ꓙꓻ ꓖꓴ ꓫꓱꓽˍ ꓟ
ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓚꓱ, ꓐꓰ ꓐꓯˍ ꓕꓯ ꓗꓳ. ꓡ ꓕꓯ ꓮ ꓟꓬ, ꓐꓯ ꓓꓳ ꓡꓰꓳ꓿ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓚꓱ,꓾ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓮ ꓡꓲ ꓛꓳ ꓫꓱꓽ ꓠ ꓔ ꓟ꓾ ꓮ ꓡꓲ ꓔꓬ ꓠ ꓔ ꓟ꓾ ꓐꓰ ꓧꓪꓽ ꓖꓳ ꓓꓱꓽ ꓡꓰꓽ ꓟꓽ ꓞꓲ ꓠꓲ, ꓔꓯ ꓥˍ ꓟꓲ ꓔꓬ, ꓢꓻ ꓝꓲ ꓠꓯ, ꓟ ꓚꓱ,꓾ ꓮ ꓟꓬ, ꓔꓯ ꓐꓯ ꓓꓳ ꓡꓰꓳ꓿ ꓠꓻ ꓠ, ꓔꓬ ꓢꓴ ꓮ ꓙꓵꓽ ꓐꓱ ꓶ ꓥ ꓟꓲ ꓕꓲ ꓘꓴ ꓟꓽ ꓥ ꓕꓲ ꓘꓴ ꓗꓪ ꓣꓱꓽ ꓬꓯꓼ ꓓꓴ ꓙꓳˍ ꓥꓳ ꓐꓰ ꓓꓵꓽ ꓙˍ ꓡꓳ꓿
“Simple is the Best” ꓐꓯˍ ꓟ ꓐꓯ ꓘꓶꓽ ꓙꓳˍ ꓡꓳ꓿ ꓬꓲ ꓓꓽ ꓟ ꓟꓽ ꓥ꓾ ꓬꓲ ꓤꓽ ꓤꓽ ꓠꓬ ꓙꓲꓻ ꓓꓰ ꓡꓰˍ ꓟ ꓥ ꓡꓳ꓾ ꓐꓰ ꓐꓯ ꓓꓴ ꓥꓳ꓿ ꓖꓳ ꓓꓱꓽ ꓔꓬ, ꓢꓻ ꓚꓱ, ꓐꓱ ꓶ ꓥ ꓟꓲ ꓬꓲ ꓓꓽ ꓟ ꓡꓰꓽ ꓟꓽ ꓥ꓾ ꓬꓰ ꓟꓽ ꓫ. ꓟ ꓟꓽ ꓘꓶꓼ ꓟ꓾ ꓮꓽ ꓔꓳ ꓟꓶˍ ꓟ ꓚꓱ,꓾ ꓬꓲ ꓒꓵꓽ ꓟꓽ ꓓꓳ ꓟ ꓚꓱ,꓾ ꓙꓳˍ ꓡꓳ꓿
ꓕꓱ ꓟ ꓠꓬ ꓙꓻ ꓖꓴ ꓫꓱꓽˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓙꓻ ꓖꓴ ꓫꓱꓽˍ ꓐꓰ ꓐꓯˍ ꓕꓯ꓾ ꓣꓳ ꓡꓲ‐ꓢꓴ ꓡꓲ ꓪ ꓟꓬꓽ ꓠꓬꓲ ꓠꓬ ꓪꓽ ꓚꓲ ꓪꓽ ꓐ ꓗꓪ ꓔꓬ ꓢꓴ꓾ ꓐꓱ ꓟꓬꓱꓽ ꓬꓰ ꓜꓽ ꓢꓴ꓾ ꓟꓬꓱꓽ ꓓꓽ ꓟ ꓬꓰ ꓔꓬ ꓢꓴ ꓠꓬ ꓟꓬꓽ ꓠꓬꓲ ꓥ ꓡꓳ꓿ ꓖꓳ ꓟ ꓐꓱ ꓶ ꓙꓻ ꓖꓴ ꓫꓱꓽˍ ꓟ ꓔꓯ ꓠꓬ ꓪꓴ. ꓓꓵ ꓛꓬ, ꓢꓲ꓾ ꓬꓲ ꓕꓲꓽ ꓟꓴꓽ ꓗꓷ ꓢꓲ ꓠꓬꓲ ꓐꓯ ꓟꓽ ꓛꓵ ꓐꓰ ꓓꓵꓽ ꓙˍ ꓡꓳ꓿ ꓠꓬꓲ ꓠ. ꓔꓬ ꓙꓵ, ꓟꓽ ꓙꓳ꓾ ꓚꓵ. ꓬꓲ ꓟꓽ ꓓꓳ ꓙꓵ, ꓟꓲ ꓟꓽ ꓙꓳ꓿ ꓖꓳ ꓟ ꓑꓶ. ꓓꓴ ꓡꓲ‐ꓢꓴ ꓡꓲ ꓪ ꓟꓬꓽ ꓠꓬꓲ꓾ ꓓꓰ ꓟꓲ ꓦ ꓟꓲ ꓬꓰ ꓔꓬ ꓢꓴ꓾ ꓐꓱ ꓟꓬꓱꓽ ꓬꓰ ꓜꓽ ꓢꓴ ꓟꓬꓽ ꓠꓬꓲ ꓠꓬ ꓮ ꓘꓶ. ꓔꓬ, ꓢꓻˍ ꓟ ꓔꓯ ꓡꓳ. ꓟꓳˍ ꓡꓳ꓿ ꓢꓯꓼ ꓙꓳ ꓪꓽ ꓠꓬꓲˍ ꓟ ꓔꓯ ꓡꓳ. ꓟꓳˍ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓡꓳ ꓒꓱ ꓓꓽ ꓟ ꓗꓪ ꓚꓵ. ꓡ ꓢꓴ ꓐꓴ꓾ ꓐꓱ ꓟꓬꓱꓽ ꓢꓶ. ꓟꓽ ꓞꓲꓺ ꓬꓳ, ꓟꓬꓱꓽ ꓬꓰ ꓢꓴ ꓠꓽ ꓟꓬꓽ ꓡ ꓔꓬꓳ꓿ ꓕꓲꓽ ꓠꓬꓲ ꓡꓱꓸꓼ ꓗꓪ ꓙꓻ ꓖꓴ ꓫꓱꓽ ꓙꓵ, ꓕꓯꓽ ꓢꓲ ꓠꓬꓲ ꓔ ꓙꓵ, ꓠꓽ ꓙꓵ, ꓠꓬ ꓟꓬꓽ ꓡ ꓔꓬ ꓟ ꓥ ꓡꓳ꓿ ꓖꓳ ꓓꓱꓽ ꓠꓬ ꓟꓽ ꓓꓵ ꓟ ꓟꓶ ꓫꓵ ꓡˍ ꓕꓯ ꓠꓻ ꓥˍ ꓟꓲ ꓮꓽ ꓟꓬ, ꓫꓵꓽ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓖꓳ ꓓꓱꓽ ꓗꓪ ꓚꓵ. ꓬꓲ ꓓꓳ ꓠ, ꓟ ꓐꓱ ꓶ ꓡꓵ ꓖꓶˍ ꓟ ꓗꓪ ꓙꓻ ꓖꓴ ꓫꓱꓽˍ ꓟ ꓠꓬ ꓪ ꓜꓲ ꓙꓲˍ ꓟ ꓚꓱ, ꓕꓲꓽ ꓟ ꓥ ꓡꓳ꓿
ꓙꓻ ꓖꓴ ꓫꓱꓽˍ ꓟ ꓗꓪ ꓐꓰ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓰ ꓐꓯˍ ꓕꓯ꓾
ꓠꓲ, ꓟ ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ꓾
ꓠꓲ, ꓟ ꓟꓬꓱꓽ ꓬꓰ ꓚꓱ, ꓐꓰ ꓫꓵꓽ ꓬꓲꓻ ꓚꓳˍ ꓟ ꓗꓪ ꓬꓰ ꓙ ꓔꓳ, ꓙ ꓖꓶˍ ꓡꓳ
