ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓬ‐ꓟ ꓗꓴꓷꓼ ꓗꓪ ꓗꓳ. ꓡ ꓟ 3 ꓦ 28 ꓠꓬꓲ ꓟꓳꓼ ꓡꓳꓼ 1ꓽ50 ꓕꓯ 7.7 ꓬꓲ ꓢꓯꓼ ꓙꓳˍ ꓟ ꓟꓵꓽ ꓙꓴꓽ ꓕꓲ ꓟ ꓚꓵ, ꓗꓷ꓾ ꓟꓵꓽ ꓓꓵ ꓗꓷ ꓠꓬꓲ ꓫꓵꓻ ꓗꓷ ꓢꓴ ꓠꓬ 2000 ꓣꓳ ꓛꓲ ꓙꓳ ꓡ ꓔꓬ ꓟ ꓔꓯ ꓣꓳ ꓑ ꓙꓽ ꓪˍ ꓡꓰꓳ꓿ ꓕꓱ ꓟ ꓠꓬ ꓫꓵꓻ ꓟꓳ ꓖꓳ ꓓꓱꓽ ꓔꓯ ꓟꓳꓻ ꓗꓷ ꓟ ꓔꓯ ꓡꓰꓽ ꓵꓻ ꓔ ꓟ ꓥ ꓡꓳ꓿ ꓢꓷ. ꓢꓴ ꓐꓴ ꓕꓲ ꓐꓱ ꓡꓰ ꓐꓯˍ ꓟ ꓠꓬ ꓫꓵꓻ ꓢꓴ ꓠꓬ ꓬꓲ ꓫꓬ, ꓣꓳ ꓛꓲ ꓙꓳ ꓡ ꓓꓴ ꓥꓳ ꓐꓰ ꓐꓯ ꓔꓬ ꓖꓴˍ ꓡꓳ꓿

ꓟꓵꓽ ꓓꓵ ꓗꓷ ꓟ ꓟꓵꓽ ꓐꓴ ꓠꓬ ꓟ‐ꓓ‐ꓡꓰ,꓾ ꓢ‐ꓖꓮꓲ,꓾ ꓔꓮꓳꓽ‐ꓙꓲ,꓾ ꓲꓠ‐ꓡꓮꓬ꓾ ꓮꓴꓠꓖ‐ꓑꓮꓠ,꓾ ꓗꓬꓮꓴꓗ‐ꓒꓬꓴ꓾ ꓒꓬꓴ,꓾ ꓠꓰ‐ꓑꓬꓲ‐ꓓꓮꓪ꓾ ꓑꓬꓮꓪ‐ꓒꓪꓰ꓾ ꓝꓮꓲ ꓠꓱ. ꓐꓯ ꓡꓳ ꓒꓱ ꓮ ꓟꓬ, ꓗꓪ ꓟꓵꓽ ꓓꓵ ꓬꓯꓼ ꓗꓷ ꓠꓬꓲ ꓦꓲꓻ ꓮ ꓟꓬ, ꓐꓱꓽ ꓙꓰ ꓢꓲ ꓠꓬꓲ ꓞꓳ ꓤ ꓥˍ ꓟꓲ ꓮ ꓟꓬ ꓫꓵꓻ ꓢꓴ ꓫꓵꓻ꓾ ꓠꓻ ꓓꓴ ꓓꓴ ꓡꓰ ꓢꓴ ꓓꓴ ꓡꓰ ꓕꓱ ꓡꓱ ꓒꓬꓱꓼ ꓗꓷ ꓟ ꓥ ꓡꓳ꓿ ꓮ ꓘꓶ. ꓠꓲ, ꓟ ꓫ. ꓓꓴ ꓥꓳ꓿

