ꓣꓳ ꓟꓬ ꓢꓷꓽ ꓗꓪ ꓐꓰ ꓟꓳ ꓓˍꓟ ꓶꓼ ꓤꓼ ꓔꓯ ꓠꓲꓹ ꓦꓬꓼ ꓟ ꓚꓱꓹ ꓔꓯ ꓐꓯˍꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓲꓹ ꓡꓶ ꓟꓽ ꓥ꓾ꓮ ꓫꓵꓽ ꓑꓶꓸ ꓓꓴ ꓥ ꓡ? ꓕꓱ ꓕꓲ ꓙꓰ ꓟ ꓠꓬ ꓣꓳ ꓠꓲꓸꓹ ꓟ ꓠꓬ ꓣꓳ ꓦ ꓢꓷꓽ ꓟ ꓞꓲ ꓕꓱ ꓡꓱ ꓐꓰ ꓒꓴꓽ ꓫꓵꓽ ꓧꓪꓼ ꓟ ꓶꓼ ꓤ ꓶꓼ ꓟꓲ ꓖꓴ ꓙꓴ ꓖꓴ ꓟꓲ ꓔꓯ ꓡꓰ ꓠꓲꓸꓹ ꓯꓬꓼ ꓟ ꓥ ꓡꓳ= ꓠꓲꓸꓹ ꓟ ꓕꓲ ꓟ ꓡꓱ ꓗꓪ ꓮ ꓡꓰ ꓬꓰ ꓢꓲ꓾ ꓒꓴꓽ ꓪ ꓓˍꓟ ꓮ ꓡꓰ ꓐꓰ ꓬꓰ ꓙ ꓬꓰ ꓓꓳ ꓠꓹ ꓟ ꓝꓮꓲ ꓬꓲꓼ ꓤꓶꓸꓹ ꓕꓲ ꓟ ꓡꓱ ꓔꓯ ꓥˍꓟꓲ ꓕꓱ ꓟ ꓔꓯ ꓡꓰ ꓬꓲꓼ ꓠꓲꓸꓹ ꓫꓵꓽ ꓡꓳ= ꓖꓳ ꓡꓰ ꓠꓬꓲ ꓣꓳ ꓫꓸ ꓢꓴ ꓟꓷꓼ ꓢꓴ ꓐꓰ ꓫꓸ ꓪ ꓔꓱ ꓟ ꓗꓪ ꓞꓳ ꓫꓸ ꓐꓴ ꓐꓯ ꓟ ꓠꓬ ꓬꓰ ꓙ ꓠ ꓗꓹ ꓡꓳ=ꓣꓳ ꓕꓲ ꓠꓬꓲ ꓕꓲ ꓠꓬꓲ ꓣꓱꓽ ꓞꓸ ꓟ ꓜꓽ ꓫꓵꓼ ꓓꓳ ꓫꓵꓼ ꓠꓬ ꓣꓳ ꓤꓶꓸꓹ ꓗꓪ ꓣꓱꓽ ꓯꓬꓼ ꓡꓳ=
ꓖꓳ ꓡꓰ ꓐꓯ ꓥˍꓟꓲ ꓣꓳ ꓠꓲꓹ ꓟ ꓕꓲ ꓟ ꓡꓱ ꓖꓳ ꓟ ꓔꓯ ꓡꓰ ꓠꓲꓸꓹ ꓥꓳꓽ ꓢꓲ꓾ ꓢꓯ ꓕꓵꓼ ꓔꓬ ꓥꓳ ꓐꓯ ꓠꓬ ꓕꓱ ꓟ ꓠꓬ ꓟꓽ ꓜꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓣꓳ ꓠꓬ ꓧꓪꓽ ꓖꓳ ꓓꓱ ꓕꓲ ꓟ ꓡꓰ ꓢꓯꓼ ꓕꓽ ꓢꓴ ꓟ ꓥ=ꓦ ꓕꓲ ꓒꓳꓹ ꓙꓳ ꓟ ꓑꓶꓸ ꓓꓴ ꓣꓳ ꓠꓬ ꓕꓱ ꓡꓱ ꓫꓵꓽ ꓞꓳ ꓫꓱꓼ ꓚꓱꓹ ꓔꓯ ꓬꓰ ꓟꓽ ꓕ꓾= ꓖꓳ ꓡꓰ ꓠꓬꓲ ꓣꓳ ꓕꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ= ꓝꓮꓲ ꓕꓲ ꓫꓵꓽ ꓠꓬ ꓣꓱꓽ ꓟ ꓯꓬꓼ ꓟ ꓔꓯ ꓡꓰ ꓪꓴꓸꓸ ꓢꓲꓽ ꓛꓬ ꓦ ꓟ ꓚꓱꓹ ꓥ ꓡꓳ= ꓣꓳ ꓕꓲ ꓡꓱ ꓬꓰˍꓟ ꓗꓪ ꓐꓰ ꓮ ꓡꓰ ꓗꓷ ꓡꓰ ꓡ ꓐꓯ ꓠꓬ ꓕꓱ ꓡꓱ ꓬꓰ ꓢꓴ ꓟꓬ ꓡ ꓕꓯ ꓫꓸ ꓢꓴ ꓟꓷꓼ ꓢꓴ ꓐꓱ ꓶ ꓮ ꓘꓶꓽ ꓫꓸ ꓙꓰ ꓡꓳ= ꓐꓳ ꓡ ꓢꓴ ꓠꓬ ꓐꓳ ꓡ ꓢꓲ꓾ ꓫꓸ ꓢꓴ ꓐꓴ ꓠꓬ ꓮ ꓘꓶꓽ ꓫꓸ ꓡ ꓔꓬ ꓡꓳ= ꓣꓳ ꓕꓱ ꓡꓱ ꓟꓽ ꓬꓰ ꓬꓰ ꓐꓰ ꓣꓳ ꓜꓽ ꓡꓳ ꓠ ꓛꓲ ꓡꓰ ꓪꓴꓸꓸ ꓣꓳ ꓖꓪ ꓡꓳ ꓠ ꓛꓲ ꓡꓰ ꓪꓴꓸꓸ ꓢꓲ ꓠꓬꓲ ꓞꓳ ꓙꓳ ꓠꓹ ꓟ ꓢꓯꓽ ꓕꓵꓼ ꓡꓯ= ꓣꓳ ꓗ-ꓕꓳ-ꓡꓲꓗ ꓘꓴꓽ ꓜꓲ ꓞꓳ ꓗꓪ ꓐꓰ ꓬꓲꓼ ꓢꓲ ꓤ ꓐꓴ ꓔꓯ ꓕꓱ ꓡꓱ ꓟꓸ ꓖꓶ ꓡ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓟꓲ ꓠꓯ ꓗꓪ ꓕꓲ ꓑ ꓤ ꓡꓰ ꓔꓬ ꓪ ꓟ ꓥ ꓡꓳ= ꓖꓳ ꓡꓰ ꓠꓬꓲ ꓣꓳ ꓞꓳ ꓙꓳ ꓟ ꓯꓬꓼ ꓠꓬꓲ ꓗꓪ ꓣꓳ ꓧꓪꓽ ꓖꓳ ꓓꓱ ꓕꓲ ꓒꓳꓹ ꓔꓯ ꓢꓯꓽ ꓕꓵꓼ ꓟ ꓡꓰ ꓟꓽ ꓞꓲ ꓦ ꓕꓲꓒꓳꓹ ꓔꓯ ꓟꓲ ꓢꓯꓼ ꓕꓵꓼ ꓓꓴ ꓬꓰ ꓡꓯ=
