ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓖꓳ ꓓꓱꓽ ꓕꓲ ꓖꓳ ꓓꓱꓽ ꓡꓱꓸꓼ ꓠꓬ ꓮ ꓫꓵꓽ ꓥˍ ꓟꓲ ꓬꓲ ꓟꓬꓱꓽ ꓬꓲ ꓬꓰ ꓔꓬ ꓟ ꓥ ꓡꓳ꓿ ꓣꓳ ꓢꓯꓼ ꓦ ꓔꓬ ꓟ꓾ ꓚꓵ. ꓬꓲꓻ ꓓꓳ ꓔꓬ ꓟ꓾ ꓬꓲ ꓐꓽ ꓗꓪ ꓙꓰˍ ꓟ꓾ ꓟꓬ ꓞꓲ, ꓔꓬ ꓟ꓾ ꓕꓱ ꓟ ꓮ ꓙꓵꓽ ꓠꓬ ꓣꓳ ꓖꓳ ꓓꓱꓽ ꓐꓱ ꓶ ꓣꓱꓽ ꓞ, ꓟ ꓣꓱꓽ ꓬꓯꓼˍ ꓟ ꓕꓲꓽ ꓒꓳ, ꓗꓪ ꓣꓱꓽ ꓬꓰ ꓔꓬ ꓟ ꓥ ꓡꓳ꓿ ꓮ ꓡꓲ ꓕꓲ ꓫꓵꓽ ꓥ ꓟꓲ ꓮ ꓘꓶ. ꓬꓳ. ꓚꓰꓽˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓚꓱ, ꓔꓯ ꓐꓯ ꓟꓳ. ꓖꓶˍ ꓟ ꓙꓵˍ ꓗꓪ ꓠꓬ꓾
ꓮ ꓫꓵꓽ ꓪꓴ. ꓠꓬꓲ ꓚꓵ. ꓬꓲꓻ ꓓꓳˍ ꓟ ꓠꓬ ꓙꓲˍ ꓟ ꓥ ꓡꓳ꓾ ꓐꓰ ꓐꓯ ꓔꓬ ꓡ?
ꓣꓳꓽ ꓢꓷ. ꓔ ꓟ ꓡꓰ ꓕꓲꓽ ꓡꓰ, ꓚꓵ. ꓬꓲꓻ ꓠꓬ ꓞꓻ ꓡˍ ꓕꓯ ꓓꓳˍ ꓡꓳ꓾ ꓠꓲ, ꓟ ꓔꓷ, ꓡˍ ꓕꓯ ꓓꓳˍ ꓡꓳ꓾ ꓙꓳ ꓡˍ ꓕꓯ ꓠꓲ, ꓟ ꓓꓵꓽ ꓙꓽ ꓪꓴꓽ ꓧꓶ ꓡˍ ꓕꓯ ꓥ ꓟꓲ ꓓꓳˍ ꓡꓳ꓾ ꓔꓬ, ꓟꓽ ꓢꓻ ꓕꓯ ꓥ ꓟꓲ ꓚꓵ. ꓬꓲꓻ ꓙꓬ ꓓꓳˍ ꓡꓳ꓿
ꓕꓲ ꓐꓱ ꓠꓬ ꓚꓵ. ꓬꓲꓻ ꓓꓳ ꓡˍ ꓕꓯ ꓔꓬ ꓫ.ˍ ꓟ ꓑꓶ. ꓓꓴ ꓚꓵ. ꓬꓲꓻ ꓓꓳˍ ꓟ ꓔꓯ ꓟꓽ ꓧꓳ,꓾ ꓟꓽ ꓠꓵꓻ꓿ ꓖꓳ ꓡꓱ ꓐꓯ ꓥ ꓟꓲ ꓚꓵ. ꓬꓲꓻ ꓓꓳˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓚꓵ. ꓬꓲꓻ ꓐꓯˍ ꓟ ꓠꓬ ꓮ ꓫꓵꓽ ꓥ ꓡ? ꓚꓵ. ꓬꓲꓻ ꓐꓰ ꓐꓯˍ ꓟ ꓠꓬ ꓣꓳ ꓓꓵꓽ ꓙ ꓔ ꓟ ꓕꓯꓽ ꓢꓲ ꓪ ꓜꓲ ꓬꓲ ꓐꓯ ꓘꓶꓽ ꓠꓯ.