ꓞꓳ ꓡꓱ ꓐꓰ ꓢꓷꓹ ꓠꓲꓻ ꓟꓲ ꓠꓯ ꓗꓪ ꓞꓳ ꓤ ꓒꓬꓱꓼ ꓡꓳ ꓐꓯ ꓠꓬ ꓣꓳ ꓚꓳ ꓡꓳ: ꓚꓳ ꓫꓵꓼ ꓗꓪ ꓔꓬ ꓢ ꓠꓹ ꓟ ꓗꓹ ꓛꓲ ꓠꓹ ꓟ ꓢꓴ ꓞꓳ ꓒꓴ ꓡ ꓠꓹ ꓟ ꓤꓶꓻ ꓔꓯ ꓗꓹ ꓛꓲ ꓛꓲ ꓔꓬ ꓖꓳ: ꓠꓲꓻ ꓫꓵ: ꓡꓳ= ꓕꓱ ꓕꓶ: ꓙꓱ ꓮ ꓙꓵ: ꓑꓲ ꓜꓲꓼ ꓡ ꓠꓹ ꓠꓬ ꓣꓳ ꓢꓯꓼ ꓙꓳˍꓟ ꓞꓳ ꓡꓱ ꓯꓬꓼ ꓠꓬꓲ ꓗꓪ ꓢꓯꓼ ꓕꓵꓼ ꓠꓹ ꓗ ꓡꓳ= ꓟ: ꓢꓯꓼ ꓕꓵ ꓪ ꓡꓰ ꓠꓬ ꓕꓱ ꓕꓶꓼ ꓙꓱ: ꓠꓯꓼ ꓗꓪ ꓛꓲ ꓪ ꓟ: ꓓ= ꓢꓷꓹ ꓠꓲꓻ ꓙꓳ ꓒ ꓕꓲ ꓣꓳ ꓒꓬꓱꓼ ꓡ ꓠꓬ ꓣꓳ ꓤꓶꓻ ꓗꓪ ꓗꓹ ꓛꓲ ꓓꓴ ꓥꓳ= ꓢꓷꓹ ꓠꓲꓹ ꓟ: ꓑꓲ ꓜꓲꓼ ꓢꓴ ꓠꓬ ꓟꓬꓱꓼ ꓕꓲ ꓫꓵ: ꓡꓲ꓾ ꓕꓲ ꓫꓵ: ꓬꓰ ꓔꓬ ꓡꓳ= ꓮ ꓡꓰ ꓗꓹ ꓠꓬꓲ ꓕꓲ ꓡꓱ ꓬꓰ ꓔꓬ ꓐꓯ ꓠꓬ ꓮ ꓡꓰ ꓕꓲ ꓫꓵ: ꓟ ꓬꓰ ꓕꓯ ꓢꓲ꓾ ꓒꓴ ꓟꓬ ꓠꓬꓲ ꓪ ꓡ ꓥ ꓢꓷ ꓐꓰ ꓓꓴ ꓙ ꓢꓲ꓾ ꓬꓰ ꓔꓬ ꓟ ꓥ ꓡꓳ= ꓢꓷꓹ ꓠꓲꓻ ꓙꓳ ꓢꓴ ꓐꓴ ꓠꓬ ꓟꓬꓱꓼ ꓕꓲ ꓫꓵꓼ ꓔꓯ ꓡꓰ ꓬꓲꓻ ꓙꓵ: ꓮ ꓟꓬꓹ ꓖꓶ ꓢꓲ꓾ ꓬꓰ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓡꓳ= ꓟꓬꓱꓼ ꓕꓱ ꓟ ꓔꓯ ꓮ ꓘꓶ: ꓬꓰ ꓔꓬ ꓐꓭ ꓠꓬ ꓧꓪꓼ ꓡꓰ ꓠꓹ ꓟ ꓬꓲꓼ ꓚꓱꓹ ꓥˍꓟꓲ ꓙꓳ ꓡ ꓟ ꓥ ꓡꓳ= ꓢꓷꓹ ꓠꓲꓻ ꓙꓳ ꓢꓴ ꓠꓬ ꓣꓳ ꓚꓵ.. ꓛꓬ ꓔꓯ ꓬꓰ ꓙ ꓑ ꓡ ꓟ ꓡꓰ ꓐꓰ ꓢꓴ ꓔꓯ ꓥˍ ꓟꓲ ꓬꓰ ꓙ ꓑ ꓡ ꓡꓳ= ꓢꓴ ꓐꓰ ꓙ ꓡꓯ ꓘꓳꓹ ꓟ ꓗꓪ ꓥˍꓟꓲ ꓢꓴ ꓠꓹ ꓡꓳ ꓢ ꓠ: ꓫ. ꓪ ꓔꓯ ꓕꓱ ꓗꓴ ꓔ: ꓟ ꓥ ꓡꓳ=ꓖꓳ ꓟ ꓑꓶ. ꓓꓴ ꓣꓳ ꓢꓷꓹ ꓠꓲꓹ ꓢꓯꓼ ꓕꓵꓼ ꓡꓯ꓾ ꓢꓴ ꓔꓯ ꓪꓴ: ꓓꓵ ꓣꓱ: ꓢꓴ ꓒꓬꓱꓼ ꓡ ꓠꓹ ꓛꓲ ꓣꓳ ꓞꓳ ꓡꓱ ꓐꓴ ꓢꓯꓼ ꓕꓵ: ꓠ ꓗꓹ ꓡꓳ= ꓢꓯꓼ ꓕꓵ: ꓕꓯ ꓠꓬ ꓮ ꓡꓰ ꓫꓵ: ꓥˍꓟꓲ ꓒꓬꓱꓼ ꓡ ꓓˍ ꓟ ꓥ ˍ ꓡꓳ= ꓞꓳ ꓟꓳ ꓐꓴ ꓠꓬ ꓟꓳꓺ ꓡ ꓖꓴ꓾ ꓣꓳ ꓗꓴꓷꓼ ꓣꓳ ꓟꓵ ꓣꓳ ꓘꓹ ꓔꓯ ꓣꓳ ꓗꓪ ꓫꓵ: ꓠꓹ ꓗꓹ ꓟ ꓥ ꓡꓳ= ꓕꓱ ꓡꓱ ꓗꓪ ꓫꓵ: ꓠꓹ ꓟ ꓠꓬ ꓢꓷꓹ ꓠꓲꓻ ꓣꓱ: ꓯꓬꓼ ꓡꓳ꓾ ꓢꓯꓼ ꓕꓵꓸꓼ ꓡꓯ ꓞꓳ ꓡꓱ ꓐꓴꓳ꓾ ꓮ ꓟꓶ ꓟ ꓣꓳ ꓤꓶꓻ ꓗꓪ ꓢꓴ ꓗꓴꓷꓼ ꓡꓰ ꓐꓰ ꓢꓷꓹ ꓠꓲꓻ ꓢꓷꓹ ꓢꓴ ꓟꓬ ꓡ ꓔꓬ ꓟ ꓥ ꓡꓳ= ꓖꓳ ꓟ ꓗꓪ ꓠꓴ ꓥˍ ꓟꓲ ꓑ ꓠꓹ ꓟ ꓢꓯꓼ ꓕꓵ꓾ ꓡꓯ= ꓢꓷꓹ ꓠꓲꓻ ꓢꓷꓹ ꓢꓴ ꓕꓲ ꓣꓳ ꓒꓬꓱꓼ ꓡ ꓠꓬ ꓚꓵ..ꓛꓬ ꓖꓳ ꓓꓱ ꓔꓯ ꓥˍ ꓟꓲ ꓠꓲꓻ ꓠꓵꓹ ꓘꓴ ꓡ ꓟ ꓡꓰ ꓐꓰ ꓢꓴ ꓔꓯ ꓥˍ ꓟꓲ ꓬꓰ ꓙ ꓘꓴ ꓢꓴ ꓟ: ꓞꓲ ꓧꓪꓼ ꓡꓰ ꓟ ꓚꓱꓹ ꓔꓯ ꓥˍ ꓟꓲ ꓖꓪ ꓘꓴ: ꓢꓴ ꓒꓬꓱꓼ ꓡ ꓥꓳ꓾ ꓟ: ꓞꓲ ꓒꓴ: ꓮ ꓘꓶ: ꓪ ꓢˍꓟ ꓟꓬꓱꓼ ꓔꓯ ꓥˍꓟꓲ ꓬꓰ ꓒ ꓡ ꓢꓴ ꓒꓬꓱꓼ ꓡ ꓥꓳ= ꓖꓳ ꓑꓶ. ꓓꓴ ꓠꓻ ꓠꓵꓹ ꓟ ꓬꓲꓼ ꓤ ꓠꓬꓲ: ꓤ ꓐꓴ ꓢꓴ ꓛꓬ ꓓꓴ ꓔꓯ ꓗꓹ ꓟꓶ ꓠꓹ ꓟ ꓐꓱ ꓶ ꓢꓷꓹ ꓠꓲꓹ ꓔꓯ ꓮ ꓘꓶ: ꓢꓯꓼ ꓕꓵ: ꓡꓯ꓾ ꓣꓳ ꓚꓲ ꓛꓬ ꓢꓯꓼ ꓪ ꓗꓪ ꓐꓰ ꓟ ꓑ ꓡ ꓟ ꓑꓶ. ꓓꓴ ꓪꓴ- ꓢ ꓔꓯ ꓪ: ꓪꓴ ꓘꓳꓼ ꓢꓲ꓾ ꓢꓯꓼ ꓕꓵ: ꓠꓬ ꓕꓲ ꓠꓬꓲ ꓛꓲ ꓡ ꓕꓯ ꓠꓴ ꓠꓬ ꓧꓪ: ꓡꓰ ꓓꓴ ꓔꓯ ꓘꓴ ꓣꓴ ꓟꓶ ꓢꓴ ꓒꓬꓱꓼ ꓡ ꓥꓳ=
