ꓗꓴꓷꓼ ꓫꓵ ꓪꓴ ꓑꓶ ꓓꓴ ꓫ. ꓓꓴ ꓔꓳꓹ ꓜꓳ ꓔꓬ ꓟ꓾ ꓖꓮꓜꓮ꓾ ꓟꓬꓮꓠꓟꓮꓣ ꓐꓰ ꓴꓗꓣꓮꓲꓠꓰ ꓐꓴ ꓐꓱ ꓶ ꓪ: ꓘꓴ ꓙ ꓟ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓔꓳꓹ ꓜꓳ ꓔꓬ ꓟ ꓔꓶ. ꓗꓪ ꓢꓲ ꓡꓲꓹ ꓠꓹ ꓟ ꓐꓯ ꓖꓶ ꓢꓲ ꓠꓬꓲ꓾ ꓖꓮꓜꓮ꓾ ꓟꓬꓮꓠꓟꓮꓣ ꓐꓰ ꓴꓗꓣꓮꓲꓠꓰ ꓗꓪ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓫ. ꓔꓬ ꓢꓴ ꓐꓴ ꓐꓱ ꓶ ꓪ: ꓘꓴ ꓙ ꓖꓶ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓙꓵ: ꓪ ꓪꓵꓼ ꓙꓱꓼˍ ꓟ ꓠ: ꓦꓬꓼ ꓠꓬꓲ ꓟꓲ-ꓢ ꓪ: ꓘꓴ ꓙꓵꓹ ꓓꓳ ꓡꓰ ꓕꓯ ꓪ: ꓘꓴ ꓶ ꓓꓰ ꓙ ꓖꓶ ꓟ ꓥꓳ=
ꓕꓱ ꓟꓲ-ꓢ ꓪ: ꓘꓴ ꓙꓵꓹ ꓗꓪ ꓜꓲꓼ ꓡ ꓢꓴ ꓠꓬꓲ: ꓫꓬꓹ ꓣꓳ ꓛꓲ ꓐꓰ ꓗꓴꓷꓼ ꓪꓴ. ꓓꓵ ꓣꓱ: ꓢꓴ꓾ ꓗꓴꓷꓼ ꓝꓲ ꓓꓴ ꓐꓴ ꓮ ꓙꓵ ꓔꓯ ꓫ ꓟꓳ ꓐꓰ ꓐꓯ ꓖꓶ ꓢꓲ꓾ ꓙꓵꓻ ꓠꓲꓹ ꓐꓰ ꓕꓲ ꓠꓲꓹ ꓕꓲ ꓪꓼ ꓙ ꓫꓱ: ꓗꓹ ꓛꓲ ꓟ ꓗꓪ ꓟꓯꓼ ꓢꓰꓼ ꓡꓯ ꓘꓳ ꓟ ꓑꓶ ꓓꓴ ꓫ. ꓔꓬ ꓢꓴ ꓬꓲ ꓤ ꓠꓬꓲ ꓤ ꓐꓴ ꓔꓯ ꓟ: ꓟꓲ ꓡꓰ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓯ ꓔ ꓡꓳ=
ꓖꓮꓜꓮ ꓗꓪ ꓔꓬ ꓟ ꓤ ꓠꓱ ꓤ ꓐꓴ ꓕꓲ ꓦꓲꓻ ꓢꓴ ꓐꓴ ꓐꓰ ꓞꓲꓼ ꓪꓴ ꓢꓴ ꓐꓴ ꓬꓲ ꓪ ꓔꓳ, ꓜꓳ ꓔꓬ ꓟ ꓫ. ꓓꓴ ꓟꓷꓼ ꓓꓴ ꓔꓯ ꓐ ꓡ ꓟꓬ ꓛꓲ ꓟꓽ ꓙꓳ ꓡꓰ ꓠ, ꓟ꓾ ꓟꓬ‐ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓠꓬ ꓝꓴꓲ ꓟꓽ ꓙꓳ ꓟ ꓞꓳ ꓡꓱ ꓤ ꓐꓴ ꓔꓯ ꓬꓲ ꓞꓲꓼ ꓓꓴ. ꓡꓰ ꓝꓲ_ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓴꓗꓣꓮꓲꓠꓰ ꓗꓴꓷꓼ ꓫꓵ ꓪꓴ ꓢꓰꓼ ꓡꓯ ꓘꓳ ꓓꓴ ꓗꓪ ꓫꓵꓻ ꓡꓰ ꓢꓴ ꓐꓴ ꓐꓱ ꓶ ꓠꓲ, ꓫ ꓟꓬ ꓫ ꓙ ꓔꓬ ꓟ ꓡꓰ ꓐꓰ ꓟꓬ ꓠꓬꓲ ꓐꓷ ꓠꓬꓲ ꓢꓲ ꓡꓲ, ꓗ, ꓛꓲ ꓠ, ꓟ ꓐꓱ ꓶ ꓢꓲ ꓡꓲ, ꓟ ꓚꓱ, ꓗꓪ ꓐꓰ ꓖꓪ ꓙꓱ ꓜꓲꓼ ꓓꓴ ꓐꓱ ꓶ ꓥꓳ ꓡꓳ. ꓔꓬ ꓡꓳ ꓐꓰ ꓐꓯ ꓖꓶ ꓔ ꓟ ꓥꓳ꓿ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓜꓲꓼ ꓡ ꓟ ꓴꓗꓣꓮꓲꓠꓰ ꓗꓴꓷꓼ ꓢꓲ ꓒꓽ ꓐꓰ ꓬꓲ ꓕꓲ ꓦꓲꓻ ꓢꓴ ꓐꓴ ꓟꓲ‐ꓢ ꓪꓽ ꓘꓴ ꓙꓵ, ꓓꓳ ꓡꓰ ꓗ. ꓠꓯ. ꓔꓲ ꓒ ꓪ ꓔꓲ ꓐꓰ ꓜꓲ ꓡꓯꓽ ꓘꓳ ꓗꓷ ꓟ ꓥꓳ꓿
ꓣꓰꓖꓲꓠꓮ ꓚꓮꓰꓡꓲ ꓮꓠꓖꓰꓡꓴꓢ ꓓꓳ ꓡꓰ ꓗ. ꓠꓯ. ꓠꓬ ꓔꓲꓺ ꓒ ꓪ ꓔꓲ ꓡꓰꓳ ꓠꓬ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓦ ꓢꓯꓼ ꓕꓲ ꓒꓳ, ꓗꓪ ꓬꓰ ꓙ ꓔꓬ ꓡꓳ ꓐꓰ ꓓꓵꓽ ꓙ ꓔꓬ ꓟ ꓥꓳ꓿ ꓟ, ꓟ ꓟ‐ꓡꓲ ꓠꓯꓼ ꓗꓪ ꓪꓽ ꓘꓴ ꓟ ꓐꓰ ꓬꓲ ꓬꓰ ꓔꓬ ꓟ ꓟꓬꓱꓽ ꓮ ꓙꓵ ꓔꓯ ꓡꓯꓼ ꓙꓱ ꓖꓶ ꓔꓬ ꓟ ꓥ ꓢꓲ ꓠꓬꓲ ꓢꓯ. ꓬꓲꓼ ꓡ ꓟ ꓢꓲ ꓒꓽ ꓬꓰ‐ꓢꓴ ꓔꓯ ꓢꓷ. ꓙ ꓟꓳ ꓙ ꓢꓴ ꓮ ꓙꓵ ꓶ ꓤ ꓫꓱ. ꓤ ꓪ ꓟꓶ ꓠ, ꓟ꓾ ꓠꓲ, ꓫ ꓟꓬ ꓫ. ꓮ ꓟꓬ, ꓔꓳ, ꓜꓳ ꓔꓬ ꓢꓴ ꓐꓴ ꓠꓲ, ꓗꓳ ꓟꓬ ꓗꓳ ꓪ ꓟꓶ ꓠ, ꓟ ꓐꓰ ꓬꓰ ꓙ ꓔꓳ, ꓙ ꓢꓴ ꓪ ꓟꓶ ꓠ, ꓟ꓾ ꓢꓲ ꓡꓲ, ꓗ, ꓛꓲ ꓟ ꓶ ꓤ ꓫꓱ. ꓤ ꓐꓴ ꓪ ꓟꓶ ꓠ, ꓟ ꓐꓱ ꓶ ꓟ, ꓟ ꓟ‐ꓡꓲ ꓠꓯꓼ ꓗꓪ ꓶꓽ ꓓꓰ ꓪꓽ ꓘꓴ ꓙ ꓗꓷ ꓟ ꓥꓳ꓿
