ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓶ ꓘꓳꓼ ꓠꓯ, ꓗꓪ ꓐꓰ ꓜ ꓚꓵ. ꓚꓵ. ꓙꓵ, ꓟ ꓥꓪꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 8ꓽ 1‐11 ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓴꓲ ꓙꓳ ꓟ ꓤ ꓟꓶ ꓤ ꓕꓲ ꓣꓳ ꓔꓯ ꓚꓬꓴ ꓙ ꓗꓷ ꓟ ꓚꓱ, ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓟ. ꓟꓲꓽ ꓚꓺ ꓔꓬ ꓟ ꓙꓵ, ꓕꓯ ꓒ‐ꓡꓲ‐ꓢꓷ ꓡ ꓞꓳ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓤ ꓠꓬꓲ ꓠ, ꓟ ꓝꓴꓲ ꓬꓰ ꓗꓷ ꓟ ꓤ ꓟꓶ ꓤ ꓕ꓾ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓔꓬ ꓗꓪ ꓧꓳꓽ ꓡ ꓡꓳ꓿ ꓒ‐ꓡꓲ‐ꓢꓷ ꓐꓴ ꓡꓰ ꓟ. ꓒ ꓕꓱ ꓤ ꓟꓶ ꓤ ꓠꓬ ꓦꓬꓽ ꓛꓳꓽ ꓬꓰ ꓔꓬ ꓟ ꓗꓪ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓙꓵꓽ ꓗ ꓗꓪ ꓟꓳ‐ꓫ ꓡꓰ ꓕꓱ ꓡꓱ ꓫꓵꓽ ꓔꓯ ꓭ. ꓛꓲ ꓡꓰ ꓡꓳ ꓢꓰꓼ ꓐꓰ ꓕꓵꓼ ꓪ ꓖꓶ ꓔ ꓡꓳ ꓐꓰ ꓐꓯ ꓗꓷ ꓡꓳ꓿

ꓖꓳ ꓕꓱ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓗꓳ ꓡꓳ ꓗꓪ ꓐꓰ ꓝꓴꓲ ꓟꓽ ꓙꓳ ꓢꓴ ꓕꓲ ꓣꓳ ꓙꓳ ꓐꓷ ꓠꓬ ꓬꓲ ꓔꓯ ꓧꓶ. ꓕꓯ ꓭ. ꓛꓲ ꓡꓰ ꓡꓳ ꓐꓰ ꓐꓯ ꓗꓷ ꓡꓳ꓿ ꓬꓲ ꓪ ꓠꓬ ꓚꓲ. ꓛꓬ ꓬꓰ ꓥꓳꓽ ꓡꓰ ꓝꓴꓲ ꓔꓯ ꓓꓵꓽ ꓙ ꓢꓲ ꓠꓬꓲ ꓡ ꓙꓰ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓤ ꓟꓶ ꓤ ꓕꓱ ꓡꓱ ꓖꓳ ꓑꓳ ꓝꓴꓲ ꓕꓽ ꓬꓰ ꓐꓰ ꓐꓯ ꓗꓷ ꓡꓳ꓿

ꓣꓳ ꓝꓴꓲ ꓙꓳ ꓟ ꓟꓲ ꓠꓯ ꓡ ꓞꓳ ꓐꓴ ꓠꓬ ꓢꓴ ꓛꓬ, ꓡꓰ ꓟ ꓝꓴꓲ ꓔꓯ ꓡꓰ ꓡꓳ. ꓟꓳ ꓗꓴ ꓢꓴ ꓐꓴ ꓥ ꓡꓳ꓿ ꓕꓱ ꓟ ꓠꓬ ꓢꓯꓼ ꓐ ꓟ ꓟꓲ ꓠꓯ ꓡ ꓞꓳ ꓥ ꓟ ꓪꓴ. ꓠꓬꓲ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓦꓻ ꓕꓲ ꓒꓳ, ꓡꓰ ꓟꓽ ꓧꓪ ꓖꓳꓽ ꓓꓱ ꓕꓲ ꓒꓳ, ꓗꓪ ꓐꓰ ꓟꓲ ꓚꓬꓴ ꓙ ꓢꓴ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓡꓳ. ꓟꓳ ꓗꓷ ꓟ ꓥ ꓡꓳ꓿

