ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓦꓬꓼ ꓠꓬꓲ ꓠꓯꓸꓼ ꓗꓪ ꓞꓳ ꓤ ꓤꓶꓻ ꓐꓱ ꓶ ꓟꓽ ꓙꓳ ꓟꓽ ꓓꓻ ꓟ ꓮ ꓟꓬ, ꓫꓵꓽ ꓙꓳˍ ꓟ ꓥ ꓡꓳ꓿ ꓢꓷ. ꓠꓲ,꓾ ꓒꓴ ꓫꓵ꓾ ꓙꓽ ꓜꓲꓼ ꓠꓲ,꓾ ꓕꓱ ꓟꓬ ꓫꓵꓽ ꓠꓬ ꓞꓳ ꓤ ꓤꓶꓻ ꓠꓯꓸꓼ ꓗꓪ ꓟꓽ ꓙꓳ ꓟꓽ ꓓꓻ ꓟ ꓥ ꓡꓳ꓿ ꓮ ꓙꓵꓽ ꓟ ꓕꓯꓽ ꓢꓲ ꓟꓽ ꓓ ꓬꓳ. ꓚꓰꓽ ꓓꓰ ꓡꓰˍ ꓟ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓟ ꓥ ꓡꓳ꓿ ꓠꓴ ꓢꓷ. ꓠꓲ, ꓮ ꓡꓲ ꓟꓬ ꓛꓲ ꓢꓷ. ꓔ ꓥ ꓟꓲ ꓖꓳ ꓓꓱꓽ ꓔꓬ, ꓟꓽ ꓢꓻ ꓕꓯ ꓠꓽ ꓢꓷ. ꓠꓲ, ꓖꓳ ꓟ ꓠꓬ ꓮꓽ ꓔꓳ ꓥꓳ꓿ ꓒꓴ ꓫꓵ ꓮ ꓟꓬ ꓛꓲ ꓙꓳˍ ꓥ ꓟꓲ꓾ ꓟꓵꓽ ꓮ ꓟꓬ, ꓛꓲ ꓪꓴꓻ ꓟꓶ ꓔ ꓥ ꓟꓲ ꓧꓪꓽ ꓖꓳ ꓓꓱꓽ ꓔꓬ, ꓟꓽ ꓢꓻ ꓕꓯ ꓠꓽ ꓮꓽ ꓔꓳˍ ꓡꓰꓽ ꓥꓳ꓿ ꓖꓳ ꓡꓱ ꓠꓬꓲ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓠꓬ ꓮ ꓘꓶ. ꓬꓳ. ꓚꓵˍ ꓟ ꓥ ꓡꓳ꓿

ꓧꓶ. ꓕꓯ ꓟ ꓦꓬꓼ ꓠꓬꓲ ꓗꓪ ꓣꓳ ꓞꓳ ꓤ ꓐꓴ ꓠꓬ ꓔꓬ, ꓢꓻˍ ꓕꓯ꓾ ꓢꓯꓼ ꓙꓳ ꓓˍ ꓕꓯ ꓒꓴ ꓫꓵ ꓧꓪ ꓢꓲ ꓠꓬꓲ꓾ ꓠꓻ ꓡˍ ꓕꓯ ꓡꓰꓽ ꓠꓯꓻ ꓞꓲꓼ ꓫꓬ, ꓔꓬ ꓖꓴˍ ꓡꓳ꓿ ꓠꓻ ꓡ ꓒꓬꓽ ꓡˍ ꓕꓯ ꓡꓰꓽ ꓚꓲ. ꓛꓬ ꓠꓻ ꓐꓰ ꓟꓽ ꓕꓽ ꓟ꓾ ꓜꓽ ꓟꓽ ꓓꓻ ꓬꓰ ꓟꓽ ꓓꓻ ꓟ ꓔꓯ ꓤ ꓟꓴ ꓔꓬ ꓖꓴˍ ꓡꓳ꓿ ꓮ ꓟꓶ ꓞꓲꓼ ꓟ ꓞꓳ ꓤ ꓟꓬꓽ ꓠꓬꓲ ꓠꓬ ꓮ ꓫꓵ. ꓫꓵ ꓟ ꓤꓶꓻ ꓐꓱ ꓶ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓰ꓾ ꓚꓲ. ꓛꓬ ꓬꓲ ꓫꓱ, ꓔꓯ ꓤ ꓟꓳ ꓡ ꓔꓬ ꓟ ꓥ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓢꓷ. ꓠꓲ, ꓬꓲ ꓫꓵꓽ ꓬꓲ ꓙꓰꓽ ꓔꓯ ꓬꓲ ꓚꓱ, ꓮ ꓟꓬ, ꓗꓪ ꓐꓰ ꓑ ꓙꓽ ꓪ ꓵꓻ ꓪ ꓡꓰ ꓠꓬꓲ꓾ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓕꓲ ꓒꓳ, ꓐꓱ ꓶ ꓮ ꓟꓬ, ꓣꓱꓽ ꓬꓰ ꓡ ꓔꓬ ꓖꓴˍ ꓟ ꓥ ꓡꓳ꓿

