ꓟꓬ‐ꓟ ꓗꓴꓷꓼ ꓗꓪ ꓚꓳ. ꓧꓶꓽ ꓗꓴꓷꓼ ꓗꓪ ꓪꓴꓽ ꓜꓽ ꓗꓷ ꓟꓶˍ ꓟ ꓤ ꓟꓶ 21 ꓣꓳ ꓔꓯ ꓗꓳ. ꓗꓷ ꓟ 3 ꓦ ꓬꓲ ꓪꓴ. ꓕꓲꓽ ꓠꓽ ꓕꓯ ꓟ‐ꓓ‐ꓡꓰ, ꓡꓳ ꓒꓱ ꓗꓪ ꓟ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓚꓬꓴ. ꓙ ꓐ ꓡ ꓗꓷ ꓢꓲ꓾ ꓗ‐ꓛꓲ ꓗꓴꓷꓼ ꓫꓴ ꓟꓲ‐ꓚꓲ‐ꓠ ꓗꓪ ꓗꓷ ꓔ ꓡꓳ ꓐꓰ ꓕꓲ ꓦꓲꓻ ꓢꓴ ꓐꓰ ꓞꓳ ꓤ ꓔꓯ ꓪꓴꓽ ꓜꓽ ꓢꓲ ꓶꓻ ꓡꓯꓼ ꓟꓬꓱꓽ ꓬꓰˍ ꓟ ꓔꓯ ꓗꓽ ꓕˍ ꓟ ꓟꓬꓱꓽ ꓬꓰ ꓢꓴ ꓐꓴ ꓡꓰ ꓐꓯˍ ꓡꓳ꓿
ꓬꓲ ꓪ ꓠꓬ 15 ꓘꓳꓼ ꓗꓪ ꓐꓰ 38 ꓘꓳꓼ ꓠꓬꓲꓽ ꓗꓴ. ꓚꓸꓼ ꓗꓪ ꓟ ꓤ ꓟꓶ ꓤ ꓐꓴ ꓥ ꓢꓲ ꓠꓬꓲ꓾ ꓣ‐ꓘꓮꓲ ꓗꓴꓷꓼ ꓫꓴ ꓢꓲ‐ꓔꓪꓰ ꓡꓳ ꓒꓱ ꓗꓪ ꓐꓰ 10 ꓣꓳ꓾ ꓗꓬꓮꓴ‐ꓒꓬꓴ ꓡꓳ ꓒꓱ ꓗꓪ ꓐꓰ 3 ꓣꓳ꓾ ꓗꓬꓮꓴ‐ꓔꓮꓪ ꓡꓳ ꓒꓱ ꓗꓪ ꓐꓰ 1 ꓣꓳ ꓐꓰ꓾ ꓟꓬ‐ꓟ ꓗꓴꓷꓼ ꓔꓱ, ꓫꓵ ꓗꓪ ꓐꓰ 7 ꓣꓳ꓾ ꓮ ꓙꓵꓽ 21 ꓣꓳ ꓥ ꓡꓳ꓾ ꓐꓰ ꓐꓯ ꓡꓳ꓿
ꓪꓴꓽ ꓜꓽ ꓟꓶ ꓡꓰ ꓗꓷ ꓟ ꓤ ꓟꓶ ꓤ ꓐꓴ ꓔꓯ ꓪꓴꓽ ꓜꓽ ꓢꓴ ꓐꓴ ꓡꓰ꓾ ꓕꓲ ꓐꓱ ꓔꓯ ꓠꓬ ꓬꓮꓥ‐ꓖꓳꓥ ꓗꓪ ꓟꓬꓱꓽ ꓖꓶˍ ꓥꓳ꓾ ꓐꓯ ꓢꓲ ꓘꓴꓻˍ ꓡꓳ꓿ ꓕꓲ ꓐꓱ ꓔꓯ ꓠꓬ ꓧꓶꓽ ꓗꓴꓷꓼ ꓗꓪ ꓟꓬꓱꓽ ꓬꓰ ꓪˍ ꓥꓳ꓾ ꓐꓯ ꓢꓲ ꓘꓴꓻˍ ꓡꓳ꓿ ꓣ‐ꓘꓮꓲ ꓗꓴꓷꓼ ꓫꓴ ꓗꓪ ꓟ ꓤ ꓟꓶ ꓤ ꓐꓴ ꓔꓯ ꓬꓮꓥ‐ꓖꓳꓥ ꓗꓪ ꓛꓲ ꓐꓬꓱ ꓦꓲꓻ ꓡꓰ ꓘꓴꓻ ꓔꓯ, ꓡˍ ꓡꓳ꓿ ꓬꓮꓥ‐ꓖꓳꓥ ꓗꓪ ꓐꓰ ꓧꓶꓽ ꓗꓴꓷꓼ ꓟꓵꓽ ꓫ. ꓗ ꓗꓪ ꓝ. ꓢꓲ ꓙꓰ ꓔꓬ ꓕꓯ ꓟ‐ꓓ‐ꓡꓰ, ꓗꓪ ꓣꓴ ꓟꓶ ꓡꓰ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓗ‐ꓛꓲ ꓤ ꓟꓶ ꓤ ꓜꓴꓻ (ꓗꓪꓮꓔ) ꓡꓰ 2024 ꓘꓳꓼ 12 ꓦ ꓕꓯ ꓐꓯ ꓑꓶ ꓔ ꓟ “Sold To China” ꓐꓰ ꓟꓬꓱ ꓔ ꓟ ꓕꓳꓽ ꓶ ꓗꓪ꓾ ꓟꓬ‐ꓟ ꓗꓴꓷꓼ ꓗꓪ ꓟ ꓤ ꓟꓶ ꓤ ꓐꓴ ꓠꓬ ꓧꓶꓽ ꓒ ꓤ ꓟꓶ ꓬꓰ ꓠ, ꓟ ꓧꓶꓽ ꓗꓴꓷꓼ ꓗꓪ ꓪꓴꓽ ꓜꓽˍ ꓟ ꓟꓶ ꓔꓬ ꓟ ꓫꓵꓽ ꓪꓴ ꓠꓬ꓾ ꓙꓳꓺ ꓠ ꓔ ꓗꓪ ꓛꓲ ꓮ ꓟꓬ, ꓟꓬꓽ ꓡ ꓔꓬ ꓡꓳ꓾ ꓐꓰ ꓐꓳ ꓔ ꓡꓳ꓿ ꓗꓪꓮꓔ ꓡꓰ 2019 ꓗꓪ ꓐꓰ 2023 ꓗꓪ ꓛꓲ꓾ 4 ꓘꓳꓼ ꓘꓴꓽ ꓠꓯꓸꓼ ꓗꓪ꓾ ꓧꓶꓽ ꓗꓴꓷꓼ ꓗꓪ ꓧꓶꓽ ꓤ ꓟꓶ ꓬꓰ ꓠ, ꓟ ꓪꓴꓽ ꓜꓽˍ ꓟ ꓟꓶ ꓗꓷ ꓢꓴ ꓤ ꓟꓶ ꓤ 187 ꓣꓳ ꓔꓯ ꓬꓰ ꓙ ꓐ ꓡ ꓗꓷꓳ꓾ ꓐꓰˍ ꓟꓲ ꓕꓳꓽ ꓶ ꓖꓳ ꓟ ꓗꓪ ꓐꓳ ꓔ ꓡꓳ꓿
