ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲꓽ ꓠꓽ ꓫ. ꓢꓴ ꓟꓷꓼ ꓢꓴ ꓐꓴ ꓐꓰ ꓫ. ꓕꓱˍ ꓟ ꓗꓪ ꓠꓬ꓾ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓐꓰ꓾ ꓬꓲ ꓜꓴ ꓐꓰ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓐꓰ ꓕꓱ ꓡꓱ ꓫ. ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓔꓬ ꓫꓵꓽ ꓙꓳˍ ꓡꓳ꓿ ꓔꓯ ꓥꓳꓽ ꓐꓯˍ ꓠꓬ CARITAS ꓐꓰ ꓐꓯˍ ꓟ ꓡꓳꓽ‐ꓟꓲꓽ ꓥꓳꓽ ꓗꓪ ꓐꓰ ꓗ‐ꓣꓴ‐ꓠ ꓐꓰ ꓐꓯˍ ꓟ ꓫꓱ. ꓤ ꓟꓬꓱꓽ ꓬꓰ ꓢꓴ ꓜꓴꓻ ꓕꓲꓽ ꓜꓴꓻ ꓙꓳˍ ꓡꓳ꓿
ꓡꓳꓽ‐ꓟꓲꓽ ꓟꓵꓽ ꓗꓪ ꓮ ꓟꓶ ꓠꓬ ꓔꓲꓺ ꓒ ꓓꓽ ꓟ ꓙꓵꓽ ꓔꓶ. 17 ꓟ ꓙꓳ ꓡꓰꓳ꓿ 17 ꓟ ꓡꓱꓸꓼ ꓗꓪ ꓗ‐ꓣꓴ‐ꓠ ꓐꓯˍ ꓟ ꓙꓲˍ ꓟ ꓟꓬꓱꓽ ꓬꓰ ꓢꓴ ꓞꓳ ꓡꓯ. ꓐꓴ꓾ ꓔꓲꓺ ꓒ ꓐꓴ ꓧꓳꓽ ꓣꓱꓽ ꓢꓲ ꓠꓬꓲ ꓮ ꓡꓲ ꓗꓪ ꓫ. ꓢꓴ ꓟꓷꓼ ꓢꓴ ꓙꓳˍ ꓠꓬ ꓕꓱ ꓡꓱ ꓬꓰ ꓙ ꓔꓬ ꓟ ꓙꓳˍ ꓡꓳ꓿ ꓔꓯꓺ ꓥꓳꓽ ꓟꓲ‐ꓚꓲ‐ꓠ ꓗꓪ ꓥˍ ꓟꓲ ꓟꓯꓼ ꓛꓰ, ꓑꓬ ꓢꓴ꓾ ꓫ. ꓢꓴ ꓟꓷꓼ ꓢꓴ ꓔꓳ, ꓜꓳꓽ ꓔꓬ ꓢꓴ ꓐꓴ ꓔꓯ ꓐ ꓡˍ ꓕ ꓑꓳꓸꓼ ꓬꓰ ꓙ ꓔꓬ ꓡꓳ꓿
ꓬꓲ ꓪ ꓣꓱꓽˍ ꓟ ꓒꓴ ꓠꓬ ꓮ ꓡꓲ ꓗꓪ ꓚꓳ. ꓡˍ ꓡ ꓐꓰ ꓐꓯˍ ꓕꓯ꓾ ꓮ ꓟꓶ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓐꓰ ꓞꓲꓺ ꓐꓱ ꓠꓯꓸꓼ ꓗꓪ ꓐꓰ ꓥˍ ꓟꓲ꓾ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓫ ꓔ ꓟ ꓒꓴ ꓗꓪ ꓐꓰ ꓥˍ ꓟꓲ ꓬꓲ ꓪ ꓕꓱ ꓡꓱ ꓣꓱꓽ ꓔꓬ ꓟ ꓥ ꓡꓳ꓿
ꓝꓮꓲ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓐꓰ St. Vincent De Paul ꓐꓰ ꓐꓯˍ ꓟˍ ꓟꓲ ꓙꓳˍ ꓡꓳ꓿ ꓕꓱ ꓟ ꓠꓬ ꓮ ꓘꓶ. ꓫ. ꓢꓴ ꓟꓷꓼ ꓢꓴ꓾ ꓜ ꓟꓽ ꓟꓶ ꓜꓽ ꓢꓴ ꓐꓴ ꓔꓯ ꓬꓰ ꓙ ꓔꓬ ꓟ ꓥ ꓡꓳ꓿ ꓢꓲꓽ ꓫꓬ ꓟ‐ꓡꓲ‐ꓬ ꓬꓲ ꓜꓴꓻ ꓐꓰ ꓐꓯˍ ꓟ Legion of Mary ꓐꓯˍ ꓟˍ ꓟꓲ ꓙꓳˍ ꓡꓳ꓿ ꓕꓱ ꓡꓱ ꓬꓲ ꓜꓴ ꓬꓲ ꓜꓴ ꓬꓰ ꓢꓲ ꓠꓬꓲ ꓫꓱ. ꓤ ꓓꓴ ꓟꓬꓱꓽ ꓬꓰ ꓔꓬ ꓢꓴ ꓮ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓣꓳ ꓔꓯ ꓬꓲꓼ ꓠꓬꓲ. ꓖꓶ ꓡ ꓔꓬ ꓟ ꓕꓲ ꓙꓰꓽ ꓙꓳˍ ꓢꓰꓽ ꓡꓳ꓿ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓐ ꓡˍ ꓕ ꓑꓳꓸꓼ ꓫ. ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓮ ꓡꓲ ꓐꓰ ꓥ ꓡ꓿ Domestic Church ꓐꓰ ꓐꓯˍ ꓟ “ꓣꓳ ꓦꓲꓻ ꓠꓬ ꓢꓲꓽ ꓫꓬ ꓦꓲꓻ ꓤꓽ ꓤ ꓥ ꓡꓳ꓿ ꓢꓲꓽ ꓫꓬ ꓦꓲꓻ ꓠꓬ ꓪꓴ‐ꓢ ꓙꓵꓽˍ ꓟ ꓦꓲꓻ꓾ ꓪꓴ‐ꓢ ꓔꓬ ꓟ ꓦꓲꓻ꓾ ꓪꓴ‐ꓢ ꓶꓼ ꓤ ꓫꓱ, ꓤ ꓖꓶ ꓔꓬ ꓟ ꓦꓲꓻ ꓥ ꓡꓳ”꓿ ꓖꓳ ꓡꓱ ꓠꓬꓲ ꓦꓲꓻ ꓕꓱ ꓟ ꓘꓴꓽ ꓠꓯꓸꓼ ꓗꓪ ꓙꓵꓻ ꓢꓴ ꓢꓲ ꓤ ꓣꓳꓽ ꓠꓬ ꓕꓱ ꓡꓱ ꓠꓱ. ꓐꓯ ꓢꓴ ꓔꓯ ꓬꓰ ꓙ ꓖꓶˍ ꓟ꓾ ꓠꓱ. ꓐꓯ ꓢꓴ ꓐꓱ ꓶ ꓓꓵꓽ ꓙꓽ ꓖꓶˍ ꓟ꓾ ꓣꓳ ꓔꓯ ꓙꓳˍ ꓟ ꓗꓪ ꓐꓰ ꓮ ꓔꓲ. ꓤ ꓐꓱ ꓖꓶ ꓐ ꓡˍ ꓟ꓾ ꓟꓽ ꓟꓶ ꓜꓽ ꓟꓽ ꓟꓶ ꓓꓳꓻ ꓢꓴ ꓔꓯ ꓬꓰ ꓙ ꓖꓶ ꓠ, ꓟ ꓫꓱ. ꓤ ꓖꓶ ꓠ, ꓟ ꓬꓳ. ꓚꓰꓽˍ ꓟ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳꓽ ꓔꓬ ꓟ ꓦꓲꓻ ꓠꓬ ꓪꓽ ꓘꓴ ꓦꓲꓻ ꓤꓽ ꓤꓽ ꓥ ꓡꓳ ꓐꓰ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ. ꓬꓳ‐ꓦ ꓒꓳ‐ꓡꓳ ꓡꓰ ꓐꓯ ꓔ ꓡꓳ꓿
ꓖꓳ ꓡꓱ ꓠꓬꓲ ꓣꓳꓽ ꓕꓲꓽ ꓠꓬꓲ ꓕꓲꓽ ꓠꓬꓲ ꓞꓳ ꓙꓳ ꓔꓬ ꓟ ꓘꓴꓽ ꓗꓪ ꓣꓳꓽ ꓮ ꓟꓬ, ꓬꓰ ꓟꓽ ꓐ ꓡ ꓐꓯˍ ꓥ ꓟꓲ꓾ ꓚꓳ ꓡꓳ ꓚꓳ ꓫꓵ ꓗꓪ ꓣꓳ ꓡꓳ. ꓠꓬꓲ ꓡꓯ꓿ ꓣꓳ ꓒꓳ, ꓕꓲꓽ ꓟ ꓡꓱꓸꓼ꓾ ꓣꓳ ꓘꓴ ꓜꓲꓼ ꓞꓳ ꓕꓲꓽ ꓟ ꓡꓱꓸꓼ꓾ ꓬꓲ ꓜꓴꓻ ꓬꓲ ꓜꓴꓻ ꓕꓱ ꓡꓱ ꓟꓬꓱꓽ ꓬꓰ ꓔꓬ ꓥ ꓟꓲ ꓒ ꓕꓲꓺ ꓒ ꓠꓶꓽ ꓗꓪ ꓣꓳ ꓮ ꓡꓲ ꓬꓰ ꓐ ꓡˍ ꓠꓬ ꓖꓳ ꓡꓱ ꓬꓰ ꓙ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ꓿
ꓮ ꓡꓲꓳ ꓐꓯ ꓠꓬ ꓣꓳ ꓕꓲꓽ ꓠꓬꓲ ꓙꓳˍ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓣꓳꓽ ꓮ ꓫꓵꓽ ꓬꓰ ꓖꓶ ꓗꓷ ꓡ ꓐꓯ ꓟ ꓔꓯ ꓡꓰꓽ ꓡꓳ. ꓠꓬꓲ ꓢꓲ ꓠꓬꓲ ꓣꓳꓽ ꓠꓬ ꓐꓯ ꓟꓴ ꓞꓷ,ˍ ꓟ ꓟꓶˍ ꓥꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓙꓵꓻ ꓠꓲ, ꓡꓰ ꓪꓴ‐ꓢ ꓤ ꓠꓱ ꓕꓲꓽ ꓣꓳˍ ꓡꓰ ꓐꓰ ꓫꓱ. ꓤ ꓓꓴ ꓟꓬꓱꓽ ꓬꓰ ꓐ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