ˍ ꓟ ꓥ ꓡꓳ꓿ ꓡ ꓞꓳ ꓕꓲ ꓣꓳ ꓗꓪ ꓬꓲꓻ ꓙꓬ꓾ ꓞꓼ ꓐꓳ꓾ ꓮ‐ꓟꓮꓲ‐ꓠꓳ ꓮꓚꓲꓓ꓾ ꓑꓣꓳꓔꓰꓲꓠ ꓐꓰ ꓠꓱ. ꓐꓯ ꓮ ꓟꓬ, ꓫꓵꓽ ꓚꓬꓼ ꓔ ꓟ ꓔꓯ ꓣꓴ ꓓꓳ ꓖꓶˍ ꓟ ꓚꓵ. ꓬꓲꓻ ꓓꓳ ꓖꓴ ꓬꓲ ꓘꓴ ꓢꓪꓰꓮꓔ ꓖꓡꓮꓠꓓ 40 ꓫꓬ, ꓛꓲ ꓙꓳˍ ꓡꓳ꓾ ꓐꓰ ꓢꓷ. ꓪˍ ꓟ ꓥ ꓡꓳ꓿ ꓕꓱ ꓚꓬꓼ ꓔ ꓟ ꓗꓪ ꓓꓯ,ˍ ꓟ ꓠꓬ ꓡ ꓞꓳ ꓕꓲꓽ ꓣꓳ ꓗꓪ ꓙꓳˍ ꓟ ꓧꓳꓣꓟꓳꓠꓰꓢ꓾ ꓖꓳ ꓓꓱꓽ ꓡꓶ. ꓙꓰˍ ꓟ ꓐꓰ ꓖꓳ ꓓꓱꓽ ꓘꓴꓽ ꓗꓪ ꓙꓳˍ ꓟ ꓐꓮꓚꓔꓰꓣꓲꓮ ꓕꓱ ꓟꓬꓽ ꓙꓰꓽ ꓔꓯ ꓛꓳ ꓢꓲ ꓠꓬꓲ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱ. ꓡꓯ ꓘꓳ ꓟ ꓥ ꓡꓳ꓿ ꓝꓮꓲ ꓓꓵꓽ ꓙꓽ ꓮʼ ꓓꓴ ꓕꓲꓽ ꓫꓵꓽ ꓠꓬ ꓚꓵ. ꓬꓲꓻ ꓗꓪ ꓓꓯ,ˍ ꓟ ꓚꓬꓼ ꓫꓵꓽ ꓬꓲ. ꓫꓵꓽ ꓬꓲ. ꓙꓰꓽ ꓐꓰ ꓚꓵ. ꓬꓲꓻ ꓖꓡꓲꓠ ꓟꓬꓱꓽ ꓬꓰ ꓚꓱ, ꓠꓬ ꓞꓳ ꓤ ꓕꓲꓽ ꓣꓳ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓚꓱ, ꓔꓯ ꓮ ꓟꓬ, ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓚꓵ. ꓬꓲꓻ ꓠꓬ ꓮ ꓫꓵꓽ ꓑꓶ. ꓓꓴ ꓓꓳ ꓡˍ ꓡ? ꓚꓵ. ꓬꓲꓻ ꓓꓳ ꓡ ꓝꓲˍ ꓟ ꓚꓱ, ꓮ ꓟꓬ, ꓙꓳˍ ꓟ ꓥ ꓡꓳ꓿ ꓖꓳ ꓓꓱꓽ ꓗꓪ ꓮ ꓘꓶ. ꓞꓻ ꓡˍ ꓕꓯ ꓖꓳ ꓓꓱꓽ ꓞꓻ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲ ꓢꓲ ꓖꓳ ꓓꓱꓽ ꓡꓬꓽ ꓡꓰ ꓠ ꓚꓵ. ꓬꓲꓻ ꓠꓬ ꓬꓰ ꓙ ꓖꓶ ꓐ ꓡˍ ꓡꓳ꓿ ꓚꓵ. ꓬꓲꓻ ꓠꓬ ꓖꓳ ꓓꓱꓽ ꓗꓪ ꓟꓽ ꓙꓲꓻ꓾ ꓬꓲ. ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓠ, ꓟ ꓐꓱ ꓶ ꓪꓽ ꓠꓬꓲˍ ꓟ ꓚꓱ, ꓕꓲꓽ ꓟ ꓥ ꓡꓳ꓿ ꓚꓵ. ꓬꓲꓻ ꓓꓳˍ ꓟ ꓗꓪ ꓐꓰ ꓟꓶ ꓡˍ ꓟ ꓙꓲꓻ ꓖꓴ ꓐꓴ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓟꓽ ꓙꓲꓻ ꓟ ꓬꓲ ꓢꓯꓼ ꓐꓴ ꓔꓯ ꓣꓴ ꓦ ꓖꓶˍ ꓟ꓾
ꓚꓵ. ꓬꓲꓻ ꓬꓲ ꓟꓬꓱꓽ ꓗꓪ ꓟ ꓕꓲꓽ ꓟ ꓠꓬ ꓖꓳ ꓓꓱꓽ ꓔꓯ ꓡꓬꓽ ꓡꓰ ꓠ ꓬꓰ ꓙ ꓖꓶ ꓠ, ꓟ ꓐꓯˍ ꓥ ꓟꓲ꓾ ꓟꓬꓽ ꓠꓬꓲꓽ ꓬꓳ. ꓚꓰꓽˍ ꓟ ꓕꓲꓽ ꓟ ꓠꓬ ꓬꓲ. ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓟ ꓥ ꓡꓳ꓿ ꓚꓵ. ꓬꓲꓻ ꓗꓪ ꓐꓰ ꓬꓲ ꓓꓳꓼ ꓣꓴ ꓦ ꓖꓶˍ ꓐꓯˍ ꓟ ꓠꓬ ꓒꓬꓱꓼ ꓡ ꓟꓽ ꓓꓻ꓾ ꓐꓰ ꓐꓯ ꓔ ꓟ ꓙꓳˍ ꓥ ꓟꓲ ꓚꓵ. ꓬꓲꓻ ꓠꓬ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓾ ꓐꓯˍ ꓟ ꓢꓷ. ꓡꓰ ꓓꓴ ꓥ ꓟꓲ ꓮ ꓟꓬ, ꓙꓳˍ ꓟ ꓥ ꓡꓳ꓿ ꓠꓯ ꓞꓲꓼ ꓔꓯ ꓟꓳ. ꓧꓪ ꓟꓰ, ꓠꓬꓲ ꓔ ꓟ ꓕꓲ ꓖꓻ ꓗꓪ ꓠꓬ ꓟ‐ꓚꓬꓴ‐ꓣꓲ ꓬꓲ ꓓꓳꓼ ꓖꓳ ꓡꓰ ꓢꓴ ꓐꓴ ꓔꓯ ꓥ ꓟꓲ ꓓꓻ ꓡꓰ ꓠ, ꓟ ꓐꓱ ꓶ ꓚꓵ. ꓬꓲꓻ ꓓꓳ ꓠ ꓬꓰ ꓙ ꓖꓶ ꓠ ꓗ, ꓡꓳ꓾ ꓐꓰ ꓐꓯ ꓔ ꓡꓳ꓿ ꓚꓵ. ꓬꓲꓻ ꓠꓬ Arsenic꓾ Cadmium ꓐꓰ lead꓾ ꓕꓱ ꓡꓱ ꓫꓵꓽ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓟ ꓑꓶ. ꓓꓴ ꓥ ꓡꓳ꓿
ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓧꓳꓣꓟꓳꓠꓰꓢ ꓓꓳ ꓡˍ ꓟ ꓔꓯ ꓗꓽ ꓔ ꓟ BAP ꓐꓰ PCBs ꓐꓴ ꓔꓯ ꓣꓴ ꓦ ꓖꓶˍ ꓟ꓾
ꓖꓳ ꓓꓱꓽ ꓗꓪ ꓧꓳꓣꓟꓳꓠꓰꓢ ꓓꓳ ꓡˍ ꓟ ꓔꓯ ꓗꓽ ꓔ ꓟ BAP ꓔꓯ ꓑꓡꓮꓢꓔꓲꓚ ꓗꓪ ꓟꓳꓻ ꓪˍ ꓟ ꓑꓶ. ꓓꓴ ꓑꓡꓮꓢꓔꓲꓚ ꓣꓱꓽˍ ꓟ ꓔꓯ ꓐ ꓡˍ ꓗꓪ ꓛꓲ ꓤ ꓟꓳ ꓠ ꓗ, ꓡꓳ꓿ ꓠꓯ ꓞꓲꓼ ꓔꓯ ꓟꓳ. ꓧꓪ ꓟꓰ, ꓠꓬꓲ ꓖꓴ ꓗꓪ BAP ꓔꓯ ꓠꓱ. ꓐꓯ ꓬꓲ ꓓꓳꓼ ꓣꓴ ꓦˍ ꓟ ꓚꓱ, ꓢꓶ. ꓟꓽ ꓞꓲ ꓚꓵ. ꓬꓲꓻ ꓗꓪ ꓐꓰ ꓕꓲꓽ ꓝ. ꓣꓴ ꓦˍ ꓟ ꓠꓬ ꓪ ꓜꓲ ꓕꓲꓺ ꓡꓰ ꓓꓴ ꓙꓳˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ PCBs ꓐꓰ PBDES ꓡꓰ ꓐꓰ ꓟꓽ ꓙꓲꓻ ꓟ ꓐꓴ ꓔꓯ ꓥˍ ꓟꓲ ꓤꓲꓽ ꓗꓪ ꓐꓰ ꓟꓽ ꓥ ꓥ ꓚꓵ. ꓬꓲꓻ ꓗꓪ ꓣꓴ ꓦ ꓖꓶˍ ꓟ ꓥ ꓡꓳ꓿
ꓧꓪꓽ ꓗꓴ, ꓙꓲ ꓐꓱ ꓶ ꓙꓲꓻˍ ꓟ
ꓚꓵ. ꓬꓲꓻ ꓠꓬ ꓧꓪꓽ ꓗꓴ, ꓙꓲꓻ ꓐꓱ ꓶ ꓙꓲˍ ꓟ ꓐꓮꓚꓔꓰꓣꓲꓮ ꓟꓬꓽ ꓡ ꓠ, ꓟ ꓐꓱ ꓶ ꓠꓯ ꓞꓲꓼ ꓕꓲꓽ ꓟˍ ꓡꓰ ꓐꓰ ꓟꓬꓱꓽ ꓬꓰˍ ꓟ ꓥ ꓡꓳ꓿ ꓧꓪꓽ ꓗꓴ, ꓙꓲ ꓚꓰꓡꓡ ꓐꓴ ꓬꓲ ꓫꓵꓼ ꓒꓬꓱꓼ ꓡ ꓠ, ꓟ ꓐꓰ ꓒꓬꓱꓽ ꓟꓬ ꓗꓪ ꓬꓲ ꓑ ꓓꓲꓻˍ ꓟ ꓗꓪ ꓐꓰ ꓓꓻ ꓡꓰ ꓠ, ꓟ ꓧꓪꓽ ꓗꓴ, ꓙꓲ ꓗꓪ ꓟꓽ ꓙꓲꓻ ꓟ ꓐꓮꓚꓔꓰꓣꓲꓮ ꓐꓴ ꓔꓯ ꓣꓴ ꓦ ꓖꓶ ꓠ, ꓟ ꓚꓵ. ꓬꓲꓻ ꓠꓬ ꓬꓰ ꓙ ꓖꓶˍ ꓡꓳ꓿
Alzheimer’s ꓠꓻ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓾
