ꓐꓲ ꓜꓲꓼˍ ꓟ ꓔꓬ, ꓢꓻ ꓚꓱ, ꓐꓯˍ ꓟ ꓠꓬ꓾
ꓔꓬ, ꓢꓻ ꓚꓱ, ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ ꓮ ꓟꓬ, ꓚꓱ, ꓐꓯ ꓔꓬ ꓖꓴˍ ꓡꓳ꓿ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓜꓴ (WHO) ꓡꓰ ꓐꓯˍ ꓟ ꓠꓬ꓾ ꓖꓳ ꓓꓱꓽ ꓗꓪ ꓠꓻ ꓟꓽ ꓙꓳ ꓕꓲꓽ ꓖꓼ ꓔꓬ, ꓢꓻˍ ꓡꓳ ꓐꓰ ꓐꓯ ꓟꓽ ꓐ ꓡ꓿ ꓡ ꓞꓳ ꓕꓲ ꓣꓳ ꓔꓬ, ꓢꓻ ꓐꓯˍ ꓟ ꓠꓬ ꓖꓳ ꓓꓱꓽ ꓕꓲ ꓒꓳ, ꓔꓯ ꓟꓳ.꓾ ꓠꓲ, ꓟ ꓕꓲ ꓒꓳ, ꓔꓯ ꓟꓳ. ꓡꓰꓽ ꓟꓽ ꓞꓲꓺ ꓡ ꓞꓳ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳˍ ꓟ ꓗꓪ ꓔꓬ, ꓢꓻˍ ꓟ꓾ (ꓟꓬꓽ ꓠꓬꓲ ꓠꓬ꓾ ꓕꓲ ꓣꓳ ꓔꓵꓸꓼ ꓟꓽ ꓔꓬ, ꓔꓬ, ꓗꓳ ꓡꓳ ꓗꓪ ꓔꓬ ꓢꓴ ꓐꓴ ꓐꓰ ꓫ. ꓕꓱ ꓡꓯ ꓘꓳ ꓙꓻ ꓡꓯ ꓘꓳ ꓓꓴ) ꓙꓳˍ ꓕꓯ ꓡꓰꓽ ꓚꓵ ꓚꓵ ꓔꓬ, ꓢꓻˍ ꓡꓳ ꓐꓰ ꓐꓯ ꓐ ꓡˍ ꓡꓳ꓾ ꓐꓯˍ ꓡꓳ꓿
ꓖꓳ ꓡꓱ ꓠꓬꓲ ꓐꓲ ꓜꓲꓼˍ ꓟ ꓔꓬ, ꓢꓻ ꓚꓱ, ꓐꓯˍ ꓟ ꓮ ꓫꓵꓽ ꓥ ꓡ꓾ ꓐꓯ ꓟ ꓔꓯ ꓝ. ꓢꓲ ꓢꓳ ꓣꓴ ꓓꓴ ꓬꓰ ꓡꓯ꓿
ꓔꓬ, ꓢꓻ ꓚꓱ, ꓐꓰ ꓐꓯ ꓗꓷ ꓠꓬ꓾ ꓣꓳ ꓞꓳ ꓤ ꓮ ꓟꓬ, ꓢꓷ. ꓔ ꓟ ꓠꓬ ꓖꓳ ꓓꓱꓽ ꓐꓰ ꓠꓲ, ꓟ ꓔꓬ, ꓢꓻˍ ꓟ ꓥ ꓡꓳ꓿ ꓐꓲ ꓜꓲꓼˍ ꓟ ꓔꓬ, ꓢꓻ ꓚꓱ, ꓐꓱ ꓶ ꓠꓬ ꓕꓱ ꓠꓬꓲꓽ ꓙꓰꓽˍ ꓡꓰꓽ ꓟꓽ ꓞꓲꓺ꓾ ꓠꓲ, ꓟ ꓓꓵꓽ ꓙꓽ ꓚꓱ,꓾ ꓢꓷ. ꓠꓲ, ꓙꓽ ꓜꓲꓼ ꓚꓱ,꓾ ꓒꓴ ꓫꓵ ꓔꓯ ꓟꓳ. ꓗꓴ. ꓙꓲꓽ ꓙꓳˍ ꓟ ꓚꓱ,꓾ ꓚꓲ. ꓛꓬ ꓔꓬ ꓟ ꓟꓵꓽ ꓐꓰ ꓟꓬꓱꓽ ꓬꓰ ꓖꓴ ꓗꓪ ꓛꓲ ꓔꓬ, ꓢꓻ ꓠ ꓗ, ꓡꓳ꓾ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓣꓳ ꓖꓳ ꓓꓱꓽ ꓔꓬ, ꓢꓻ ꓚꓱ, ꓐꓰ ꓝ. ꓓ, ꓟ꓾ ꓗꓴ. ꓙꓲꓽ ꓙꓳ ꓔꓬ, ꓟ ꓚꓱ, ꓥ ꓡꓳ꓿
ꓔꓯ ꓥꓳꓽ ꓐꓯ ꓪˍ ꓠꓬ꓾ ꓣꓳ ꓢꓷ. ꓠꓲ, ꓙꓽ ꓜꓲꓼ ꓚꓱ, ꓔꓬ, ꓢꓻ ꓕꓯ ꓡꓰꓽ ꓖꓳ ꓓꓱꓽ ꓗꓪ ꓔꓬ, ꓟꓽ ꓢꓻ ꓕꓯ ꓠꓻ ꓡˍ ꓕꓯ ꓠꓯ ꓞꓲꓼ ꓟ. ꓒ ꓮ ꓡꓲ ꓕꓲ ꓣꓳ ꓔꓯ ꓟꓳ. ꓖꓶ ꓠ ꓗ, ꓟ꓾ ꓮ ꓡꓲ ꓫꓵꓽ ꓚꓱ, ꓔꓯ ꓤ ꓟꓳ ꓠ ꓔ ꓟ ꓔꓯ ꓢꓷ. ꓐ ꓡˍ ꓟ ꓥ ꓡꓳ꓿ ꓚꓲ. ꓛꓬ ꓔꓯ ꓒꓴ ꓙꓳ ꓔꓬ ꓕꓯ ꓡꓰꓽ ꓔꓬ, ꓢꓻ ꓡ ꓓꓴ ꓐꓱ ꓶ ꓠꓯꓻ ꓞꓲꓼ ꓫꓬ, ꓡꓳꓼ ꓡˍ ꓟ ꓥ ꓡꓳ꓿
ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓔꓯ ꓐꓯˍ ꓕꓯ꓾ ꓣꓳ ꓔꓯ ꓠꓻ ꓟꓽ ꓙꓳ ꓕꓯ ꓠꓽ ꓖꓳ ꓓꓱꓽ ꓔꓬ, ꓢꓻˍ ꓟ ꓥ ꓡꓳ꓾ ꓐꓰ ꓐꓯ ꓐ ꓡˍ ꓡꓳ꓿ ꓔꓬ, ꓢꓻ ꓕꓯ ꓡꓰꓽ ꓣꓳ ꓙꓰ ꓠꓲ, ꓫꓵˍ ꓟ ꓗꓪ ꓙꓰ ꓐ ꓡ꓾ ꓬꓰ ꓠꓲ, ꓫꓵˍ ꓟ ꓔꓯ ꓬꓰ ꓐ ꓡ꓾ ꓜꓽ ꓠꓲ, ꓫꓵˍ ꓟ ꓔꓯˍ ꓟꓲ ꓜꓽ ꓐ ꓡˍ ꓟ ꓥ ꓡꓳ꓿ ꓕꓱ ꓟ ꓔꓯ ꓣꓳ ꓮ ꓙꓵꓽ ꓢꓷ. ꓔ ꓟ ꓥ ꓡꓳ꓿ ꓠꓻ ꓔꓬ ꓒꓬꓽ ꓔꓬ ꓕꓯ ꓮ ꓫꓵꓽ ꓔꓯ ꓥˍ ꓟꓲ ꓬꓰ ꓟꓽ ꓐ ꓡꓺꓳ꓿
