ꓕꓲ ꓖ ꓕꓲ ꓧꓪ, ꓟꓶ ꓞꓻ ꓮ ꓘꓶ. ꓞˍ ꓕꓯ ꓬꓲ ꓛꓵꓻ ꓬꓲꓻ ꓙꓬ ꓝꓲ ꓝꓲ ꓟ ꓔꓯ ꓓꓳꓻˍ ꓟ ꓔꓯ ꓞꓳ ꓤ ꓐꓴ ꓠꓬ ꓟꓬꓽ ꓠꓬꓲ ꓠꓲ, ꓘꓪꓽ ꓫꓵ ꓔꓬ ꓟ ꓥꓳ꓿ ꓫꓵꓽ ꓤ ꓧꓪ ꓤ ꓐꓴ꓾ ꓛꓳ ꓒꓯ, ꓐꓴ ꓦꓲꓻ ꓗꓪ ꓛꓪ. ꓙꓰ꓾ ꓗ, ꓙꓰˍ ꓕꓯ ꓥ ꓟꓲ ꓛꓵꓻˍ ꓟ ꓐꓬꓽ ꓐꓰ ꓛꓵꓻˍ ꓟ ꓬꓲ ꓛꓵꓻ ꓬꓲꓻ (ꓒꓬꓮꓪ ꓬꓲꓻ) ꓕꓴꓽ ꓪꓴꓻ ꓔꓯ, ꓙꓰ ꓢꓲ ꓡꓯꓼ ꓫꓴ ꓖꓶ꓾ ꓤ ꓠꓱ ꓤ ꓐꓴ ꓔꓯ ꓖꓶ ꓓꓳꓻ꓾ ꓖꓳ ꓡꓱ ꓬꓰˍ ꓟ ꓟꓲ ꓙꓳˍ ꓡꓳ꓿ ꓝꓮꓲ ꓛꓳꓽ ꓒꓯ, ꓐꓴ꓾ ꓫꓵꓽ ꓤ ꓧꓪ ꓤ ꓐꓴ ꓣꓳ ꓦꓲꓻ ꓗꓪ ꓡˍ ꓕꓯ ꓥˍ ꓟꓲ ꓛꓵˍ ꓟ ꓑ ꓑ ꓲʼ ꓖꓶˍ ꓟ꓾ ꓬꓲ ꓛꓵꓻ ꓬꓲꓻ ꓲʼ ꓖꓶ ꓓꓳꓻˍ ꓟ꓾ ꓕꓱ ꓟ ꓥ ꓟꓲ ꓠꓬꓲ. ꓠꓬꓲ ꓗꓪ ꓡꓲꓽ ꓒꓰꓼ ꓕꓲ ꓟˍ ꓡꓰ ꓐꓰ ꓒꓬꓱꓼ ꓡ ꓔꓬ ꓟ ꓥ ꓡꓳ꓿
ꓛꓵꓻˍ ꓟ ꓬꓲ ꓢꓯꓼ ꓠꓬ ꓞꓳ ꓤ ꓟꓷꓽ ꓠꓷ, ꓗꓪ ꓮ ꓘꓶ. ꓟꓲˍ ꓟ ꓙꓲꓻˍ ꓟ ꓑꓶ. ꓓꓴ ꓬꓲ ꓛꓵꓻ ꓔꓯ ꓟꓽ ꓧꓳ, ꓢꓴ꓾ ꓟꓽ ꓠꓵꓻ ꓢꓴ ꓥ ꓟꓲ ꓟꓽ ꓙꓳ ꓐꓯ ꓠ ꓛꓲ꓾ ꓬꓲ ꓛꓵꓻ ꓢꓯꓼ ꓠꓬ ꓞꓳ ꓤ ꓐꓴ ꓗꓳ ꓡꓳ ꓗꓪ ꓮ ꓘꓶ. ꓟꓬꓱ ꓓꓳꓽ ꓟꓶˍ ꓡꓳ꓿ ꓤ ꓠꓱ ꓤ ꓐꓴ ꓥ ꓟꓲ ꓬꓲ ꓪ ꓡꓯꓽ ꓒꓯ, ꓗꓪ ꓒꓴ ꓓˍ ꓕꓯ ꓛꓵˍ ꓟ ꓕꓲ ꓫꓵꓽ ꓫꓵꓽ ꓔꓯ ꓪꓴꓻ ꓜꓽ ꓪꓴꓻ ꓓꓳꓻ ꓔꓬ ꓟ ꓥꓳ꓿ ꓕꓱ ꓡꓱ ꓬꓰˍ ꓟ ꓗ ꓠꓯ. ꓢꓲ ꓗꓪ ꓠꓬ ꓞꓳ ꓤ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓮ ꓟꓬ, ꓫꓵꓽ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓾ ꓐꓯ ꓟ ꓔꓯ ꓢꓷ. ꓢꓴ ꓠꓽ ꓮ ꓘꓶ. ꓠꓲ. ꓓ,ˍ ꓢꓰꓽ ꓡꓳ꓿