ꓚꓵ. ꓬꓲꓻ ꓓꓳˍ ꓟ ꓠꓬ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓬꓲ. ꓓꓳꓼ ꓒꓬꓱꓼ ꓡ ꓝꓲˍ ꓟ ꓟꓽ ꓙꓲꓻ ꓟ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿ ꓖꓳ ꓓꓱꓽ ꓐꓰ ꓠꓲ, ꓟ ꓔꓯ ꓡꓳꓻ ꓡꓰ ꓠ ꓬꓰ ꓙ ꓖꓶˍ ꓡꓳ꓿ ꓪꓴ. ꓠꓶ. ꓫꓵꓽ ꓬꓲꓻ ꓚꓳˍ ꓟ ꓗꓪ ꓬꓰ ꓙ ꓖꓶˍ ꓡꓳ꓿ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓠꓬ Alzheimer’s ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶ ꓐ ꓡˍ ꓟ ꓥ ꓡꓳ꓿ ꓧꓪ ꓟꓰ, ꓠꓬꓲ ꓔ ꓟ ꓕꓲꓽ ꓟ ꓗꓪ ꓠꓬ ꓚꓵ. ꓬꓲꓻ ꓩꓵ, ꓖꓴ ꓗꓪ ꓮ ꓕꓯ ꓟꓲ ꓙꓰ ꓔꓬ ꓢꓴ ꓠꓬ꓾ ꓚꓵ. ꓬꓲꓻ ꓓꓳ ꓠ ꓮ ꓕꓯ ꓟꓲ ꓬꓰ ꓔꓬ ꓢꓴ ꓐꓴ ꓠꓬ ꓟꓽ ꓬꓰ ꓢꓴ ꓢꓶ. ꓟꓽ ꓞꓲ Alzheimer’s ꓠꓻ ꓒꓬꓱꓼ ꓡ ꓚꓱ, ꓠꓬ 65% ꓗꓪ ꓛꓲ ꓠꓲ.ˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓓꓱꓽ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓐꓶꓽ ꓓꓲꓻ ꓐꓴ ꓔꓯ ꓢꓰꓼ ꓖꓶˍ ꓟ꓾
ꓟꓵꓽ ꓗꓳ, ꓓꓵ ꓓꓵ ꓧꓪ ꓟꓰ, ꓠꓬꓲ ꓔ ꓟ ꓗꓪ ꓠꓬ ꓚꓵ. ꓬꓲꓻ ꓩꓵ, ꓖꓶˍ ꓟ ꓠꓬ ꓔꓳꓗꓰ‐ꓗꓪꓰ ꓒꓬꓱꓼ ꓡ ꓚꓱ, ꓔꓯ 3 ꓩꓴ. 1 ꓩꓴ. ꓠꓲ. ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓚꓵ. ꓬꓲꓻ ꓗꓪ ꓓꓯ,ˍ ꓟ ꓐꓶꓽ ꓓꓲꓻ ꓗꓽ ꓙ ꓖꓶˍ ꓟ ꓑꓣꓳꓔꓰꓲꓠ ꓐꓴ ꓠꓬ ꓖꓳ ꓓꓱꓽ ꓗꓪ ꓙꓳˍ ꓟ ꓬꓲ ꓓꓳꓼ ꓐꓰ ꓟꓽ ꓙꓲꓻ ꓟ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶ ꓐ ꓡˍ ꓡꓳ꓿
