ꓟꓲ ꓠꓯ ꓗꓪ ꓞꓳ ꓤ ꓒꓬꓱꓼ ꓡ ꓟ ꓬꓲ ꓔꓶꓻ ꓙꓱꓼ ꓔꓯ ꓕꓲ ꓐꓱ ꓠꓬ ꓟꓲ ꓡꓰ, ꓔꓬ ꓡꓳ= ꓟꓬ: ꓠꓬꓲ ꓞꓳ ꓡꓱ ꓐꓴ ꓬꓲ ꓪ ꓬꓰ ꓠꓲꓹ ꓫꓵˍ ꓟ ꓟꓬꓱꓽ ꓬꓰ꓾ ꓟꓬꓱꓽ ꓬꓲ ꓔꓶꓸ ꓕꓲ ꓟ ꓗꓪ ꓟꓶ ꓤ ꓗꓷ ꓡꓰ ꓠꓬ ꓝꓮꓲ ꓕꓲ ꓟꓬꓱꓽ ꓔꓯ ꓬꓰ ꓙꓰ꓾ ꓕꓱ ꓟꓬꓱꓽ ꓗꓪ ꓒꓴ ꓮ ꓟꓬꓹ ꓟꓽ ꓪ ꓠꓬ ꓒꓴ ꓮ ꓟꓬꓹ ꓪˍ ꓟ ꓟꓬꓱꓽ ꓔꓯ ꓬꓰ ꓙꓰ꓾ ꓕꓱ ꓡꓱ ꓬꓰ ꓢꓲ ꓬꓲ ꓪ ꓤꓶꓸꓹ ꓔꓯ ꓗꓹ ꓛꓲ ꓔꓬ ꓡꓳ= ꓞꓳ ꓡꓱ ꓐꓴ ꓬꓲ ꓪ ꓔꓶꓻ ꓙꓱꓼ ꓠꓬ ꓒꓴ ꓪ ꓓꓴ ꓔꓯ ꓡꓰꓽ ꓓꓵꓽ ꓙˍ ꓟ ꓪꓴꓸ ꓠꓬꓲ ꓕꓱ ꓡꓱ ꓬꓰ ꓔꓬ ꓟ ꓥ ꓡꓳ=
ꓪ ꓡˍ ꓟ ꓒꓴ ꓫꓵꓸꓸ ꓔꓯ ꓠꓬ ꓬꓲ ꓪ ꓗꓹ ꓛꓲꓽ ꓓꓴ ꓐꓱ ꓶ ꓣꓱꓽ ꓓꓴ ꓥ ꓢꓲ ꓞꓳ ꓡꓱ ꓐꓴ ꓠꓲꓹ ꓟ ꓗꓪ ꓕꓱ ꓡꓱ ꓬꓰˍ ꓟ ꓠꓬ ꓙꓲꓻ ꓖꓴ ꓟꓽ ꓙꓳˍ ꓟ ꓔꓯ ꓬꓲ ꓪ ꓟꓽ ꓢꓷꓸ ꓔꓬ꓾ ꓢꓯꓼ ꓙꓳˍ ꓟ ꓕꓲ ꓙꓵꓹ ꓗꓪ ꓕꓱ ꓡꓱ ꓗꓹ ꓛꓲ ꓛꓲ ꓔꓬ ꓮ ꓫꓵ ꓥ ꓟꓲ ꓙꓽ ꓫꓸ ꓓꓴ ꓟꓽ ꓙꓳ ꓗꓹ ꓛꓲ ꓟ ꓐꓰ ꓠꓲꓹ ꓘꓪꓽ ꓫꓵꓺ ꓓˍ ꓟ ꓦꓬꓼ ꓠꓬꓲ ꓥꓳ ꓐꓯ ꓥ ꓟꓲ ꓞꓲꓼ ꓟꓳꓽ ꓡ ꓕꓯ ꓮ ꓡꓲ ꓕꓲ ꓣꓳ ꓥ ꓟꓲ ꓬꓲ ꓬꓰ ꓢꓲ ꓙꓳˍ ꓟ ꓤꓶꓸꓹ ꓔꓯ ꓠꓲꓹ ꓥꓳˍ ꓡꓳ=
ꓬꓲ ꓬꓰ ꓢꓲ ꓙꓳˍ ꓟ ꓞꓳ ꓤ ꓤꓶꓸꓹ ꓐꓯ ꓟ ꓠꓬ ꓠꓬ ꓮ ꓫꓵꓽ ꓥ ꓡ? ꓙꓲˍ ꓟ ꓟꓬꓱꓽ ꓔꓯ ꓬꓰ ꓢꓲ꓾ ꓡ ꓠꓹ ꓟ ꓣꓳ ꓤ ꓣꓳ ꓠꓱ ꓐꓱ ꓶ ꓬꓲ ꓒꓵꓽ ꓙꓳˍ ꓟ ꓕꓲ ꓫꓵꓽ ꓫꓵꓽ ꓛꓹ ꓖꓶ ꓠ ꓔ ꓟ ꓥ ꓡꓳ= ꓖꓳ ꓕꓯ ꓢꓲ ꓣꓳ ꓧꓪꓽ ꓖꓳ ꓓꓱꓽ ꓡꓳꓹ ꓬꓰ ꓟ ꓙꓵꓹ ꓛꓲ ꓡ ꓕꓯ ꓥꓪ ꓤ ꓥꓪ ꓠꓱ ꓐꓱ ꓶ ꓥꓪ ꓢꓯꓼ ꓕꓵꓼ ꓗꓷꓳ꓾ ꓐꓯ ꓢꓲ ꓗꓹ ꓛꓲ ꓓꓴ ꓥꓳ=
ꓞꓳ ꓡꓱ ꓕꓲ ꓐꓱ ꓠꓬ ꓕꓱ ꓡꓱ ꓢꓯꓼ ꓖꓶ ꓘꓶꓽ ꓔꓯ ꓟꓽ ꓠꓲꓹ ꓫꓵ ꓡꓰ ꓟꓽ ꓢꓷꓸ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ ꓠꓽ ꓙꓲꓻ ꓖꓴ ꓙꓳˍ ꓟ ꓟꓬꓱꓽ ꓬꓰ ꓢꓲ꓾ ꓕꓲ ꓠꓬꓲ ꓟꓲ ꓕꓯ ꓙꓲ ꓡ ꓟ ꓔꓯ ꓮ ꓘꓶꓸ ꓗꓹ ꓛꓲꓽˍ ꓡꓳ= ꓙ ꓟꓶ ꓗꓴꓸ ꓔ ꓢꓴ ꓞꓳ ꓡꓱ ꓐꓴ ꓕꓲ ꓐꓱ ꓠꓬ ꓥꓪ ꓡꓰ ꓢꓯꓼ ꓖꓶ ꓘꓶꓽ ꓔꓯ ꓠꓲꓹ ꓫꓵˍ ꓐꓭ ꓥꓳ=
