ꓟꓬꓱꓽ ꓬꓰˍ ꓟ ꓐꓰ ꓢꓯꓼ ꓕꓵꓼ ꓟ ꓚꓱꓹ ꓪꓽˍ ꓥ ꓟꓲ ꓢꓴ ꓕꓯꓽ ꓢꓲ ꓟꓬꓽ ꓠꓬꓲ ꓧꓪꓸ ꓝꓲ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳˍ ꓡ? ꓟꓲ ꓠꓯ ꓗꓪ ꓞꓳ ꓤ ꓮ ꓙꓵꓽ ꓪꓽ ꓡ ꓐꓯ ꓥ ꓟꓲ ꓞꓳ ꓤ ꓐꓴ ꓕꓯꓽ ꓢꓲ ꓟꓬꓽ ꓠꓬꓲ ꓬꓲ ꓒꓵꓽ ꓙꓳ ꓢꓴ ꓒꓬꓱꓼ ꓝꓲ ꓠꓲꓹ ꓫꓵˍ ꓡ? ꓣꓳ ꓔꓯ ꓟꓽ ꓙꓲꓻ ꓐꓯ ꓡ ꓢꓴ ꓐꓴ ꓮ ꓙꓵꓽ ꓐꓰ꓾ ꓫꓸ ꓓꓴ ꓟꓬ ꓓꓴ ꓔꓯ ꓬꓲ ꓚꓱꓹ ꓙꓳ ꓙꓳ ꓒꓳꓹ ꓖꓶ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳˍ ꓡ? ꓖꓳ ꓡꓱ ꓠꓲꓹ ꓟ ꓙꓳˍ ꓐꓭ ꓠꓬ ꓕꓳ ꓶ ꓵ ꓡꓯ=
ꓕꓳ ꓶ ꓗꓪ ꓠꓬ ꓙꓲˍ ꓟ ꓬꓲ ꓚꓱꓹ ꓙꓳˍ ꓡꓳ= ꓔꓳꓹ ꓜꓳꓽ ꓠꓬꓲˍ ꓟ ꓬꓲ ꓚꓱꓹ ꓙꓳˍ ꓡꓳ= ꓠꓲꓹ ꓟ ꓢꓻ ꓡꓰ ꓝꓲ ꓠ, ꓟ ꓢꓷꓸ ꓡꓰ ꓓꓴ ꓮ ꓟꓬꓹ ꓙꓳˍ ꓡꓳ= ꓣꓳ ꓗꓹ ꓛꓲꓽ ꓓꓴ ꓔꓯ ꓧꓪ ꓟꓶ ꓠꓹ ꓟ ꓕꓳꓽ ꓶ ꓵ ꓡꓯ= ꓥꓳꓽ ꓡꓰˍ ꓟ ꓗꓪ ꓐꓰ ꓢꓷꓸ ꓡꓰ ꓓꓴ ꓣꓴ ꓢꓲ꓾ ꓡ ꓠꓹ ꓟ ꓣꓳ ꓤꓶꓻ ꓐꓱ ꓶ ꓙꓲˍ ꓟ ꓒꓬꓱꓼ ꓡ ꓠꓹ ꓟ ꓕꓳ ꓶ ꓵ ꓡꓯ= ꓮꓽ ꓟ ꓥ ꓟꓲ ꓣꓳ ꓒ ꓕꓲ ꓗꓪ ꓟꓽ ꓔꓬ ꓡ ꓐꓯ ꓡꓰ꓾ ꓕꓲ ꓣꓳˍ ꓡꓰꓽ ꓔꓬ ꓐ ꓡ ꓠꓹ ꓟ ꓐꓱ ꓶ ꓕꓳ ꓶ ꓵ ꓡꓯ= ꓠꓲꓹ ꓟ ꓡꓳꓸ ꓐꓲ ꓡ ꓠꓹ ꓟ ꓐꓱ ꓶ ꓕꓳ ꓶ ꓵ ꓡꓯ=
ꓫꓱꓸ ꓤˍ ꓟ ꓠꓲꓹ ꓟ ꓙꓳ ꓡ ꓠꓹ ꓟ ꓐꓱ ꓶ ꓕꓳ ꓶ ꓵ ꓡꓯ= ꓢꓴ ꓡꓰ ꓣꓳ ꓔꓯ ꓠꓲꓹ ꓜꓳ ꓡ ꓐꓯ ꓡꓰ ꓪꓽ ꓢꓱ ꓐ ꓠꓲ ꓔꓬ ꓐ ꓡ ꓠꓹ ꓟ ꓢꓯꓼ ꓕꓵꓼ ꓡꓯ= ꓢꓴ ꓣꓳ ꓔꓯ ꓟꓽ ꓠꓲꓹ ꓠꓵ ꓡ ꓐꓯ ꓡꓰ꓾ ꓣꓳ ꓚꓲ. ꓛꓬ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓡꓯ= ꓢꓴ ꓟꓽ ꓙꓲꓻ ꓡ ꓐꓯ ꓡꓰ꓾ ꓣꓳ ꓙꓲꓻ ꓠꓹ ꓟ ꓢꓯꓼ ꓕꓵꓼ ꓡꓯ= ꓮ ꓕꓯ ꓥ ꓟꓲ ꓕꓳ ꓶ ꓵ꓿ ꓕꓳ ꓶ ꓵˍ ꓟ ꓗꓪ ꓐꓰ ꓣꓳ ꓪꓴꓸ ꓠꓶꓸ ꓠꓲꓹ ꓟ ꓮ ꓙꓵꓽ ꓔꓯ ꓢꓷꓸ ꓠꓲꓹ ꓬꓲ ꓫꓵꓼ ꓖꓶ ꓡ ꓡꓳ= ꓕꓲ ꓘꓶꓽ ꓵ ꓐ ꓡ ꓕꓲ ꓘꓶꓽ ꓵ꓿ ꓕꓲ ꓠꓬꓲ ꓠꓬ ꓢꓴ ꓕꓯꓽ ꓢꓲ ꓓꓻ ꓢꓴ ꓒꓬꓱꓼ ꓡ ꓢꓲ꓾ ꓠꓲꓹ ꓟ ꓥ ꓟꓲ ꓡꓳꓸ ꓐꓲꓻ ꓡˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓤꓶꓻ ꓗꓪ ꓞꓳꓸ ꓡꓰ ꓢꓴ ꓕꓽ ꓗꓷ ꓡꓰ ꓝꓲ꓾ ꓠꓲꓹ ꓟ ꓡꓳꓸ ꓐꓲꓻ ꓠꓹ ꓟ ꓕꓳ ꓶ ꓔꓯ ꓮ ꓕꓯ ꓥ ꓟꓲ ꓵ ꓪ ꓡꓰ ꓝꓲ=