ꓠꓲ, ꓟ ꓠꓻ꓾ ꓡꓰ‐ꓒꓬꓯꓸꓼ ꓠꓻ꓾ ꓐꓰ ꓫꓵꓽ ꓓꓯꓻ ꓠꓻ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓟꓽ ꓙꓲꓻ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓐꓴ ꓔꓯ ꓞꓰ ꓡꓰ ꓝꓲ ꓢꓲ ꓙꓲˍ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓔꓯ ꓟꓬꓽ ꓡ ꓝꓲˍꓡꓳ꓿
ꓖꓳ ꓓꓱꓽ ꓒ. ꓟ ꓘꓪꓽˍ ꓟ ꓗꓪ ꓐꓰ ꓬꓲ ꓞꓶꓻ ꓫꓱ ꓡꓰ ꓝꓲˍ ꓟ ꓚꓱ, ꓐꓰ ꓗꓴ. ꓙꓲꓽ ꓙꓳ ꓢꓲ꓾
ꓗꓯ‐ꓡꓳ‐ꓣꓲ ꓐꓴ ꓔꓯ ꓐꓬ ꓝꓲ ꓢꓲ꓾ ꓔꓬ, ꓢꓻˍ ꓟ ꓖꓳ ꓓꓱꓽ ꓙꓳ ꓡ ꓠ ꓬꓰ ꓙ ꓖꓶˍ ꓡꓳ꓿
ꓟꓬꓽ ꓠꓬꓲ ꓠꓬ ꓙꓴꓽ ꓝꓲ. ꓕꓲꓽ ꓚꓳ ꓡꓳ ꓗꓪ ꓙꓳˍ ꓟ ꓬꓲ ꓞꓶꓻ ꓐꓴ ꓔꓯ ꓬꓯꓼ ꓡꓰ ꓞꓰꓻ ꓡꓰ ꓝꓲˍ ꓡꓳ꓿
ꓪꓳꓽ ꓔꓳ ꓐꓰ ꓧꓪꓽ ꓘꓴ. ꓔꓬ, ꓢꓻ ꓚꓱ, ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ꓾
ꓛꓲ ꓒꓯ,꓾ ꓦꓰꓽ ꓛꓲꓽ ꓐꓰ ꓖꓳ ꓓꓱꓽ ꓕꓯꓽ ꓢꓲ ꓕꓲ ꓛꓱꓽ ꓗꓪ ꓙꓳˍ ꓟ ꓧꓪꓽ ꓘꓴ. (ꓗꓪꓮꓬ‐ꓔ,) ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓝꓲˍ ꓡꓳ꓿
ꓪꓳꓽ ꓔꓳ ꓳʼ ꓠꓻ ꓐꓰ ꓬꓲ ꓝꓲ. ꓬꓲ ꓟꓲ ꓳʼ ꓠꓻ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓠꓲ, ꓟ ꓔꓬ, ꓢꓻ ꓚꓱ, ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ꓾
ꓠꓲ, ꓟ ꓓꓵꓽ ꓙꓽ ꓪꓴꓽ ꓧꓶˍ ꓟ ꓐꓰ ꓠꓲ, ꓟ ꓓꓵꓽ ꓙꓽ ꓟꓬꓽˍ ꓟ ꓔꓯ ꓠꓲ. ꓡꓰ ꓝꓲˍꓡꓳ꓿