ꓪꓴ‐ꓢ ꓖꓶ ꓔ ꓟ ꓬꓲ ꓞꓲꓼ ꓬꓲ ꓦꓬꓼ ꓠꓬꓲ ꓒ ꓐꓲ ꓠꓯꓸꓼ ꓗꓪ ꓗ, ꓛꓲꓽ ꓛꓲꓽ ꓔꓬ, ꓢꓻ ꓢꓻ ꓡꓰ ꓔꓬ, ꓐ ꓡ ꓠ, ꓟ ꓐꓱ ꓶ ꓕꓲ ꓠꓬꓲ ꓕꓲ ꓠꓬꓲ ꓣꓱꓽ ꓬꓰ ꓠꓯ, ꓟ ꓛꓳ ꓫꓱꓽ ꓚꓱ, (10) ꓚꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿ ꓕꓱ ꓛꓳ ꓫꓱꓽ ꓚꓱ, ꓠꓬ꓾ ꓣꓦꓮ ꓡꓲ‐ꓢꓴ ꓢꓯꓼ ꓔꓯ ꓠ ꓠ, ꓔꓬ ꓢꓴ ꓮ ꓙꓵꓽ ꓐꓱ ꓶ 100% ꓗꓪ ꓛꓲ ꓗ, ꓛꓲꓽ ꓔꓬ, ꓢꓻ ꓓꓴ ꓖꓶ ꓟꓽ ꓐ ꓡ ꓐꓯ ꓥˍ ꓟꓲ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ, ꓟ ꓤꓶꓻ ꓠꓯꓸꓼ ꓗꓪ 1% ꓗꓪ ꓛꓲˍ ꓡꓰꓽ ꓗ, ꓛꓲꓽ ꓔꓬ, ꓢꓻ ꓓꓴ ꓖꓶ ꓐ ꓡˍ ꓥꓳ ꓐꓯ ꓕꓯꓽ ꓠꓽ꓾ ꓣꓳ ꓐꓱ ꓶ ꓙꓲꓻ ꓖꓴ ꓙꓳˍ ꓡꓳ ꓟꓽ ꓥ ꓡ꓿