ꓕꓱ ꓡꓱ ꓠꓻ ꓟꓽ ꓙꓳ꓾ ꓔꓬ, ꓢꓻ ꓠ, ꓟ ꓐꓱ ꓶ ꓠꓬ ꓠꓻ ꓡˍ ꓕꓯ ꓡꓰꓽ ꓠꓻ ꓫꓬ, ꓟ ꓟꓽ ꓥ ꓥ꓾ ꓟꓽ ꓒꓬꓱꓼ ꓡ ꓕꓯ ꓡꓰ ꓠꓻ ꓒꓬꓱꓼ ꓡ ꓚꓱ, ꓔꓯ ꓤ ꓟꓳ ꓠ ꓔ ꓟ ꓥ ꓡꓳ꓿ ꓠꓯꓻ ꓞꓲꓼ ꓟ. ꓒ ꓟ. ꓟ ꓐꓴ ꓡꓰ ꓐꓯ ꓖꓶ ꓡˍ ꓟ ꓚꓱ, ꓔꓯ ꓛꓳ ꓫꓱꓽ ꓠ ꓗ, ꓡꓳ꓿ ꓠꓻ ꓒꓬꓽ ꓡˍ ꓕꓯ ꓥ ꓟꓲ ꓟꓬꓽ ꓠꓬꓲ ꓠꓻ ꓡˍ ꓗꓪ ꓛꓲꓺ ꓦꓵ ꓔ ꓟ ꓟꓽ ꓬꓰ ꓬꓰ꓾ ꓠꓻ ꓫꓬ, ꓠ ꓗ, ꓡꓳ꓾ ꓐꓯ ꓟ ꓔꓯ ꓥˍ ꓟꓲ ꓟꓽ ꓛꓲ ꓟꓽ ꓡꓯꓼ ꓡꓰ ꓣꓳ ꓮ ꓙꓵꓽ ꓢꓷ. ꓔ ꓟ ꓥ ꓡꓳ꓿
ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓗꓪ ꓔꓬ, ꓢꓻ ꓓꓴ ꓐꓱ ꓶ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓚꓵ. ꓬꓲꓻ ꓓꓳ ꓡ ꓠ ꓬꓰˍ ꓟ꓾ ꓢꓯꓼ ꓙꓳ ꓡ ꓠ ꓜꓽ ꓓꓳˍ ꓟ꓾ ꓐꓰ ꓣꓳ ꓔꓯ ꓠꓻ ꓒꓬꓱꓼ ꓡ ꓝꓲˍ ꓟ꓾ ꓠꓻ ꓓꓴ ꓓꓴ ꓡꓰ ꓝꓲˍ ꓟ ꓗꓪ ꓐꓰ ꓤ ꓟꓳˍ ꓟ꓾ ꓕꓱ ꓡꓱ ꓬꓰ ꓠ ꓔˍ ꓡꓳ꓿
ꓔꓯ ꓥꓳꓽ꓾ ꓣꓳ ꓟꓬꓱꓽ ꓬꓰ ꓔꓬ ꓕꓯ ꓠꓻ ꓓꓴ ꓟꓽ ꓓꓴ ꓡꓰ ꓠ, ꓟ ꓐꓱ ꓶ ꓤ ꓟꓳ ꓢꓲ ꓟꓬꓱꓽ ꓬꓰˍ ꓟ꓾ ꓛꓵꓼ ꓡꓵ ꓙꓲꓻ ꓒꓶꓽ ꓐꓰ ꓬꓲꓼ ꓫꓵꓽ ꓬꓲꓼ ꓙꓰꓽ ꓔꓯ ꓟꓽ ꓣꓱꓽ ꓟ꓾ ꓖꓳ ꓓꓱꓽ ꓗꓪ ꓠꓻ ꓟꓽ ꓓꓵꓽ ꓡ ꓠ ꓠꓯꓻ ꓞꓲꓼ ꓗ.ˍ ꓟ ꓕꓱ ꓡꓱ ꓫꓵꓽ ꓬꓰ ꓠ ꓔ ꓟ ꓥ ꓡꓳ꓿