ꓝꓴꓲ ꓬꓰ ꓗꓷ ꓟ ꓤ ꓟꓶ ꓤ ꓦꓬꓽ ꓛꓳꓽ ꓧꓪ ꓟ ꓤ ꓟꓶ ꓤ ꓠꓬ ꓢꓲꓺ ꓒ ꓬꓰ‐ꓢꓴ ꓟ. ꓟꓲꓽ ꓚꓺ ꓔꓬ ꓟ ꓙꓵ, ꓔꓯ ꓕꓱ ꓝꓴꓲ ꓬꓰ ꓢꓴ ꓐꓴ ꓠꓬ ꓫꓵꓻ ꓠ, ꓗꓪ ꓝꓴꓲ ꓙꓳ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓢꓴ ꓔꓯ ꓚꓬꓴ ꓠ, ꓟ ꓬꓲ ꓚꓲ. ꓛꓬ ꓔꓯ ꓫꓵꓻ ꓙ ꓗꓷ ꓟ ꓢꓲꓺ ꓒ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓬꓰ ꓔꓬ ꓟ ꓤ ꓟꓶ ꓤ ꓔꓯ ꓮ ꓟꓶ ꓖꓳ ꓑꓳ ꓝꓴꓲ ꓔꓯ ꓕꓽ ꓬꓰ ꓠ, ꓟ ꓐꓯ ꓗꓷ ꓟ ꓥ ꓡꓳ꓿ ꓖꓳ ꓟ ꓠꓬ ꓬꓲ ꓠꓬ ꓝꓴꓲ ꓔꓯ ꓣꓳ ꓟꓲ ꓠꓯ ꓡ ꓞꓳ ꓔꓯ ꓤ ꓟꓳ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓪꓴ‐ꓢ ꓓꓵꓽ ꓙ ꓚꓱ, ꓐꓰ ꓟꓲ ꓠꓯ ꓡ ꓞꓳ ꓓꓵꓽ ꓙ ꓚꓱ, ꓠꓬ ꓮ ꓡꓰ ꓟꓲ ꓟꓽ ꓪ ꓟ ꓔꓯ ꓠꓬꓲ. ꓠꓬꓲ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓟꓲ ꓠꓯ ꓡ ꓞꓳ ꓐꓴ ꓠꓬ ꓝꓴꓲ ꓙꓳ ꓢꓴ ꓔꓯ ꓠꓲ, ꓜꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓠꓲ, ꓠꓵ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓡꓰ ꓚꓰꓼ ꓔ ꓟ ꓬꓲ ꓒꓬꓱꓼ ꓡꓰ ꓐꓰ ꓔ ꓟ ꓪꓴ. ꓠꓬꓲ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓗꓳ. ꓗꓷ ꓟ ꓙꓵ, ꓕꓯ ꓣꓳ ꓬꓰ ꓛꓬ, ꓡꓰ ꓬꓰ ꓥꓳꓽ ꓡꓰ ꓝꓴꓲ ꓔꓯ ꓤ ꓟꓳ ꓠ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓝꓴꓲ ꓠꓯ, ꓗꓪ ꓓꓵꓽ ꓡꓰ ꓗꓴ ꓟ ꓚꓱ, ꓔꓯ ꓡꓳ ꓗꓷ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓮ ꓟꓶ ꓗꓪ ꓐꓰ ꓝꓴꓲ ꓔꓯ ꓡꓳ. ꓗꓷ ꓓꓴ ꓬꓰ ꓡꓯ꓿ ꓢꓲꓺ ꓒ ꓐꓰ ꓕꓲ ꓪ ꓙ ꓫꓱ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