ꓛꓳ ꓫꓱꓽ ꓚꓱ, ꓕꓱ (10) ꓚꓱ, ꓠꓬ ꓮ ꓡꓲ ꓫꓵꓽ ꓥ ꓡ꓿

• ꓬꓲꓻ ꓙꓬ ꓮ ꓟꓬ, ꓓꓳꓻ ꓖꓶ꓾

ꓖꓳ ꓓꓱꓽ ꓠꓬ ꓬꓲ ꓟꓬꓱꓽ ꓬꓰ ꓚꓱ, ꓔꓯ ꓮ ꓘꓶ. ꓙꓲꓻˍ ꓟ ꓕꓲ ꓒꓳ, ꓗꓪ ꓐꓰ ꓣꓱꓽ ꓬꓰ ꓐ ꓡ ꓝꓲ ꓠ, ꓟ ꓐꓱ ꓶ ꓬꓲꓻ ꓙꓬ ꓮ ꓟꓬ, ꓓꓳꓻ ꓖꓶ ꓠꓯ, ꓟ ꓥ ꓡꓳ꓿ ꓖꓳ ꓓꓱꓽ ꓠꓯꓸꓼ ꓗꓪ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓗꓷ ꓢꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓳꓫꓬꓖꓰꓠ ꓐꓰ ꓜꓽ ꓓꓴ ꓗꓪ ꓐꓰ ꓟꓶˍ ꓟ ꓬꓲ ꓢꓯꓼ ꓐꓴ ꓔꓯ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓖꓶ ꓐ ꓡ ꓠ, ꓟ ꓥ ꓡꓳ꓿ ꓧꓪꓽ ꓗꓴ, ꓙꓲ ꓙꓴ ꓡꓰˍ ꓟ ꓔꓯ ꓗꓽ ꓕ. ꓙ ꓖꓶˍ ꓟˍ ꓡꓰ ꓐꓰ꓾ ꓦꓰꓼ ꓟ ꓙꓲꓺ ꓢꓻ ꓝꓲ꓾ ꓤꓲꓽ ꓫꓵ ꓫꓵˍ ꓝꓲ ꓐ ꓡˍ ꓡꓳ꓿

• ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲ꓾

ꓮ ꓘꓶ. ꓒ. ꓢꓺ ꓡꓰ ꓟ(ꓘꓪꓽ ꓟꓬꓽ ꓙꓲ ꓡꓰ ꓟ)꓾ ꓢꓰ,‐ꓛꓬꓳ ꓐꓰ ꓠꓻ ꓓꓽ ꓟ꓾ ꓕꓱ ꓡꓱ ꓫꓵꓽ ꓟꓽ ꓙꓳ ꓙꓳ꓾ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓠ, ꓟ ꓐꓱ ꓶ ꓠꓬ꓾ ꓬꓲꓼ ꓔ . ꓬꓲ ꓟꓶ ꓙꓵ, ꓡꓳꓼ ꓠ ꓗ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓕꓲ ꓣꓳ ꓠꓬ ꓕꓲ ꓦꓬꓼ ꓗꓪ ꓬꓲꓼ ꓔ ꓬꓲꓼ ꓟꓶ ꓙꓵ, ꓠꓬ 8 ꓙꓵ, ꓗꓪ ꓐꓰ 6 ꓙꓵ, ꓗꓪ ꓛꓲ ꓙꓳ ꓠ ꓔ ꓡꓳ꓿

• ꓙ ꓖꓴ ꓫꓱꓽ ꓖꓶ꓾

ꓙ ꓖꓴ ꓫꓱꓽ ꓖꓶˍ ꓟ ꓠꓬ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓐꓱ ꓶ ꓬꓰ ꓙ ꓔꓳ, ꓙ ꓖꓶˍ ꓟ ꓕꓲ ꓙꓰꓽ ꓥ ꓡꓳ꓿ ꓙ ꓖꓴ ꓫꓱꓽˍ ꓟ ꓗꓪ ꓐꓰ ꓖꓳ ꓓꓱꓽ ꓠꓯꓸꓼ ꓗꓪ ꓫꓵꓽ ꓬꓲꓻ ꓚꓳˍ ꓟ ꓟꓬꓱꓽ ꓗꓪ ꓢꓻ ꓡꓰ ꓝꓲ ꓢꓲ ꓠꓬꓲ꓾ ꓖꓳ ꓓꓱꓽ ꓔꓯ ꓔꓬ, ꓢꓻ ꓝꓲˍ ꓟ ꓥ ꓡꓳ꓿