ꓝꓮꓲ ꓖꓳ ꓓꓱꓽ ꓔꓬ, ꓢꓻ ꓓꓴ ꓠꓬ ꓣꓳ ꓠꓲ, ꓟ ꓔꓬ, ꓢꓻˍ ꓟ ꓐꓰˍ ꓟꓲ ꓝ. ꓡꓯ ꓘꓳ ꓓ, ꓟ ꓥ ꓡꓳ꓿ ꓔꓬ, ꓟꓽ ꓢꓻ ꓢꓴ꓾ ꓠꓻ ꓔꓬ, ꓢꓴ ꓠꓬ ꓠꓲ, ꓟ ꓫ. ꓠꓲ, ꓟ ꓙꓬ ꓡꓰ ꓢꓻˍ ꓡꓳ꓿ ꓠꓲ, ꓟ ꓫ. ꓠꓲ, ꓟ ꓙꓬ ꓔꓬ ꓢꓴ ꓥˍ ꓟꓲ ꓬꓲꓼ ꓫꓵꓽ ꓬꓲꓼ ꓙꓰꓽ ꓣꓱꓽ ꓡˍ ꓟ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓽ ꓗꓪꓼ ꓫꓵꓼ ꓟ ꓑꓶ. ꓓꓴ ꓔꓬ, ꓟꓽ ꓢꓻ ꓗꓷ ꓡ ꓗꓴ.ˍ ꓡꓳ꓿
ꓠꓲ, ꓟ ꓔꓬ, ꓢꓻ ꓓꓴ ꓔꓯ ꓐꓯˍ ꓕꓯ ꓞꓳ ꓤ ꓕꓲ ꓣꓳ ꓮ ꓕꓯ ꓟꓲ ꓗ, ꓛꓲꓽ ꓔꓬ ꓠ ꓗ, ꓡꓳ ꓐꓰ ꓐꓯˍ ꓟ ꓠꓽ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓬꓲ ꓠꓲ, ꓟ ꓗꓪ ꓒꓬꓱꓼ ꓔꓬ ꓟ꓾ ꓬꓲ ꓗꓳ ꓡꓳ ꓗꓪ ꓔꓬ ꓢꓴ ꓐꓴ ꓐꓰ ꓙꓻ ꓡꓯ ꓘꓳ ꓔꓬ, ꓟ꓾ ꓕꓱ ꓠꓬꓲꓽ ꓙꓰꓽ ꓡꓱꓸꓼ ꓗꓪ ꓠꓽ ꓔꓬ, ꓢꓻ ꓠ ꓗ, ꓡꓳ꓿
ꓞꓳ ꓤ ꓕꓲ ꓣꓳ ꓠꓬ ꓠꓲ, ꓟ ꓙꓬ ꓠꓻ ꓟꓽ ꓙꓳ ꓕꓲꓽ ꓖꓼ꓾ ꓠꓲ, ꓟ ꓓꓵꓽ ꓙꓽ ꓘꓶꓻ ꓡꓶꓽ ꓓꓴ ꓠꓲ, ꓟ ꓢꓴꓼ ꓢꓼ ꓓꓴ ꓟꓽ ꓙꓳ ꓕꓲꓽ ꓖꓼ ꓐꓰ꓾ ꓠꓲ, ꓟ ꓔꓬ, ꓢꓻˍ ꓡꓳ ꓐꓰ ꓐꓯ ꓟꓽ ꓐ ꓡ꓿
ꓬꓲ ꓠꓬ꓾ ꓚꓲ. ꓛꓬ ꓤꓶꓻ ꓔꓯ ꓚꓲ. ꓛꓬ ꓘꓳ ꓣꓴ ꓢꓲ ꓠꓲ, ꓡꓱꓻ ꓗꓴ. ꓠ ꓗ, ꓡꓳ꓿ ꓫ. ꓓꓴ ꓔꓳ, ꓜꓳꓽ ꓡˍ ꓕꓯ ꓫꓵꓽ ꓪꓴꓻ ꓖꓳ ꓟ ꓔꓯ ꓔꓱ,ˍ ꓟ ꓚꓱ, ꓗꓪ ꓐꓰ ꓗꓳ. ꓘꓳ ꓙꓰ ꓐ ꓡ ꓠ ꓗ, ꓡꓳ꓿ ꓟꓬꓱꓽ ꓬꓰ ꓖꓴ ꓐꓰ ꓦꓲꓻ ꓘꓴꓽ ꓠꓯꓸꓼ ꓗꓪ ꓬꓲ ꓖꓻ ꓙꓳ ꓙꓳ ꓡꓰꓽ ꓔꓬ, ꓢꓲ ꓠꓬꓲ ꓠꓲ, ꓟ ꓗ, ꓛꓲꓽ ꓓꓴ ꓔꓯ ꓧꓪ ꓗꓴ. ꓠ ꓗ, ꓡꓳ꓿ ꓠꓲ, ꓪꓴꓽ ꓠꓲ, ꓙꓳ ꓠ ꓗ, ꓡꓳ꓿ ꓚꓲ. ꓛꓬ ꓬꓰ ꓐ ꓡˍ ꓟ ꓔꓯ ꓢꓷ. ꓠ ꓗ, ꓡꓳ꓿ ꓕꓲ ꓐꓱ ꓠꓬ ꓚꓲ. ꓛꓬ ꓬꓰ ꓐ ꓡˍ ꓟ ꓕꓯꓽ ꓢꓲ ꓬꓰ ꓠꓲ, ꓫꓵ ꓢꓲ ꓠꓬꓲ꓾ ꓟꓽ ꓧꓪ. ꓡꓰ ꓕꓯ ꓧꓪ. ꓡꓰ ꓢꓴ ꓔꓯ ꓡꓳ. ꓢꓲ ꓠꓲ, ꓟ ꓙꓬ ꓡꓰ ꓗꓴ.ˍ ꓟ ꓑꓶ. ꓓꓴ ꓥ ꓡꓳ꓿
ꓠꓲ, ꓟ ꓕꓲ ꓒꓳ, ꓐꓰ ꓧꓪꓽ ꓖꓳ ꓓꓱꓽ ꓕꓲꓽ ꓒꓳ, ꓔꓬ, ꓢꓻ ꓓꓴ ꓚꓱ, ꓠꓬ ꓝ. ꓓ, ꓟ ꓑꓶ. ꓓꓴ ꓕꓱ ꓠꓬꓲꓽ ꓟ ꓡꓱꓸꓼ ꓔꓯ ꓔꓲꓺ ꓟꓴ. ꓣꓱꓽ ꓬꓰ ꓠ ꓗ, ꓡꓳ꓿
ꓣꓳ ꓠꓲ, ꓟ ꓐꓰ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓛꓳ ꓫꓱꓽ ꓠ ꓗ, ꓟ ꓚꓱ, ꓔꓯ ꓠꓬ ꓮꓽ ꓟˍ ꓟꓲ ꓢꓷ. ꓔ ꓟ ꓥ ꓡꓳ꓿ ꓡꓯꓼ ꓕꓲꓺ ꓬꓰ ꓐ ꓡ ꓠ, ꓟ ꓬꓳ. ꓚꓵˍ ꓡꓳ꓿
ꓕꓲ ꓠꓬꓲ ꓕꓲ ꓠꓬꓲ ꓖꓳ ꓓꓱꓽ ꓢꓯꓼ ꓙꓳ ꓡꓰ ꓠ ꓜꓽ ꓠ ꓔ ꓡꓳ꓿ ꓢꓯꓼ ꓠꓯꓻ ꓞꓲꓼ ꓢꓶ. ꓟꓽ ꓞꓲꓺ ꓣꓳ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟ ꓜꓽ ꓓꓴ ꓔꓯ ꓟꓬꓽ ꓠꓬꓲ ꓜꓽ ꓠ ꓔ ꓡꓳ꓿