ꓩꓼ ꓔ ꓟꓽ ꓐ ꓡ꓾ ꓧꓶ. ꓕꓯ ꓡꓰ ꓤ ꓟꓳ ꓔ ꓟꓽ ꓐ ꓡ ꓟ ꓫꓵꓽ ꓪꓴ ꓕꓲ ꓟ ꓥ ꓟ ꓟꓵꓽ ꓓꓵ ꓟꓵꓽ ꓙꓴꓽ ꓚꓵ,ˍ ꓟ ꓑꓶ. ꓓꓴ ꓠꓻ ꓓꓴ ꓓꓴ ꓡꓰˍ ꓟ ꓐꓰ ꓢꓯꓼ ꓟꓬ ꓞꓷ, ꓗꓷˍ ꓟ ꓠꓬ꓾ ꓐꓱꓽ ꓞꓰꓻ ꓡ ꓘꓪꓼ ꓞꓰꓻ ꓡ ꓟ ꓚꓬ ꓢꓲ. ꓶꓻ ꓤ ꓑꓶ. ꓓꓴ ꓖꓳ ꓓꓱꓽ ꓗꓪ ꓠꓻ ꓡꓰˍ ꓟ ꓑꓶ. ꓓꓴ ꓥ ꓡꓳ꓿ ꓟꓵꓽ ꓓꓵ ꓔꓬ ꓕꓯ ꓕꓶꓻ ꓕꓶꓻ ꓡꓰꓽ ꓟꓽ ꓫꓬ ꓔ ꓟ ꓦꓲꓻ ꓘꓴꓽ ꓠꓯꓸꓼ ꓗꓪ ꓔꓬ ꓢꓴ ꓠꓬ ꓟꓬꓽ ꓠꓬꓲ ꓠꓻ ꓡꓰˍ ꓟ ꓥ ꓡꓳ꓿ ꓟꓵꓽ ꓓꓵ ꓟꓵꓽ ꓙꓴꓽ ꓚꓵ,ˍ ꓕꓯ ꓪꓳꓽ ꓔꓳ ꓘꓳ, ꓡꓰˍ ꓟ꓾ ꓕꓯˍ ꓟ ꓕꓲ ꓫꓵꓽ ꓫꓵꓽ ꓐꓰ ꓖꓳ ꓓꓱꓽ ꓗꓪ ꓗ. ꓬꓯꓼ ꓡꓰ ꓗ. ꓙ ꓙꓰˍ ꓟ꓾ ꓗꓴ, ꓙꓲ ꓠꓻ ꓡꓰˍ ꓟ꓾ ꓮ ꓔꓳ. ꓐꓬˍ ꓟ꓾ ꓪꓴ. ꓓꓵ ꓗꓪ ꓬꓯꓼ ꓡꓰ ꓢꓲ ꓪꓴ. ꓠꓶ. ꓔꓯ ꓐꓬ ꓡꓰ ꓝꓲˍ ꓟ꓾ ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓡꓳ꓿ ꓟꓵꓽ ꓙꓴꓽ ꓚꓵ,ˍ ꓟ ꓑꓶ. ꓓꓴ ꓝ. ꓢꓲ ꓒꓬꓱꓼ ꓡˍ ꓟ ꓠꓬ ꓬꓲ ꓙꓬ ꓙꓵꓽ ꓬꓲꓻ ꓙꓬ ꓟꓶ. ꓡˍ ꓟ ꓪꓴ. ꓠꓬꓲ ꓬꓲꓻ ꓙꓬ ꓛꓬ.ˍ ꓟ꓾ ꓬꓲꓻ ꓙꓬ ꓘꓴꓽ ꓗꓪ ꓟꓶ ꓤ ꓔꓬ ꓪˍ ꓟ ꓑꓶ. ꓓꓴ ꓖꓳꓽ ꓓꓱꓽ ꓞꓻ ꓢꓯꓼ ꓞꓰꓻ ꓡꓰ ꓬꓯꓼ ꓡꓰˍ ꓟ꓾ ꓓꓳꓼ ꓙꓳˍ ꓟ ꓕꓲ ꓫꓵꓽ ꓫꓵꓽ ꓟꓽ ꓫꓬ ꓟ ꓕꓲꓽ ꓙꓰꓽ ꓙꓰꓽ ꓐꓰ ꓕꓲꓺ ꓪ ꓔꓳ, ꓜꓳꓽ ꓪˍ ꓟ ꓑꓶ. ꓓꓴ ꓢꓯꓼ ꓦ ꓚꓱ, ꓔꓯ ꓟꓳ. ꓠꓻ ꓒꓬꓱꓼ ꓡˍ ꓟ ꓔꓯ ꓤ ꓟꓳ ꓠ ꓗ, ꓡꓳ꓿

ꓟꓵꓽ ꓙꓴꓽ ꓚꓵ, ꓗꓷ ꓖꓴ ꓗꓪ ꓠꓬ ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓡꓳ꓿

