ꓗ‐ꓛꓲ ꓗꓴꓷꓼ ꓫꓴ꓾ ꓒ‐ꓗ. ꓡꓳ ꓒꓱ꓾ ꓡ‐ꓪ, ꓞꓳ ꓘ, ꓗꓪ ꓟꓯꓼ ꓛꓰ, ꓟꓯꓼ ꓑꓬ ꓢꓴ 500 ꓣꓳ ꓟꓽ ꓞꓲꓺ ꓠꓬ ꓠꓯ ꓞꓲꓼ ꓐꓰ ꓜꓽ ꓓꓴ ꓓꓳꓻ ꓓꓴ ꓫ. ꓙꓵ ꓔꓬ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓞꓳ ꓘ, ꓢꓴ ꓤ ꓟꓶ ꓤ ꓕꓲ ꓣꓳ ꓡꓰ ꓐꓯˍ ꓟ ꓠꓬ꓾ “ꓡ‐ꓪ, ꓞꓳ ꓘ, ꓗꓪ ꓔꓬ ꓟꓽ ꓓꓻ ꓟ ꓪꓴ. ꓠꓬꓲ ꓮ ꓟꓶ ꓕꓲ ꓑ, ꓤ ꓟꓯꓼ ꓛꓰ, ꓑꓬ ꓔꓬ ꓪˍ ꓥ꓿ ꓜꓽ ꓓꓴ ꓓꓳꓻ ꓢꓴ ꓠꓽ ꓫ. ꓔꓬꓳ꓿ ꓮ ꓫꓵꓽ ꓶꓻ ꓤ ꓚꓬ ꓢꓲ. ꓥˍ ꓟꓲ ꓟꓽ ꓣꓴ ꓪ ꓡꓰ꓿ ꓖꓳ ꓓꓱꓽ ꓡꓰꓽ ꓔꓷ, ꓡ ꓪ ꓢꓴ ꓮ ꓟꓬ, ꓙꓳˍ ꓟ ꓪꓴ. ꓠꓬꓲ꓾ ꓜꓽ ꓓꓴ ꓓꓳꓻ ꓓꓴ ꓐꓰ ꓠꓯ ꓞꓲꓼ ꓠꓯ ꓟꓲ. ꓠꓽ ꓮ ꓘꓶ. ꓣꓱꓽ ꓞ, ꓔꓬ ꓥ꓾” ꓐꓰ ꓐꓯˍ ꓡꓳ꓿
ꓟꓬꓽ ꓠꓬꓲ ꓠꓬ ꓠ‐ꓟ‐ꓔꓲ. ꓐꓰ ꓟꓳ,‐ꓗꓮꓴ, ꓡꓳ ꓒꓱ ꓐꓴ ꓗꓪ ꓟꓯꓼ ꓛꓰ, ꓑꓬ ꓔꓬ ꓥ ꓟꓲ꓾ ꓕꓲ ꓐꓱ ꓶ ꓢꓲ, ꓠꓯ ꓗꓪ ꓛꓰ, ꓑꓬ ꓙꓰ ꓟ ꓪꓴ. ꓠꓬꓲ ꓜꓽ ꓓꓴ ꓟꓬꓽ ꓠꓬꓲ ꓫ. ꓡꓰꓳ꓾ ꓐꓰ ꓢꓷ. ꓪ ꓡꓳ꓿
ꓡꓲ‐ꓓꓳ ꓙꓻ ꓖꓴ ꓗꓪ ꓙꓳˍ ꓟ ꓪ‐ꓬ‐ꓤꓴꓑ ꓑ ꓫꓬ ꓐꓴ ꓦ ꓟꓲ ꓢꓲ, ꓠꓯ ꓕꓲ ꓛꓱꓽ ꓗꓪ ꓛꓰ, ꓑꓬ ꓙꓰ ꓪˍ ꓠꓬꓲ꓾ ꓡꓳ ꓒꓱ ꓗꓪ ꓓꓳ ꓡ ꓟꓽ ꓓꓻ ꓛꓵꓽ ꓡꓰ ꓟ ꓪꓴ. ꓠꓬꓲ꓾ ꓠꓯ ꓞꓲꓼ ꓐꓰ ꓜꓽ ꓓꓴ ꓣꓱꓽ ꓞ, ꓔꓬ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓟꓬ‐ꓟ ꓗꓴꓷꓼ ꓗꓪ ꓠꓬ 2021 ꓘꓳꓼ ꓕꓯ ꓡꓰ ꓪꓴ. ꓔꓴ ꓢꓲ꓾ ꓡꓳ ꓒꓱ ꓮ ꓟꓬ, ꓗꓪ ꓠꓬꓲꓽ ꓛꓱꓽ ꓟꓯꓼ ꓓꓶꓽ ꓡꓯ ꓘꓳˍ ꓟ ꓑꓶ. ꓓꓴ ꓟꓯꓼ ꓛꓰ, ꓟꓯꓼ ꓑꓬ ꓪ ꓢꓴ ꓑ ꓫꓬꓼ ꓮ ꓟꓬ, ꓙꓳ ꓡ ꓟ ꓥ ꓢꓲ ꓠꓬꓲ꓾ ꓑ ꓫꓬꓼ ꓮ ꓟꓬ, ꓫ. ꓙꓵ ꓓꓴ ꓔꓳ, ꓜꓳꓽ ꓔꓬ ꓪˍ ꓟ ꓥ ꓡꓳ꓿
