ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ ꓟꓲꓠꓔ ꓐꓰ ꓘꓴˍ ꓟ ꓑꓴ‐ꓢꓲ‐ꓠꓯ ꓬꓲꓻ ꓔꓯ ꓓꓳꓻ ꓖꓶˍ ꓟ ꓠꓬ ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ꓾ ꓬꓲ ꓞꓶꓻ ꓔꓯ ꓥˍ ꓟꓲ ꓫꓱꓺ ꓡꓰ ꓝꓲˍ ꓡꓳ ꓜꓳꓽ꓿ ꓟꓶꓽ ꓘꓶꓽ ꓬꓲꓼ ꓔ ꓬꓲꓼ ꓟꓶ ꓟꓽ ꓓꓻ ꓕꓯ ꓑꓴ‐ꓢꓲ‐ꓠꓯ 4 ꓒꓬꓽ 5 ꓒꓬꓽ ꓛꓲ ꓔꓯ ꓬꓲꓻ ꓛ ꓗꓪ ꓔꓲ, ꓗꓷ ꓢꓲ꓾ ꓡꓬꓽ ꓡꓰˍ ꓕꓯ ꓓꓳꓻ ꓖꓶˍ ꓠꓬ ꓬꓲꓼ ꓟꓶ ꓢꓻ ꓡꓰˍ ꓡꓳ꓾ ꓐꓰ ꓖꓳ ꓡꓱ ꓓꓳꓻ ꓠꓬꓲ ꓗꓷ ꓢꓴ ꓐꓴ ꓡꓰ ꓐꓯ ꓔ ꓟ ꓙꓳˍ ꓡꓳ꓿
ꓑꓴ‐ꓢꓲ‐ꓠꓯ ꓔꓯ ꓪꓳꓽ ꓒꓬꓽ ꓗꓪ ꓧꓳꓽ ꓜꓽˍ ꓟˍ ꓡꓰ ꓐꓰ꓾ ꓡ, ꓝꓲꓼ ꓗꓪ ꓔꓳ, ꓜꓽˍ ꓟˍ ꓟꓲ ꓙꓳˍ ꓡꓳ꓿
ꓑꓴ‐ꓢꓲ‐ꓠꓯ ꓒꓬꓽ ꓠꓬ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓯ ꓟ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓦꓰꓼ ꓟ ꓙꓲ ꓢꓻ ꓝꓲˍ ꓡꓳ
ꓟꓷꓽ ꓠꓷ, ꓔꓯ ꓫꓬꓽ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓜꓽ ꓓꓴ ꓔꓯ ꓙꓲꓺ ꓢꓻ ꓡꓰ ꓝꓲˍ ꓟ ꓥ ꓡꓳ꓿ ꓗꓳˍ ꓟ ꓜꓽ ꓓꓴ ꓔꓯ ꓟꓬꓽ ꓠꓬꓲ ꓜꓽ ꓪ ꓡꓰ ꓕꓯ꓾ ꓥ ꓠꓬ ꓦꓰꓼ ꓟ ꓙꓲꓺ ꓟꓽ ꓘꓴ ꓗ, ꓕꓯ ꓑꓴ‐ꓢꓲ‐ꓠꓯ ꓮ ꓔꓲ. ꓤ ꓔꓯ ꓜꓽ ꓖꓶˍ ꓠꓬ ꓦꓰꓽ ꓛꓲꓽ ꓔꓬ, ꓢꓻ ꓝꓲˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓮ‐ꓬꓳꓠ‐ꓚꓬꓮꓪ ꓢꓯꓼ ꓔꓯ ꓥˍ ꓟꓲ ꓪꓽ ꓠꓬꓲ ꓡꓰ ꓝꓲˍ ꓡꓳ꓾ ꓪꓴ. ꓓꓵ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓾
ꓑꓴ‐ꓢꓲ‐ꓠꓯ ꓔꓯ ꓮ ꓕꓯ ꓟꓲ ꓜꓽ ꓖꓶˍ ꓟ ꓠꓬ ꓮ‐ꓬꓳꓠ‐ꓚꓬꓮꓪ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟˍ ꓡꓰ ꓐꓰ꓾ ꓪꓴ. ꓓꓵ ꓠꓻ ꓔꓬ ꓕꓯ ꓥ ꓟꓲ ꓑꓴ‐ꓢꓲ‐ꓠꓯ ꓬꓲ. ꓒꓬꓽ ꓔꓯ ꓜꓽˍ ꓠꓬ ꓬꓲ ꓒꓬꓽ ꓗꓪ ꓙꓳˍ ꓟ ꓬꓲ ꓐꓵ ꓪꓴ. ꓠꓬꓲ ꓪꓴ. ꓓꓵ ꓠꓻˍ ꓟ ꓓꓻ ꓡꓰˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓞꓶꓽ ꓚꓵ.ˍ ꓟ (ꓞꓶꓽ ꓧꓶꓽ ꓚꓲ.ˍ ꓟ) ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓾
ꓞꓶꓽ ꓚꓵ. ꓠꓯ ꓞꓲꓼ (ꓞꓶꓽ ꓧꓶꓽ ꓚꓲ. ꓠꓯ ꓞꓲꓼ) ꓟꓬꓽ ꓠꓬꓲ ꓗꓪ ꓠꓬ꓾ ꓑꓴ‐ꓢꓲ‐ꓠꓯ ꓬꓲ ꓢꓯꓼ ꓔꓯ ꓧꓳꓽ ꓢꓲ ꓫꓬ, ꓔ ꓟ ꓔꓯ ꓟꓳꓻ ꓪˍ ꓟˍ ꓡꓰ ꓐꓰ꓾ ꓮ ꓔꓲ. ꓤ ꓐꓬˍ ꓟ ꓬꓲ ꓢꓯꓼ ꓑꓶ. ꓓꓴ ꓞꓶꓽ ꓚꓵ.ˍ ꓟ (ꓞꓶꓽ ꓧꓶꓽ ꓚꓲ.ˍ ꓟ) ꓔꓯ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓑꓴ‐ꓢꓲ‐ꓠꓯ ꓠꓬ ꓡꓰ‐ꓐꓰ ꓔꓯ ꓫꓬꓽ ꓡꓰ ꓝꓲ ꓢꓲ ꓢꓯꓼ ꓦ ꓚ ꓔꓯ ꓢꓯꓼ ꓡꓴꓽ ꓖꓶˍ ꓟ ꓑꓶ. ꓓꓴ ꓑꓯꓠ,‐ꓠ‐ꓬꓲꓠ‐ꓚꓬꓮꓬꓼ ꓠꓻ ꓙꓳ ꓢꓴ ꓥ ꓟꓲ꓾ ꓜꓽ ꓠ ꓔ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓤ ꓠꓱ ꓟ ꓐꓴ ꓮ ꓚꓵ, ꓬꓲꓻ ꓮ ꓟꓬ, ꓓꓳ ꓡ ꓝꓲˍ ꓡꓳ꓾
ꓮ ꓚꓵ, ꓛꓵꓼ ꓤ ꓙꓳˍ ꓟ ꓤ ꓠꓱ ꓟ ꓐꓴ ꓥ ꓟꓲ ꓮ ꓚꓵ, ꓬꓲꓻ ꓮ ꓟꓬ, ꓓꓳ ꓡ ꓠ, ꓟ ꓐꓱ ꓶ ꓑꓴ‐ꓢꓲ‐ꓠꓯ ꓔꓯ ꓕꓲ ꓠꓬꓲ ꓮ ꓔꓲ. ꓜꓽ ꓖꓶ ꓠ ꓔ ꓡꓳ꓾ ꓐꓰ ꓐꓯ ꓔ ꓡꓳ꓿
ꓒ. ꓢꓺ ꓡꓰ ꓟ (ꓘꓪꓽ ꓟꓬꓽ ꓙꓲ ꓡꓰ) ꓟ ꓔꓯ ꓥ ꓟꓲ ꓗꓽ ꓕ. ꓙ ꓖꓶˍ ꓡꓳ꓾
ꓑꓴ‐ꓢꓲ‐ꓠꓯ ꓒꓬꓽ ꓗꓪ ꓓꓯ,ˍ ꓟ ꓐꓬˍ ꓟ ꓬꓲ ꓢꓯꓼ ꓠꓬ ꓫꓵꓽ ꓘꓴꓽ ꓗꓪ ꓟ ꓬꓲ ꓞꓶꓻ ꓘꓴ. ꓔꓯ ꓣꓴ ꓦ ꓖꓶ ꓐ ꓡ ꓢꓲ꓾ ꓒ. ꓢꓺ ꓡꓰ (ꓘꓪꓽ ꓟꓬꓽ ꓙꓲ ꓡꓰ) ꓟ ꓔꓯ ꓥ ꓟꓲ ꓗꓽ ꓕ. ꓙ ꓖꓶˍ ꓟ ꓔꓯ ꓟꓳꓻ ꓪˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓟꓲ ꓡꓲ, ꓢꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓾
ꓬꓲ ꓞꓲꓼ ꓙꓳ ꓡˍ ꓟ ꓪꓴ. ꓠꓬꓲ ꓥˍ ꓟꓲ꓾ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓮ ꓟꓬ, ꓙꓳˍ ꓟ ꓪꓴ. ꓠꓬꓲ ꓥ ꓟꓲ꓾ ꓟꓲ ꓡꓲ, ꓢꓻˍ ꓟ ꓔꓯ ꓑꓴ‐ꓢꓲ‐ꓠꓯ ꓬꓲ ꓒꓬꓽ ꓠꓬ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓾ ꓓꓻ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
Cancer ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓾ 100% ꓗꓪ ꓛꓲ ꓗꓽ ꓕ. ꓙ ꓟꓽ ꓐ ꓡ ꓐꓯ ꓥˍ ꓟꓲ꓾ ꓠꓯ ꓞꓲꓼ ꓔꓯ ꓟꓳ. ꓬꓲ ꓢꓯꓼ ꓙꓳˍ ꓟ ꓔꓯ ꓕꓺ ꓠꓬꓲ ꓚꓬ, ꓠꓬꓲ ꓔ ꓟ ꓗꓪ ꓠꓬ꓾ ꓑꓴ‐ꓢꓲ‐ꓠꓯ ꓠꓬ ꓚꓮꓠꓚꓰꓣ ꓠꓻ ꓔꓯ ꓒꓬꓱꓼ ꓡ ꓝꓲ ꓠ, ꓟ ꓐꓱ ꓶ ꓚꓰꓡꓡ ꓒꓬꓱꓼ ꓡ ꓔꓬ ꓟ ꓐꓰ꓾ ꓚꓮꓠꓚꓰꓣ ꓚꓰꓡꓡ ꓐꓴ ꓔꓯ ꓫꓵꓻ ꓡꓰ ꓝꓲ ꓠ ꓬꓰ ꓙ ꓖꓶ ꓐ ꓡˍ ꓟ ꓔꓯ ꓧꓪ ꓟꓳꓻ ꓔ ꓟ ꓥ ꓡꓳ꓿