ꓠꓻ ꓓꓴ ꓑ ꓗꓪ ꓐꓶꓽ ꓓꓲꓻ ꓓꓵꓽ ꓡꓰˍ ꓟ꓾ (ꓠꓻ ꓟꓽ ꓫꓬ ꓗꓷ ꓕꓯ ꓠꓽ ꓫꓵꓻ ꓡꓰˍ ꓗꓪ ꓛꓲ ꓗꓷ ꓡꓰˍ ꓡꓳ)

ꓟꓵꓽ ꓓꓵ ꓗꓷ ꓟ ꓑꓶ. ꓓꓴ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓠꓬ  ꓠꓻ ꓓꓴ ꓑ ꓗꓪ ꓐꓶꓽ ꓓꓲꓻ ꓟꓽ ꓓꓵ ꓡꓰ ꓠ ꓤ ꓟꓳ ꓠ ꓔ ꓡꓳ꓿ ꓠꓻ ꓫꓬ, ꓟꓽ ꓟꓶ ꓟ꓾ ꓝꓮꓲ ꓟꓽ ꓫꓬ ꓗꓷ ꓡꓰ ꓟ ꓬꓲ ꓫꓵꓽ ꓬꓲ ꓙꓰꓽ꓾ ꓐꓶꓽ ꓓꓲꓻ ꓓꓵˍ ꓟ ꓬꓲꓻ ꓙꓬ꓾ ꓑꓱ. ꓛꓵꓽ ꓕꓱ ꓡꓱ ꓫꓵꓽ ꓔꓯ ꓕꓲꓺ ꓪ ꓡꓰ ꓠꓬꓲ ꓠꓻ ꓓꓴ ꓑ ꓗꓪ ꓐꓶꓽ ꓓꓲꓻ ꓓꓵꓽ ꓡꓰ ꓗꓴ.ˍ ꓡꓳ꓿ ꓬꓲ ꓑ ꓗꓪ ꓐꓶꓽ ꓓꓲꓻ ꓓꓵꓽ ꓡˍ ꓟ ꓪꓴ. ꓠꓬꓲ ꓬꓲ ꓑ ꓟꓲ ꓡꓰ ꓟꓽ ꓓꓻ ꓟ꓾ ꓫꓵꓽ ꓗꓪ ꓬꓲ ꓓꓳꓼ ꓒꓬꓱꓼˍ ꓟ꓾ ꓮ ꓘꓶ. ꓢ ꓡꓰˍ ꓕꓯ ꓛꓲ ꓒꓯ, ꓡꓯꓽ ꓒꓯ, ꓓꓶ ꓪ ꓡꓰˍ ꓗꓪ ꓛꓲ ꓗꓷ ꓡꓰ ꓗꓴ.ˍ ꓡꓳ꓿ ꓬꓲ ꓑ ꓗꓪ ꓐꓶꓽ ꓓꓲꓻ ꓓꓵꓽ ꓡꓰ ꓟ ꓪꓴ. ꓠꓬꓲ ꓟꓰ,‐ꓘꓮꓲꓽ‐ꓑꓳ, ꓠꓬ ꓟꓬꓽ ꓠꓬꓲ ꓒꓬꓱꓼ ꓡꓰ ꓗꓴ.ˍ ꓡꓳ ꓐꓰ ꓢꓷ. ꓪ ꓡꓳ꓿ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓠꓬ ꓟꓰ,‐ꓘꓮꓲꓽ‐ꓑꓳ, ꓐꓶꓽ ꓓꓲꓻ ꓗꓽ ꓠꓯꓻ ꓞꓲꓼ ꓗ. ꓠ ꓔ ꓡꓳ꓾ ꓐꓰ ꓢꓷ. ꓪ ꓡꓳ꓿

