ꓬꓲꓼ ꓔ ꓙꓵ, ꓟꓬꓽ ꓙ ꓬꓰ ꓕꓯ ꓣꓳ ꓖꓳ ꓓꓱꓽ ꓗꓪ ꓮ ꓡꓲ ꓫꓵꓽ ꓒꓬꓱꓼ ꓡ ꓓ,ˍ ꓡ?
ꓣꓳ ꓕꓲ ꓠꓬꓲ ꓡꓱꓸꓼ ꓪꓴꓽ ꓧꓶ ꓔ ꓟ ꓔꓯ ꓬꓲꓼ ꓔ ꓬꓲꓼ ꓟꓶ ꓢꓲ ꓪꓴꓽ ꓧꓶ ꓠꓽ ꓗꓷ ꓠꓬ ꓓꓻ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓐꓯ ꓔꓬ ꓖꓴˍ ꓡꓳ꓿ ꓮ ꓡꓲ ꓫꓵꓽ ꓥ ꓟꓲ ꓬꓲ ꓟꓶ ꓬꓲ ꓜꓲꓽ ꓬꓰˍ ꓠꓬ꓾ ꓢꓺ ꓡꓰˍ ꓕꓯ ꓠꓽ ꓟꓽ ꓙꓲꓻ ꓗꓷ ꓡꓰˍ ꓡꓳ ꓐꓯˍ ꓟ ꓬꓲ ꓘꓴꓽ ꓗꓪ ꓬꓲꓼ ꓔ ꓟ ꓥˍ ꓟꓲ ꓕꓲ ꓟ ꓚꓬꓼˍ ꓟ ꓥ ꓡꓳ꓿ ꓚꓵ ꓚꓵ ꓣꓳ ꓣꓱꓽ ꓞ, ꓟ ꓕꓯꓽ ꓢꓲ ꓬꓲꓼ ꓔ ꓙꓵ, ꓟꓬꓽ ꓡꓰ ꓟ ꓥˍ ꓟꓲ ꓣꓳ ꓖꓳ ꓓꓱꓽ ꓔꓯ ꓘꓶ ꓡꓶꓽ ꓡꓰ ꓝꓲˍ ꓡꓳ꓿
ꓖꓳ ꓟ ꓑꓶ. ꓓꓴ ꓬꓲꓼ ꓔ ꓙꓵ, ꓟꓬꓽ ꓡꓰ ꓕꓯ ꓒꓬꓱꓼ ꓡˍ ꓟ ꓧꓪꓽ ꓖꓳ ꓓꓱꓽ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓚꓱ, ꓐꓴ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓠꓲ, ꓟ ꓔꓯ ꓔꓬ, ꓟꓽ ꓢꓻ ꓗꓷ ꓡꓰ ꓝꓲˍ ꓡꓳ꓾
ꓞꓳ ꓤ ꓖꓳ ꓓꓱꓽ ꓗꓪ ꓟ ꓠꓲ, ꓟ ꓠꓬ ꓖꓳ ꓓꓱꓽ ꓣꓱꓽ ꓬꓰ ꓚꓱ, ꓔꓯ ꓛꓳ ꓢꓲ꓾ ꓬꓲ ꓟꓬꓱꓽ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓬꓲꓼ ꓔ ꓔꓬ ꓢꓲ ꓠꓬꓲ ꓖꓳ ꓓꓱꓽ ꓠꓬ ꓢꓲ ꓡꓲ ꓐꓰ ꓔꓬ ꓟ ꓠꓬ꓾ ꓠꓲ, ꓟ ꓠꓻ ꓔꓯ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿ ꓟꓬꓽ ꓠꓬꓲ ꓠꓬ ꓮ ꓟꓬ, ꓙꓵ, ꓠꓬꓲ ꓔ. ꓔꓬ, ꓟ꓾ ꓟꓶ ꓤ ꓵ, ꓔꓬ ꓟ꓾ ꓖꓳ ꓓꓱꓽ ꓔꓯ ꓚꓵ. ꓬꓲꓻ ꓓꓳ ꓠ ꓛꓲ ꓡꓵ ꓡꓯꓼ ꓡꓵ ꓟꓽ ꓬꓰ ꓟ ꓙꓻ ꓖꓴ ꓟꓽ ꓫꓱꓽ ꓟ ꓠꓬ ꓠꓲ, ꓟ ꓠꓻ ꓒꓬꓱꓼ ꓡ ꓝꓲˍ ꓡꓳ ꓐꓰ꓾ ꓠꓯ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓢꓷ. ꓢꓴ ꓕꓲ ꓐꓱ ꓡꓰ ꓐꓯˍ ꓡꓳ꓿
ꓙꓴꓽ ꓝꓲ. ꓠꓻ ꓝꓲˍ ꓟ꓾
