ꓦꓰꓼ ꓟ ꓐꓰ ꓬꓲ ꓪꓴ ꓚꓱ, ꓔꓯ ꓢꓲꓽ ꓫꓬ ꓡꓰ ꓠ ꓬꓰ ꓖꓶ ꓐ ꓡˍ ꓟ ꓠ. ꓟꓽ ꓔꓳꓼ ꓡꓳꓼ꓾ ꓦꓯ, ꓠ. ꓑꓳ꓾ ꓟꓵ ꓛꓵꓽ ꓙꓲꓻ ꓖꓴ ꓙꓳˍ ꓟ ꓚꓱ,꓾
ꓟꓵ ꓛꓵꓽ ꓕꓱ ꓟ ꓔꓯ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ Jew’s ear mushroom꓾ ꓥ ꓠꓬ Jelly ear mushroom꓾ ꓥ ꓠꓬ wood ear mushroom ꓐꓰ ꓘꓴˍ ꓟ ꓥ ꓡꓳ꓿
ꓟꓵ ꓛꓵꓽ ꓕꓱ ꓟ ꓠꓬ ꓢꓲ, ꓠꓯ ꓗꓪ꓾ ꓢꓲ, ꓓꓱꓽ ꓗꓪ ꓓꓱꓼˍ ꓟ ꓟꓵ ꓛꓵꓽ ꓕꓲ ꓙꓰꓽ ꓥ ꓢꓲ ꓠꓬꓲ꓾ ꓕꓱ ꓟ ꓔꓯ ꓚꓬ. ꓗꓷ ꓢꓲ ꓑꓯ. ꓜꓽ ꓫꓳꓽ ꓜꓽˍ ꓟˍ ꓡꓰ ꓐꓰ ꓡꓱ ꓜꓽˍ ꓟˍ ꓟꓲ ꓙꓳˍ ꓡꓳ꓿ ꓜꓻ ꓧꓶꓽ ꓐꓰ ꓑꓯ. ꓢꓲ ꓑꓴ. ꓜꓽˍ ꓟˍ ꓟꓲ ꓬꓰˍ ꓡꓳ꓿
ꓟꓵ ꓛꓵꓽ ꓕꓱ ꓟ ꓗꓪ ꓑꓣꓳꓔꓰꓲꓠ ꓢꓯꓼ꓾ ꓬꓲ ꓞꓶꓻ ꓢꓯꓼ꓾ ꓚꓮꓡꓚꓲꓴꓟ꓾ ꓑꓧꓳꓢꓑꓧꓳꓣꓴꓢ꓾ ꓜꓲꓠꓚ꓾ ꓦꓲꓔꓮꓟꓲꓠ ꓐ1꓾ ꓐ2꓾ ꓦꓲꓔꓮꓟꓲꓠ ꓗ꓾ ꓦꓲꓔꓮꓟꓲꓠ ꓓ꓾ ꓑꓳꓡꓬꓢꓮꓚꓚꓧꓮꓣꓲꓓꓰ꓾ ꓮꓓꓰꓠꓳꓢꓲꓠꓰ ꓕꓱ ꓡꓱ ꓫꓵꓽ ꓢꓯꓼ ꓙꓳˍ ꓟ ꓥ ꓡꓳ꓿
ꓠ. ꓟꓽ ꓔꓳꓼ ꓡꓳꓼ (ꓦꓯ, ꓠ. ꓑꓳ) ꓟꓵ ꓛꓵꓽ ꓬꓲ ꓙꓲꓻ ꓖꓴ ꓐꓴ ꓠꓬ ꓕꓱ ꓡꓱ ꓥꓳ꓾
ꓟꓵ ꓛꓵꓽ ꓕꓱ ꓟ ꓗꓪ ꓜꓲꓠꓚ ꓢꓯꓼ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ꓾ ꓖꓳ ꓓꓱꓽ ꓗꓪ ꓜꓲꓠꓚ ꓢꓯꓼ ꓠꓲ.ˍ ꓟ ꓑꓶ. ꓓꓴ ꓫꓵꓽ ꓢꓯꓼ ꓠꓲ.ˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓑꓳꓡꓬꓢꓮꓚꓚꓧꓮꓣꓲꓓꓰ ꓐꓰ ꓮꓓꓰꓠꓳꓢꓲꓠꓰ ꓢꓯꓼ ꓐꓴ ꓗꓪ ꓐꓰ ꓥˍ ꓟꓲ꓾ ꓪꓴ ꓠꓷ. ꓐꓰ ꓚꓲ. ꓟꓶ ꓓꓴ ꓢꓯꓼ ꓔꓯ ꓬꓰ ꓙ ꓔꓳ, ꓙ ꓖꓶ ꓢꓲ ꓠꓬꓲ꓾ ꓮꓡꓜꓧꓰꓲꓟꓰꓣʼꓢ ꓠꓻ꓾ ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓚꓱ, ꓔꓯ ꓥ ꓟꓲ ꓠꓲ. ꓡꓰ ꓝꓲ ꓐ ꓡˍ ꓡꓳ꓿
