ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓗꓪ ꓐꓰ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵꓽ ꓔꓯ ꓝꓮꓲ ꓕꓲ ꓧꓪ, ꓘꓳ ꓣꓴ ꓩꓴ ꓡˍ ꓥꓳ꓿ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾
ꓠꓬꓲ. ꓠꓬꓲ ꓗꓪ ꓠꓬ ꓣꓳ ꓖꓳ ꓓꓱꓽ ꓗꓪ ꓬꓳ. ꓚꓵˍ ꓟ ꓕꓲꓽ ꓟ ꓥ ꓟ ꓟꓷꓽ ꓠꓷ, ꓐꓰ ꓗꓴ. ꓙꓲꓽ ꓙꓳ ꓢꓲ꓾ ꓞꓼ ꓐꓳ ꓬꓲꓻ ꓡꓰ ꓟꓷꓽ ꓠꓷ, ꓡꓯ,ˍ ꓟ ꓗꓪ ꓐꓰ ꓟꓶ ꓡˍ ꓟ ꓙꓲꓻ ꓖꓴ ꓐꓴ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ, ꓟ ꓬꓲ ꓙꓲꓻ ꓖꓴ ꓐꓴ ꓠꓬ꓾
- ꓡꓰ ꓐꓲ ꓠꓻˍ ꓢꓲ ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
- ꓞꓶꓽ ꓚꓵ.ˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
- ꓡꓰ ꓐꓲ ꓗꓳꓽ ꓔꓳ, (Tonsil) ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
- ꓟꓷꓽ ꓠꓷ, ꓒꓴꓽˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ꓿
- ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓠꓲ. ꓡꓰ ꓝꓲˍ ꓡꓳ꓾
- ꓢꓲꓽ ꓛꓲ ꓠꓻˍ ꓟ ꓠꓲ. ꓡꓰ ꓝꓲˍ ꓡꓳ꓾
- ꓢꓲꓽ ꓛꓲ ꓠꓰꓼ ꓠꓰ (ꓢꓲꓽ ꓛꓲ ꓤꓶꓼ ꓦꓲ) ꓗꓪ ꓫꓵꓽ ꓓꓳ ꓡˍ ꓟ ꓔꓯ ꓗꓽ ꓕ. ꓙ ꓖꓶˍ ꓡꓳ꓾
- ꓟꓷꓽ ꓠꓷ, ꓗꓪ ꓬꓲ ꓐꓵꓽ ꓛꓱꓽ ꓠꓱˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
- ꓠꓻ ꓘꓴ ꓛꓵꓽˍ ꓟ ꓔꓯ ꓥˍ ꓟꓲ ꓠꓲ. ꓡꓰ ꓝꓲˍ ꓡꓳ꓿
ꓞꓼ ꓐꓳ ꓬꓲꓻ ꓡꓰ ꓟꓷꓽ ꓠꓷ, ꓡꓯ,ˍ ꓟ ꓞꓲꓽˍ ꓟ ꓔꓯ ꓠꓽ ꓮꓽ ꓟˍ ꓟꓲ ꓑ ꓙꓽ ꓠꓬꓲˍ ꓥꓳ꓿ ꓡꓰ ꓐꓲ ꓠꓻˍ ꓕꓯ ꓞꓼ ꓐꓳ ꓬꓲꓻ ꓔꓯ ꓟꓬꓽ ꓠꓬꓲ ꓣꓱꓽˍ ꓡꓳ꓿ ꓖꓳ ꓡꓱ ꓠꓬꓲ ꓡꓰ ꓐꓲ ꓠꓻ ꓡˍ ꓕꓯ ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ,ˍ ꓟ ꓞꓲꓽˍ ꓟ ꓠꓬ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓐꓯ ꓟ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ,ˍ ꓖꓶˍ ꓕꓯ