ꓟꓵꓽ ꓓꓵ ꓗꓷ ꓗ ꓠꓯ. ꓚꓲ. ꓠꓷꓼ ꓗꓴ.ˍ ꓟ ꓠꓻ ꓥˍ ꓟꓲ ꓒꓬꓱꓼ ꓡˍ ꓡꓳ꓿

ꓬꓲꓻ ꓙꓬ ꓐꓱꓽ ꓖꓶˍ ꓟ ꓚꓱ, ꓐꓬ ꓡꓰˍ ꓟ꓾ ꓫꓬˍ ꓟ ꓬꓲꓻ ꓙꓬ ꓟꓽ ꓟꓶ ꓟ꓾ ꓬꓲꓻ ꓙꓬ ꓚꓰ ꓐꓬ ꓡꓰˍ ꓟ ꓑꓶ. ꓓꓴ ꓚꓲ. ꓠꓷꓼ ꓗꓴ.ˍ ꓟ ꓠꓻ ꓥˍ ꓟꓲ ꓒꓬꓱꓼ ꓡ ꓗꓴ.ˍ ꓡꓳ꓿ ꓬꓲꓻ ꓙꓬ ꓗꓪ ꓐꓰ ꓚꓲ. ꓠꓷꓼˍ ꓟ ꓦꓰꓽ ꓛꓲꓽ ꓧꓳ, ꓠꓻ꓾ ꓫꓵꓽ ꓒꓬ. ꓳ ꓢꓲ ꓒꓬꓱꓽ ꓧꓪꓼ ꓡꓰˍ ꓟ ꓠꓻ꓾ ꓕꓱ ꓡꓱ ꓫꓵꓽ ꓔꓯ ꓤ ꓟꓳ ꓠ ꓔ ꓡꓳ꓿ ꓦꓲꓻ ꓐꓬ ꓡꓰ ꓢꓲ ꓠꓬꓲ꓾ ꓔꓬ ꓖꓴ ꓟꓽ ꓡꓳꓼ ꓟ ꓐꓰ ꓠꓱ. ꓐꓯ ꓕꓲꓽ ꓖ ꓗꓪ ꓚꓵ. ꓙꓰ ꓪ ꓡꓰ ꓟ ꓑꓶ. ꓓꓴ ꓞꓳ ꓤ ꓮ ꓟꓬ, ꓔꓬ, ꓐꓲ ꓡꓰ ꓢꓲ ꓟꓲꓽ ꓦꓲ ꓗꓪ ꓐꓰ ꓕꓲꓽ ꓝ. ꓚꓲ. ꓠꓷꓼ ꓡˍ ꓟ ꓟꓲꓽ ꓦꓲ ꓚꓱ, ꓔꓯ ꓟꓳ. ꓠꓻ ꓥˍ ꓟꓲ ꓒꓬꓱꓼ ꓡ ꓗꓴ.ˍ ꓡꓳ꓿ ꓖꓳ ꓡꓱ ꓠꓬꓲ ꓕꓱ ꓟ ꓐꓱ ꓶ ꓥ ꓟꓲ ꓠꓯꓻ ꓞꓲꓼ ꓗ. ꓠ ꓔ ꓡꓳ ꓐꓰ ꓢꓷ. ꓪ ꓡꓳ꓿