• ꓢꓲ ꓡꓰ ꓐꓰ ꓠꓬꓲ ꓠ. ꓖꓶ꓾

ꓕꓱ ꓕꓲ ꓚꓱ, ꓟ ꓠꓬ ꓐꓴ‐ꓓ ꓙꓵꓻ ꓠꓲ, ꓚꓱ, ꓗꓪ ꓬꓰ ꓔꓬ ꓟ ꓚꓱ, ꓥ ꓡꓳ꓿ ꓣꓳ ꓪꓴ‐ꓢ ꓦ ꓡꓱ ꓢꓴ ꓐꓴ ꓠꓬ ꓖꓳ ꓡꓱ ꓬꓰ ꓟꓽ ꓓꓻ ꓐꓰ ꓐꓯ ꓢꓴˍ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓢꓲ ꓡꓲ ꓐꓰ ꓠꓬꓲ ꓠ. ꓟ꓾ ꓮ ꓫꓵꓽˍ ꓟꓲ ꓟꓽ ꓬꓰ ꓬꓰ ꓮ ꓫꓵꓽ ꓔꓯ ꓥ ꓟꓲ ꓟꓽ ꓓꓵꓽ ꓙꓽ ꓙꓽ ꓕꓲ ꓑ, ꓤ ꓟꓬ ꓢꓶꓽ ꓑꓲ. ꓔ ꓢꓲ ꓠꓬꓲ꓾ ꓠꓬ, ꓤ ꓟꓶ ꓔꓬ ꓟ ꓬꓲ ꓢꓯꓼ ꓔꓯ ꓠ ꓠ, ꓟ꓾ ꓫꓵꓽ ꓫꓵꓽ ꓚꓳꓻ ꓔꓯ ꓟ ꓢꓯꓼ ꓔꓯ ꓠ ꓠ, ꓖꓶˍ ꓟ꓾ ꓟꓴꓽ ꓖꓪ ꓢꓯꓼ ꓔꓯ, ꓮ ꓤ, ꓤ, ꓒꓴ ꓔ ꓢꓲ ꓠꓬꓲ ꓠ ꓠ, ꓟ ꓕꓱ ꓟ ꓠꓬ꓾ ꓠꓲ, ꓟ ꓔꓯ ꓢꓲ ꓡꓲ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪˍ ꓟ ꓥ ꓡꓳ꓿

ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓠꓲ, ꓟ ꓢꓲ ꓡꓲ ꓡꓰ ꓢꓲ ꓠꓬꓲ ꓬꓲꓼ ꓟꓶ ꓢꓻ ꓝꓲˍ ꓟ ꓑꓶ. ꓓꓴ ꓗ, ꓛꓲꓽ ꓔꓬ, ꓢꓻˍ ꓟ ꓤꓶꓻ ꓔꓯ ꓟꓶ ꓠꓲ, ꓫꓵ ꓢꓴ ꓠꓬ ꓕꓲ ꓠꓽ ꓗꓪ (3) ꓧꓪ, ꓛꓲ ꓢꓲ ꓡꓲ ꓡꓲˍ ꓐꓰ ꓠꓬꓲ ꓠ. ꓖꓶ ꓠ ꓗ, ꓡꓳ꓾ ꓐꓰ ꓢꓷ. ꓪ ꓡꓳ꓿

• ꓚꓵ. ꓬꓲ ꓓꓳ ꓠ ꓛꓲ ꓡꓵꓻ ꓡꓯꓼ ꓡꓵꓻ ꓖꓶ꓾

ꓕꓲꓽ ꓠꓬꓲ ꓗꓪ 10 ꓟꓲ‐ꓠꓲ ꓛꓲ ꓛꓲ ꓡꓯꓻ ꓡꓯꓼ ꓡꓵꓻ ꓖꓶˍ ꓟ ꓠꓬ꓾ ꓖꓳ ꓓꓱꓽ ꓗꓪ ꓢꓯꓼ ꓙꓳ ꓡ ꓝꓲ ꓢꓲ ꓠꓬꓲ꓾ ꓠꓲ, ꓟ ꓐꓰ ꓖꓳ ꓓꓱꓽ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓿ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓚꓵ. ꓬꓲꓻ ꓮ ꓟꓬ, ꓓꓳ ꓙꓰ ꓢꓲ ꓠꓬꓲ꓾ ꓖꓳ ꓓꓱꓽ ꓠꓯꓸꓼ ꓗꓪ ꓙꓳˍ ꓟ ꓬꓲ ꓓꓳꓼ ꓐꓴ ꓔꓯ ꓚꓵ. ꓬꓲꓻ ꓐꓰ ꓕꓲ ꓛꓳˍ ꓓꓳ ꓙꓰ ꓝꓲˍ ꓟ ꓥ ꓡꓳ꓿