ꓞꓼ ꓛꓵꓻ ꓞꓼ ꓐꓳ ꓐꓬꓽ ꓟꓬꓽ ꓡꓰˍ ꓕꓯ ꓮ ꓡꓲ ꓫꓵꓽ ꓠꓻ ꓒꓬꓱꓼ ꓡ ꓓˍ ꓡ ꓐꓯ ꓟ ꓔꓯ ꓝ. ꓢꓲ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓣꓳ ꓓꓳꓻ ꓔꓬ ꓟ ꓗꓳ‐ꓡ꓾ ꓚꓬꓳꓲ‐ꓬꓮꓲ,꓾ ꓑꓯꓑ‐ꓢꓲ꓾ ꓕꓱ ꓡꓱ ꓫꓵꓽ ꓖꓮꓢ ꓓꓯ,ˍ ꓟ ꓬꓲ ꓛꓵꓻ ꓬꓲꓻ ꓕꓲ ꓕꓴꓽ ꓗꓪ ꓞꓼ ꓛꓵꓻ 8 ꓬꓲ, ꓖꓴ ꓗꓪ ꓐꓰ 12 ꓬꓲ, ꓖꓴ ꓗꓪ ꓛꓲ (33g – 50g) ꓗꓪ ꓛꓲ ꓓꓵˍ ꓟ ꓥ ꓢꓲ ꓠꓬꓲ꓾ ꓕꓱ ꓟ ꓠꓬ ꓕꓲ ꓠꓬꓲ ꓐꓱ ꓶ ꓜꓽ ꓠ ꓔ ꓟ ꓞꓼ ꓛꓵꓻ ꓕꓯꓽ ꓢꓲ ꓮ ꓟꓬ, ꓟꓬꓽ ꓙꓰ ꓟ ꓥꓳ꓿ ꓕꓲ ꓠꓬꓲ ꓡꓱꓸꓼ ꓐꓱ ꓶ ꓜꓻ ꓪꓳꓽ ꓒꓬꓽ꓾ ꓢꓲ, ꓢꓶꓽ꓾ ꓜꓽ ꓫꓵꓽ ꓜꓽ ꓙꓰꓽ꓾ ꓕꓱ ꓟꓬ ꓫꓵꓽ ꓗꓪ ꓐꓰ ꓟꓶ ꓡˍ ꓟ ꓞꓼ ꓛꓵꓻ ꓢꓯꓼ ꓔꓯ꓾ ꓮ ꓢꓳ ꓕꓯ ꓐꓯ ꓗꓷ ꓟ ꓬꓲ ꓛꓵꓻ ꓬꓲꓻ ꓕꓲ ꓕꓴꓽ ꓤ ꓓꓳꓻ ꓗꓷˍ ꓕꓯ ꓡꓰ ꓮ ꓟꓬ, ꓟꓬꓽ ꓙꓰ ꓟ ꓥ ꓡꓳ꓿
ꓞꓼ ꓛꓵꓻ ꓮ ꓟꓬ, ꓓꓵꓽ ꓡˍ ꓟ ꓔꓯ ꓣꓳ ꓖꓳ ꓓꓱꓽ ꓠꓬ ꓘꓳ ꓣꓴ ꓟꓽ ꓐ ꓡ꓾ ꓐꓰ ꓐꓯˍ ꓡꓳ꓿ ꓕꓱ ꓡꓱ ꓛꓵꓻˍ ꓟ ꓔꓯ ꓓꓳꓻ ꓗꓷˍ ꓕꓯ ꓣꓳ ꓖꓳ ꓓꓱꓽ ꓗꓪ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓗꓴ.ˍ ꓡꓳ꓾
ꓢꓲꓽ ꓛꓲ ꓐꓶꓽ ꓓꓲꓻ ꓜꓽˍ ꓟ꓾ ꓟꓷꓽ ꓠꓷ, ꓘꓴꓽ ꓗꓪ ꓐꓯ‐ꓔꓲ‐ꓣꓲ‐ꓬ ꓐꓶꓽ ꓓꓲꓻ ꓮ ꓟꓬ, ꓓꓳ ꓡ ꓠ ꓬꓲ ꓛꓵꓻ ꓢꓯꓼ ꓠꓬ ꓬꓰ ꓙ ꓖꓶˍ ꓟ ꓑꓶ. ꓓꓴ ꓢꓲꓽ ꓛꓲ ꓐꓶꓽ ꓓꓲꓻ ꓜꓽˍ ꓟ ꓒꓬꓱꓼ ꓡˍ ꓗꓴ.ˍ ꓡꓳ꓿
