ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ 5 ꓦ ꓟ 2025 ꓘꓳꓼ ꓕꓯ ꓬꓲ ꓪꓽ ꓘꓴ ꓔꓶꓻ ꓙꓱꓼ ꓠꓬ ꓟꓬꓱꓽ ꓘꓴꓽ ꓗꓪ ꓬꓲ ꓫꓵ ꓬꓲ ꓚꓱꓹ ꓮ ꓟꓬꓹ ꓫꓵꓽ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓥ ꓡꓳ= ꓮ ꓟꓶ ꓔꓲꓺ ꓒ ꓪ ꓔꓲ ꓡꓰ ꓘꓴ ꓜꓲꓼ ꓞꓳ ꓐꓰ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓫꓸ ꓓꓴ ꓟꓬ ꓓꓴ ꓮ ꓙꓵ ꓔꓯ ꓪꓴ-ꓢ ꓠꓯꓼ ꓗꓪ ꓡꓯꓼ ꓙꓱ ꓢꓲ ꓝꓲ ꓓꓴ ꓟꓬꓱꓽ ꓔꓯ ꓢꓯꓼ ꓕꓵꓼ ꓔꓬ ꓟ ꓥꓳ= ꓕꓱ 5 ꓦ ꓗꓪ ꓔꓲꓺ ꓒ ꓪ ꓔꓲ ꓢꓽ ꓣꓳ ꓥ ꓟ꓾ ꓝꓣꓮꓠꓚꓲꓢ꓾ ꓐꓰꓠꓰꓓꓲꓚꓔ ꓫꓦꓲ ꓐꓰ ꓢꓔꓸ ꓙꓳꓧꓠ ꓑꓮꓴꓡ ꓲꓲ ꓬꓲ ꓪ ꓗꓪ ꓐꓰ ꓢꓯꓼ ꓪ ꓣꓴ ꓓꓴ ꓬꓰ ꓡꓯ=
2022 ꓘꓳꓼ ꓕꓯ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓕꓱ ꓡꓱ ꓐꓯ ꓖꓶ ꓔ ꓡꓳ= ꓶꓼ ꓓꓳ ꓫꓱꓸ ꓓꓳ ꓐꓳ ꓑꓶ ꓢꓴ ꓟ-ꓕꓲ ꓐꓰ ꓟ-ꓘꓳ ꓐꓴ ꓡꓰ ꓬꓳ-ꓢꓷ ꓔꓯ ꓑꓴ ꓙꓵ ꓒꓽ ꓐꓰ ꓐꓳ ꓑꓶ ꓔ ꓟ ꓥꓳ= ꓢꓲꓺ ꓒ ꓬꓰ-ꓢꓴ ꓠꓬ ꓮ ꓘꓶꓸ ꓫꓸ ꓔ ꓟ ꓬꓲ ꓐꓹ ꓐ ꓟꓬꓱꓽ ꓔꓯ ꓢꓳꓻ ꓜꓲꓼ ꓙ ꓜꓲꓼ ꓗꓷ ꓟ ꓥꓳ= ꓶꓻ ꓡꓯꓼ ꓟꓬꓱꓽ ꓚꓱꓹ ꓗꓪ ꓐꓰ ꓥ ꓟꓲ ꓕꓱ ꓡꓱ ꓫꓵ ꓟꓬꓱꓽ ꓠꓬ ꓪꓽ ꓒꓵꓽ ꓮ ꓘꓶꓸ ꓟꓽ ꓪ ꓟ ꓥꓳ= ꓕꓱ ꓡꓱ ꓬꓳ-ꓢꓷ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓪ ꓟꓬꓱꓽ ꓝꓸ ꓡꓯꓼ ꓘꓳ ꓟ ꓠꓬ ꓟꓲ ꓠꓯ ꓗꓪ ꓔꓬ ꓟ ꓟꓬꓱꓽ ꓬꓰ ꓢꓴ ꓮ ꓙꓵ ꓔꓯ ꓓꓵꓽ ꓙ ꓟꓶ ꓓꓴ ꓗꓷ ꓡꓰ ꓝꓲ_ ꓡꓳ=ꓟꓬꓱꓽ ꓠꓬ ꓣꓳ ꓚꓲ ꓛꓬ ꓟꓬꓱꓺ ꓓꓳ ꓔꓯ ꓛꓵ ꓔꓴ ꓖꓶ_ ꓡꓳ= ꓟꓲ ꓠꓯ ꓡ ꓞꓳ ꓞꓳ ꓙꓳ ꓟ ꓟꓬꓱꓺ ꓓꓳ ꓛꓵ ꓔꓴ ꓟ ꓠꓬ ꓢꓴ ꓡꓰ ꓬꓰ ꓙ ꓡ ꓟ ꓗꓪ ꓐꓰ ꓡꓰ ꓢꓯꓸ ꓔꓬ ꓐ ꓡ ꓟ ꓟꓽ ꓥ ꓥ꓾ ꓣꓳ ꓚꓲ ꓛꓬ ꓢꓯꓼ ꓕꓵꓼ ꓧꓪ ꓢꓲ ꓜ ꓓꓳ ꓘꓴ ꓐ ꓡ ꓟ ꓥ ꓡꓳ=