• ꓢꓲ, ꓢꓶꓽ ꓡꓳ ꓢꓶꓽ ꓟꓬꓽ ꓠꓬꓲ ꓜꓽ ꓖꓶ꓾

ꓢꓲ, ꓢꓶꓽ ꓐꓴ ꓗꓪ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡ ꓢꓯꓼ ꓟꓬꓽ ꓠꓬꓲ ꓓꓯ,ˍ ꓟ ꓑꓶ. ꓓꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲ, ꓢꓶꓽ ꓜꓽ ꓠ ꓔ ꓡꓳ꓿ ꓢꓲ, ꓢꓶꓽ ꓐꓯ ꓗꓷ ꓕꓯ ꓬꓲ ꓒꓵꓽ ꓮ ꓟꓬ, ꓖꓶ ꓢꓲ ꓪꓴ ꓪˍ ꓢꓲ, ꓢꓶꓽ ꓔꓯ ꓡꓰꓽ ꓐꓯˍ ꓟ ꓟꓽ ꓥ꓾ ꓣꓳ ꓗꓳ ꓡꓳ ꓗꓪ ꓙꓳˍ ꓟ꓾ ꓣꓳ ꓪꓳꓽ ꓐꓱ ꓗꓪ ꓙꓳˍ ꓟ ꓢꓲ, ꓢꓶꓽ ꓐꓴ ꓗꓪ ꓐꓰ ꓥˍ ꓟꓲ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡ ꓢꓯꓼ ꓮ ꓟꓬ, ꓟꓶˍ ꓐ ꓡˍ ꓟ ꓥ ꓡꓳ꓿

• ꓬꓲ ꓛꓵꓻ ꓔꓯ ꓮ ꓟꓬ, ꓕꓽ ꓜꓽ꓾

ꓬꓲ ꓛꓵꓻ ꓜꓽ ꓟꓬꓽ ꓡꓰ ꓕꓯ ꓠꓬ ꓖꓳ ꓓꓱꓽ ꓗꓪ ꓔꓬ, ꓟꓽ ꓢꓻ ꓓꓴ ꓚꓱ, ꓮ ꓟꓬ, ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿ ꓬꓲ ꓓꓻ ꓬꓲ ꓛꓵˍ ꓟ ꓟꓽ ꓥ ꓥ ꓐꓰ꓾ ꓞꓼ ꓛꓵꓻ ꓞꓼ ꓐꓳ ꓐꓬꓽ ꓮ ꓟꓬ, ꓧꓳꓽ ꓔ ꓟ ꓜꓽ ꓓꓴ ꓔꓯ ꓮ ꓟꓬ, ꓜꓽ ꓪ ꓡꓰ ꓕꓯ꓾ ꓖꓳ ꓓꓱꓽ ꓗꓪ ꓠꓻ ꓮ ꓟꓬ, ꓒꓬꓱꓼ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓔꓬ, ꓢꓻˍ ꓟ ꓤꓶꓻ ꓔꓯ ꓟꓶ ꓠꓲ, ꓫꓵˍ ꓠꓬ ꓬꓲ ꓛꓵꓻ ꓮ ꓟꓬ, ꓓꓵˍ ꓜꓽ ꓓꓴ ꓜꓽˍ ꓟ ꓔꓯ ꓤ ꓟꓳ ꓠ ꓔ ꓟ ꓥ ꓡꓳ꓿