ꓟꓵꓽ ꓓꓵ ꓟꓵꓽ ꓙꓴꓽ ꓚꓵ, ꓗꓷ ꓗ ꓠꓯ. ꓟꓬꓽ ꓠꓬꓲ ꓒꓬꓱꓼ ꓡ ꓗꓴ.ˍ ꓟ ꓠꓻ ꓐꓴ ꓠꓬ꓾

*ꓬꓲꓻ ꓙꓬ ꓟꓽ ꓫꓬ ꓟ ꓑꓶ. ꓓꓴ ꓒꓬꓱꓼ ꓡˍ ꓟ ꓦꓰꓽ ꓛꓲꓽ ꓐꓬ ꓦꓰꓽ ꓛꓲꓽ ꓧꓳ, ꓠꓻ꓾

*ꓬꓲ ꓒꓶꓽ ꓑꓶ. ꓓꓴ ꓒꓬꓱꓼ ꓡˍ ꓟ ꓢꓯꓼ ꓦ ꓚꓱ, ꓐꓰ ꓐꓵꓼ ꓟꓵ ꓳ ꓠꓻ꓾

*ꓐꓶꓽ ꓓꓲꓻ ꓤ ꓑꓶ. ꓓꓴꓴ ꓒꓬꓱꓼ ꓡˍ ꓟ ꓠꓻ ꓧꓶ ꓐꓰ ꓠꓱ. ꓐꓯ ꓠꓻ꓾

*ꓟꓰ,‐ꓘꓮꓲ‐ꓑꓳ, ꓓꓵꓽ ꓡꓰˍ ꓟ꓾

*ꓧꓪꓽ ꓗꓴ, ꓙꓲꓽ ꓗꓪ ꓒꓬꓱꓼ ꓡˍ ꓟ ꓠꓻ꓾

*ꓫꓵꓽ ꓒꓬ. ꓳ ꓢꓲ ꓒꓬꓱꓽ ꓧꓪꓼ ꓡꓰˍ ꓟ ꓠꓻ꓾

*ꓠꓲ, ꓟ ꓔꓬ ꓘꓶꓻ ꓡꓶꓽ ꓢꓲ ꓠꓬꓲ ꓕꓲ ꓫꓵꓽ ꓫꓵꓽ ꓔꓯ ꓙꓳꓺˍ ꓟ꓾ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓗꓴ.ˍ ꓡꓳ꓿

ꓝꓮꓲ ꓫꓵꓽ ꓓꓯꓻ ꓠꓻ꓾ ꓢꓰ,‐ꓛꓬꓳ ꓠꓻ꓾ ꓠꓲ, ꓟ ꓠꓻ꓾ ꓔꓐ ꓠꓻ ꓕꓱ ꓡꓱ ꓫꓵꓽ ꓠꓻ ꓙꓳ ꓢꓴ ꓐꓴ ꓥˍ ꓟꓲ ꓟꓵꓽ ꓓꓵ ꓟꓵꓽ ꓙꓴꓽ ꓚꓵ, ꓗꓷ ꓗ ꓠꓯ. ꓕꓯ ꓪ ꓜꓲ ꓠꓻ ꓡ ꓗꓴ.ˍ ꓟ ꓑꓶ. ꓓꓴ꓾ ꓫꓵꓽ ꓪꓴ ꓕꓱ ꓟ ꓒꓬꓱꓼ ꓗꓷ ꓗ ꓠꓯ. ꓚꓲ. ꓛꓬ ꓠꓻ ꓔꓯ ꓟꓬꓽ ꓠꓬꓲ ꓠꓯꓻ ꓞꓲꓼ ꓫꓬ, ꓠ ꓔ ꓡꓳ꓾ ꓐꓰ ꓢꓷ. ꓪ ꓡꓳ꓿

ꓬꓲ ꓢꓯꓼ ꓪꓽ ꓠꓬꓲˍ ꓟ ꓟꓵꓽ ꓓꓵ ꓗꓷ ꓟꓵꓽ ꓙꓴꓽ ꓚꓵ, ꓗꓷ ꓟ ꓑꓶ. ꓓꓴ ꓠꓻ ꓫꓬ, ꓖꓶ ꓔꓬ ꓟ ꓠꓯꓻ ꓞꓲꓼ ꓦꓲ ꓐꓬ ꓡꓰˍ ꓟ꓾ ꓠꓻ ꓫꓬ, ꓖꓶ ꓢꓴ ꓐꓴ ꓠꓬ ꓟꓵꓽ ꓙꓴꓽ ꓚꓵ, ꓗꓷ ꓟ ꓪꓴ. ꓠꓬꓲ ꓠꓻ ꓡꓰˍ ꓟ꓾ ꓙꓻ ꓖꓴ ꓐꓬ ꓡꓰ ꓟ ꓐꓰ ꓦꓲꓻ ꓐꓬ ꓡꓰˍ ꓟ ꓑꓶ. ꓓꓴ ꓞꓳ ꓠꓻ ꓟꓬꓽ ꓡ ꓢꓲ꓾ ꓠꓯꓻ ꓞꓲꓼ ꓟꓽ ꓡꓳꓼ ꓟ ꓪꓴ. ꓠꓬꓲ꓾ ꓞꓳ ꓤ ꓔꓬ, ꓢꓻ ꓚꓱ, ꓔꓯ ꓟꓬꓽ ꓠꓬꓲ ꓢꓯꓼ ꓐꓽ ꓡꓰ ꓝꓲˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓟꓵꓽ ꓓꓵ ꓗꓷ ꓖꓴ꓾ ꓟꓵꓽ ꓙꓴꓽ ꓚꓵ, ꓖꓴ ꓗꓪ ꓔꓬ ꓢꓴ ꓐꓴ ꓠꓬ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓔꓯ ꓟꓬꓽ ꓠꓬꓲ ꓗꓪꓼ ꓫꓵꓼ ꓠ ꓔ ꓡꓳ꓾ ꓐꓰ ꓠꓯꓻ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓡꓳ꓿