pH Level ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓡꓳ꓾
ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓞꓲꓽ ꓖꓶ ꓡꓯ, ꓖꓶˍ ꓟ ꓠꓬ ꓡꓰ ꓐꓲ ꓗꓪ ꓙꓳˍ ꓟ ꓮꓚꓲꓓ ꓔꓲꓺ ꓟꓴ. ꓟꓽ ꓗ, ꓟ ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓡꓳ꓿ ꓟꓷꓽ ꓠꓷ, ꓘꓴꓽ ꓗꓪ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓟꓽ ꓙꓳ ꓡ ꓠ, ꓟ ꓔꓯ ꓥˍ ꓟꓲ ꓗꓽ ꓕ. ꓙ ꓖꓶˍ ꓡꓳ꓿
ꓠ ꓘꓴ/ ꓠ ꓐꓰ ꓛꓵꓽ ꓡꓰ ꓟ ꓔꓯ ꓥ ꓟꓲ ꓓꓻ ꓡꓰ ꓝꓲˍ ꓡꓳ꓾
ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ, ꓟ ꓠꓬ ꓢꓯꓼ ꓦ ꓚꓱ, ꓐꓰ ꓠ ꓘꓴ/ꓠ ꓐꓰ ꓗꓪ ꓓꓵꓽˍ ꓟ ꓞꓶꓽ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿ ꓠꓻˍ ꓟ ꓔꓯ ꓥ ꓟꓲ ꓓꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓳʼˍ ꓟ ꓔꓯ ꓥˍ ꓟꓲ ꓬꓯꓼ ꓡꓰ ꓝꓲˍ ꓡꓳ꓿ ꓠ ꓘꓴ ꓘꓴꓽ ꓗꓪ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓰ ꓦꓲꓣꓴꓢ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿
ꓢꓯꓼ ꓦ ꓚꓱ, ꓗꓪ ꓐꓶꓽ ꓓꓲꓻ ꓚꓲ. ꓠꓷꓼ ꓡꓰˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
ꓞꓼ ꓐꓳ ꓔꓯ ꓟꓳ. ꓙꓲꓻ ꓖꓴ ꓐꓴ ꓔꓯ ꓧꓪ ꓠꓬꓲ ꓚꓬ, ꓠꓬꓲ ꓔ ꓟ ꓗꓪ ꓠꓬ꓾ ꓕꓲꓽ ꓠꓬꓲ ꓗꓪ ꓞꓼ ꓐꓳ ꓬꓲꓻ ꓡꓱꓻ ꓡꓱꓻ ꓡꓰꓽ ꓐꓰ (3) ꓧꓪ, ꓟꓷꓽ ꓠꓷ, ꓡꓯ, ꓖꓶ ꓞꓲꓽ ꓖꓶˍ ꓟ ꓠꓬ꓾ ꓢꓯꓼ ꓦ ꓚꓱ, ꓬꓲ ꓑꓶ. ꓓꓴ ꓗꓪ ꓐꓶꓽ ꓓꓲꓻ ꓓꓵꓽ ꓡꓰ ꓚꓲ. ꓠꓷꓼ ꓡꓰˍ ꓟ ꓟꓽ ꓒꓬꓱꓽ ꓡ ꓠ, ꓟ 40% ꓗꓪ ꓛꓲ ꓗꓽ ꓕ. ꓙ ꓖꓶ ꓐ ꓡˍ ꓟ ꓔꓯ ꓟꓳꓻ ꓪˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓡꓰ ꓐꓲ ꓗꓳꓽ ꓔꓳ, (ꓔꓳꓠꓢꓲꓡ) ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ꓾ ꓦꓲꓣꓴꓢ ꓐꓴ ꓪꓴ. ꓠꓬꓲ ꓟꓷꓽ ꓠꓷ, ꓘꓴꓽ ꓠꓯꓸꓼ ꓗꓪ ꓙꓳˍ ꓟ ꓡꓰ ꓐꓲ ꓗꓳꓽ ꓔꓳ, (ꓔꓳꓠꓢꓲꓡ) ꓳʼˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ꓿ ꓡꓰ ꓐꓲ ꓗꓳꓽ ꓔꓳ, (ꓔꓳꓠꓢꓲꓡ) ꓳʼ ꓡˍ ꓕꓯ ꓜꓽ ꓫꓵꓽ ꓜꓽ ꓙꓰꓽ ꓖꓴ ꓓꓵꓽ ꓡꓰˍ ꓕꓯ ꓠꓻ ꓡˍ ꓟ ꓑꓶ. ꓓꓴ ꓖꓴ ꓓꓵꓽ ꓡꓰ ꓠ, ꓟ ꓮ ꓘꓶ. ꓫ. ꓡꓳ꓿ ꓕꓱ ꓡꓱ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓠ, ꓟ ꓞꓼ ꓐꓳ ꓬꓲꓻ ꓡꓱꓻ ꓡꓱꓻ ꓡꓰꓽ ꓟ ꓔꓯ ꓟꓷꓽ ꓠꓷ, ꓡꓯ, ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓟꓷꓽ ꓠꓷ, ꓗꓪ ꓬꓲ ꓐꓵꓽ ꓛꓱꓽ ꓠꓱˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓾
ꓜꓽ ꓓꓴ ꓑꓶ. ꓓꓴ ꓥ ꓟꓲ꓾ ꓠꓱ. ꓐꓯ ꓚꓱ, ꓪꓴ. ꓠꓬꓲ ꓥ ꓟꓲ ꓟꓷꓽ ꓠꓷ, ꓛꓱꓽ ꓠꓱˍ ꓟ ꓔꓯ ꓓꓻ ꓡꓰ ꓝꓲ ꓠ, ꓟ ꓐꓱ ꓶ ꓟꓷꓽ ꓠꓷ, ꓫꓬꓻ ꓡꓰ ꓓꓴ ꓠꓯꓻ ꓞꓲꓼ ꓣꓱꓽ ꓠꓲ, ꓟꓽ ꓫꓵ ꓕꓯ꓾ ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ, ꓖꓶ ꓐ ꓡˍ ꓡꓳ꓿
ꓢꓲꓽ ꓛꓲ ꓠꓰꓼ ꓠꓰꓼ (ꓢꓲꓽ ꓛꓲ ꓤꓶꓼ ꓦꓲ) ꓐꓰ ꓢꓲꓽ ꓛꓲ ꓗꓪ ꓫꓵꓽ ꓓꓳˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓾
ꓞꓼ ꓐꓳ ꓬꓲꓻ ꓡꓱꓻ ꓡꓱꓻ ꓡꓰꓽ ꓟ ꓐꓰ ꓟꓷꓽ ꓠꓷ, ꓡꓯ, ꓖꓶˍ ꓟ ꓠꓬ ꓢꓲꓽ ꓛꓲ ꓠꓰꓼ ꓠꓰꓼ (ꓢꓲꓽ ꓛꓲ ꓤꓶꓼ ꓦꓲ) ꓳʼˍ ꓟ꓾ ꓫꓵꓽ ꓓꓳˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓿ ꓞꓼ ꓐꓳ ꓬꓲꓻ ꓠꓬ ꓳʼˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟˍ ꓡꓰ ꓐꓰ꓾ ꓢꓲꓽ ꓛꓲ ꓠꓰꓼ ꓠꓰꓼ (ꓢꓲꓽ ꓛꓲ ꓤꓶꓼ ꓦꓲ) ꓳʼˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶ ꓐ ꓡˍ ꓡꓳ꓿ ꓢꓲꓽ ꓛꓲ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓿
ꓟꓷꓽ ꓠꓷ, ꓬꓲ ꓑ ꓐꓴ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓾ ꓟꓷꓽ ꓠꓷ, ꓘꓴꓽ ꓗꓪ ꓒꓬꓱꓼ ꓡˍ ꓟ ꓬꓲ. ꓑ ꓒꓴꓻ ꓒꓴꓻˍ ꓟ ꓓꓻ ꓡꓰ ꓝꓲ ꓠ, ꓟ ꓐꓱ ꓶ ꓥˍ ꓟꓲ ꓞꓼ ꓐꓳ ꓬꓲꓻ ꓐꓰ ꓟꓷꓽ ꓠꓷ, ꓡꓯ, ꓖꓶ ꓐ ꓡˍ ꓡꓳ꓿ ꓬꓲ ꓑ ꓔꓯ ꓓꓻ ꓡꓰ ꓝꓲ ꓢꓲ꓾ ꓬꓲ ꓑ ꓔꓯ ꓟꓲ ꓡꓰ ꓢꓻ ꓝꓲ ꓐ ꓡˍ ꓡꓳ꓿