2006 ꓘꓳꓼ꓾ ꓢꓔꓸ ꓙꓳꓢꓰꓑꓧ ꓑꓮꓲ ꓦꓬꓼ ꓠꓬꓲ ꓔꓲꓺ ꓒ ꓪ ꓔꓲ ꓐꓰꓠꓰꓓꓲꓚꓔ ꓫꓦꓲ ꓡꓰ ꓟꓬꓱꓽ ꓬꓰ ꓢꓴ ꓮ ꓙꓵ ꓔꓯ ꓐꓯ ꓖꓶ ꓔ ꓟ ꓗꓪ꓾ ꓟꓬꓱꓽ ꓠꓬ ꓬꓲ ꓜꓴ ꓬꓲ ꓟꓯꓼ ꓗꓪ ꓐꓰ ꓞꓳ ꓤ ꓐꓴ ꓣꓱꓽ ꓬꓯꓼ ꓔꓬ ꓟ ꓔꓯ ꓖꓶ ꓠꓹ ꓟ ꓐꓱ ꓶ ꓮ ꓘꓶꓸ ꓣꓳꓸ ꓚꓵ_ ꓟ ꓕꓲ ꓟ ꓥ ꓟ ꓔꓯ ꓐꓯ ꓖꓶ ꓔ ꓡꓳ= ꓖꓳ ꓟ ꓑꓶ ꓓꓴ ꓟꓬꓱꓽ ꓔꓯ ꓕꓶꓻ ꓕꓶꓻ ꓡꓰ ꓬꓰ ꓢꓲ꓾ ꓟꓲ ꓠꓯ ꓡ ꓞꓳ ꓟꓬꓱꓺ ꓓꓳ ꓔꓯ ꓒꓵꓽ ꓛꓳ ꓢꓲ꓾ ꓞꓳ ꓤ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ ꓠꓹ ꓟ ꓢꓯꓼ ꓕꓵꓼ ꓬꓰ ꓠꓹ ꓟ ꓥ ꓡꓳ=ꓣꓳ ꓢꓯꓸ ꓔꓬ ꓟ ꓬꓲ ꓔꓶꓻ ꓙꓱꓼ ꓔꓯ ꓬꓲ ꓟꓶ ꓗꓪ ꓛꓲ ꓧꓪ ꓢꓲ ꓠꓬꓲ ꓬꓲꓸ ꓟꓬꓱꓽ ꓛꓳ ꓑꓸ ꓟꓽ ꓗꓷ ꓡꓰ ꓠꓹ ꓟ ꓐꓱ ꓶ ꓐꓯ ꓔ ꓡꓳ=
2000 ꓘꓳꓼ ꓟꓬꓱꓽ ꓬꓰ ꓢꓴ ꓙꓴꓐꓲꓡꓰꓰ ꓑꓮꓲ ꓦꓬꓼ ꓠꓬꓲ ꓠꓯꓼ ꓗꓪ ꓟꓬꓱꓽ ꓬꓲ ꓒꓵꓽ ꓔꓯ ꓢꓷꓸ ꓠ ꓧꓪ ꓠꓹ ꓟ ꓔꓲꓺ ꓒ ꓪ ꓔꓲ ꓙꓳꓧꓠ ꓑꓮꓴꓡ ꓲꓲ ꓡꓰ ꓐꓯ ꓔ ꓡꓳ= ꓟꓬꓱꓽ ꓘꓴꓽ ꓗꓪ ꓶ ꓡꓯꓼ ꓟꓬꓱꓽ ꓐꓰ ꓞꓳ ꓙꓳ_ ꓟ꓾ ꓢꓯꓼ ꓕꓵꓼ_ ꓟ ꓐꓰ ꓟꓬꓱꓽ ꓬꓰ ꓢꓴ ꓮ ꓙꓵ ꓬꓲ ꓪ ꓟꓬꓱꓺ ꓓꓳ ꓔꓯ ꓝꓮꓲ ꓫꓬꓹ ꓔꓴ ꓖꓶ ꓠꓹ ꓟ ꓐꓱ ꓶ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓙꓳꓧꓠ ꓑꓮꓴꓡ ꓲꓲ ꓡꓰ ꓟꓬꓱꓽ ꓘꓴꓽ ꓗꓪ ꓟꓽ ꓔꓱꓹ ꓟ ꓔꓯ ꓝꓮꓲ ꓫꓬꓹ ꓔꓱꓹ ꓖꓶ ꓢꓲ꓾ ꓟꓬꓱꓽ ꓟꓽ ꓙꓳ ꓟ ꓑꓶ ꓓꓴ ꓫꓸ ꓔꓬ ꓢꓴ꓾ ꓪꓽ ꓒꓵꓽ ꓟꓽ ꓡꓳꓼ ꓟ꓾ ꓚꓲ ꓛꓬ ꓟꓬꓱꓽ ꓪꓴꓸ ꓔꓴ ꓠꓹ ꓟ ꓟꓽ ꓡꓳꓼ ꓢꓴ ꓐꓴ ꓔꓯ ꓓꓵꓽ ꓙ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓟ ꓥꓳ=
ꓟꓬꓱꓽ ꓗꓪ ꓐꓰ ꓡ ꓞꓳ ꓐꓴ ꓣꓱ ꓬꓯꓼ ꓔꓬ ꓟ ꓔꓯ ꓖꓶ ꓐ ꓡꓰ ꓢꓲ꓾ ꓕꓲ ꓦꓲꓻ ꓢꓴ ꓐꓴ ꓥ ꓟꓲ ꓟꓬꓱꓺ ꓓꓳ ꓔꓯ ꓣꓳ ꓚꓵ ꓔꓴ ꓢꓲ꓾ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱꓹ ꓗꓪ ꓐꓰ ꓛꓳ ꓫꓱꓽ ꓗꓴꓸ ꓠꓹ ꓟ ꓪꓽ ꓘꓴ ꓓꓴ ꓬꓰ ꓡꓯ=