• ꓫꓬ, ꓔ ꓟ ꓜꓽ ꓓꓴ ꓔꓯ ꓤ ꓟꓳ꓾

ꓬꓲ ꓔꓱ, ꓬꓲ ꓙꓳˍ ꓟ꓾ ꓬꓲ ꓓ ꓬꓲ ꓙꓳˍ ꓟ ꓟꓽ ꓥ ꓥ꓾ ꓞꓳ ꓤ ꓡꓰ ꓫꓬ, ꓔ ꓟ ꓜꓽ ꓓꓴ ꓐꓴ ꓠꓬ ꓞꓼ ꓐꓳ ꓢꓯꓼ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓫꓵꓽ ꓓꓯꓻ ꓠꓻ ꓐꓰ ꓠꓲ, ꓟ ꓠꓻ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿ ꓜꓽ ꓓꓴ ꓕꓱ ꓟ ꓗꓪ ꓬꓲ ꓦꓬꓼ ꓠꓬꓲ ꓟꓶ ꓤ ꓗꓪ ꓛꓲ ꓫ ꓔ ꓐ ꓡˍ ꓟ ꓠꓯ ꓞꓲꓼ ꓕꓲ ꓙꓰꓽ ꓧꓳꓽ ꓔ ꓟ ꓑꓶ. ꓓꓴ ꓣꓳ ꓔꓯ ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿

• ꓛꓵꓼ ꓡꓵ ꓐꓰ ꓙꓲꓻ ꓒꓶꓽ ꓔꓯ ꓠꓽ ꓗꓷ

ꓛꓵꓼ ꓡꓵ ꓐꓰ ꓙꓲꓻ ꓒꓶꓽ ꓠꓬ ꓞꓳ ꓤ ꓐꓱ ꓶ ꓮ ꓫꓵꓽ ꓙꓲꓻ ꓖꓴˍ ꓟꓲ ꓟꓽ ꓙꓳ ꓟ ꓪꓴ. ꓠꓬꓲ꓾ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓗ, ꓛꓲꓽˍ ꓟ ꓤꓶꓻ ꓔꓯ ꓟꓶ ꓠꓲ, ꓫꓵˍ ꓕꓯ ꓠꓽ꓾ ꓛꓵꓼ ꓡꓵ ꓛꓵꓼˍ ꓟ ꓐꓰ ꓙꓲꓻ ꓒꓶꓽ ꓓꓳꓻˍ ꓟ ꓗꓪ ꓐꓰ ꓠꓽ ꓗꓷ ꓠ ꓔ ꓡꓳ꓿

• ꓚꓮꓝꓰ ꓔꓯ ꓥˍ ꓟꓲ ꓮ ꓟꓬ, ꓕꓽ ꓜꓽ ꓓꓳ ꓪ ꓡꓰ ꓝꓲ꓾

ꓚꓳꓝꓝꓰꓰ ꓓꓳꓻˍ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻˍ ꓡꓳ ꓐꓯˍ ꓥ ꓟꓲ ꓓꓳꓻ ꓟꓬꓽ ꓡꓰ ꓕꓯ ꓠꓽ ꓣꓳ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓚꓳꓝꓝꓰꓰ ꓐꓰ꓾ ꓚꓮꓝꓰ ꓢꓯꓼ ꓙꓳˍ ꓟ ꓓꓳꓻ ꓓꓴ꓾ ꓡꓽ ꓚꓬ. (ꓛꓽ ꓬꓰ,) ꓐꓰ ꓠꓱ. ꓐꓯ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯ ꓮꓽ ꓟꓬ, ꓕꓽ ꓜꓽ꓿ ꓕꓱ (10) ꓚꓱ, ꓔꓯ ꓛꓳ ꓫꓱꓽ ꓢꓲ ꓠꓬꓲ ꓗ, ꓛꓲꓽ ꓔꓬ, ꓢꓻ ꓟ ꓤꓶꓻ ꓔꓯ ꓘꓳ ꓣꓴ ꓟꓶ ꓡꓰ ꓝꓲ꓿ ꓮ ꓙꓵꓽ ꓢꓴ ꓧꓪ. ꓧꓪꓸꓼ ꓔꓬ,꓿

https://youtu.be/2_pVUVdVNKw