ꓲ‐ꓓꓲ‐ꓬ ꓗꓴꓷꓼ ꓐꓰ ꓠꓲ‐ꓑꓮꓴꓡ ꓗꓴꓷꓼ ꓐꓴ ꓠꓬ 4 ꓦ 9 ꓠꓬꓲ ꓗꓪ ꓐꓰ ꓪꓴ. ꓔꓴ ꓢꓲ ꓬꓲ ꓝꓲ. ꓬꓲ ꓒꓯꓽ ꓟꓽ ꓥ ꓥ꓾ ꓟꓶꓽ ꓦ ꓠꓬ ꓬꓲ ꓓꓽ ꓟ ꓦ ꓗꓷ ꓟ ꓑꓶ. ꓓꓴ ꓡ ꓞꓳ 100 ꓣꓳ ꓛꓲ ꓫꓵꓻ ꓟ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓐꓰ media ꓐꓴ ꓡꓰ ꓐꓯ ꓔ ꓡꓳ꓿
ꓮꓢꓲꓮ ꓖꓴ ꓟꓶ. ꓗꓴꓷꓼ ꓘꓴꓽ ꓗꓪ ꓬꓲ ꓝꓲ. ꓬꓲ ꓒꓯꓽ ꓟꓽ ꓥ ꓥ ꓟꓶ ꓦ ꓠꓬ ꓪ ꓜꓲ ꓦ ꓡˍ ꓥꓳ꓾ ꓐꓰ ꓲ‐ꓓꓲ‐ꓬ ꓟꓵꓽ ꓘꓳ ꓔꓯ ꓟꓳ. ꓕꓺ ꓠꓬꓲ ꓚꓬ, ꓠꓬꓲ ꓔꓶ. ꓗꓪ ꓐꓰ ꓐꓯ ꓑꓶ ꓔ ꓡꓳ꓿
ꓐꓲ‐ꓦ ꓗꓴꓷꓼ ꓫꓴ ꓐꓶ ꓓꓳ ꓕꓲ ꓛꓱꓽ ꓗꓪ 4 ꓦ 9 ꓠꓬꓲ ꓗꓪ ꓐꓰ꓾ ꓟꓶꓽ ꓦ ꓮ ꓘꓶ. ꓦ ꓡ ꓢꓲ ꓠꓬꓲ ꓡ ꓞꓳ (64) ꓣꓳ ꓛꓲ ꓫꓵꓻ ꓗꓷꓳ꓾ ꓐꓰ ꓗꓴꓷꓼ ꓫꓴ ꓗꓪ ꓟ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰ ꓣꓮꓲ‐ꓔ ꓓꓳꓽ ꓐꓯ ꓑꓶ ꓔꓶ. ꓗꓪ ꓐꓯ ꓔ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓲ‐ꓓꓲ‐ꓬ ꓗꓴꓷꓼ ꓗꓪ ꓡ ꓞꓳ ꓮ ꓘꓶ. ꓔꓬ ꓟꓬꓽˍ ꓟ ꓴꓔꓔꓮꓣ ꓑꓣꓮꓓꓰꓢꓧ ꓗꓴꓷꓼ ꓫꓴ ꓗꓪ ꓥˍ ꓟꓲ꓾ ꓟꓶꓽ ꓦ ꓬꓲ ꓓꓽ ꓟ ꓦ ꓗꓷ ꓠꓬꓲ ꓡ ꓞꓳ (20) ꓣꓳ ꓟꓽ ꓞꓲ ꓫꓵꓻ ꓗꓷꓳ꓾ ꓐꓰ ꓗꓴꓷꓼ ꓘꓴꓽ ꓗꓪ ꓟ ꓓꓳꓽ ꓐꓯ ꓑꓶ ꓔꓶ. ꓐꓴ ꓡꓰ ꓐꓯ ꓔ ꓡꓳ꓿
ꓖꓳ ꓟ ꓘꓴꓽ ꓗꓪ ꓲ‐ꓓꓲ‐ꓬ ꓗꓴꓷꓼ ꓒ ꓕꓲ ꓗꓪ ꓟ ꓠꓲ‐ꓑꓮꓴꓡ ꓗꓴꓷꓼ ꓗꓪ ꓥˍ ꓟꓲ꓾ ꓟꓴꓽ ꓖꓴꓽ ꓑꓱ, ꓟꓴꓽ ꓖꓴꓽ ꓘꓶꓽˍ ꓟ ꓐꓰ ꓟꓶꓽ ꓦ ꓮ ꓘꓶ. ꓦˍ ꓟ ꓑꓶ. ꓓꓴ ꓡ ꓞꓳ 8 ꓣꓳ ꓛꓲꓺ ꓫꓵꓻ ꓗꓷꓳ꓾ ꓐꓰ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓡꓳ꓿
ꓲ‐ꓓꓲ‐ꓬ ꓗꓴꓷꓼ ꓔꓱ, ꓫꓵ ꓐꓰ ꓗꓴꓷꓼ ꓐꓶ ꓓꓳ ꓕꓲ ꓛꓱꓽ ꓐꓴ ꓗꓪ 4 ꓦ (12) ꓠꓬꓲ꓾ ꓠꓬꓲ. ꓠꓬꓲ ꓗꓪ ꓛꓲ ꓟꓴꓽ ꓖꓴꓽ ꓑꓱ, ꓟꓴꓽ ꓖꓴꓽ ꓘꓶꓽˍ ꓟ ꓐꓰ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓟ ꓙꓳˍ ꓥꓳ꓾ ꓐꓰ ꓟꓵꓽ ꓘꓳꓼ ꓔꓯ ꓟꓳ. ꓚꓬ, ꓠꓬꓲ ꓕꓺ ꓠꓬꓲ ꓔꓶ. ꓗꓪ ꓐꓰ ꓐꓯ ꓑꓶ ꓔ ꓡꓳ꓿