ꓬꓲꓼ ꓔ ꓐꓯˍ ꓟ ꓠꓬ ꓖꓳ ꓓꓱꓽ ꓔꓯ ꓟꓽ ꓓꓵ ꓓꓵ ꓟꓶ ꓤ ꓔꓬ ꓪˍ ꓟ ꓥ ꓡꓳ꓿ ꓖꓳ ꓡꓱ ꓟꓽ ꓓꓵ ꓓꓵ ꓔꓬ ꓟ ꓑꓶ. ꓓꓴ ꓗ, ꓗꓴ (ꓗ ꓔꓯ) ꓪꓳꓽ ꓔꓳ ꓐꓰ ꓙꓴꓽ ꓝꓲ. ꓪꓳꓽ ꓔꓳ ꓐꓴ ꓠꓬ ꓟꓽ ꓓꓵ ꓓꓵ ꓔꓬ ꓠꓬꓲ꓾ ꓫꓵꓻ ꓬꓲꓻ ꓚꓳˍ ꓟ ꓟꓽ ꓙꓳ ꓟ ꓑꓶ. ꓓꓴ ꓟꓶ ꓤ ꓬꓲꓼ ꓔ ꓟ ꓠꓬ ꓙꓴꓽ ꓝꓲ. ꓔꓯ ꓠꓻ ꓡꓰ ꓝꓲˍ ꓟ ꓥ ꓡꓳ꓿
ꓪꓴ. ꓠꓶ. ꓐꓱ ꓶ ꓥˍ ꓟꓲ ꓟꓽ ꓙꓲꓻ ꓟ꓾
ꓬꓲꓼ ꓔ ꓬꓲꓼ ꓟꓶ ꓙꓵ, ꓠꓬ ꓕꓲ ꓠꓬꓲꓽ ꓗꓪ 8 ꓙꓵ, ꓟꓽ ꓞꓲ ꓗꓪ ꓛꓲˍ ꓙꓳˍ ꓠꓬ ꓡꓳꓼ ꓡꓰꓳ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓕꓯꓽ ꓢꓲ ꓬꓲꓼ ꓔ ꓙꓵ, ꓙ ꓙꓰˍ ꓕꓯ ꓠꓬ ꓪꓴ. ꓠꓶ. ꓔꓯ ꓡꓲꓽ ꓡꓰ ꓝꓲˍ ꓡꓳ꓿ ꓪꓴ. ꓠꓶ. ꓡꓲꓽ ꓡꓰˍ ꓟ ꓟꓽ ꓢꓰ ꓟ ꓠꓬ ꓪꓴ. ꓠꓶ. ꓔꓬ, ꓢꓻ ꓚꓱ, ꓔꓯ ꓘꓶ ꓡꓶꓽ ꓡꓰ ꓝꓲˍ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓟꓶ ꓤ ꓬꓲꓼ ꓔ ꓗꓷ ꓢꓲ ꓧꓪ. ꓛꓲꓽ ꓡˍ ꓕꓯ ꓪꓴ. ꓓꓵ ꓠꓻˍ ꓟ ꓔꓯ ꓥˍ ꓟꓲ ꓔꓳ, ꓜꓳꓽ ꓡ ꓗꓴ.ˍ ꓟ ꓥ ꓡꓳ꓿
ꓠꓻ ꓮ ꓟꓬ, ꓟꓶ ꓡꓰ ꓝꓲ ꓐ ꓡˍ ꓟ꓾
ꓬꓲꓼ ꓔ ꓬꓲ ꓟꓶ ꓙꓵ, ꓟꓬꓽ ꓡꓰ ꓟ ꓪꓴ. ꓠꓬꓲ ꓝꓮꓲ ꓒꓬꓱꓼ ꓡ ꓗꓴ.ˍ ꓟ ꓠꓻ ꓠꓬ ꓢꓰ,‐ꓛꓬꓳ ꓒꓬꓱꓼ ꓡ ꓚꓱ, ꓟꓬꓽ ꓡˍ ꓟ꓾ ꓠꓲ, ꓟ ꓙꓬˍ ꓟ ꓔꓯ ꓥ ꓟꓲ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿
ꓡ ꓞꓳ ꓕꓲ ꓣꓳ ꓠꓬ ꓕꓲ ꓠꓬꓲ ꓗꓪ ꓫꓵꓽ ꓫꓵ 6 ꓙꓵ, ꓗꓪ ꓐꓰ 8 ꓙꓵ, ꓗꓪ ꓛꓲ ꓬꓲꓼ ꓔ ꓟ ꓠꓬ꓾ ꓬꓲꓼ ꓔ ꓬꓲꓼ ꓟꓶ ꓙꓵ, ꓡꓳꓼˍ ꓟ ꓥ ꓡꓳ ꓐꓰ ꓟꓲ ꓠꓯ ꓗꓪ ꓟ ꓧꓪ ꓟꓰ, ꓠꓬꓲ ꓕꓺ ꓠꓬꓲ ꓚꓬ, ꓠꓬꓲ ꓢꓴ ꓮ ꓟꓬ, ꓡꓰ ꓐꓯ ꓔ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓔꓬ, ꓟꓽ ꓢꓻ ꓢꓴ꓾ ꓠꓻ ꓔꓬ ꓢꓴ ꓐꓴ ꓠꓬ ꓟꓬꓽ ꓠꓬꓲ ꓬꓲꓼ ꓔ ꓙꓵ, ꓙꓳ ꓠ ꓔ ꓟ ꓑꓶ. ꓓꓴ ꓬꓲ ꓪ ꓔꓯ ꓠꓽ ꓟꓽ ꓐꓯ꓿