ꓠꓲ, ꓟ ꓔꓯ ꓗꓽ ꓕ. ꓙ ꓖꓶˍ ꓟ꓾
ꓚꓵ. ꓬꓲꓻ ꓓꓳ ꓠ ꓡꓵ ꓖꓶˍ ꓟ ꓗꓪ ꓐꓰ ꓥˍ ꓟꓲ꓾ ꓚꓵ. ꓬꓲꓻ ꓩꓵ,ˍ ꓟ ꓑꓶ. ꓓꓴ ꓥˍ ꓟꓲ ꓚꓵ. ꓬꓲꓻ ꓓꓳˍ ꓕꓯ ꓠꓬ ꓖꓳ ꓓꓱꓽ ꓫꓵꓽ ꓬꓲꓻ ꓚꓳˍ ꓟ ꓐꓰ ꓠꓲ, ꓟ ꓫꓵꓽ ꓙꓴꓽ ꓚꓱ, ꓔꓯ ꓟꓬꓽ ꓠꓬꓲ ꓬꓰ ꓙ ꓔꓳ, ꓙ ꓖꓶˍ ꓟ ꓥ ꓡꓳ꓿ ꓚꓵ. ꓬꓲꓻ ꓩꓵ, ꓖꓴ ꓗꓪ ꓙꓰ ꓢꓴ ꓐꓴ ꓠꓬ ꓟꓽ ꓙꓰ ꓢꓴ ꓐꓴ ꓢꓶ. ꓟꓽ ꓞꓲ ꓠꓲ, ꓟ ꓫꓵꓽ ꓙꓴꓽ ꓣꓳˍ ꓟ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓚꓵ. ꓬꓲꓻ ꓩꓵ, ꓖꓴ ꓗꓪ ꓙꓰˍ ꓟ ꓚꓵ. ꓬꓲꓻ ꓩꓵ, ꓖꓶˍ ꓟ ꓠꓬ ꓖꓳ ꓓꓱꓽ ꓡꓳꓻ ꓡꓰ ꓝꓲ ꓓꓴˍ ꓡꓰꓽ ꓟꓽ ꓞꓲꓺ ꓠꓲ, ꓟ ꓐꓱ ꓶ ꓥˍ ꓟꓲ ꓮ ꓘꓶ. ꓙꓲꓻˍ ꓟ ꓥ ꓡꓳ꓿
ꓖꓳ ꓓꓱꓽ ꓔꓯ ꓫꓬ, ꓔꓱ, ꓖꓶˍ ꓟ꓾
ꓚꓵ. ꓬꓲꓻ ꓠꓬ ꓧꓪꓽ ꓘꓴ. ꓗꓪꓮꓔ‐ꓔ ꓘꓴꓽ ꓠꓯꓸꓼ ꓗꓪ ꓫꓵꓽ ꓬꓲꓻ ꓚꓳˍ ꓟ ꓗꓪ ꓢꓯꓼ ꓡꓴꓽ ꓖꓶˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓻ ꓤꓽ ꓒꓬꓽ ꓤ ꓐꓰ ꓧꓪꓽ ꓘꓴ. ꓠꓻˍ ꓟ ꓔꓯ ꓕꓲ ꓝꓲ.ˍ ꓡꓰ ꓓꓻ ꓡꓰ ꓝꓲ ꓐ ꓡˍ ꓡꓳ꓿ ꓚꓵ. ꓬꓲ ꓠꓬ ꓧꓳꓣꓟꓳꓠꓰꓢ ꓓꓳ ꓡ ꓝꓲˍ ꓟ ꓔꓯ ꓟꓴ ꓓꓯ ꓡ ꓝꓲ ꓐ ꓡˍ ꓟ ꓑꓶ. ꓓꓴ ꓕꓱ ꓟ ꓥˍ ꓟꓲ ꓖꓳ ꓓꓱꓽ ꓔꓯ ꓝꓮꓲ ꓫꓬ, ꓔꓱ,ˍ ꓟ ꓚꓱ, ꓥ ꓡꓳ꓿
ꓠꓲ, ꓟ ꓓꓵꓽ ꓙꓽ ꓟꓬꓽˍ ꓟ ꓧꓳꓣꓟꓳꓠꓰꓢ ꓔꓯ ꓠꓲ. ꓡꓰ ꓝꓲˍ ꓟ꓾