ꓝꓮꓲ ꓮ ꓘꓶ. ꓒ. ꓡ꓾ ꓘꓪꓽ ꓡˍ ꓟ꓾ ꓞꓼ ꓛꓵꓻ (ꓞꓼ ꓐꓳ ꓐꓬꓽ) ꓐꓰ ꓚꓮꓡꓳꓣꓲ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓓꓳꓻ ꓢꓻˍ ꓟ ꓡꓰꓽ ꓟꓽ ꓞꓲ꓾ ꓒ. ꓡꓰ ꓢꓻ ꓘꓪꓽ ꓡꓰ ꓢꓻˍ ꓡꓳ꓿ ꓮ ꓘꓶ. ꓒ. ꓢꓺ ꓡꓰ (ꓘꓪꓽ ꓟꓬ ꓙꓲ ꓡꓰˍ ꓟ) ꓠꓬ ꓞꓳ ꓤ ꓖꓳ ꓓꓱꓽ ꓐꓰ ꓠꓲ, ꓟ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓥ ꓡꓳ꓿
ꓞꓼ ꓐꓳ ꓐꓬꓽ (ꓞꓼ ꓛꓵꓻ) ꓮ ꓟꓬ, ꓣꓱꓽ ꓪ ꓡꓰ ꓕꓯ ꓠꓲ, ꓟ ꓠꓻ ꓔꓯ ꓥˍ ꓟꓲ ꓒꓬꓱꓼ ꓡ ꓝꓲˍ ꓡꓳ꓿ ꓬꓲ ꓞꓵꓻ ꓢꓯꓼ ꓑꓶ. ꓓꓴ ꓫꓵꓽ ꓘꓴꓽ ꓗꓪ ꓬꓲ ꓞꓶꓻ ꓮ ꓟꓬ, ꓟꓬꓽ ꓡ ꓢꓲ ꓠꓬꓲ ꓟꓶ ꓫꓵ ꓡˍ ꓕꓯ꓾ ꓠꓲ, ꓟ ꓠꓻ ꓔꓯ ꓥˍ ꓟꓲ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿ ꓬꓲ ꓛꓵꓻ ꓬꓲꓻ ꓟꓬꓽ ꓠꓬꓲ ꓓꓳꓻ ꓢꓴ ꓠꓬ ꓟꓽ ꓓꓳꓻ ꓢꓴ ꓢꓶ. ꓟꓽ ꓞꓲꓺ ꓠꓲ, ꓟ ꓠꓻ ꓒꓬꓱꓼ ꓡ ꓚꓱ, ꓮ ꓘꓶ. ꓟꓬꓽˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓡꓰ‐ꓒꓬꓯꓸꓼ ꓠꓻ ꓔꓯ ꓥˍ ꓟꓲ ꓒꓬꓱꓼ ꓡ ꓝꓲˍ ꓡꓳ꓿ ꓒ. ꓢꓺ ꓡꓰ (ꓘꓪꓽ ꓟꓬ ꓙꓲ ꓡꓰ) ꓕꓯ ꓡꓰ‐ꓒꓬꓯꓸꓼ ꓠꓻ ꓒꓬꓱꓼ ꓡ ꓚꓱ, ꓔꓯ ꓟꓬꓽ ꓠꓬꓲ ꓟꓴꓺ ꓓꓯ ꓡ ꓝꓲˍ ꓡꓳ꓿ ꓡꓰ‐ꓒꓬꓯꓸꓼ ꓟ ꓠꓬ ꓞꓳ ꓠꓻ ꓐꓱ ꓶˍ ꓡꓰꓽ ꓟꓽ ꓞꓲ꓾ ꓞꓳ ꓠꓻ ꓔꓯ ꓠꓬꓲ ꓡꓳ. ꓗꓪꓼ ꓫꓵꓼ ꓔꓬ ꓢꓴ ꓐꓱ ꓶˍ ꓟꓲ ꓮ ꓘꓶ. ꓬꓰ ꓫ.ˍ ꓟ ꓥ ꓡꓳ꓿
ꓢꓰ,‐ꓛꓬꓳ ꓠꓻ꓾ ꓕꓱ ꓟ ꓔꓯ ꓠꓽ ꓐꓯ ꓟꓽ ꓛꓵꓳ꓿ ꓖꓳ ꓓꓱꓽ ꓗꓪ ꓓꓵꓽ ꓡ ꓟ ꓬꓲ ꓛꓵꓻ ꓮ ꓟꓬ, ꓔꓯ ꓧꓪꓽ ꓖꓳ ꓓꓱꓽ ꓠꓬ ꓙꓵꓽ ꓟꓽ ꓐ ꓡ ꓕꓯ ꓫꓵꓽ ꓘꓴꓽ ꓗꓪ ꓐꓰ ꓤꓲꓽ ꓘꓴꓽ ꓗꓪ ꓬꓲ ꓛꓵꓻ ꓢꓯꓼ ꓮ ꓟꓬ, ꓟꓬꓽ ꓡ ꓢꓲ ꓠꓬꓲ꓾ ꓢꓰ,‐ꓛꓬꓳ ꓠꓻ ꓒꓬꓱꓼ ꓡ ꓗꓴ.ˍ ꓟ ꓥ ꓡꓳ꓿ ꓢꓰ,‐ꓛꓬꓳ ꓒꓬꓱꓼ ꓡˍ ꓕꓯ ꓠꓻ ꓓꓴ ꓑ ꓓꓻ ꓡꓰ ꓟꓽ ꓢꓻ ꓢꓲ ꓛꓲ ꓒꓯ, ꓓꓶ ꓠ ꓗꓪ ꓛꓲ ꓗꓷ ꓡꓰˍ ꓟ꓾ ꓪꓳꓽ ꓓꓲꓻ ꓐꓬ ꓡꓰˍ ꓟ ꓥ ꓟꓲ ꓒꓬꓱꓼ ꓡ ꓗꓴ.ˍ ꓟ ꓥ ꓡꓳ꓿
ꓬꓲ ꓛꓵꓻ ꓬꓲꓻ ꓓꓳˍ ꓟ ꓟꓶ ꓫꓵ ꓡ ꓕꓯ ꓕꓲ ꓠꓬꓲ ꓟꓽ ꓓꓳꓻ ꓟꓽ ꓓꓻ ꓗꓪ ꓛꓲ ꓗꓷ ꓡꓰ ꓢꓲ ꓠꓬꓲ꓾ ꓟꓽ ꓓꓳꓻ ꓓꓳꓻ ꓔꓬ ꓠꓬꓲˍ ꓕꓯ ꓪꓴ. ꓓꓵ ꓠꓻˍ ꓟ꓾ ꓪꓴꓽ ꓧꓶ ꓡˍ ꓟ꓾ ꓠꓲ, ꓟ ꓙꓬ ꓡˍ ꓟ꓾ ꓠꓲ, ꓟ ꓟꓽ ꓫꓵ ꓟ꓾ ꓕꓱ ꓡꓱ ꓫꓵꓽ ꓥˍ ꓟꓲ ꓒꓬꓱꓼ ꓡˍ ꓟ ꓥ ꓡꓳ꓿
ꓖꓳ ꓟ ꓪꓴ. ꓠꓬꓲ ꓣꓳ ꓧꓪꓽ ꓓꓱꓽ ꓐꓱ ꓶ ꓟꓽ ꓙꓲꓻ ꓟ꓾ ꓠꓻ ꓡꓰꓽ ꓖꓶˍ ꓟ ꓬꓲ ꓛꓵꓻ ꓬꓲꓻ ꓔꓯ ꓓꓳꓻ ꓔꓬ ꓢꓴ ꓥ ꓕꓯ ꓠꓽ꓾ ꓕꓱ ꓟ ꓔꓯ ꓓꓳꓻˍ ꓟ ꓗꓪ ꓐꓰ ꓠꓽ ꓗꓷ ꓠ ꓗ, ꓡꓳ꓿ ꓓꓳꓻ ꓟꓽ ꓓꓻ ꓐꓰ ꓐꓯ ꓟ ꓠꓽ ꓟꓽ ꓥ꓿ ꓞꓳ ꓤ ꓖꓳ ꓓꓱꓽ ꓐꓱ ꓶ ꓞꓼ ꓛꓵꓻ ꓢꓯꓼ ꓞꓼ ꓐꓳ ꓐꓬꓽ ꓢꓯꓼ ꓣꓱꓽ ꓞ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓡꓳꓼ ꓠ ꓗꓪ ꓛꓲˍ ꓡꓰꓽ ꓣꓱꓽ ꓠ ꓔ ꓡꓳ꓿ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓜꓽ ꓔꓬ ꓟ ꓜꓻ ꓪꓳꓽ ꓒꓬꓽ꓾ ꓐꓰ ꓢꓲ, ꓢꓶꓽ ꓡꓳ ꓢꓶꓽ꓾ ꓠꓱ. ꓐꓯ ꓜꓽ ꓫꓵꓽ ꓜꓽ ꓙꓰꓽ ꓗꓪ ꓐꓰˍ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞ, ꓟ ꓞꓼ ꓛꓵꓻ ꓢꓯꓼ ꓞꓼ ꓐꓳ ꓐꓬꓽ ꓢꓯꓼ ꓔꓯ ꓟꓶ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓖꓳ ꓓꓱꓽ ꓗꓪ ꓪꓴꓽ ꓧꓶ ꓡˍ ꓕꓯ ꓛꓵˍ ꓟ ꓕꓲ ꓙꓰꓽ ꓙꓰꓽ ꓜꓽ ꓠꓲ, ꓫꓵ꓾ ꓓꓳꓻ ꓠꓲ, ꓫꓵ ꓡˍ ꓕꓯ ꓠꓬ꓾ ꓞꓼ ꓐꓳ ꓐꓬꓽ ꓮ ꓔꓲ. ꓤ ꓡꓰꓽ ꓧꓳꓽ ꓔ ꓟ ꓢꓲ, ꓢꓶꓽ ꓒꓬꓮꓪ‐ꓬꓲꓻ ꓓꓳꓻ ꓖꓶ꓾ ꓬꓲ ꓛꓵꓻ ꓬꓲꓻ ꓘꓴꓽ ꓗꓪˍ ꓟꓲ ꓞꓼ ꓐꓳ ꓐꓬꓽ ꓮ ꓔꓲ. ꓤ ꓡꓰꓽ ꓓꓯ,ˍ ꓟ ꓬꓲ ꓛꓵꓻ ꓬꓲꓻ ꓙꓳˍ ꓟ ꓥ ꓡꓳ꓾ ꓖꓳ ꓟ ꓔꓯ ꓓꓳꓻ ꓖꓶꓽ ꓐ ꓡˍ ꓡꓳ꓿ ꓝꓮꓲ ꓠꓬ ꓛꓽ ꓬꓰ (ꓡꓽ ꓚꓬ.) ꓔꓯ ꓥˍ ꓟꓲ ꓓꓳꓻ ꓖꓶ ꓐ ꓡˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓣꓳ ꓖꓳ ꓓꓱꓽ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓟ ꓬꓲꓻ ꓙꓬ ꓔꓯ ꓓꓳꓻ ꓐ ꓡˍ ꓟ ꓥ ꓡꓳ꓿
ꓣꓳ ꓞꓳ ꓙꓳ ꓢꓯ. ꓔꓬ ꓟ ꓦꓬꓼ ꓠꓬꓲ ꓗꓪ ꓞꓼ ꓛꓵꓻ ꓞꓼ ꓐꓳ ꓐꓬꓽ ꓮ ꓟꓬ, ꓣꓱꓽˍ ꓟ ꓔꓯ ꓤ ꓟꓳ ꓢꓲ ꓠꓬꓲ꓾ ꓧꓪꓽ ꓖꓳ ꓓꓱꓽ ꓔꓯ ꓔꓬ, ꓢꓻ ꓝꓲ ꓡꓯ꓿