ꓠꓲ, ꓟ ꓓꓵꓽ ꓙꓽ ꓚꓱ, ꓔꓯ ꓔꓬ, ꓢꓻ ꓡꓰ ꓝꓲ ꓢꓲ ꓲꓠ‐ꓓꓳ‐ꓩꓲꓠ ꓐꓴ ꓔꓯ ꓓꓳ ꓡ ꓝꓲˍ ꓡꓳ꓿
ꓪꓴ. ꓠꓶ. ꓔꓯ ꓥˍ ꓟꓲ ꓕꓯꓺ ꓡ ꓝꓲˍꓡꓳ꓿
ꓠꓱ. ꓐꓯ ꓙꓲꓻ ꓖꓴ ꓙꓳˍ ꓟ ꓚꓱ, ꓐꓴ ꓠꓬ
ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ꓿
ꓬꓲꓼ ꓔ ꓬꓲꓼ ꓟꓶ ꓢꓻ ꓝꓲˍ ꓡꓳ꓿ ꓚꓵ. ꓬꓲ ꓓꓳ ꓠ ꓟꓬꓱꓽ ꓬꓰ ꓪ ꓢꓴ ꓐꓴ ꓠꓬ ꓠꓯꓼ ꓠꓯꓼ ꓬꓲ ꓟꓶ ꓡꓰˍ ꓡꓳ ꓟꓽ ꓥ ꓡ꓿
ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓡꓳ꓿
ꓦꓰꓼ ꓟ ꓙꓲ ꓢꓻ ꓡꓰ ꓝꓲˍ ꓡꓳ꓿
ꓚꓮꓠꓚꓰꓣ ꓠꓻ ꓕꓲ ꓐꓱ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓟꓳꓽ ꓡꓰ ꓢꓻˍ ꓟ ꓔꓯ ꓥˍ ꓟꓲ ꓗꓽ ꓕ. ꓖꓶˍ ꓡꓳ꓾ ꓐꓰ ꓐꓯˍ ꓡꓳ꓿
ꓙꓻ ꓖꓴ ꓫꓱꓽˍ ꓐꓯˍ ꓟ ꓠꓬ ꓮꓽ ꓟ ꓥˍ ꓟꓲ ꓬꓰ ꓐ ꓡˍ ꓟ꓾ ꓬꓲ ꓒꓵꓽ ꓟꓽ ꓓꓳ ꓓꓳ ꓬꓰ ꓐ ꓡˍ ꓟ ꓡꓵ ꓓꓴ ꓕꓲ ꓫꓵꓽ ꓥ ꓡꓳ꓿
ꓟꓬꓱꓽ ꓗꓪ ꓙꓰˍ ꓕꓯ꓾ ꓜꓻ ꓜꓽ ꓓꓳ ꓡ ꓗ ꓠꓯ. ꓙꓻ ꓖꓴ ꓫꓱꓽˍ ꓟ ꓡꓰ ꓐꓰ꓾ ꓕꓲ ꓠꓬꓲ ꓕꓲ ꓠꓬꓲ ꓬꓰ ꓠ ꓔ ꓟ ꓗꓪ ꓢꓻ ꓢꓻ ꓡꓰ ꓬꓰ ꓐ ꓡˍ ꓡꓳ꓿
ꓙꓻ ꓖꓴ ꓫꓱꓽˍ ꓕꓯ꓾ ꓙꓴꓽ ꓝꓲ. ꓔꓯ ꓔꓱ, ꓔꓱ, ꓡꓰꓽ ꓗꓷ ꓔ꓾
ꓪꓴ. ꓓꓵ ꓔꓯ ꓔꓱ, ꓔꓱ, ꓡꓰ ꓬꓰ ꓔ (ꓕꓲ ꓐꓱ ꓠꓬ ꓙ ꓖꓴ ꓫꓱꓽˍ ꓕꓯ ꓪꓴ. ꓓꓵ ꓟꓳꓼ ꓢꓲ꓾ ꓥꓰꓼ ꓢꓲ꓾ ꓫꓱꓽˍ ꓟ ꓑꓶ. ꓓꓴ ꓥ ꓡꓳ)
ꓡꓯꓼ ꓒꓶ ꓔꓯ ꓗꓳ, ꓗꓳ, ꓡꓰꓽ ꓕꓽ ꓬꓰ ꓔ꓾
ꓦꓰꓽ ꓛꓲ ꓔꓯ ꓝꓶ. ꓔ꓾
ꓙ ꓖꓴ ꓫꓱꓽˍ ꓕꓯ ꓡꓯꓽ ꓒꓯ, ꓠꓬꓲꓽ ꓒꓯ, ꓷ, ꓖꓶ꓾