ꓟꓵ ꓛꓵꓽ ꓕꓱ ꓟ ꓠꓬ ꓫꓵꓽ ꓘꓴꓽ ꓗꓪ ꓟ ꓬꓲ ꓞꓶꓻ ꓢꓯꓼ ꓔꓯ ꓞꓰꓻ ꓡꓰ ꓬꓯꓼ ꓡꓰ ꓝꓲ ꓢꓲ ꓠꓬꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓫꓵꓽ ꓬꓲꓻ ꓚꓳˍ ꓟ ꓔꓯ ꓢꓯꓼ ꓡꓴꓽ ꓖꓶˍ ꓟ ꓑꓶ. ꓓꓴ꓾ ꓟꓵ ꓛꓵꓽ ꓕꓱ ꓟ ꓔꓯ ꓜꓽˍ ꓟ ꓗꓪ ꓐꓰ ꓠꓲ, ꓟ ꓠꓻ ꓐꓰ ꓡꓰ‐ꓒꓯꓸꓼ ꓠꓻ ꓒꓬꓱꓼ ꓡ ꓚꓱ, ꓔꓯ ꓥˍ ꓟꓲ ꓠꓲ. ꓡꓰ ꓝꓲ ꓐ ꓡˍ ꓡꓳ꓿
ꓟꓵ ꓛꓵꓽ ꓗꓪ ꓓꓵˍ ꓟ꓾ ꓐ,ˍ ꓟ ꓦꓲꓔꓮꓟꓲꓠ ꓓ ꓐꓰ ꓚꓮꓡꓚꓲꓴꓟ ꓢꓯꓼ ꓥ ꓟꓲ ꓪꓳꓽ ꓔꓳ ꓐꓰ ꓢꓲꓽ ꓛꓲ ꓔꓯ ꓕꓶꓻ ꓡꓰ ꓝꓲˍ ꓟ ꓢꓯꓼ ꓙꓳˍ ꓡꓳ ꓐꓰ ꓢꓷ. ꓪ ꓡꓳ꓿
ꓠ. ꓟꓽ ꓔꓳꓼ ꓡꓳꓼ (ꓦꓯ, ꓠ. ꓑꓳ) ꓟꓵ ꓛꓵꓽ ꓔꓯ ꓪꓴ. ꓞꓱ ꓠꓬꓱ, ꓢꓴ꓾ ꓞꓶꓽ ꓢꓴ꓾ ꓬꓲ ꓒꓶꓽ ꓬꓲ ꓧꓶꓽ ꓐꓰ ꓟꓬꓱꓽ ꓬꓰ ꓔꓬ ꓪ ꓢꓴ ꓐꓴ ꓠꓬ ꓪ ꓜꓲ ꓜꓽ ꓠ ꓔ ꓡꓳ꓾ ꓐꓰ ꓠꓯ ꓞꓲꓼ ꓔꓯ ꓟꓳ. ꓚꓬ, ꓠꓬꓲ ꓕꓺ ꓠꓬꓲ ꓢꓴ ꓐꓴ ꓡꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓠ. ꓟꓽ ꓔꓳꓼ ꓡꓳꓼ (ꓦꓯ, ꓠ. ꓑꓳ) ꓟꓵ ꓛꓵꓽ ꓜꓽˍ ꓟ ꓗꓪ ꓐꓰ ꓦꓰꓼ ꓟ ꓐꓰ ꓬꓲ ꓪꓴ ꓚꓱ, ꓘꓴꓽ ꓗꓪ ꓬꓲ ꓚꓱ, ꓮ ꓟꓬ, ꓗꓪ ꓐꓰ ꓓꓵꓽ ꓡ ꓟ ꓪꓴ. ꓞꓶꓻ꓾ ꓬꓲ ꓒꓶꓽ ꓬꓲ ꓧꓶꓽ ꓐꓴ ꓔꓯ ꓣꓴ ꓦ ꓗꓷ ꓐ ꓡˍ ꓟ ꓑꓶ. ꓓꓴ ꓥ ꓡꓳ꓾ ꓐꓰ ꓠꓯ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯˍ ꓡꓳ꓿ ꓮ ꓪꓯꓼ ꓧꓪꓽ ꓜꓽˍ ꓕꓯ ꓬꓲ ꓟꓵ ꓟꓽ ꓫꓬ ꓟ ꓔꓯ ꓜꓽ ꓪ ꓡꓰ ꓥˍ ꓟꓲ꓾ ꓟꓵ ꓛꓵ ꓕꓱ ꓟ ꓔꓯ ꓜꓽˍ ꓟ ꓗꓪ ꓐꓰ ꓫꓬꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿
