ꓪꓴ-ꓢ ꓟꓬꓱꓽ ꓝꓲ ꓓꓴ ꓟꓬꓱꓽ ꓬꓰ ꓙ ꓟ ꓟꓬꓱꓽ ꓗꓪ ꓟꓬ ꓠꓬꓲ ꓢꓯꓸ ꓔꓬ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓢꓯꓼ ꓖꓶ_ ꓟ꓾
ꓪꓴ-ꓢ ꓟꓬꓱꓽ ꓝꓲ ꓓꓴ ꓟꓬꓱꓽ ꓬꓰ ꓙ ꓟ ꓟꓬꓱꓽ ꓗꓪ ꓟꓬ ꓠꓬꓲ ꓢꓯꓸ ꓔꓬ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓓꓴ ꓬꓰ ꓡꓯ ꓐꓰ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓯꓼ ꓖꓶ ꓔ ꓡꓳ=
ꓕꓲ ꓣꓳ ꓐꓰ ꓕꓲ ꓣꓳ ꓒꓵ ꓛꓳ ꓢꓯꓸ ꓔꓬ ꓢꓲ ꓠꓬꓲ ꓠꓵꓻ ꓠꓲꓹ ꓐꓰ ꓔꓱꓹ ꓟ ꓚꓱꓹ ꓗꓪ ꓕꓲꓽ ꓪ ꓛꓳ ꓱꓽ ꓠꓹ ꓟ ꓪꓴ-ꓢ ꓟꓬꓱꓽ ꓚꓱꓹ ꓝꓲ ꓓꓴ ꓟꓬꓱꓽ ꓚꓱꓹ ꓗꓪ ꓛꓳ ꓫꓱꓽ ꓢꓴ ꓟꓬ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓓꓴ ꓬꓰ ꓡꓯ ꓐꓰ ꓐꓯ ꓔ ꓡꓳ=
ꓮꓠꓖꓰꓡꓴꓢ ꓪꓽ ꓟꓽ ꓘꓴ_ ꓟ ꓟꓲ ꓕꓯ ꓗꓪ ꓦꓮꓔꓲꓚꓮꓠ ꓗꓪ ꓜꓲꓼ ꓡ ꓟ ꓪꓽ ꓘꓴ ꓜꓲꓼ ꓡ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓠꓲꓹ ꓡꓱ ꓡꓱ ꓐꓰ ꓒꓵ ꓗꓹ ꓬꓰ_ ꓡꓳ= ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓠꓽ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓪ ꓔꓲ ꓡꓰ ꓢꓲ ꓫꓬ ꓕꓳ ꓶ ꓶꓼ ꓓꓳ ꓱꓸ ꓓꓳꓽ ꓗꓪ ꓐꓰ “ꓢꓲ ꓒ ꓬꓰ-ꓢꓴ ꓠꓬ ꓬꓲ ꓚꓲ ꓛꓬ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓐꓰ ꓟꓸ ꓖꓶ ꓔ ꓟ ꓥꓳ= ꓬꓲ ꓠꓬ ꓬꓲ ꓮ ꓣꓳ ꓜꓴ ꓔꓯ ꓢꓷꓸ ꓔ ꓡꓳ= ꓬꓲ ꓪ ꓔꓯ ꓠꓲꓹ ꓠꓵꓻ ꓢꓲ꓾ ꓬꓲ ꓪ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓟ ꓥ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓪꓴ-ꓢ ꓡꓰ ꓖꓶ_ ꓟ ꓡꓯꓼ ꓫꓴ ꓥ ꓡꓳ=
ꓔꓲꓺ ꓒ ꓤꓶꓻ꓾ ꓪꓴ-ꓢ ꓟꓬꓱꓽ ꓗꓪ ꓘꓴ ꓟꓶ ꓢꓴ ꓐꓴ ꓐꓱ ꓶ ꓪꓴ-ꓢ ꓤ ꓠꓱ ꓤ ꓐꓴ ꓐꓰ ꓕꓲ ꓪ ꓪꓽ ꓘꓴ ꓟꓶ ꓠꓬꓲ ꓠꓲꓹ ꓡꓱ ꓗꓹ ꓛꓲ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓘꓴ ꓜꓲꓼ ꓞꓳ ꓠꓬ ꓕꓱ ꓕꓲ ꓤꓶꓻ ꓠꓯꓼ ꓗꓪ ꓝꓲ ꓓꓴ ꓟꓬꓱꓽ ꓬꓰ ꓠꓹ ꓟ ꓮ ꓘꓶꓸ ꓣꓱ ꓬꓯꓼ_ ꓡꓳ=
ꓪꓴ-ꓢ ꓐꓰ ꓕꓲ ꓪ ꓚꓲ ꓛꓬ ꓐꓰ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓠꓲꓹ ꓡꓱ ꓡꓱ ꓐꓰ ꓝꓲ ꓓꓴ ꓟꓬꓱꓽ ꓔꓯ ꓣꓱ ꓢꓴ ꓐꓴ ꓬꓲ ꓪ ꓔꓯ ꓢꓯꓼ ꓖꓶ ꓠꓹ ꓟ꓾ ꓠ ꓠꓹ ꓖꓶ ꓠꓹ ꓟ꓾ ꓘꓳꓹ ꓣꓴ ꓠꓹ ꓟ꓾ ꓬꓰ ꓙ ꓔꓳꓹ ꓙ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ=
ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓝꓲ ꓓꓴ ꓟꓬꓱꓽ ꓬꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ_ ꓟ ꓦꓬꓼ ꓠꓬꓲ ꓬꓲ ꓐꓯ ꓘꓶꓽ ꓗꓪ ꓐꓰ ꓪꓴ-ꓢ ꓗꓪ ꓐꓰ ꓣꓳ ꓶꓽ ꓓꓰ_ ꓟ ꓡꓰ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓒꓵꓽ ꓛꓳ ꓢꓲ꓾ ꓠꓵꓻ ꓠꓲꓹ ꓐꓰ ꓔꓱꓹ ꓟ ꓚꓱꓹ ꓗꓪ ꓕꓲ ꓠꓲꓹ ꓕꓲ ꓪ ꓬꓰ ꓙ ꓛꓳ ꓫꓱ ꓠꓹ ꓟ ꓐꓰ ꓞꓳ ꓡꓱ ꓤ ꓐꓴ ꓔꓯ ꓠꓲꓹ ꓡꓱ ꓡꓱ ꓘꓳꓹ ꓣꓴ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓯꓼ ꓖꓶ ꓔ ꓡꓳ=
ꓬꓲ ꓟꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓲ ꓒ ꓬꓰ-ꓢꓴ ꓘꓴ_ ꓟ꓾ ꓘꓴ ꓜꓲꓼ ꓞꓳ ꓗꓪ ꓐꓰ ꓘꓴ_ ꓟ ꓔꓯ ꓟꓽ ꓙꓳꓺ ꓠꓹ ꓟ꓾ ꓞꓳ ꓡꓱ ꓤ ꓐꓴ ꓔꓯ ꓮ ꓘꓶꓸ ꓢꓯꓼ ꓖꓶ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓟ ꓥꓳ=