ꓙꓴꓽ ꓝꓲ. ꓗꓴ.ˍ ꓟ꓾ ꓥ ꓠꓬ꓾ ꓛꓲ ꓦꓽ ꓓꓽ ꓪꓴ. ꓦꓽ ꓢꓲ ꓫꓱꓽˍ ꓟ ꓔꓯ ꓤ ꓟꓳ꓾
ꓕꓲ ꓠꓬꓲˍ ꓟꓲ ꓟꓽ ꓠꓽ ꓙꓻ ꓖꓴ ꓫꓱꓽ ꓠ, ꓟ ꓟꓽ ꓐ ꓡ ꓥ ꓟꓲ꓾ ꓕꓲ ꓫꓵꓽ ꓠꓽ ꓗꓪ 4 ꓠꓬꓲ 5 ꓠꓬꓲ ꓛꓲ ꓫꓱꓽ ꓢꓲ ꓕꓲꓽ ꓠꓬꓲ ꓗꓪ 30 ꓧꓷ, ꓥ ꓠꓬ ꓕꓱ ꓟ ꓕꓯꓽ ꓢꓲ ꓞꓼ ꓞꓼ ꓙꓻ ꓖꓴ ꓫꓱꓽ ꓖꓶˍ ꓟ ꓠꓬ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓔꓯ ꓬꓰ ꓙˍ ꓟ ꓙꓲˍ ꓟ ꓚꓱ, ꓕꓲꓽ ꓟ ꓥ ꓡꓳ꓿
ꓕꓲ ꓠꓬꓲ ꓗꓪ 30 ꓧꓶ, ꓫꓱꓽ ꓟꓽ ꓐ ꓡ ꓕꓯꓽ ꓠꓽ꓾ 10 ꓧꓶ, ꓤ ꓫꓱꓽˍ ꓥ ꓟꓲ ꓞꓼ ꓞꓼ ꓫꓱꓽˍ ꓕꓯ ꓠꓽ ꓙꓲꓻ ꓖꓴ ꓙꓳˍ ꓟ ꓥ ꓡꓳ꓿
ꓙꓻ ꓖꓴ ꓫꓱꓽˍ ꓐꓰ ꓐꓯˍ ꓕꓯ ꓣꓳꓽ ꓟꓬꓽ ꓠꓬꓲ ꓠꓬ ꓙꓻ ꓖꓴ ꓫꓱꓽ ꓛꓳꓽ ꓒꓯ, ꓤ ꓐꓴ ꓫ. ꓕꓱ ꓡꓯ ꓘꓳ ꓠꓬꓲ꓾ ꓮꓽ ꓤ ꓮꓽ ꓤ ꓫꓱꓽ ꓔꓬ ꓖꓴˍ ꓡꓳ꓿ ꓖꓳ ꓡꓱ ꓫꓱꓽˍ ꓟ ꓕꓯꓽ ꓢꓲ ꓞꓼ ꓞꓼ ꓫꓱꓽˍ ꓟ ꓠꓬ ꓪ ꓜꓲ ꓕꓲꓺ ꓡꓰ ꓓꓴ ꓙꓳˍ ꓡꓳ꓿
ꓖꓳ ꓡꓱ ꓠꓬꓲ ꓙꓻ ꓖꓴ ꓫꓱꓽˍ ꓕꓯ ꓞꓼ ꓞꓼ ꓫꓱꓽ ꓠ ꓔ ꓡꓳ꓾ ꓚꓵ. ꓬꓲ ꓓꓳ ꓠ ꓫꓱꓽ ꓠ ꓔ ꓡꓳ꓿ ꓕꓲꓽ ꓠꓬꓲ ꓟꓽ ꓠꓽ ꓕꓲ ꓠꓬꓲ ꓗꓪ 30 ꓧꓶ, ꓛꓲ ꓫꓱꓽ ꓐ ꓡˍ ꓠꓬ ꓮ ꓘꓶ. ꓙꓲˍ ꓟ ꓥ ꓡꓳ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
ꓙꓻ ꓖꓴ ꓫꓱꓽ ꓗꓷ ꓗ ꓠꓯ. ꓚꓵ. ꓬꓲꓻ ꓮ ꓟꓬ, ꓓꓳ ꓙꓰˍ ꓟ ꓗꓪ ꓐꓰ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓥ ꓟꓲ ꓓꓳ ꓙꓰ ꓟ ꓑꓶ. ꓓꓴ꓾ ꓬꓲꓻ ꓙꓬ ꓓꓳ ꓠ, ꓟ ꓔꓯ ꓥ ꓟꓲ ꓕꓽ ꓟꓲ ꓡꓰ, ꓝꓲ ꓥꓰ꓿
