ꓢꓲ ꓒ ꓬꓰ-ꓢꓴ ꓚꓬꓴ. ꓙ ꓟ ꓚꓱꓹ ꓐꓰ ꓟꓲ ꓠꓯ ꓞꓳ ꓤ ꓡꓲꓽ ꓒꓰꓼ ꓚꓱꓹ ꓠꓬ ꓫꓱ. ꓡꓯ ꓘꓳˍ ꓟ ꓙꓳˍ ꓡꓳ= ꓐꓹ ꓐ ꓪꓴ-ꓢ ꓠꓬ ꓬꓲꓸ ꓤ ꓔꓲ. ꓬꓰ- ꓢꓴ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓟ ꓠꓯꓸꓼ ꓗꓪ ꓐꓹ ꓐ ꓪꓴ- ꓢ ꓥ ꓟꓲ ꓐ_ˍ ꓟ ꓔꓯ ꓟꓳꓸ ꓖꓶˍ ꓟ ꓙꓳˍ ꓡꓳ= ꓤ ꓔꓲꓸ ꓢꓲ ꓒ ꓬꓰ- ꓢꓴ ꓥ ꓟꓲ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓕꓯ ꓬꓲ-ꓢꓷ-ꓡꓲ ꓞꓳ ꓫꓵꓽ ꓒꓬꓱꓼ ꓡ ꓢꓲ꓾ ꓬꓲ-ꓢꓷ-ꓡꓲ ꓐꓴ ꓡꓲꓽ ꓒꓰꓼ ꓡꓰ ꓐꓰ ꓕꓲ ꓡꓰꓹ ꓐꓰ ꓢꓯꓸ ꓔꓬ ꓡꓳꓹ ꓬꓰ ꓟ ꓥꓳ= ꓟꓸ ꓟꓲꓽ ꓚꓺ ꓥ ꓟꓲ ꓬꓲ-ꓢꓷ-ꓡꓲ ꓐꓴ ꓡꓲꓽ ꓒꓰꓼ ꓔꓯ ꓪꓴꓸ ꓓꓵ ꓛꓬꓹ ꓢꓲ ꓚꓺ ꓡꓳꓹ ꓬꓰ ꓟ ꓥ ꓡꓳ=
ꓟꓽ ꓐꓲ ꓜꓲꓼ ꓟ꓾ ꓫꓬꓹ ꓑꓱˍ ꓟ꓾ ꓙꓵꓻ ꓠꓲꓹ ꓚꓱꓹ ꓔꓯ ꓣꓴ ꓗꓷ ꓢꓲ꓾ ꓟꓬꓽ ꓠꓬꓲ ꓐꓲ ꓜꓲꓼˍ ꓟ ꓛꓳ ꓚꓱꓹ ꓔꓯ ꓟꓸ ꓖꓶ ꓢꓲ ꓠꓬꓲ ꓛꓳ ꓚꓱꓹ ꓮ ꓙꓵꓽ ꓔꓯ ꓐꓲ ꓜꓲꓼ ꓡꓰ ꓝꓲˍ ꓟ ꓥ ꓡꓳ= ꓖꓳ ꓟ ꓗꓪ ꓐꓰ ꓟꓲ ꓠꓯ ꓞꓳ ꓤ ꓮ ꓙꓵꓽ ꓔꓯ ꓚꓬꓴ. ꓙ ꓠꓹ ꓟ ꓐꓱ ꓶ ꓬꓲ ꓠꓬ ꓚꓬꓴ. ꓙˍ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓟꓸ ꓖꓶ ꓢꓲ ꓠꓬꓲ ꓬꓲꓸ ꓠꓯꓸꓼ ꓗꓪ ꓛꓳ ꓢꓴ ꓐꓴ ꓮ ꓙꓵꓽ ꓔꓯ ꓟꓲ ꓠꓯ ꓡꓳꓹ ꓬꓰ ꓗꓪ ꓛꓲ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓟꓸ ꓖꓶ ꓠꓹ ꓟ ꓐꓱ ꓶ ꓬꓲ ꓡꓰ ꓝꓲ ꓩꓴ ꓗꓷ ꓟ ꓥ ꓡꓳ=
ꓡꓲꓽ ꓒꓰꓼ ꓐꓰ ꓫꓸ ꓕꓱˍ ꓐꓯ ꓠꓬ ꓕꓱ ꓟ ꓔꓯ Dialogue with Culture ꓐꓯˍ ꓟ ꓥꓳ= Inculturation ꓐꓯ ꓟ ꓥꓳ=ꓬꓲꓸ ꓟꓸ ꓟꓲꓽ ꓠꓬ ꓡꓲꓽ ꓒꓰꓼ ꓐꓰ ꓫꓸ ꓕꓱˍ ꓟ ꓡꓰ ꓟꓽ ꓥ꓾ ꓡꓲꓽ ꓒꓰꓼ ꓠꓯꓸꓼ ꓗꓪ ꓐꓰ ꓣꓳ ꓣꓱꓽ ꓠ ꓔ ꓟ ꓙꓲˍ ꓟ ꓚꓱꓹ ꓔꓯ ꓣꓴ ꓢꓲ꓾ ꓟꓽ ꓙꓲꓻ ꓟ ꓔꓯ ꓫꓬꓹ ꓑꓱ ꓢꓲ ꓡꓲꓽ ꓒꓰꓼ ꓠꓯꓸꓼ ꓗꓪ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓟꓸ ꓖꓶ ꓠꓹ ꓟ ꓐꓱ ꓶ ꓐꓯˍ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓕꓯ ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ ꓟ ꓥꓳ= ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ ꓢꓲ ꓬꓲ-ꓢꓷ-ꓡꓲ ꓡꓲꓽ ꓒꓰꓼ ꓔꓯ ꓛꓳˍ ꓟ ꓥ ꓡꓳ= ꓕꓱ ꓗꓪ ꓐꓰ ꓐꓯ ꓠꓲꓹ ꓫꓵˍ ꓟ ꓠꓬ ꓟꓲ ꓠꓯ ꓞꓳ ꓤ ꓡꓲꓽ ꓒꓰꓼ ꓔꓯ ꓛꓳ ꓡ ꓟ ꓥ ꓡꓳ= ꓪꓴ-ꓢ ꓠꓬ ꓡꓲꓽ ꓒꓰꓼ ꓡꓰ ꓐꓰ ꓕꓲ ꓡꓰꓹ ꓬꓰ ꓡˍ ꓟ ꓥ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓠꓬ ꓡꓲꓽ ꓒꓰꓼ ꓡꓰ ꓐꓰ ꓕꓲ ꓡꓰꓹ ꓒꓳꓹ ꓡꓶꓸ ꓠꓹ ꓟ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓕꓱ ꓡꓱ ꓟꓸ ꓖꓶ ꓡ ꓟ ꓥ ꓡꓳ=
ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓘꓴꓽ ꓗꓪ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓢꓯꓸ ꓔꓬ ꓠ ꓗꓹ ꓡꓳ= ꓢꓲ-ꓒ ꓬꓰ-ꓢꓴ ꓙꓵꓺ ꓠꓲꓹ ꓪꓴꓸ ꓠꓬꓲ ꓡꓲꓽ ꓒꓰꓼ ꓮ ꓙꓵꓽ ꓔꓯ ꓒꓳꓹ ꓡꓶꓸ ꓠꓹ ꓟ ꓟꓽ ꓥ=ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓢꓲ ꓠꓬꓲ ꓡꓲꓽ ꓒꓰꓼ ꓘꓴꓽ ꓗꓪ ꓓꓵꓽ ꓡ ꓢꓲ ꓢꓯꓸ ꓔꓬ ꓠꓹ ꓟ ꓥ ꓡꓳ ꓐꓯˍ ꓟ ꓔꓯ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓐꓯˍ ꓟ ꓥ ꓡꓳ=
ꓮ ꓫꓵꓽ ꓑꓶ. ꓓꓴ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓥ ꓟꓲ ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ꓾ ꓬꓲ-ꓢꓷ-ꓡꓲ ꓡꓲꓽ ꓒꓰꓼ ꓔꓯ ꓛꓳ꓾ ꓬꓲ-ꓢꓷ-ꓡꓲ ꓐꓴ ꓦ ꓡꓱˍ ꓟ ꓬꓴ-ꓓ ꓙꓵꓻ ꓠꓲꓹ ꓔꓯ ꓙꓵꓻ ꓡꓳꓹ ꓬꓰ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓠꓬꓲꓸ ꓠꓬꓲ ꓣꓳ ꓙꓵꓻ ꓔꓬ ꓟ Christian ꓙꓵꓻ ꓠꓲꓹ ꓐꓯˍ ꓟ ꓙꓲ-ꓢꓴ ꓢꓲ ꓤ ꓐꓴ ꓙꓵꓻ ꓠꓲꓹ ꓔꓯ ꓛꓳ ꓡꓳꓹ ꓬꓰ ꓟ ꓟꓽ ꓥ꓾ꓬꓲ ꓠꓬ ꓬꓴ-ꓷ ꓙꓵꓻ ꓠꓲꓹ ꓔꓯ ꓛꓳ ꓡꓳꓹ ꓬꓰ ꓢꓴ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓟ ꓡꓲꓽ ꓒꓰꓼ ꓔꓯ ꓒꓵꓽ ꓠ ꓗꓹ ꓡꓳ=ꓢꓳꓻ ꓣꓴ ꓠ ꓗꓹ ꓡꓳ= ꓖꓳ ꓗꓪ ꓐꓰ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓠꓬ ꓟꓬꓽ ꓠꓬꓲ ꓢꓯꓸ ꓠ ꓢꓯꓼ ꓕꓵꓼ ꓠ ꓔ ꓡꓳ=
ꓮ ꓡꓲꓳ ꓐꓯ ꓠꓬ ꓡꓲꓽ ꓒꓰꓼ ꓗꓪ ꓐꓰ ꓫꓸ ꓕꓱ ꓡ ꓟ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓕꓲ ꓧꓪꓹ ꓥˍ ꓟꓲ ꓟꓽ ꓓꓵꓽ ꓙ ꓠꓬꓲ ꓟ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓪꓴ-ꓢ ꓶꓽ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓐ ꓡˍ ꓟ ꓬꓲꓸ ꓟꓸ ꓟꓲꓽ ꓒꓶ ꓐ ꓡˍ ꓟ ꓙꓳˍ ꓡꓳ=ꓖꓳ ꓡꓲ ꓠꓬꓲ ꓞꓳ ꓫꓵꓽ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓠꓯꓸꓼ ꓗꓪ ꓬꓲ ꓟꓸ ꓟꓲꓽ ꓮ ꓘꓶꓸ ꓠꓯꓸ ꓟ ꓡꓲꓽ ꓒꓰꓼ ꓗꓪ ꓐꓰ ꓓꓳꓺ ꓡˍ ꓟ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓙꓳˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓕꓱ ꓡꓱ ꓐꓯ ꓔꓬ ꓟ ꓥ ꓡꓳ=
