ꓣꓳ ꓕꓲ ꓖꓳ ꓓꓱꓽ ꓡꓱꓸꓼ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓟ ꓠꓬ꓾ ꓣꓳ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓔꓯ ꓬꓰ ꓙ ꓔꓳ, ꓙ ꓖꓶ ꓐ ꓡˍ ꓡꓳ꓾ ꓐꓯ ꓟ ꓔꓯ ꓢꓷ.ˍ ꓡ꓿ ꓡ ꓞꓳ ꓕꓲ ꓣꓳ ꓗ, ꓛꓲꓽ ꓔꓬ, ꓢꓻ ꓠ, ꓟ ꓐꓱ ꓶ ꓖꓳ ꓓꓱꓽ ꓢꓲꓽ ꓫꓬˍ ꓟˍ ꓟꓲ ꓮ ꓘꓶ. ꓬꓳ. ꓚꓰꓽˍ ꓟ ꓥ ꓡꓳ꓿ ꓖꓳ ꓓꓱꓽ ꓢꓲꓽ ꓫꓬˍ ꓟ ꓠꓬ ꓔꓬ, ꓢꓻ ꓓꓴ ꓐꓱ ꓶˍ ꓡꓰꓽ ꓟꓽ ꓥ꓿ ꓞꓳ ꓤ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳˍ ꓟ ꓐꓰ꓾ ꓶꓻ ꓡꓯꓼ ꓟꓬꓱꓽ ꓬꓰ ꓚꓱ, ꓗꓪˍ ꓟꓲ ꓣꓱꓽ ꓬꓯꓼ ꓓꓴ ꓙꓳˍ ꓟ ꓥ ꓡꓳ꓿ ꓠꓲ, ꓟ ꓕꓲ ꓒꓳ,꓾ ꓖꓳ ꓓꓱꓽ ꓕꓲ ꓒꓳ, ꓔꓬ, ꓢꓻ ꓓꓴ ꓐꓱ ꓶ ꓠꓬ ꓖꓳ ꓓꓱꓽ ꓢꓲꓽ ꓫꓬ ꓓꓴ ꓚꓱ, ꓔꓯ ꓟꓬꓽ ꓠꓬꓲ ꓢꓯꓼ ꓕꓵꓼ ꓠ ꓗ, ꓡꓳ꓿ ꓖꓳ ꓓꓱꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓬꓰ ꓔ ꓕꓯ ꓠꓻ ꓤ ꓒꓬꓽ ꓤ ꓟꓽ ꓙꓳ ꓝꓲ ꓟ ꓡꓰꓽ ꓟꓽ ꓞꓲ꓾ ꓠꓻ ꓐꓶꓽ ꓓꓲꓻ ꓚꓲ. ꓠꓷꓼ ꓡˍ ꓟ ꓐꓰ꓾ ꓖꓳ ꓓꓱꓽ ꓗꓪ ꓐꓰ ꓬꓲ ꓐꓵꓽ ꓛꓱꓽ ꓠꓱˍ ꓟ ꓗꓪ ꓐꓰ ꓥˍ ꓟꓲ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓖꓳ ꓓꓱꓽ ꓟꓽ ꓢꓲꓽ ꓫꓬ ꓕꓯ ꓣꓳ ꓔꓯ ꓔꓬ, ꓟꓽ ꓢꓻ ꓗꓷ ꓡꓰ ꓝꓲˍ ꓡꓳ꓿ ꓖꓳ ꓟ ꓑꓶ. ꓓꓴ꓾ ꓣꓳ ꓦꓲꓻ ꓘꓴꓽ ꓗꓪ ꓐꓰ ꓪꓴ. ꓔꓴ ꓢꓲ꓾ ꓜꓽ ꓓꓴ꓾ ꓖꓪꓽ ꓓꓴ ꓗꓪ ꓛꓲ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓬꓰˍ ꓕꓯ ꓡꓰꓽ꓾ ꓣꓳ ꓖꓳ ꓓꓱꓽ ꓔꓯ ꓔꓬ, ꓢꓻ ꓡꓰ ꓝꓲˍ ꓟ ꓥ ꓡꓳ꓿ ꓠꓻ ꓚꓲ. ꓠꓷꓼ ꓡˍ ꓟ ꓗꓪ ꓐꓰˍ ꓟꓲ ꓗꓽ ꓕ. ꓟꓶˍ ꓥꓳ꓿ ꓖꓳ ꓓꓱꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓟ ꓠꓬ ꓬꓲ ꓒꓵꓽ ꓟꓽ ꓟꓬꓽ ꓟ꓾ ꓣꓳ ꓚꓲ. ꓛꓬ ꓣꓳ ꓗꓪꓼ ꓫꓵꓼ ꓚꓱ, ꓕꓲ ꓟ ꓥ ꓡꓳ꓿ ꓖꓳ ꓓꓱꓽ ꓢꓲꓽ ꓫꓬˍ ꓕꓯ ꓠꓱ. ꓐꓯ ꓢꓴ ꓐꓰ ꓙꓻ ꓡꓯ ꓘꓳˍ ꓟ ꓗꓪˍ ꓟꓲ ꓢꓻ ꓡꓰ ꓝꓲˍ ꓟ ꓚꓱ, ꓕꓲ ꓟ ꓥ ꓡꓳ꓿ ꓖꓳ ꓓꓱꓽ ꓗꓪ ꓐꓰ ꓬꓲ ꓐꓵꓽ ꓛꓱꓽ ꓠꓱ꓾ ꓟꓷꓽ ꓠꓷ, ꓗꓪ ꓐꓰˍ ꓟꓲ ꓬꓲ ꓐꓵꓽ ꓓꓳ ꓡ ꓢꓲ ꓠꓬꓲ꓾ ꓧꓪꓽ ꓗꓴ, ꓙꓲ ꓗꓪ ꓬꓲ. ꓑꓻ ꓓꓲꓻ ꓔꓬ꓾ ꓡꓯ ꓫꓱꓽ ꓛꓲ ꓫꓱꓽ ꓥˍ ꓟꓲ ꓠꓲ, ꓒꓳ ꓒꓳ ꓡꓰꓽ ꓓ, ꓕꓯ ꓠꓽ꓾ ꓢꓴ ꓡꓰ ꓣꓳ ꓔꓯ ꓠꓬꓲ ꓟꓽ ꓟꓵ ꓬꓰ ꓡˍ ꓟ ꓡꓰꓽ ꓟꓽ ꓞꓲ꓾ ꓣꓳ ꓚꓳ ꓡꓳ ꓗꓪ ꓔꓬ ꓢꓴ ꓐꓴ ꓔꓯ ꓠꓲ, ꓟ ꓘꓶꓻ ꓡꓶꓽ ꓡꓰ ꓝꓲ ꓐ ꓡˍ ꓟ ꓥ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓟꓽ ꓢꓲꓽ ꓫꓬ ꓟ ꓠꓬ ꓠꓻ ꓐꓶꓽ ꓓꓲꓻ ꓐꓴ ꓔꓯ ꓟꓯꓻ ꓔ ꓟ ꓡꓰ ꓗ, ꓟ ꓑꓶ. ꓓꓴ ꓔꓬ, ꓟꓽ ꓢꓻ ꓗꓷ ꓡꓰ ꓢꓻˍ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓗ, ꓛꓲꓽ ꓔꓬ ꓢꓻˍ ꓟ ꓦꓬꓼ ꓠꓬꓲ ꓔꓯ ꓘꓳ ꓣꓴ ꓟꓶ ꓢꓲ꓾ ꓠꓲ, ꓠꓵ ꓢꓴ ꓧꓶꓼ ꓢꓴ ꓟꓬꓽ ꓡ ꓠꓲ, ꓫꓵˍ ꓕꓯ ꓠꓽ ꓖꓳ ꓓꓱꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓠ ꓗ, ꓡꓳ꓿
ꓣꓳ ꓖꓳ ꓓꓱꓽ ꓟꓽ ꓢꓲꓽ ꓫꓬ ꓕꓯ ꓐꓯ‐ꓔꓲ‐ꓣꓲ‐ꓬ꓾ ꓠꓻ ꓐꓶꓽ ꓓꓲꓻ ꓚꓲ. ꓠꓷꓼ ꓡ ꓟ ꓑꓶ. ꓓꓴ꓾ ꓐꓵꓼ ꓟꓵ ꓳ ꓔꓐ ꓠꓻ꓾ ꓦꓰꓽ ꓛꓲꓽ ꓧꓳ,ˍ ꓟ꓾ ꓦꓰꓽ ꓧꓳ, ꓠꓻ꓾ ꓠꓻ ꓤ ꓒꓬꓽ ꓤ ꓐꓰ꓾ ꓠꓻ ꓧꓶ꓿
ꓝꓮꓲ ꓠꓬ ꓫꓵꓽ ꓒꓬ. ꓳ ꓢꓲ ꓧꓪꓽ ꓗꓴ, ꓙꓲ ꓧꓪꓼ ꓡꓰˍ ꓟ ꓠꓻ꓾ ꓪꓳꓽ ꓔꓳ ꓠꓴꓽ ꓡꓰˍ ꓟ ꓠꓻ꓾ ꓧꓪꓼ ꓗꓴ, ꓙꓲ ꓗꓪ ꓬꓲ ꓑꓻ ꓬꓲ ꓫꓵꓽ ꓬꓲ ꓙꓰꓽ ꓓꓲˍ ꓟ꓾ ꓬꓲ ꓪꓴꓻ ꓳˍ ꓟ ꓠꓻ ꓐꓴ ꓔꓯ ꓒꓬꓱꓼ ꓡ ꓝꓲˍ ꓡꓳ꓿
ꓝꓮꓲ ꓠꓬ ꓜꓽ ꓓꓴ ꓬꓲ ꓓꓳꓼ ꓖꓳˍ ꓟ꓾ ꓬꓲ ꓧꓶ ꓖꓶˍ ꓟ꓾ ꓪꓳꓻ ꓐꓵꓼ ꓓꓵˍ ꓟ꓾ ꓦ ꓟ ꓛꓲ ꓒꓯ, ꓠꓻ꓾ ꓕꓱ ꓟꓬ ꓫꓵꓽ ꓔꓯ ꓒꓬꓱꓼ ꓡ ꓝꓲˍ ꓡꓳ꓿
ꓖꓳ ꓡꓱ ꓠꓬꓲ ꓠꓻ ꓕꓱ ꓟꓬ ꓟꓽ ꓒꓬꓱꓼ ꓡ ꓠ, ꓟ ꓐꓱ ꓶ ꓣꓳ ꓖꓳ ꓓꓱꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓔꓬ ꓐ ꓡ ꓠ, ꓟ ꓕꓱ (8) ꓚꓱ, ꓔꓯ ꓖꓼ ꓛꓳ ꓓꓴ ꓬꓰ ꓡꓯ꓿