ꓚꓵ. ꓬꓲꓻ ꓓꓳˍ ꓟ ꓠꓬ ꓖꓳ ꓓꓱꓽ ꓗꓪ ꓮ‐ꓬꓳꓠꓰ‐ꓗꓬꓮꓪ, ꓟꓬꓱꓽ ꓬꓰˍ ꓚꓱ, ꓔꓯ ꓢꓯꓼ ꓙꓳ ꓡꓰ ꓝꓲ ꓢꓲ ꓠꓬꓲ꓾ ꓜꓽ ꓓꓴ ꓐꓴ ꓔꓯ ꓙꓲˍ ꓟ ꓗꓪ ꓬꓰ ꓙ ꓖꓶˍ ꓡꓳ꓿ ꓖꓳ ꓓꓱꓽ ꓡꓵ ꓖꓶˍ ꓟ ꓗꓪ ꓐꓰ ꓓꓳ ꓡˍ ꓟ ꓚꓵ. ꓬꓲꓻ ꓠꓬ ꓗ, ꓛꓲꓽ ꓓꓴ ꓧꓳꓣꓟꓳꓠꓰꓢ ꓔꓯ ꓟꓴ ꓓꓯ ꓡ ꓝꓲ ꓐ ꓡ ꓢꓲ꓾ ꓠꓲ, ꓟ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶˍ ꓟ ꓔꓯ ꓥ ꓟꓲ ꓬꓯꓼ ꓡꓰ ꓞꓰ ꓡꓰ ꓝꓲ ꓐ ꓡˍ ꓡꓳ꓿
ꓪꓳꓽ ꓓꓲ ꓗꓪ ꓡꓳ ꓓꓲ ꓒꓬꓱꓼ ꓡ ꓚꓱ, ꓔꓯ ꓥ ꓟꓲ ꓠꓲ. ꓡꓰ ꓝꓲˍ ꓟ꓾ ꓚꓵ. ꓬꓲꓻ ꓓꓳˍ ꓟ ꓙꓲꓻ ꓖꓴ ꓙꓳˍ ꓟ ꓚꓱ, ꓝꓮꓲ ꓕꓲ ꓟ ꓙꓳˍ ꓢꓰꓽ ꓡꓳ꓿ ꓬꓲ ꓞꓲꓼ 50 ꓘꓳꓼ ꓙ ꓬꓰ ꓟ ꓤ ꓟꓶ ꓤ ꓐꓴ ꓪꓳꓽ ꓓꓲ ꓗꓪ ꓡꓳ ꓓꓲ ꓒꓬꓱꓼ ꓡ ꓚꓱ, ꓟꓬꓽˍ ꓡꓳ ꓐꓰ ꓐꓯ ꓔ ꓥ ꓟꓲ ꓚꓵ. ꓬꓲꓻ ꓓꓳˍ ꓟ ꓗꓪ ꓐꓰ ꓡꓳ ꓓꓲ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲ ꓐ ꓡˍ ꓟ ꓥ ꓡꓳ꓿ ꓞꓼ ꓐꓳ ꓐꓰ ꓚꓮꓡꓚꓲꓴꓟ ꓮ ꓟꓬ, ꓓꓯ,ˍ ꓟ ꓠꓬ ꓪꓳꓽ ꓓꓲ ꓗꓪ ꓡꓳ ꓓꓲ ꓒꓬꓱꓼ ꓡ ꓝꓲˍ ꓐꓯˍ ꓥ ꓟꓲ꓾ ꓚꓵ. ꓬꓲꓻ ꓓꓳˍ ꓟ ꓗꓪ ꓐꓰ ꓞꓼ ꓐꓳ ꓐꓰ ꓚꓮꓡꓚꓲꓴꓟ ꓢꓯꓼ ꓮ ꓟꓬ, ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓟ ꓡꓰꓽ ꓟꓽ ꓞꓲ꓾ ꓚꓮꓡꓚꓲꓴꓟ ꓔꓯ ꓥˍ ꓟꓲ ꓪꓳꓽ ꓔꓳ ꓐꓱ ꓶ ꓙꓲꓻ ꓖꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓬꓲ ꓚꓱ, ꓒꓳ, ꓖꓶ ꓐ ꓡˍ ꓟ ꓥ ꓡꓳ꓿
