ ꓗꓴꓷꓼ ꓮ ꓟꓬ, ꓥ ꓟ ꓖ‐ꓜ ꓴꓗꓮꓣꓲꓠ꓾ ꓟꓬ‐ꓟ ꓗꓴꓷꓼ ꓠꓱ. ꓐꓯ ꓗꓴꓷꓼ ꓮ ꓟꓬ, ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓟꓯꓼ ꓢꓰꓼ ꓡꓯ ꓘꓳ, ꓔꓬ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓟ ꓥ ꓡꓳ꓿ꓞꓲ ꓟꓳ ꓡꓰ ꓢꓴ ꓐꓰ ꓤ ꓠꓱ ꓤ ꓐꓴ ꓮ ꓟꓬ, ꓥ ꓟꓲ ꓜ ꓓꓴ ꓓꓳ ꓓꓴ ꓮ ꓟꓬ, ꓫ. ꓔꓬ ꓟ ꓥ ꓡꓳ꓿
ꓠꓲ, ꓫ ꓟꓬ ꓫ. ꓔꓬ ꓟ ꓤ ꓠꓱ ꓐꓴ ꓔꓯ ꓬꓰ ꓙ ꓢꓴ ꓙꓲˍ ꓟ ꓮ‐ꓐ ꓕꓲ ꓣꓳ ꓡꓰ ꓐꓰ ꓔꓲꓺ ꓒ ꓪ ꓔꓲ ꓫꓵꓼ ꓔꓯ ꓚꓮꓣꓓꓲꓠꓮꓡ ꓶ ꓓꓰꓽ ꓙ ꓟ ꓑꓶ. ꓓꓴ ꓫ. ꓟꓳ ꓔꓬ ꓔꓯ ꓥ ꓟꓲ ꓐꓯ ꓔ ꓟ ꓥ ꓡꓳ꓿ ꓗꓴꓷꓼ ꓮ ꓟꓬ, ꓗꓪ ꓫꓵꓽ ꓪꓴꓽ ꓒꓬꓱꓼ ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓟꓬꓱꓽ ꓮ ꓟꓬ, ꓬꓰ ꓐ ꓠ,ꓟ ꓪꓽ ꓘꓴ ꓙ ꓖꓶ ꓟ ꓥ ꓡꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓠꓬ ꓕꓲ ꓟꓲ ꓠꓯ ꓡꓱ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓚꓲ. ꓛꓬ ꓘꓳ, ꓣꓴ ꓟꓶ ꓟ ꓙꓵꓻ ꓠꓲ, ꓔꓯ ꓪꓴꓽ ꓟꓴꓽ ꓡ ꓠ, ꓟ ꓢꓯꓼ ꓪ ꓖꓶ ꓢꓴ ꓙꓲ ꓟ ꓮ. ꓣꓳ ꓡꓳ ꓒꓽ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓥꓳꓽ ꓡꓳ ꓔ ꓟ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓟꓬꓱꓽ ꓔꓯ ꓬꓰ ꓐ ꓡ ꓠ, ꓟ ꓪꓽ ꓘꓴ ꓙ ꓖꓶ ꓔꓬ ꓡꓳ ꓐꓰ ꓚꓮꓣꓓꓲꓠꓮꓡ ꓡꓰ ꓐꓯ ꓔ ꓡꓳ꓿