ꓡꓯꓽ ꓒꓯ, ꓔꓯ ꓞꓲꓽ ꓖꓶ ‐ ꓜꓽ ꓓꓴ ꓟꓽ ꓜꓽ ꓧꓶ. ꓕꓯ꓾ ꓜꓽ ꓓꓳ ꓡꓰ ꓗ ꓠꓯ.꓾ ꓬꓲꓽ ꓐꓽ ꓗꓪ ꓙꓰ ꓗꓷ ꓗ ꓠꓯ. (ꓢꓲꓽ ꓒ ꓦꓲꓻ ꓗꓪ ꓙꓰ ꓗꓷ ꓗ ꓠꓯ. ꓕꓯ)꓾ ꓟꓽ ꓢꓲꓽ ꓫꓬ ꓟ ꓕꓲꓽ ꓙꓰꓽ ꓙꓰꓽ ꓔꓯ ꓫꓱ, ꓪ ꓡꓰ ꓕꓯ꓾ ꓡꓯꓽ ꓒꓯ, ꓔꓯ ꓛ, ꓐꓬꓽ ꓣꓱꓽ ꓢꓲ ꓞꓲꓽ ꓖꓶ ꓠꓯ, ꓡꓳ꓿ ꓡꓯꓽ ꓒꓯ, ꓞꓲꓽˍ ꓟ ꓗꓪ ꓬꓲ ꓙꓵ, ꓣꓴ ꓢꓲ ꓞꓲꓽ ꓖꓶ ꓠ ꓔ ꓟ ꓥ ꓡꓳ꓿
ꓖꓳ ꓓꓱꓽ ꓔꓯ ꓟꓽ ꓠꓽ ꓠꓽ ꓞꓲꓽ ꓖꓶ ‐ ꓖꓳ ꓓꓱꓽ ꓢꓲꓽ ꓫꓬ ꓚꓱ, ꓔꓯ ꓟꓳ. ꓕꓲ ꓠꓬꓲ ꓗꓪ ꓠꓬꓲꓽ ꓧꓪ, ꓖꓳ ꓓꓱꓽ ꓞꓲꓽ ꓠ ꓔ ꓡꓳ ꓐꓰ ꓐꓯ ꓔ ꓥ ꓟꓲ꓾ ꓟꓽ ꓐ ꓡ ꓕꓯ ꓕꓲ ꓠꓬꓲ ꓗꓪ ꓕꓲ ꓧꓪ, ꓠꓽ ꓞꓲꓽ ꓠ ꓔ ꓟ ꓥ ꓡꓳ꓿ ꓮ ꓘꓶ. ꓙꓬˍ ꓟ ꓟꓵꓽ ꓗꓪ ꓔꓬ ꓢꓴ ꓐꓴ ꓠꓬ ꓬꓲꓻ ꓛ ꓚꓺ ꓢꓲ ꓖꓳ ꓓꓱꓽ ꓞꓲꓽ ꓐ ꓡˍ ꓟ ꓥ ꓡꓳ꓿ ꓖꓳ ꓓꓱꓽ ꓞꓲꓽˍ ꓟ ꓠꓬ ꓠꓻ ꓐꓶ ꓓꓲꓽ ꓔꓯ ꓗꓽ ꓕ. ꓟ ꓡꓰꓽ ꓟꓽ ꓞꓲ꓾ ꓠꓲ, ꓟ ꓔꓯ ꓢꓰ ꓢꓰ ꓡꓰꓽ ꓗꓷ ꓡꓰ ꓝꓲˍ ꓡꓳ꓿
ꓝꓮꓲ꓾ ꓕꓲ ꓠꓬꓲ ꓗꓪ ꓠꓬꓲꓽ ꓧꓪ, ꓢꓶꓽ ꓛꓲ ꓛ, ꓠ ꓔ ꓡꓳ꓿
ꓕꓲ ꓠꓽ ꓗꓪ ꓠꓬꓲꓽ ꓧꓪ, ꓛꓲ ꓪꓴ. ꓓꓵ ꓞꓲꓽ ꓠ ꓔ ꓡꓳ꓿
ꓕꓲ ꓠꓽ ꓗꓪ ꓕꓲ ꓧꓪ, ꓛꓲ ꓫꓱꓽ ꓡꓯꓽ ꓫꓱꓽ ꓠꓬꓱ, ꓖꓶ ꓠ ꓔ ꓡꓳ꓿ ꓛꓲ ꓫꓱꓽ ꓡꓯ ꓫꓱꓽ ꓫꓵ ꓡˍ ꓕꓯ ꓖꓳ ꓟ ꓘꓴꓽ ꓗꓪ ꓠꓻ ꓐꓶ ꓓꓲ ꓮ ꓟꓬ, ꓔꓬ ꓟ ꓑꓶ. ꓓꓴ꓾ ꓕꓲ ꓠꓽ ꓕꓲ ꓧꓪ, ꓛꓲ ꓠꓬꓱ, ꓖꓶ ꓠ ꓔ ꓥ꓿