ꓠꓬꓲ ꓠ. ꓢꓲ ꓟꓬꓱꓽ ꓬꓰ ꓔꓬ ꓪ ꓢꓴ꓾ ꓙꓰ ꓙꓰ ꓡ ꓡ ꓬꓰˍ ꓟ ꓟꓽ ꓙꓳ ꓢꓴ ꓐꓴ ꓠꓬ꓾ ꓕꓲ ꓠꓬꓲꓽ ꓗꓪ 20 ꓧꓷ, 30 ꓧꓷ, ꓛꓲ ꓛꓲ ꓡꓵ ꓡꓯꓼ ꓡꓵ ꓖꓶ ꓠ ꓔ ꓡꓳ꓿
ꓐ ꓡˍ ꓠꓬ꓾ ꓕꓲ ꓘꓳꓼ ꓕꓲ ꓧꓪ, ꓛꓲ꓾ ꓚꓲ. ꓛꓬ ꓖꓳ ꓓꓱꓽ ꓗꓪ ꓠꓻ ꓙꓳ ꓟꓽ ꓙꓳ ꓠꓯꓻ ꓞꓲꓼ ꓦꓲ ꓗꓪ ꓙꓰ ꓢꓲ ꓡꓳ. ꓠꓬꓲ ꓠ ꓔ ꓡꓳ꓿
ꓠꓲ, ꓟ ꓓꓵꓽ ꓙꓽ ꓫ. ꓓꓴ ꓔꓯ ꓢꓻ ꓡꓰ ꓝꓲˍ ꓟ ꓚꓱ, ꓔꓯ ꓣꓱꓽ ꓬꓰˍ ꓟ꓾ ꓮ ꓡꓲ ꓫꓵꓽ ꓗꓪ ꓥˍ ꓟꓲ ꓙꓲꓻˍ ꓟ ꓔꓯ ꓡꓰꓽ ꓡꓳ. ꓟꓳꓻˍ ꓟ ꓠꓲ, ꓟ꓾ ꓖꓽ ꓖꓶ ꓗꓴ.ˍ ꓟ ꓠꓲ, ꓟ ꓔꓯ ꓦꓵꓻ ꓠ ꓔˍ ꓟ ꓥ ꓡꓳ꓿
ꓖꓳ ꓓꓱꓽ ꓐꓰ ꓠꓲ, ꓟ ꓔꓬ, ꓢꓻ ꓠ, ꓟ ꓐꓱ ꓶ ꓠꓬ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓚꓱ, ꓐꓴ ꓔꓯ ꓛꓳꓻ ꓫꓱꓽ ꓠ ꓔ ꓟ ꓥ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓟ ꓬꓲ ꓣꓱꓽ ꓛꓰꓽ ꓔꓯ ꓢꓷ. ꓡ ꓗꓷ ꓗ ꓠꓯ. ꓕꓯ ꓞꓳ ꓤ ꓐꓴ ꓠꓬ꓾ ꓠꓻ ꓡˍ ꓕꓯ ꓡꓰꓽ ꓠꓻ ꓫꓬ, ꓟ ꓚꓱ, ꓢꓶ. ꓟꓽ ꓞꓲꓺ ꓟꓽ ꓒꓬꓱꓼ ꓡ ꓕꓯ ꓡꓰ ꓗꓽ ꓕ. ꓟ ꓚꓱ, ꓔꓯ ꓣꓱꓽ ꓬꓰ ꓡ ꓔꓬ ꓟ ꓥ ꓡꓳ꓿ ꓕꓱ ꓟ ꓔꓯ ꓠ ꓠ, ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵꓽ ꓖꓳ ꓓꓱꓽ ꓐꓰ ꓠꓲ, ꓟ ꓔꓬ, ꓢꓻ ꓢꓲ꓾ ꓗ, ꓛꓲꓽˍ ꓟ ꓤꓶꓻ ꓔꓯ ꓘꓳ ꓣꓴ ꓐ ꓡ ꓝꓲ꓾ ꓮ ꓙꓵꓽ ꓢꓴ ꓧꓪ. ꓧꓪꓸꓼ ꓔꓬ꓿