ꓐꓵ ꓞꓶꓽ ꓟꓶ ꓛꓲ ꓔꓯ ꓥˍ ꓟꓲ ꓫꓬ ꓫꓬ ꓡꓯꓽ ꓡꓯꓽ ꓖꓪꓽ ꓠ ꓔ ꓡꓳ꓿ ꓖꓪꓽ ꓓꓴ ꓟꓽ ꓢꓲꓽ ꓫꓬ ꓕꓯ ꓧꓪꓽ ꓗꓴ, ꓙꓲꓻ ꓗꓪ ꓬꓲ ꓑꓻ ꓓꓲ ꓡ ꓝꓲ ꓗꓴˍ ꓟ ꓑꓶ. ꓓꓴ꓾ ꓛ, ꓐꓬꓽ ꓣꓱꓽ ꓢꓲꓽ ꓫꓬ ꓡꓰ ꓠ ꓞꓲꓽ ꓔ ꓟ ꓐꓵ ꓞꓶꓽ ꓟꓶ ꓛꓲ ꓔꓯ ꓫꓬ ꓫꓬ ꓡꓯꓽ ꓡꓯꓽ ꓖꓪꓽ ꓠ ꓔ ꓟ ꓥ ꓡꓳ꓿
ꓕꓲ ꓠꓬꓲ ꓗꓪ ꓠꓬꓲꓽ ꓧꓪ, ꓒꓬꓱꓽ ꓟꓬ ꓞꓲꓽ ꓖꓶ꓿ ꓕꓱ ꓟ ꓥˍ ꓟꓲ ꓖꓳ ꓓꓱꓽ ꓢꓲꓽ ꓫꓬ ꓡꓰ ꓠ ꓔꓬ ꓟ ꓬꓲ ꓚꓱ, ꓕꓲ ꓚꓱ, ꓥ ꓡꓳ꓿
ꓝꓮꓲ ꓡꓳ, ꓬꓰˍ ꓕꓲ ꓚꓱ, ꓠꓬ ꓛꓲ ꓒꓯ, ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓠꓯ, ꓟ ꓥ ꓡꓳ꓿ ꓛꓲ ꓒꓯ, ꓠꓬ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓕꓳꓼ ꓠ ꓔ ꓟ ꓑꓶ. ꓓꓴ꓾ ꓠꓻ ꓐꓶꓽ ꓓꓲꓻ ꓟꓽ ꓓꓵꓽ ꓡ ꓠ, ꓟ ꓐꓱ ꓶ ꓣꓳ ꓛꓲ ꓒꓯ, ꓔꓯ ꓥˍ ꓟꓲ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓠꓯ, ꓟ ꓥ ꓡꓳ꓿ ꓟꓽ ꓒꓬꓱꓼ ꓡ ꓕꓯ ꓡꓰ ꓗꓽ ꓔ ꓟ ꓠꓬ꓾ ꓒꓬꓱꓼ ꓡ ꓗ ꓠꓯ. ꓕꓯ ꓠꓻ ꓫꓬ,ˍ ꓟ ꓢꓶ. ꓟꓽ ꓞꓲ ꓪ ꓜꓲ ꓙꓲˍ ꓟ ꓪꓴ. ꓠꓬꓲ꓾ ꓖꓳ ꓓꓱꓽ ꓔꓬ, ꓢꓻ ꓢꓲ ꓠꓲ, ꓟ ꓗ, ꓛꓲꓽˍ ꓟ꓾ ꓟꓽ ꓠꓻ ꓟꓽ ꓒꓬꓽ ꓟ ꓤꓶꓻ ꓔꓯ ꓟꓶ ꓡꓰ ꓠ, ꓟ ꓐꓱ ꓶ ꓣꓳ ꓕꓲꓽ ꓖꓳ ꓓꓱꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓔꓬ ꓡꓯ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
